ಹನೂರು: 5ನೇ ತಾಲೂಕು ಸಾಹಿತ್ಯ ಸಮ್ಮೇಳನ
ಹನೂರು,ಫೆ.06: ವಿಶ್ವದ ಬೃಹತ್ ಕಾವ್ಯಗಳಲ್ಲೊಂದಾದ ಇಂಗ್ಲೆಂಡ್ನ ಕಾಲೇವಾಲ ಮಹಾಗ್ರಂಥವನ್ನೇ ಮೀರಿಸುವಂತಹ ಮಹಾನ್ ಗ್ರಂಥ ನಮ್ಮ ಮಲೆ ಮಹದೇಶ್ವರರ ಜಾನಪದ ಕಾವ್ಯ ಎಂದು ಜಾನಪದ ವಿದ್ವಾಂಸ ಪಿ.ಕೆ.ರಾಜಶೇಖರ್ ಅಭಿಪ್ರಾಯಪಟ್ಟರು.
ಪಟ್ಟಣದ ವಾಸವಿಮಹಲ್ ಕಲ್ಯಾಣ ಮಂಟಪದ ಮೀಣ್ಯ ಗುರುಸಿದ್ದ ಕವಿ ವೇದಿಕೆಯಲ್ಲಿ ಕಸಾಪ ಕೊಳ್ಳೇಗಾಲ ಮತ್ತು ಹನೂರು ವಲಯದ ವತಿಯಿಂದ ಏರ್ಪಡಿಸಲಾಗಿದ್ದ 5ನೇ ತಾಲೂಕು ಸಾಹಿತ್ಯ ಸಮ್ಮೇಳನವನ್ನು ಉದ್ಘಾಟಿಸಿ ಮಾತನಾಡಿದ ಪಿ.ಕೆ.ರಾಜಶೇಖರ್, ಕೊಳ್ಳೇಗಾಲ ತಾಲೂಕು ಕರ್ನಾಟಕದಲ್ಲಿಯೇ ಅತ್ಯಂತ ಸಂಪದ್ಭರಿತವಾಧ ಜಾಣಪದ ಕಲೆಯನ್ನು ಹೊಂದಿದೆ. ಇಲ್ಲಿ ಜೈನ, ಶೈವ, ಜಾನಪದ, ಇಸ್ಲಾಂ ಮತ್ತು ಕ್ರೈಸ್ತ ಧರ್ಮದವರೆಲ್ಲರೂ ವಾಸಿಸುತ್ತಾರೆ. ಸರ್ವ ಧರ್ಮಗಳ ಕೇಂದ್ರವಾಗಿರುವ ಇಲ್ಲಿ ಯಾವುದೇ ಜಾತಿ ಮತಗಳ ಸಂಘರ್ಷವಿಲ್ಲದೆ, ಶಾಂತಿ ಸಹಬಾಳ್ವೆಯಿಂದ, ಸಮನ್ವಯತೆಯೊಂದಿಗೆ ಬಾಳ್ವೆ ನಡೆಸುತ್ತಿದ್ದಾರೆ. ಇದೊಂದು ಸುಸಂಸ್ಕೃತ ತಾಲೂಕು ಎಂದು ಬಣ್ಣಿಸಿದರು.
ಜಾನಪದ ವಿಶ್ವವಿದ್ಯಾನಿಲಯಕ್ಕೆ ಒತ್ತಾಯ: ಕರ್ನಾಟಕ ರಾಜ್ಯದಲ್ಲಿ ಜಾಣಪದ ವಿಶ್ವವಿದ್ಯಾನಿಲಯವನ್ನು ಪ್ರಾರಂಭಿಸಿ ಈ ನಾಡಿನ ಜಾನಪದ ಕಲೆಯನ್ನು ಉಳಿಸಬೇಕೆನ್ನುವ ಕೂಗು ಕೇಳಿಬಂದಾಗ, ವಿಶ್ವವಿದ್ಯಾನಿಲಯ ತೆರೆಯುವುದಾದರೆ ಚಾಮರಾಜನಗರ ಜಿಲ್ಲೆಯಲ್ಲಿಯೇ ಪ್ರಾರಂಭಿಸಬೇಕು ಎನ್ನುವ ವಾದವನ್ನು ಹಲವಾರು ