ಮನದ ಪರದೆ ಸರಿಸುವ ರಜಿಯಾ ಕವಿತೆಗಳು

ಹೆಣ್ಣಿನ ಒಳಗೆ ತೊಳಲಾಟಗಳನ್ನು, ಸಂಘರ್ಷಗಳನ್ನು ಯಾವ ಸಿದ್ಧಾಂತ, ಪಂಥಗಳ ಗಡಿಗೆ ಒಳಪಡಿಸದೆಯೇ ಕವಿತೆಗಳಾಗಿ ಅಭಿವ್ಯಕ್ತಿಗೊಳಿಸುತ್ತಾ ಬಂದವರು ಡಿ. ಬಿ. ರಜಿಯಾ. ಕನ್ನಡದ ಬೆರಳೆಣಿಕೆ ಮುಸ್ಲಿಮ್ ಹಿನ್ನೆಲೆಯಿರುವ ಸೂಕ್ಷ್ಮ ಕವಯಿತ್ರಿಯರಲ್ಲಿ ಇವರು ಒಬ್ಬರು. ಇವರ ಕವಿತೆಗಳ ಕುರಿತಂತೆ ಎಸ್. ಜಿ. ಸಿದ್ದರಾಮಯ್ಯ ಹೀಗೆ ಬರೆಯುತ್ತಾರೆ ‘‘ಯಾವುದೇ ಅರಗದ ಸಿದ್ಧಾಂತಗಳಿಗೆ ಬದ್ಧವಾಗಿ ಕಾವ್ಯ ಕಟ್ಟುವ ಹವಣಿಕೆ ರಜಿಯಾ ಅವರಲ್ಲಿಲ್ಲ. ಇಲ್ಲಿ ಅನುಭವ ಮಾತಾಡಿದೆ. ಮಾಗಿದ ಮನಸ್ಸು ಆದ ಅನುಭವಗಳನ್ನು ಅವಲೋಕಿಸಿ, ಆಲೋಚಿಸಿ ಕಾವ್ಯಾನುಬಂಧಕ್ಕೆ ಒಳಗು ಮಾಡಿದೆ. ಕಾವ್ಯ ಹೀಗೇೆ ಇರಬೇಕೆನ್ನುವ ಕಲಾತ್ಮಕ ಸಿದ್ಧಾಂತದ ಪರಿಭಾಷಾಪಟುಗಳಿಗೆ ಉತ್ತರ ಕೊಡಬೇಕಾದ ಅಗತ್ಯವಿಲ್ಲವೆನ್ನುವಂತೆ ಇವರ ರಚನೆಗಳು ಹರಿದಿವೆ’
  ‘ಪರದೆ ಸರಿದಂತೆ’ ರಜಿಯಾ ಅವರ ಏಳನೇ ಕೃತಿ. 30ಕ್ಕೂ ಅಧಿಕ ಕವಿತೆಗಳು ಇಲ್ಲಿವೆ. ಹೆಣ್ಣಾಳು ಒಬ್ಬಳು ಕೂಲಿ ದುಡಿಯುತ್ತಾ ಬದುಕಿನ ಸಂಕಟಗಳನ್ನು ಎದುರಿಸುವ ಪರಿ ಅಸಹಾಯಕತೆಯೇ ಅಥವಾ ಎದೆಗಾರಿಯೇ ಎಂಬ ಪ್ರಶ್ನೆಯನ್ನು ಎತ್ತುವ ‘ಕನ್ನಡಿ’, ಆಚಾರ ಸಂಪ್ರದಾಯಗಳನ್ನು ನೆಚ್ಚಿಕೊಂಡಿರುವ ಅಸಮಾನತೆಯ ಕುರಿತಂತೆ ಆಕ್ರೋಶ ವ್ಯಕ್ತಪಡಿಸುವ ‘ಸ್ವರೂಪ’, ಬದುಕಿನ ಯಾತ್ರೆಯ ಅಲೌಕಿಕತೆಯನ್ನು ಯೋಚಿಸುವಂತೆ ಮಾಡುವ ‘ಅ-ಅಲೋಕ’, ಹಿಂಸೆ, ಕ್ರೌರ್ಯಗಳ ಮೂಲಕ ಕಾಡಾಗುವುದಕ್ಕೆ ಹೊರಟಿರುವ ನಾಡಿನ ಕುರಿತಂತೆ ಕಳವಳ ವ್ಯಕ್ತಪಡಿಸುವ ‘ಅಭೇದ್ಯ’, ಬದಲಾದ ಕಾಲ ಮತ್ತು ಒಂಟಿತನದ ತೀವ್ರತೆಯನ್ನು ಹೇಳುವ ‘ಕಾಯುವ ಹೊತ್ತು’ ಹೀಗೆ ಬದುಕಿನ ಮಗ್ಗುಲಿನ ಕಡೆಗೆ ಅವರ ಕಣ್ಣುಗಳು ಹರಿಯುತ್ತವೆ. ಸಮಾಜದ ಬೇರೆ ಬೇರೆ ಸಮಸ್ಯೆಗಳು ಲೇಖಕಿಯನ್ನು ಕಾಡಿದ್ದು ಇಲ್ಲಿ ಅದು ಕವನವಾಗಿವೆ. ಹೆಣ್ಣು ಎನ್ನುವ ಮಿತಿಗಳಾಚೆಗೆ ಎಲ್ಲ ಮನುಷ್ಯರ ನೋವು, ದುಮ್ಮಾನಗಳನ್ನು ಕವಿತೆ ಹೇಳುತ್ತದೆ. ತಾಯಿ ಮಗುವಿನ ಸಂಬಂಧ, ಆಧುನಿಕತೆಯ ಸುಳಿಗೆ ಸಿಕ್ಕಿ ಕಳೆದು ಹೋಗುತ್ತಿರುವ ಮನುಷ್ಯ, ಹಿಡಿದಂತೆ ಜಾರುವ ಕನಸುಗಳು, ಸೂಫಿ ಜಗತ್ತಿನ ಅಲೌಕಿಕತೆ ಹೀಗೆ...ಬಗೆ ಬಗೆಯಾಗಿ ರಜಿಯಾ ಕವಿತೆಗಳು ನಮ್ಮನ್ನು ಕಾಡುತ್ತವೆ.
ಕೌದಿ ಪ್ರಕಾಶನ ಶಿವಮೊಗ್ಗ ಹೊರತಂದಿರುವ ಈ ಕೃತಿಯ ಮುಖಬೆಲೆ 70 ರೂಪಾಯಿ. ಆಸಕ್ತರು 98860 64444 ದೂರವಾಣಿಯನ್ನು ಸಂಪರ್ಕಿಸಬಹುದು.