ಭ್ರಾತೃತ್ವ ಭಾವನೆ ಮೂಡಲು ಧೃಡ ಸಂಕಲ್ಪ ಮಾಡಬೇಕು: ಡಾ.ಎಚ್.ಸಿ.ಮಹದೇವಪ್ಪ

ಮೈಸೂರು,ಜ.26:  ಭಾರತದ ಪ್ರಜೆಗಳಾದ ನಾವು ಭಾರತವನ್ನು ಒಂದು ಸಾರ್ವಭೌಮ, ಸಮಾಜವಾದಿ, ಜಾತ್ಯತೀತ, ಪ್ರಜಾಸತ್ತಾತ್ಮಕ ಗಣರಾಜ್ಯವನ್ನಾಗಿ ವ್ಯವಸ್ಥೆಗೊಳಿಸಲು, ಮತ್ತು ಅದರ ಎಲ್ಲ ಪೌರರಿಗೆ ಸಾಮಾಜಿಕ, ಆರ್ಥಿಕ ಮತ್ತು ರಾಜಕೀಯ ನ್ಯಾಯ, ವಿಚಾರ, ಅಭಿವ್ಯಕ್ತಿ, ನಂಬಿಕೆ, ಧರ್ಮ ಮತ್ತು ಉಪಾಸನಾ ಸ್ವಾತಂತ್ರ್ಯ, ಸ್ಥಾನಮಾನ ಮತ್ತು ಅವಕಾಶಗಳಲ್ಲಿ ಸಮಾನತೆ ಎಲ್ಲರಿಗೂ ದೊರೆಯುವಂತೆ ಮಾಡುವುದಕ್ಕೆ ವ್ಯಕ್ತಿ ಗೌರವ, ರಾಷ್ಟ್ರದ ಏಕತೆ ಮತ್ತು ಸಮಗ್ರತೆಯನ್ನು ರಕ್ಷಿಸಿ, ಭ್ರಾತೃ ಭಾವನೆಯನ್ನು ಎಲ್ಲರಿಗೂ ವೃದ್ಧಿಗೊಳಿಸುವುದಕ್ಕಾಗಿ ಧೃಡ ಸಂಕಲ್ಪ ಮಾಡಿ ಎಂದು ಜಿಲ್ಲಾ ಉಸ್ತುವಾರಿ ಸಚಿವ ಹೆಚ್.ಸಿ ಮಹದೇವಪ್ಪ ತಿಳಿಸಿದರು.

ಇಂದು ಬೆಳಿಗ್ಗೆ ನಗರದ ಬನ್ನಿಮಂಟಪದಲ್ಲಿರುವ ಕವಾಯಿತು ಮೈದಾನದಲ್ಲಿ 69ನೇ ಗಣರಾಜ್ಯೋತ್ಸವ ದಿನಾಚರಣೆ ಅಂಗವಾಗಿ ಆಯೋಜಿಸಿದ್ದ ಕಾರ್ಯಕ್ರಮದಲ್ಲಿ ಧ್ವಜಾರೋಹಣ ನೆರವೇರಿಸಿ ಮಾತನಾಡಿದ ಅವರು, ಭಾರತವು ವಿಶ್ವದಲ್ಲಿಯೇ ಬೃಹತ್ ಪ್ರಜಾಪ್ರಭುತ್ವ ಹೊಂದಿರುವ ರಾಷ್ಟ್ರ.ಅಭಿವೃದ್ಧಿ ಹೊಂದುತ್ತಿರುವ ರಾಷ್ಟ್ರಗಳ ಪೈಕಿ ಮುಂಚೂಣಿಯಲ್ಲಿರುವ ರಾಷ್ಟ್ರ ಎಂಬ ಹೆಗ್ಗಳಿಕೆಗೆ ಭಾಜನವಾಗಿದೆ.ನಮ್ಮ ರಾಷ್ಟ್ರವು ಗಣರಾಜ್ಯವಾಗಿ ಹೊಂದಿ ಇಂದಿಗೆ 68 ವರ್ಷವನ್ನು ಪೂರೈಸಿ, 69ನೇ ವರ್ಷಕ್ಕೆ ಕಾಲಿರಿಸಿದ್ದು, ತುಂಬಾ ಸಂಭ್ರಮದಿಂದ ಇಡೀ ದೇಶದ ಮೂಲೆ ಮೂಲೆಯಲ್ಲಿಯೂ ಆಚರಿಸಲಾಗುತ್ತಿದೆ. ಭಾರತದ ಸಂವಿಧಾನವು ವಿಶ್ವಕ್ಕೆ ಮಾದರಿಯಾದ ಸಂವಿಧಾನವಾಗಿದೆ ಎಂದರು.

