ಸ್ಲೇಟು ಇಲ್ಲದ ಸ್ಕೂಲ್ ಬ್ಯಾಗ್

ಮಾನ್ಯರೇ,

ಇತ್ತೀಚೆಗೆ ಪುಟಾಣಿಗಳು ಭಾರದ ಪುಸ್ತಕಗಳನ್ನು ತುಂಬಿದ ಚೀಲ ಹೆಗಲಿಗೆ ಹಾಕಿಕೊಂಡು ಶಾಲೆಗೆ ಹೋಗುತ್ತಿದ್ದಾರೆ. ಮಕ್ಕಳ ಸ್ಕೂಲ್ ಬ್ಯಾಗಿನ ಭಾರದ ಬಗ್ಗೆ ಆಗಾಗ ಶಿಕ್ಷಣ ಸಂಸ್ಥೆಗಳ ಅಧ್ಯಯನ, ಚರ್ಚೆ, ಸಲಹೆ ಸೂಚನೆಗಳು ವರದಿಯಾಗುತ್ತವೆ. ಹಿಂದೆಲ್ಲಾ ಒಂದನೇ ತರಗತಿಯಿಂದ ಐದನೇ ತರಗತಿವರೆಗೂ ಸ್ಲೇಟಿನಲ್ಲಿ ಬರೆದು ಅಭ್ಯಾಸ ಮಾಡುತ್ತಿದ್ದರು. ಚಂದದ ಕೈ ಬರಹಕ್ಕೆ ಸ್ಲೇಟು ನಿಜಕ್ಕೂ ಒಂದು ಉತ್ತಮ ಕಲಿಕಾ ಸಾಧನ. ಆದರೆ ಇತ್ತೀಚೆಗೆ ಪೂರ್ವ ಪ್ರಾಥಮಿಕ ಶಾಲೆಗಳಲ್ಲಿ ಪುಟಾಣಿಗಳು ಸ್ಲೇಟಿನಲ್ಲಿ ಬರೆಯುವ ಅಭ್ಯಾಸ ಮಾಡುತ್ತಿಲ್ಲ. ಬದಲಿಗೆ ನೇರವಾಗಿ ಇವರ ಕೈಯಲ್ಲಿ ನೋಟ್‌ಬುಕ್ ಕೊಡಲಾಗುತ್ತಿದೆ.

ಸಾಮಾನ್ಯ ಜ್ಞಾನ (ಜಿಕೆ), ಡ್ರಾಯಿಂಗ್ ಹಾಗೂ ರೈಟಿಂಗ್ ಬುಕ್ಸ್ ತುಂಬಿದ ಭಾರದ ಚೀಲ. ಜೊತೆಗೆ ನೀರಿನ ಬಾಟಲಿ, ಟಿಫಿನ್ ಬಾಕ್ಸ್. ಇದು ಇಂದಿನ ಪುಟಾಣಿ ಶಾಲೆಗೆ ಹೋಗುವ ಪರಿ. ಆದರೆ ಇದರಲ್ಲಿ ಸ್ಲೇಟು ಮತ್ತು ಬಳಪ ಯಾಕೆ ಇಲ್ಲ?. ನಿಜಕ್ಕೂ ಅನವಶ್ಯಕ ಪುಸ್ತಕದ ಹೊರೆ ಬೇಕಾಗಿಲ್ಲ. ಮನೆಯಲ್ಲೂ ಮಗುವಿಗೆ ಪುಸ್ತಕ ತರೆದು ಓದುವ ಒತ್ತಡವನ್ನು ಪೋಷಕರು ಹಾಕುತ್ತಾರೆ. ಮಗುವಿಗೆ ಆಟ ಆಡಲು ಸಮಯವೇ ಸಿಗುವುದಿಲ್ಲ. ಒಟ್ಟಾರೆ ಈ ಪುಟಾಣಿಗಳಿಗೆ ಭಾರದ ಚೀಲದ ಆವಶ್ಯಕತೆ ಇಲ್ಲ. ಶಾಲೆಯಲ್ಲಿ ಪುಟಾಣಿಗಳಿಗೆ ಹಾಡು, ಕತೆ, ಪ್ರಾಣಿ, ಪಕ್ಷಿ, ಹಣ್ಣು ಮತ್ತು ಹೂವುಗಳನ್ನು ಚಾರ್ಟ್ ಮೂಲಕ ಓದಿಸಬಹುದು. ಸ್ಲೇಟು ಮೂಲಕ ಅ,ಆ,ಇ, ಈ ಹಾಗೂ 1,2,3 ಅಕ್ಷರಗಳ ಆಕಾರದ ರಚನೆಯನ್ನು ಕಲಿಸಬಹುದು. ಅಲ್ಲದೆ ಶಿಕ್ಷಣದ ಹೆಸರಿನಲ್ಲಿ ಪೋಷಕರಿಗೆ ದುಂದು ವೆಚ್ಚದ ಹೊರೆಯನ್ನು ತಪ್ಪಿಸಿಕೊಳ್ಳಬಹುದು.

ಸ್ಲೇಟು ಬಳಕೆ ಬಗ್ಗೆ ಶಿಕ್ಷಕರೊಬ್ಬರು ಹೇಳಿದ್ದು ಹೀಗೆ; ಕೆಲವು ಪುಟಾಣಿಗಳು ಬಳಪ(ಚಾಕ್‌ಪೀಸ್) ತಿನ್ನುತ್ತಾರೆ. ಹೀಗಾಗಿ ಆರೋಗ್ಯದ ದೃಷ್ಟಿಯಿಂದ ಬಳಸುವುದಿಲ್ಲ ಮತ್ತು ಇದು ಅಶಿಸ್ತು ಅನ್ನಿಸುತ್ತೆ ಎಂದು ವಾದಿಸಿದರು. ಸ್ಲೇಟಿನ ಮೇಲೆ ಅಕ್ಷರ ಬರೆಸುವ ಅಭ್ಯಾಸ ಅಷ್ಟೊಂದು ಕಷ್ಟವೇನೂ ಅಲ್ಲ್ಲ. ಶಾಲೆಗಳು ಒಣ ಪ್ರತಿಷ್ಠೆಯಿಂದ ಸ್ಲೇಟು ಬಳಕೆ ಅಸಭ್ಯ ಅನ್ನುವ ರೀತಿಯಲ್ಲಿ ನೋಡುತ್ತಿವೆೆ. ತಾಳಿಕೆ ಬರುವ ಈ ಕಲಿಕಾ ಸಾಧನ ಚೀಲದ ಭಾರ ಕಡಿಮೆ ಮಾಡುವಲ್ಲಿ ಸಹಕಾರಿ ಎಂದರೆ ತಪ್ಪಾಗಲಾರದು. ಮಕ್ಕಳ ದೈಹಿಕ ಹಾಗೂ ಮಾನಸಿಕ ವಿಕಾಸದ ಕುರಿತು ಸಾಕಷ್ಟು ವೈಜ್ಞಾನಿಕ ವರದಿಗಳು ಪ್ರಕಟವಾಗುತ್ತವೆ. ಆದರೆ ಪೂರ್ವ ಪ್ರಾಥಮಿಕ ಮಕ್ಕಳ ಶಿಕ್ಷಣ ವ್ಯವಸ್ಥೆ ಮತ್ತು ಇವರ ಭಾರದ ಚೀಲದ ಕುರಿತು ಶಿಕ್ಷಣ ಇಲಾಖೆ ಚಿಂತಿಸಬೇಕಾಗಿದೆ.

 -ಝೈನಬ್ ಎಂ. ಡೋಣೂರ, ವಿಜಯಪುರ