ದೇಶದಲ್ಲಿ ಧರ್ಮ ರಾಜಕಾರಣ ನಡೆಯುತ್ತಿದೆ: ಸುಗತ ಶ್ರೀನಿವಾಸರಾಜು

ಬೆಂಗಳೂರು, ಜ.20: ದೇಶದಲ್ಲಿ ಧರ್ಮ, ಜಾತಿ, ದೇಶಪ್ರೇಮ, ಭಾಷೆ, ಪ್ರದೇಶ, ನೀರಿನ ಮೇಲೆ ರಾಜಕೀಯ ಮಾಡುತ್ತಾ ಚುನಾವಣೆಗಳನ್ನು ಎದುರಿಸುತ್ತಿದ್ದಾರೆ. ಯುವಜನರ ಸಮಸ್ಯೆಗಳಾದ ಶಿಕ್ಷಣ, ಉದ್ಯೋಗ, ಬಡತನದ ಪ್ರಶ್ನೆಗಳನ್ನು ಯಾರೂ ಮುಂದಿಡುತ್ತಿಲ್ಲ ಎಂದು ಹಿರಿಯ ಪತ್ರಕರ್ತ ಸುಗತ ಶ್ರೀನಿವಾಸರಾಜು ಬೇಸರ ವ್ಯಕ್ತಪಡಿಸಿದ್ದಾರೆ.

ನಗರದ ಗಾಂಧಿ ಭವನದಲ್ಲಿ ಉದ್ಯೋಗಕ್ಕಾಗಿ ಯುವಜನರು ವೇದಿಕೆ ಹಮ್ಮಿಕೊಂಡಿದ್ದ ವಿಚಾರ ಸಂಕಿರಣದಲ್ಲಿ ‘ಚುನಾವಣೆ ಹಾಗೂ ವಾಸ್ತವ ಅಂಶಗಳು’ ವಿಷಯದ ಕುರಿತು ಮಾತನಾಡಿದ ಅವರು, ಜನರ ಭಾವನೆಗಳು, ಆರ್ಥಿಕತೆ ಹಾಗೂ ನಿಯಂತ್ರಣದ ಸುತ್ತ ಚರ್ಚೆಗಳು ನಡೆಯುತ್ತಿದ್ದು, ಐಡೆಂಟಿಟಿ ರಾಜಕಾರಣ ನಡೆಸಲು ರಾಷ್ಟ್ರೀಯ ಪಕ್ಷಗಳು ಮುಂದಾಗಿವೆ. ಅದಕ್ಕಾಗಿ ಒಂದು ವಿಷಯವನ್ನು ಮಾತ್ರ ಕೇಂದ್ರೀಕರಿಸುತ್ತಿವೆ ಎಂದರು.

ದೇಶದಲ್ಲಿ 1947 ರಿಂದ ಆರಂಭವಾದ ಐಡೆಂಟಿಟಿ ರಾಜಕಾರಣ ಇಂದಿಗೂ ಮುಂದುವರಿದಿದೆ. ಎಲ್ಲಿಯೂ ಸಾಮಾನ್ಯ ಜನರ ಬೇಡಿಕೆಗಳು ಏನು ಅಥವಾ ಯುವ ಸಮುದಾಯದ ಸಮಸ್ಯೆಗಳು ಏನಿವೆ ಎಂಬುದರ ಕುರಿತು ಚರ್ಚೆ ನಡೆದಿಲ್ಲ. ಜನರನ್ನು ಒಂದು ವಿಷಯಕ್ಕೆ ಸೀಮಿತಗೊಳಿಸುತ್ತಿದ್ದಾರೆ. ಈ ವ್ಯವಸ್ಥೆಯನ್ನು ಸರಿಪಡಿಸದಿದ್ದರೆ ಪರ್ಯಾಯ ವ್ಯವಸ್ಥೆಯನ್ನು ನಿರ್ಮಾಣ ಮಾಡಲು ಆಗುವುದಿಲ್ಲ ಎಂದು ನುಡಿದರು.

ರಾಜ್ಯದಲ್ಲಿನ ಚುನಾವಣಾ ಪ್ರಚಾರಕ್ಕೆ ಬಿಜೆಪಿ ಯೋಗಿ ಆದಿತ್ಯನಾಥ್‌ರನ್ನು ಕರೆಸಿ, ಕಾಂಗ್ರೆಸ್ ಜಾತಿ ಆಧಾರಿತ ಚುನಾವಣೆ ಎದುರಿಸಿದರೆ ನಾವು ಧರ್ಮದ ಆಧಾರದಲ್ಲಿ ಎದುರಿಸುತ್ತೇವೆ ಎಂದು ಹೇಳುತ್ತಾರೆ. ಆದರೆ, ಕಾಂಗ್ರೆಸ್ ಕನ್ನಡ ಭಾಷೆ, ಭಾವುಟದ ಹೆಸರಿನಲ್ಲಿ ರಾಜಕೀಯ ಮಾಡಲು ಮುಂದಾಗಿದೆ. ಗುಜರಾತ್ ಚುನಾವಣೆ ಸಂದರ್ಭದಲ್ಲಿ ಅಭಿವೃದ್ಧಿ, ವಿಕಾಸ ಎಲ್ಲವನ್ನೂ ಮರೆಮಾಚಿ ಪಾಕಿಸ್ತಾನ, ಹಿಂದೂ ಹೆಸರಿನಲ್ಲಿ ರಾಜಕೀಯ ಮಾಡಿದರು. ಹೀಗಾಗಿ, ಸಾರ್ವಜನಿಕರು ಐಡೆಂಟಿಟಿ ಪಾಲಿಟಿಕ್ಸ್ ಬಗ್ಗೆ ಎಚ್ಚರ ವಹಿಸಬೇಕು ಎಂದು ಹೇಳಿದರು.