1946ನೇ ಡಿಸೆಂಬರ್ 9, 1949ನೇ ನವೆಂಬರ್ 26 ಮತ್ತು 1950ನೇ ಜನವರಿ 26 ಈ ಮೂರು ದಿನಗಳು ನವಭಾರತದ ಸಂವಿಧಾನದ ಚರಿತ್ರೆಯಲ್ಲಿ ಬಹು ಪ್ರಮುಖವಾದವುಗಳು. ಸಂವಿಧಾನದ ರಚನಾ ಸಭೆಯು ಹನ್ನೊಂದು ಅಧಿವೇಶನಗಳನ್ನು ಒಳಗೊಂಡಿತ್ತು. ಇದರಲ್ಲಿ ಮೊದಲ ಆರು ಅಧಿವೇಶನಗಳಲ್ಲಿ ಉದ್ದೇಶಗಳ ನಿರ್ಣಯಗಳನ್ನು ಅಂಗೀಕರಿಸಲು ಮತ್ತು ಮೂಲಭೂತ ಹಕ್ಕುಗಳು, ಒಕ್ಕೂಟ, ಪ್ರಾಂತೀಯ ಸಂವಿಧಾನ, ಅಲ್ಪಸಂಖ್ಯಾತರು, ಅನುಸೂಚಿತ ಪ್ರದೇಶಗಳು, ಅನುಸೂಚಿತ ಬುಡಕಟ್ಟುಗಳು ಇವುಗಳಿಗೆ ಸಂಬಂಧಿಸಿದಂತೆ ಸಲ್ಲಿಸಿದ್ದ ವರದಿಗಳನ್ನು ಪರಿಶೀಲಿಸುವ ಕೆಲಸ ನಡೆಯಿತು. ಉಳಿದ ಅಧಿವೇಶನಗಳು ಸಂಪೂರ್ಣವಾಗಿ ಕರಡು ಸಂವಿಧಾನದ ಪರಿಶೀಲನಾ ಕಾರ್ಯಕ್ಕೆ ಮೀಸಲಾದವು. ಈ ಹನ್ನೊಂದು ಅಧಿವೇಶನಗಳು 165 ದಿನಗಳಲ್ಲಿ ನಡೆಯಿತು. ಅದರಲ್ಲಿ 114 ದಿನಗಳನ್ನು ಸಂವಿಧಾನದ ಕರಡನ್ನು ಪರಿಶೀಲಿಸಲು ತೆಗೆದುಕೊಳ್ಳಲಾಯಿತು ಎಂದರು.

