ವಿಶ್ವರೂಪಂ 2 : ದರ್ಶನ ಸನ್ನಿಹಿತ
‘ಉಲಗ ನಾಯಕನ್’ ಕಮಲ್ ಹಾಸನ್ರ ಬಹುನಿರೀಕ್ಷಿತ ಚಿತ್ರ ವಿಶ್ವರೂಪಂ 2 ಅಂತೂ ಶೀಘ್ರದಲ್ಲೇ ಬಿಡುಗಡೆಯ ಭಾಗ್ಯವನ್ನು ಕಾಣಲಿದೆ. ಕಮಲ್ ಸ್ವತಃ ಚಿತ್ರಕಥೆ ಬರೆದು, ನಿರ್ದೇಶಿಸಿರುವ ಮತ್ತು ಸಹನಿರ್ಮಾಪಕರಾಗಿರುವ ಈ ಚಿತ್ರ ಮುಂದಿನ ಒಂದೆರಡು ತಿಂಗಳಲ್ಲಿ ತೆರೆಕಾಣಲಿರುವುದು ಖಚಿತವಾಗಿದೆ. ಅಪ್ಪಟ ಸ್ಪೈ ಥ್ರಿಲ್ಲರ್ ಕತೆಯಿರುವ ಈ ಚಿತ್ರವನ್ನು ಕಾತರದಿಂದ ಕಾಯುತ್ತಿರುವ ಸಿನೆಮಾರಸಿಕರಿಗೆ ಮನವನ್ನು ತಣಿಸಲಿದೆಯೆಂದು ಚಿತ್ರತಂಡ ಹೇಳಿಕೊಂಡಿದೆ. ವಿಶ್ವರೂಪಂ2, ಮೊದಲ ಭಾಗಕ್ಕಿಂತಲೂ ರೋಮಾಂಕಾರಿಯಾಗಿದೆ ಹಾಗೂ ಅದ್ಭುತವಾದ ದಶ್ಯಾನುಭವ ನೀಡುವುದರಲ್ಲಿ ಸಂದೇಹವಿಲ್ಲವೆಂದು ಸ್ವತಃ ಕಮಲ್, ಫೇಸ್ಬುಕ್ನಲ್ಲಿ ಹೇಳಿಕೊಂಡಿದ್ದಾರೆ.
ಹಾಗೆ ನೋಡಿದರೆ ವಿಶ್ವರೂಪಂ ಬಹಳ ಹಿಂದೆಯೇ ಬಿಡುಗಡೆಯಾಗಬೇಕಿತ್ತು. ಆದರೆ ನಿರ್ಮಾಣವೆಚ್ಚ ಸೇರಿದಂತೆ ಹಲವಾರು ತೊಡಕುಗಳನ್ನು ಎದುರಿಸಿದ್ದರಿಂದ ಚಿತ್ರದ ನಿರ್ಮಾಣ ಆಮೆಗತಿಯಲ್ಲಿ ಸಾಗಿತ್ತು. ಇದೀಗ ಈ ಎಲ್ಲಾ ಸಮಸ್ಯೆಗಳು ಬಗೆಹರಿದಿದ್ದು, ವಿಶ್ವರೂಪಂ2 ಬಿಡುಗಡೆಗೆ ರೆಡಿಯಾಗಿದೆ.
ತಮಿಳು ಹಾಗೂ ಹಿಂದಿ ಭಾಷೆಗಳಲ್ಲಿ ತಯಾರಾಗಿರುವ ಈ ಚಿತ್ರದ ಟ್ರೇಲರ್ ಸದ್ಯದಲ್ಲೇ ಬಿಡುಗಡೆಯಾಗಲಿದೆ. ಹೆಚ್ಚುಕಮ್ಮಿ ವಿಶ್ವರೂಪಂನ ಮೊದಲ ಭಾಗದಲ್ಲಿ ನಟಿಸಿದ್ದ ಪ್ರಮುಖ ತಾರೆಯರು ಎರಡನೆ ಭಾಗದಲ್ಲೂ ಕಾಣಿಸಿಕೊಳ್ಳುತ್ತಿದ್ದಾರೆ. ಕಮಲ್ಜೊತೆಗೆ ಪೂಜಾಕುಮಾರ್, ಆ್ಯಂಡ್ರಿಯಾ,ಶೇಖರ್ ಕಪೂರ್ ಹಾಗೂ ರಾಹುಲ್ ಬೋಸ್ ಮುಖ್ಯಪಾತ್ರಗಳಲ್ಲಿ ನಟಿಸಿರುವ ಈ ಚಿತ್ರವನ್ನು ಆಸ್ಕರ್ ರವಿಚಂದ್ರನ್ ನಿರ್ಮಿಸಿದ್ದಾರೆ. ವಿಶ್ವರೂಪಂ2ಗೆ ಸ್ವತಃ ಕಮಲ್ ಹಾಸನ್ ಆ್ಯಕ್ಷನ್ ಕಟ್ ಹೇಳಿದ್ದಾರೆ. ಈ ಮಧ್ಯೆ ರಜನಿ ಅಭಿನಯದ ಯಂದಿರನ್ 2.0 ಎಪ್ರಿಲ್ನಲ್ಲಿ ರಿಲೀಸ್ ಆಗಲಿರುವುದರಿಂದ ಬಾಕ್ಸ್ಆಫೀಸ್ ಸಮರವನ್ನು ತಪ್ಪಿಸುವುದಕ್ಕಾಗಿ ವಿಶ್ವರೂಪಂ2, ಅದಕ್ಕಿಂತ ಮುಂಚಿತವಾಗಿಯೇ ಬಿಡುಗಡೆಗೊಳ್ಳುವ ಸಾಧ್ಯತೆಯಿದೆಯಂತೆ. ಹಾಗಾದರೆ ವಿಶ್ವರೂಪಂ2, ಮೊದಲ ಭಾಗಕ್ಕಿಂತಲೂ ಅದ್ಭುತವಾಗಿ ಮೂಡಿಬಂದಿದೆಯೇ ಎಂಬುದನ್ನು ತಿಳಿಯಲು ಹೆಚ್ಚು ಸಮಯ ಕಾಯುವ ಅಗತ್ಯವಿಲ್ಲ ಎಂದಾಯಿತು.