ಭಾರತದಲ್ಲಿಂದು ದೇಶದ ಆರ್ಥಿಕತೆ ಕೇವಲ 5 ಜನ ದೊಡ್ಡ ಬಂಡವಾಳಶಾಹಿಗಳ ಕೈಯಲ್ಲಿದೆ ಎನ್ನುತ್ತಾರೆ. ಎನ್‌ಪಿಎ ವಿಚಾರದಲ್ಲಿ ಇದನ್ನು ನೋಡಬೇಕು, ಅನಿಲ್ ಅಂಬಾನಿಯ ಮರಪಾವತಿಯಾಗದ ಸಾಲ ಎಷ್ಟಿದೆ ಎಂದು ಯಾರು ಪ್ರಶ್ನೆ ಮಾಡುತ್ತಿಲ್ಲ ಹಾಗೂ ನಾನು ಮರುಪಾವತಿಯಾಗದ ಸಾಲಗಳನ್ನು ವಸೂಲಿ ಮಾಡುತ್ತೇನೆ ಎಂದ ಕೂಡಲೇ ಆರ್‌ಬಿಐ ಗರ್ವನರ್ ರಘುರಾಮ್ ರಾಜನ್‌ರನ್ನು ಕೆಲಸದಿಂದ ಕಿತ್ತು ಹಾಕಿದ್ದು ಯಾಕೆ ಎಂದು ಸುಗತ ಪ್ರಶ್ನಿಸಿದರು.

ಸಾರ್ವಜನಿಕ ಆಸ್ತಿಯನ್ನು ಖಾಸಗೀಕರಣ ಮಾಡುವುದು ನಡೆಯುತ್ತಿದೆ. ಯುವಜನರಿಗೆ ಉದ್ಯೋಗ ನೀಡುವಲ್ಲಿ ಎಲ್ಲಾ ಸರಕಾರಗಳು ವಿಫಲವಾಗಿವೆ. ನಮಗೆ ಉದ್ಯೋಗ ಕೊಡಿ ಎಂದು ಯಾರಾದರೂ ಕೇಳಿದರೆ ಆಗ ದೇಶಭಕ್ತಿಯ ವಿಚಾರ ಮುಂದೆ ತರುತ್ತಾರೆ. ಇಂದು ಮೋದಿ ಧರ್ಮದ ವಿಷಯ ಮಾತಾಡಿದರೆ, ಸಿದ್ದರಾಮಯ್ಯ ಜಾತಿಯ ವಿಚಾರ ಮಾತಾಡುತ್ತಾರೆ. ಯಾರೂ ಕೂಡ ಜನರ ನೈಜ ಸಮಸ್ಯೆಗಳನ್ನು ಮಾತನಾಡುತ್ತಿಲ್ಲ. ಆದರೆ, ನಾವು ಇತರೆ ಸಾಮಾಜಿಕ ಜಾಲತಾಣಗಳ ಮೂಲಕ ಜನರ ನೈಜ ಸಮಸ್ಯೆಗಳನ್ನು ಚುನಾವಣಾ ವಿಷಯವನ್ನಾಗಿ ಮಾಡಲು ಶ್ರಮಿಸಬೇಕಿದೆ ಎಂದು ಕರೆ ನೀಡಿದರು.

ಪಿಇಎಸ್ ಕಾಲೇಜಿನ ಪ್ರಾಧ್ಯಾಪಕ ಕೀಲಾರ ನಾಗೇಗೌಡ ಮಾತನಾಡಿ, 2020ರ ವೇಳೆಗೆ ಭಾರತದ ಜನಸಂಖ್ಯೆಯ ಅರ್ಧದಷ್ಟು ಜನ 26 ವಯಸ್ಸಿನ ಒಳಗಿನವರಾಗಿರುತ್ತಾರೆ. ಪ್ರತಿ ವರ್ಷ 1.2 ಕೋಟಿಯಷ್ಟು ಉದ್ಯೋಗಗಳ ಅಗತ್ಯವಿದೆ, ಆದರೆ, ಈ ನಿಟ್ಟಿನಲ್ಲಿ ಸರಕಾರಗಳು ಉದ್ಯೋಗ ಸೃಷ್ಟಿಸುವ ಬದಲು ಉದ್ಯೋಗ ಕಡಿತ ಮಾಡುತ್ತಿದ್ದಾರೆ ಎಂದು ಟೀಕಿಸಿದರು.

ಕಾರ್ಯಕ್ರಮದಲ್ಲಿ ಪತ್ರಕರ್ತ ನವೀನ್ ಸೂರಿಂಜೆ, ಸಂಶೋಧಕ ಡಾ.ಅರುಣ್ ಜೋಳದ ಕೂಡ್ಲಿಗಿ, ರಂಗಕರ್ಮಿ ಡಾ.ರಾಜಶೇಖರ್ ಅಕ್ಕಿ ಉಪಸ್ಥಿತರಿದ್ದರು.