ಬಿಹಾರದಲ್ಲಿ ‘ಪಕಡ್ವಾ ವಿವಾಹ’ಕ್ಕಾಗಿ 3,400ಕ್ಕೂ ಅಧಿಕ ವರರ ಅಪಹರಣ
ಪಾಟ್ನಾ,ಫೆ.4: ಇದು ಹಲವರಿಗೆ ಸಾಂಸ್ಕೃತಿಕ ಆಘಾತವನ್ನುಂಟು ಮಾಡಬಹುದು, ಆದರೆ ಕಳೆದ ವರ್ಷ ಬಿಹಾರದಲ್ಲಿ ‘ಪಕಡ್ವಾ ವಿವಾಹ’ವೆಂದು ಸ್ಥಳೀಯವಾಗಿ ಕರೆಯಲಾಗುವ ಬಲವಂತದ ಮದುವೆಗಾಗಿ 3,400 ಕ್ಕೂ ಅಧಿಕ ಯುವಕರನ್ನು ಅಪಹರಿಸಲಾಗಿತ್ತು.
ಬಿಹಾರದಲ್ಲಿ ಪಕಡ್ವಾ ವಿವಾಹದ ಹಾವಳಿ ಹೆಚ್ಚುತ್ತಿದೆ. ಕಳೆದ ವರ್ಷ ರಾಜ್ಯದಲ್ಲಿ ಬಲವಂತದ ಮದುವೆಗಾಗಿ ಸುಮಾರು 3,405 ಯುವಕರನ್ನು ಅಪಹರಿಸಲಾಗಿದೆ. ಪಿಸ್ತೂಲನ್ನು ತೋರಿಸಿ ಅಥವಾ ಯುವಕರಿಗೆ ಮತ್ತು ಅವರ ಕುಟುಂಬಗಳಿಗೆ ಬೆದರಿಕೆಗಳನ್ನೊಡ್ಡಿ ಈ ಪಕಡ್ವಾ ವಿವಾಹಗಳನ್ನು ನಡೆಸಲಾಗುತ್ತದೆ ಎಂದು ಹಿರಿಯ ಪೊಲೀಸ್ ಅಧಿಕಾರಿಯೋರ್ವರು ರವಿವಾರ ಇಲ್ಲಿ ತಿಳಿಸಿದರು.
ಕಳೆದ ತಿಂಗಳು ಪಾಟ್ನಾದ ಗ್ರಾಮವೊಂದರಲ್ಲಿ ಇಂಜಿನಿಯರ್ವೋರ್ವನನ್ನು ಅಪಹರಿಸಿ, ಬಳಿಕ ಪಿಸ್ತೂಲು ತೋರಿಸಿ ಪಕಡ್ವಾ ವಿವಾಹ ನಡೆಸಲಾಗಿತ್ತು. ತನ್ನ ನವ ವಿವಾಹಿತ ಪತ್ನಿಯೊಡನೆ ಬಾಳು ನಡೆಸಲು ಆತ ನಿರಾಕರಿಸಿದಾಗ ಈ ಪಕಡ್ವಾ ವಿವಾಹ ರಾಷ್ಟ್ರಾದ್ಯಂತ ಮಾಧ್ಯಮಗಳಲ್ಲಿ ಸುದ್ದಿಯಾಗಿತ್ತು. ಲಭ್ಯ ಅಂಕಿಅಂಶಗಳಂತೆ ರಾಜ್ಯದಲ್ಲಿ 2016ರಲ್ಲಿ 3,070, 2015ರಲ್ಲಿ 3,000 ಮತ್ತು 2014ರಲ್ಲಿ 2,526 ಯುವಕರನ್ನು ಪಕಡ್ವಾ ವಿವಾಹಕ್ಕಾಗಿ ಅಪಹರಿಸಲಾಗಿತ್ತು.
ಪೊಲೀಸ್ ದಾಖಲೆಗಳು ಹೇಳುವಂತೆ ರಾಜ್ಯದಲ್ಲಿ ಪ್ರತಿದಿನ ಸರಾಸರಿ ಒಂಭತ್ತು ಪಕಡ್ವಾ ವಿವಾಹಗಳು ನಡೆಯುತ್ತಿವೆ.
ಇಂತಹ ವಿವಾಹಗಳು ಹೆಚ್ಚುತ್ತಿರುವುದನ್ನು ಗಂಭೀರವಾಗಿ ಪರಿಗಣಿಸಿರುವ ಪೊಲೀಸ್ ಇಲಾಖೆಯು ಮುಂದಿನ ತಿಂಗಳಿನಿಂದ ಆರಂಭಗೊಳ್ಳಲಿರುವ ಮದುವೆ ಸೀಝನ್ನಿನಲ್ಲಿ ಇಂತಹ ಘಟನೆಗಳನ್ನು ತಡೆಯಲು ಎಚ್ಚರ ವಹಿಸುವಂತೆ ಜಿಲ್ಲಾ ಎಸ್ಪಿಗಳಿಗೆ ಸೂಚಿಸಿದೆ.
ಪಕಡ್ವಾ ವಿವಾಹ ಈ ರಾಜ್ಯದಲ್ಲಿ ಹೊಸದೇನೂ ಅಲ್ಲ. ಹಲವಾರು ವರ್ಷಗಳಿಂದ ಅವು ನಡೆಯುತ್ತಲೇ ಇವೆ. ಆದರೆ ಅವುಗಳ ಸಂಖ್ಯೆ ಹೆಚ್ಚುತ್ತಿರುವುದು ಕಳವಳಕಾರಿ ಯಾಗಿದೆ ಎಂದು ಸಾಮಾಜಿಕ ಕಾರ್ಯಕರ್ತ ಮಹೇಂದ್ರ ಯಾದವ್ ಹೇಳಿದರು. ವರದಕ್ಷಿಣೆ ಪಿಡುಗಿನಿಂದಾಗಿ ಇದೊಂದು ಸಾಮಾಜಿಕ ಸಮಸ್ಯೆಯಾಗಿದೆ. ಯುವತಿಯರ ಕುಟುಂಬಗಳು ಬಲವಂತದ ಮದುವೆಗಾಗಿ ಅರ್ಹ ಯುವಕರನ್ನು ಅಪಹರಿಸುತ್ತವೆ. ಇದಕ್ಕಾಗಿ ಅವು ಸ್ನೇಹಿತರನ್ನು ಮತ್ತು ಬಂಧುಗಳನ್ನು, ಕೆಲವೊಮ್ಮೆ ವೃತ್ತಿಪರ ಕ್ರಿಮಿನಲ್ಗಳನ್ನು ಬಳಸಿಕೊಳ್ಳುತ್ತವೆ ಎಂದರು.
18 ವರ್ಷಕ್ಕಿಂತ ಮೇಲಿನ ಯುವಕರ ಅಪಹರಣಗಳಲ್ಲಿ ಬಿಹಾರವು ದೇಶದಲ್ಲಿಯೇ ಮೊದಲ ಸ್ಥಾನದಲ್ಲಿರುವುದನ್ನು ರಾಷ್ಟ್ರೀಯ ಅಪರಾಧ ದಾಖಲೆಗಳ ಘಟಕವು ದೃಢಪಡಿಸಿದೆ.