ಕರಡು ರಚನಾ ಸಮಿತಿಯ ಅಧ್ಯಕ್ಷರಾಗಿ ಡಾ.ಬಾಬಾಸಾಹೇಬ್ ಅಂಬೇಡ್ಕರ್ ಅವರನ್ನು 1947ನೇ ಆಗಸ್ಟ್ 29 ರಂದು ಆಯ್ಕೆ ಮಾಡಲಾಯಿತು. 1947ನೇ ಆಗಸ್ಟ್ 30ರಿಂದ ಒಟ್ಟು 141 ದಿನಗಳ ಕಾಲ ಕರಡನ್ನು ಸಿದ್ಧಪಡಿಸಲು ತೆಗೆದುಕೊಳ್ಳಲಾಯಿತು. ಇದು ಅಂತಿಮವಾಗಿ ರೂಪುಗೊಳ್ಳುವ ಹೊತ್ತಿಗೆ 395 ವಿಧಿಗಳನ್ನು, 8 ಅನುಸೂಚಿಗಳನ್ನು ಸಿದ್ಧಪಡಿಸಲಾಯಿತು. ಇವುಗಳನ್ನು ತಿದ್ದುಪಡಿಗಾಗಿ ಸಲ್ಲಿಸಿ, ಸುಮಾರು 7635 ತಿದ್ದುಪಡಿಗಳನ್ನು ಪಟ್ಟಿ ಮಾಡಲಾಯಿತು. ಇವುಗಳ ಪೈಕಿ 2473 ತಿದ್ದುಪಡಿಗಳನ್ನು ಸದನದ ಮುಂದೆ ಚರ್ಚೆಗೆ ಒಪ್ಪಿಸಲಾಯಿತು. ಭಾರತ ಸಂವಿಧಾನವು ರಚಿತವಾಗಲು ಬಾಬಾಸಾಹೇಬ್ ಅಂಬೇಡ್ಕರ್ ಅವರು ಹೇಳಿದ ಹಾಗೇ,2 ವರ್ಷ 11 ತಿಂಗಳು 17 ದಿನಗಳನ್ನು ತೆಗೆದುಕೊಂಡಿತು. ಅಮೇರಿಕಾದ ಸಂವಿಧಾನವು 4 ತಿಂಗಳೊಳಗಾಗಿ, ಕೆನಡಾ ಸಂವಿಧಾನವು 2 ವರ್ಷ 5 ತಿಂಗಳು, ಆಸ್ಟ್ರೇಲಿಯಾ ಸಂವಿಧಾನವು 9 ವರ್ಷಗಳು, ದಕ್ಷಿಣ ಆಫ್ರಿಕಾದ ಸಂವಿಧಾನವು 1 ವರ್ಷ ಅವಧಿಯನ್ನು ತನ್ನ ಸಂವಿಧಾನದ ರಚನೆಗಾಗಿ ತೆಗೆದುಕೊಂಡಿದ್ದವು ಎಂದು ತಿಳಿಸಿದರು.

ವಾಕ್ ಸ್ವಾತಂತ್ರದ ಹಕ್ಕಿಗೆ ಮಿತಿಯ ಸಮರ್ಥನೆಗಾಗಿ ಬಾಬಾಸಾಹೇಬ್ ಅವರು ತೀರ್ಪನ್ನು ಉಲ್ಲೇಖಿಸಿದ್ದಾರೆ. ಅದು ಬಹುಕಾಲದಿಂದ ಸ್ಥಾಪಿತವಾಗಿರುವ ಮೂಲತತ್ವ ಸಂವಿಧಾನವು ವಾಕ್ ಸ್ವಾತಂತ್ರ್ಯವನ್ನು, ಪತ್ರಿಕಾ ಸ್ವಾತಂತ್ರ್ಯವನ್ನು ನೀಡುತ್ತದೆ. ಆದರೆ ಅದು ಹೊಣೆಗಾರಿಕೆ ಇಲ್ಲದೆ ಮನಸ್ಸಿಗೆ ಬಂದಂತೆ ಮಾತನಾಡಲು ಅಥವಾ ಪ್ರಕಟಿಸಲು ನಿರಾಪೇಕ್ಷಿತವಾದ ಹಕ್ಕನ್ನು ನೀಡುವುದಿಲ್ಲ. ಭಾಷೆಯನ್ನು ಹೇಗೆ ಬೇಕಾದರೂ ಬಳಸಲು ಅನಿರ್ಬಂದಿತವಾದ ಕಡಿವಾಣವಿಲ್ಲದ ಪರವಾನಗಿ ಕೊಡುವುದಿಲ್ಲ. ಈ ಸ್ವಾತಂತ್ರ್ಯವನ್ನು ದುರುಪಯೋಗ ಪಡಿಸಿಕೊಳ್ಳುವವರಿಗೆ ದಂಡನೆಯನ್ನು ತಪ್ಪಿಸಲು ಅವಕಾಶ ಕೊಡುವುದಿಲ್ಲ. ಆದ್ದರಿಂದ ಬಾಬಾಸಾಹೇಬ್ ಅಂಬೇಡ್ಕರ್ ಅವರು ವಾಕ್ ಸ್ವಾತಂತ್ರ್ಯದ ಹಕ್ಕನ್ನು ವಿವೇಚನೆಯಿಂದ ಬಳಸುವ ಹಕ್ಕಾಗಿರುತ್ತದೆ ಎಂದಿದ್ದಾರೆ. ಇಂದು ಜವಾಬ್ದಾರಿ ಸ್ಥಾನದಲ್ಲಿರುವವರೆ ಕಟುಕು ಮತ್ತು ಕುಟುಕು ರಾಜಕಾರಣದ ಮಾತುಗಳನ್ನು ಆಡುತ್ತಿದ್ದಾರೆ. ಆದರೆ ಕಟ್ಟುವ ರಾಜಕಾರಣದ ಮಾತುಗಳು ಗಣರಾಜ್ಯದ ಮಾತುಗಳಾಗಬೇಕು ಎಂದು ತಿಳಿಸಿದರು.

