ಬಜೆಟ್ನಲ್ಲಿ ಆರೋಗ್ಯ ಕ್ಷೇತ್ರಕ್ಕೆ ಶೇ.11ರಷ್ಟು ಹಣಕಾಸು ಹೆಚ್ಚಿಸಲು ಕೇಂದ್ರದ ಚಿಂತನೆ
ಹೊಸದಿಲ್ಲಿ,ಜ.18: ಮುಂದಿನ ತಿಂಗಳು 1ರಂದು ಮಂಡನೆಯಾಗಲಿರುವ ಬಜೆಟ್ನಲ್ಲಿ ಸಾರ್ವಜನಿಕ ಆರೋಗ್ಯ ವೆಚ್ಚವನ್ನು ಶೇ.11ರಷ್ಟು ಹೆಚ್ಚಿಸಿ ಸುಮಾರು 52,400 ಕೋ.ರೂ.ಗಳಿಗೆ ನಿಗದಿಗೊಳಿಸಲು ಸರಕಾರವು ಉದ್ದೇಶಿಸಿದೆ ಎಂದು ಸರಕಾರಿ ಮೂಲಗಳು ಗುರುವಾರ ತಿಳಿಸಿವೆ. ಈ ಕ್ಷೇತ್ರಕ್ಕೆ ನಿಗದಿತ ಹಣಕಾಸನ್ನು ಶೇ.33ರಷ್ಟು ಹೆಚ್ಚಿಸಬೇಕೆಂಬ ಆರೋಗ್ಯ ಸಚಿವ ಜೆ.ಪಿ.ನಡ್ಡಾ ಅವರ ಬೇಡಿಕೆಯನ್ನು ಸರಕಾರವು ತಿರಸ್ಕರಿಸಿದೆ ಎಂದೂ ಅವು ಹೇಳಿವೆ.
ನಡ್ಡಾ ಅವರು ನ.26ರಂದು ವಿತ್ತ ಸಚಿವರಿಗೆ ಬರೆದಿದ್ದ ಪತ್ರದಲ್ಲಿ 2018-19ನೇ ಸಾಲಿಗೆ ಆರೋಗ್ಯ ಕ್ಷೇತ್ರಕ್ಕೆ ಸುಮಾರು 63,900 ಕೋ.ರೂ.(ಕಳೆದ ವರ್ಷಕ್ಕಿಂತ ಶೇ.33 ಹೆಚ್ಚು) ನೀಡುವಂತೆ ಕೋರಿದ್ದರು.
ಲಸಿಕೆ ನೀಡಿಕೆ ಕಾರ್ಯಕ್ರಮದ ವ್ಯಾಪ್ತಿಯನ್ನು ಮತ್ತು ಉಚಿತ ಔಷಧಿ ವಿತರಣೆಯನ್ನು ಹೆಚ್ಚಿಸಲು ಹಾಗೂ 2016ರಲ್ಲಿ ಭಾರತದಲ್ಲಿ 60 ಲಕ್ಷ ಜನರನ್ನು ಬಲಿ ತೆಗೆದುಕೊಂಡಿರುವ ಕ್ಯಾನ್ಸರ್ ಮತ್ತು ಮಧುಮೇಹದಂತಹ ಸಾಂಕ್ರಾಮಿಕವಲ್ಲದ ರೋಗಗಳ ಹೆಚ್ಚುತ್ತಿರುವ ಬೆದರಿಕೆಯನ್ನು ನಿವಾರಿಸಲು ಹೆಚ್ಚಿನ ಹಣಕಾಸು ಅಗತ್ಯವಿದೆ ಎಂದು ನಡ್ಡಾ ವಾದಿಸಿದ್ದರು. ಪ್ರಧಾನಿ ನರೇಂದ್ರ ಮೋದಿಯವರ ಸರಕಾರವು ಕಳೆದ ವರ್ಷ ಹಾಲಿ ದೇಶದ ಜಿಡಿಪಿಯ ಶೇ.1.5ರಷ್ಟಿರುವ ಸಾರ್ವಜನಿಕ ಆರೋಗ್ಯ ವೆಚ್ಚವನ್ನು 2025ರ ವೇಳೆಗೆ ಶೇ.2.5ಕ್ಕೆ ಹೆಚ್ಚಿಸುವ ಗುರಿಯನ್ನು ನಿಗದಿಗೊಳಿಸಿತ್ತು. ಈಗಿನ ಶೇ.1.5 ವಿಶ್ವದ ಅತ್ಯಂತ ಕಡಿಮೆ ಅನುಪಾತಗಳಲ್ಲೊಂದಾಗಿದೆ. ಆದರೆ ಆರೋಗ್ಯ ಕ್ಷೇತ್ರಕ್ಕೆ ಈ ವರ್ಷದ ಉದ್ದೇಶಿತ ಹಣಕಾಸು ಹಂಚಿಕೆ ಈ ಗುರಿ ಸಾಧನೆಗೆ ಪೂರಕವಾಗಿಲ್ಲ ಎಂದು ಅಧಿಕಾರಿಯೋರ್ವರು ಹೇಳಿದರು.
ಬಜೆಟ್ನ ಅಂತಿಮ ಅಂಕಿಅಂಶಗಳ ಬಗ್ಗೆ ತನಗೆ ಮಾಹಿತಿಯಿಲ್ಲ, ಆದರೆ ಸಾರ್ವಜನಿಕ ಆರೋಗ್ಯ ಕ್ಷೇತ್ರಕ್ಕೆ ಉದ್ದೇಶಿತ 52,400 ಕೋ.ರೂ.ಗಳ ಹಂಚಿಕೆ ಸಾಕಾಗುವುದಿಲ್ಲ ಎಂದು ಪ್ರಧಾನಿಯವರ ಆರ್ಥಿಕ ಸಲಹಾ ಮಂಡಳಿಯ ಸದಸ್ಯೆ ಶಮಿಕಾ ರವಿ ಅಭಿಪ್ರಾಯ ವ್ಯಕ್ತಪಡಿಸಿದರು.
