ಮೋದಿ ಕ್ರಾಂತಿಪುರುಷ : ನೆತನ್ಯಾಹು ಶ್ಲಾಘನೆ
ಹೊಸದಿಲ್ಲಿ, ಜ.15: ಇಸ್ರೇಲ್ಗೆ ಭೇಟಿ ನೀಡಿರುವ ಪ್ರಥಮ ಭಾರತೀಯ ಪ್ರಧಾನಿಯಾಗಿರುವ ನರೇಂದ್ರ ಮೋದಿ ನಿಜವಾಗಿಯೂ ಓರ್ವ ಕ್ರಾಂತಿಪುರುಷ ಎಂದು ಇಸ್ರೇಲ್ ಪ್ರಧಾನಿ ಬೆಂಜಮಿನ್ ನೆತನ್ಯಾಹು ಬಣ್ಣಿಸಿದ್ದಾರೆ.
ಭಾರತಕ್ಕೆ ಭೇಟಿ ನೀಡಿರುವ ನೆತನ್ಯಾಹು ದಿಲ್ಲಿಯಲ್ಲಿ ಪ್ರಧಾನಿ ನರೇಂದ್ರ ಮೋದಿಯವರನ್ನು ಭೇಟಿಯಾಗಿ ದ್ವಿಪಕ್ಷೀಯ ಮಾತುಕತೆ ನಡೆಸಿದರು. ಉಭಯ ನಾಯಕರ ಸಮ್ಮುಖದಲ್ಲಿ ಎರಡೂ ರಾಷ್ಟ್ರಗಳ ನಡುವೆ 9 ಸಹಕಾರ ಒಪ್ಪಂದಕ್ಕೆ ಸಹಿ ಹಾಕಲಾಯಿತು.
ಬಳಿಕ ನಡೆದ ಜಂಟಿ ಸುದ್ದಿಗೋಷ್ಟಿಯಲ್ಲಿ ಮೋದಿ ಇಸ್ರೇಲ್ ಪ್ರಧಾನಿಯನ್ನು ‘ನನ್ನ ಸ್ನೇಹಿತ ಬಿಬಿ’ ಎಂದು ಪರಿಚಯಿಸಿದರೆ, ನೆತನ್ಯಾಹು ಭಾರತದ ಪ್ರಧಾನಿಯನ್ನು ‘ನರೇಂದ್ರ’ ಎಂದು ಉಲ್ಲೇಖಿಸಿ ತಮ್ಮಿಬ್ಬರ ನಡುವಿನ ಗಾಢಸ್ನೇಹದ ಪರಿಚಯ ಮಾಡಿಕೊಟ್ಟರು.
ಭಾರತದಲ್ಲಿ ಈಗಿರುವ ಉದಾರ ಎಫ್ಡಿಐ (ವಿದೇಶಿ ನೇರ ಬಂಡವಾಳ) ವ್ಯವಸ್ಥೆಯ ಲಾಭ ಪಡೆದು ಭಾರತದಲ್ಲಿ ಹೆಚ್ಚಿನ ಉತ್ಪಾದನೆ ನಡೆಸುವಂತೆ ಪ್ರಧಾನಿ ಮೋದಿ ಇಸ್ರೇಲ್ ಕಂಪೆನಿಗಳಿಗೆ ಆಹ್ವಾನ ನೀಡಿದರು. ಮಾತುಕತೆ ಸಂದರ್ಭ ಭಾರತ-ಇಸ್ರೇಲ್ ಸಂಬಂಧದಲ್ಲಿ ಆಗಿರುವ ಮುನ್ನಡೆಯ ಅವಲೋಕನ ನಡೆಸಲಾಯಿತು ಎಂದು ಪ್ರಧಾನಿ ಮೋದಿ ತಿಳಿಸಿದರು.