ಕಾರ್ಯಕ್ರಮದಲ್ಲಿ ಕಮಾಂಡೋಗಳಿಂದ ವಿಐಪಿಗಳು ಹಾಗೂ ಸಾರ್ವಜನಿಕರನ್ನು ಉಗ್ರಗಾಮಿಗಳಿಂದ ರಕ್ಷಿಸುವ ಬಗ್ಗೆ ಅಣಕು ಪ್ರದರ್ಶನವನ್ನು ಏರ್ಪಡಿಸಲಾಗಿತ್ತು. ನಂತರ ವಿವಿಧ ಶಾಲಾ ಮಕ್ಕಳಿಂದ ಸಾಂಸ್ಕೃತಿಕ ಕಾರ್ಯಕ್ರಮಗಳು ನಡೆದವು.

ಈ ಸಂದರ್ಭದಲ್ಲಿ ಶ್ರೀ ಸುಮತಿನಾಥ್ ಜೈನ್ ಯುವಕ ಮಂಡನ್ ವತಿಯಿಂದ ಶಾಲಾ ಮಕ್ಕಳಿಗೆ ಹಾಗೂ ಸಾರ್ವಜನಿಕರಿಗೆ ಲಘು ಉಪಹಾರವನ್ನು ಏರ್ಪಡಿಸಲಾಗಿತ್ತು.

ಕಾರ್ಯಕ್ರಮದಲ್ಲಿ ಮಹಾಪೌರರಾದ ಭಾಗ್ಯವತಿ, ಉಪಸಭಾಪತಿ ಮರಿತಿಬ್ಬೇಗೌಡ, ಶಾಸಕರುಗಳಾದ ವೆಂಕಟೇಶ್, ಎಂ.ಕೆ.ಸೋಮಶೇಖರ್, ಕಳಲೆ ಕೇಶವಮೂರ್ತಿ, ಮೈಸೂರು ಬಣ್ಣ ಮತ್ತು ಅರಗು ಕಾರ್ಖಾನೆ ಅಧ್ಯಕ್ಷ ಹೆಚ್.ಎ. ವೆಂಕಟೇಶ್, ಮೈಸೂರು ಮೃಗಾಲಯ ಪ್ರಾಧಿಕಾರದ ಅಧ್ಯಕ್ಷೆ ಮಲ್ಲಿಗೆ ವೀರೇಶ್, ಜಿಲ್ಲಾಧಿಕಾರಿ ರಂದೀಪ್, ನಗರಪೊಲೀಸ್ ಆಯುಕ್ತ ಸುಬ್ರಹ್ಮಣ್ಯೇಶ್ವರ ರಾವ್ ಸೇರಿದಂತೆ ಇನ್ನಿತರ ಗಣ್ಯರು ಹಾಜರಿದ್ದರು.