ಆರೋಗ್ಯಕ್ಷೇತ್ರಕ್ಕೆ ವೆಚ್ಚವನ್ನು ಕಡಿಮೆ ಮಾಡಿದರೆ ಅದು ದೀರ್ಘಾವಧಿಯಲ್ಲಿ ಉತ್ಪಾದಕತೆಯನ್ನು ತಗ್ಗಿಸುವ ಮೂಲಕ ದೇಶದ ಜಿಡಿಪಿಯ ಮೇಲೆ ವ್ಯತಿರಿಕ್ತ ಪರಿಣಾಮವನ್ನು ಬೀರುತ್ತದೆ ಎಂದು ಬ್ರೂಕಿಂಗ್ಸ್ ಇಂಡಿಯಾದಲ್ಲಿ ಸಂಶೋಧನಾ ನಿರ್ದೇಶಕಿಯೂ ಆಗಿರುವ ಶಮಿಕಾ ಹೇಳಿದರು. 2025ರ ಜಿಡಿಪಿ ಗುರಿಯನ್ನು ಸಾಧಿಸಲು ಅರೋಗ್ಯ ಕ್ಷೇತ್ರಕ್ಕೆ ಹೆಚ್ಚು ಹಣವನ್ನು ನೀಡುವಂತೆ ಸರಕಾರಕ್ಕೆ ತನ್ನ ಸಲಹೆಯನ್ನು ಮುಂದುವರಿಸುತ್ತೇನೆ ಎದರು.
ಸರಕಾರವು ಕಳೆದ ವರ್ಷ ಸಾರ್ವಜನಿಕ ಆರೋಗ್ಯ ವ್ಯವಸ್ಥೆಯನ್ನು ಪುನರ್ ಪರಿಶೀಲಿಸುವ ತನ್ನ ಪ್ರಯತ್ನಗಳನ್ನು ತೀವ್ರಗೊಳಿಸಿತ್ತು. ಬಡವರಿಗೆ ನೆರವಾಗಲು ಹಲವಾರು ವೈದ್ಯಕೀಯ ಸಾಧನಗಳ ಬೆಲೆಗಳ ಮೇಲೆ ಮಿತಿ ಹೇರಿದ್ದ ಅದು, ಸಾಂಕ್ರಾಮಿಕವಲ್ಲದ ರೋಗಗಳನ್ನು ಪತ್ತೆ ಹಚ್ಚುವ ಕಾರ್ಯಕ್ರಮಗಳಿಗೆ ಇನ್ನಷ್ಟು ಚುರುಕು ನೀಡಿತ್ತು, ಜೊತೆಗೆ ಮುಂಗಡ ಪತ್ರದಲ್ಲಿ ಆರೋಗ್ಯಕ್ಷೇತ್ರಕ್ಕೆ ಹಂಚಿಕೆಯನ್ನು ಶೇ.25ರಷ್ಟು ಹೆಚ್ಚಿಸಿತ್ತು.
ಆದರೆ ನಿಧಾನಗೊಳ್ಳುತ್ತಿರುವ ಆರ್ಥಿಕ ಬೆಳವಣಿಗೆ ಮತ್ತು ಜಿಎಸ್ಟಿಯಡಿ ತೆರಿಗೆ ಸಂಗ್ರಹದಲ್ಲಿ ಹಿಂಜರಿತದಿಂದಾಗಿ ಸರಕಾರದ ಆರ್ಥಿಕ ಸ್ಥಿತಿಯ ಮೇಲೆ ಒತ್ತಡ ವಿರುವುದರಿಂದ 2018-19ನೇ ಸಾಲಿಗೆ ಆರೋಗ್ಯ ಕ್ಷೇತ್ರಕ್ಕೆ ಹಂಚಿಕೆಯನ್ನು ನಿರೀಕ್ಷಿತ ಮಟ್ಟದಲ್ಲಿ ಹೆಚ್ಚಿಸಲು ಸಾಧ್ಯವಾಗುತ್ತಿಲ್ಲ ಎಂದು ಅಧಿಕಾರಿಗಳು ತಿಳಿಸಿದರು.
ಶೇ.11ರಷ್ಟು ಏರಿಕೆಗೂ ಮನವೊಲಿಸಲು ಆರೋಗ್ಯ ಸಚಿವಾಲಯ ಮತ್ತು ವಿತ್ತ ಸಚಿವಾಲಯಗಳ ನಡುವೆ ಹಲವಾರು ಸುತ್ತುಗಳ ಚರ್ಚೆಗಳು ಅಗತ್ಯವಾಗಿದ್ದವು. ಆರೋಗ್ಯಕ್ಷೇತ್ರಕ್ಕೆ ಹಂಚಿಕೆಯನ್ನು ಕೇವಲ ಶೇ.5ರಷ್ಟು ಹೆಚ್ಚಿಸಲು ವಿತ್ತ ಸಚಿವಾಲಯವು ಆರಂಭದಲ್ಲಿ ಉದ್ದೇಶಿಸಿತ್ತು ಎಂದು ಅನಾಮಿಕರಾಗುಳಿಯಲು ಬಯಸಿರುವ ಅಧಿಕಾರಿಗಳು ಹೇಳಿದರು.