“ನಿರೀಕ್ಷಿತ ಫಲಿತಾಂಶ ಲಭ್ಯವಾಗದಿದ್ದರೆ ನಾನು ತಾಳ್ಮೆ ಕಳೆದುಕೊಳ್ಳುತ್ತೇನೆ ಎಂದು ಹೇಳುತ್ತಾರೆ. ನೀವು ಕೂಡಾ ಇದೇ ರೀತಿಯ ವ್ಯಕ್ತಿ ಎಂಬುದು ಎಲ್ಲರಿಗೂ ತಿಳಿದಿದೆ. ಆಡಳಿತ ವ್ಯವಸ್ಥೆಯಲ್ಲಿ ಭ್ರಷ್ಟಾಚಾರ ನಿರ್ಮೂಲನೆಗೆ ನೀವು ಪಣತೊಟ್ಟಿದ್ದೀರಿ. ಇದೇ ರೀತಿ ಭಾರತದಲ್ಲಿ ನಾವು ಕಾರ್ಯಪ್ರವೃತ್ತರಾಗಿದ್ದೇವೆ” ಎಂದು ಇಸ್ರೇಲ್ ಪ್ರಧಾನಿಯನ್ನುದ್ದೇಶಿಸಿ ಮೋದಿ ಹೇಳಿದರು.
“ಸಿನೆಮಾ ನಿರ್ಮಾಣದ ಕುರಿತು ಮಾಡಿಕೊಳ್ಳಲಾದ ಒಪ್ಪಂದದಿಂದ ರೋಮಾಂಚನಗೊಂಡಿದ್ದೇನೆ. ಬಾಲಿವುಡ್ಗೆ ನಾವು ಹೋಗುತ್ತೇವೆ ಎಂಬ ಕಾರಣದಿಂದ ನನ್ನ ಪತ್ನಿ ಮತ್ತು ನಾನು ಬಹಳ ಖುಷಿಯಾಗಿದ್ದೇವೆ” ಎಂದು ನೆತನ್ಯಾಹು ಹೇಳಿದರು. ತಂತ್ರಜ್ಞಾನ ಕ್ಷೇತ್ರದಲ್ಲಿ ಭಾರತ-ಇಸ್ರೇಲ್ ಮಧ್ಯೆ ಮಾಡಿಕೊಳ್ಳಲಾದ ಒಪ್ಪಂದವನ್ನು ಉಲ್ಲೇಖಿಸಿದ ನೆತನ್ಯಾಹು, ಇಸ್ರೇಲ್ ಹೊಸಶೋಧದಲ್ಲಿ ಸದಾ ಮುಂದಿದ್ದರೆ ಭಾರತವು ಅಗಾಧ ಪ್ರತಿಭೆಗಳನ್ನು ಹೊಂದಿದೆ . ಇಸ್ರೇಲ್ನಲ್ಲಿ ನಾವು ಕಡಿಮೆ ಬಳಕೆಯಿಂದ ಹೆಚ್ಚಿನ ಸಾಧನೆ, ಕಡಿಮೆ ನೀರಿನಿಂದ ಹೆಚ್ಚಿನ ಬೆಳೆ, ಕಡಿಮೆ ಹಣದಿಂದ ಹೆಚ್ಚಿನ ವಿದ್ಯುಚ್ಛಕ್ತಿ ಉತ್ಪಾದಿಸುತ್ತೇವೆ ಎಂದು ಹೇಳಿದರು.
ಮೋದಿಯೊಂದಿಗೆ ಯೋಗಾಭ್ಯಾಸ ನಡೆಸುವ ಆಸಕ್ತಿ ವ್ಯಕ್ತಪಡಿಸಿದ ನೆತನ್ಯಾಹು, “ನನ್ನೊಂದಿಗೆ ಯೋಗ ತರಗತಿ ನಡೆಸಬೇಕೆಂದಾಗ ಹೇಳಿ. ಖಂಡಿತಾ ಆಗಮಿಸುತ್ತೇನೆ” ಎಂದರು. ಜೆರುಸಲೇಂ ನಗರವನ್ನು ಇಸ್ರೇಲ್ ರಾಜಧಾನಿ ಎಂದು ಘೋಷಿಸುವ ಅಮೆರಿಕದ ಅಧ್ಯಕ್ಷ ಟ್ರಂಪ್ ನಿಲುವನ್ನು ವಿಶ್ವಸಂಸ್ಥೆಯಲ್ಲಿ ಭಾರತ ವಿರೋಧಿಸಿದ ವಿಷಯ ಮಾತುಕತೆಯಲ್ಲಿ ಪ್ರಸ್ತಾಪವಾಗಲಿಲ್ಲ ಎಂದು ಮೂಲಗಳು ತಿಳಿಸಿವೆ.
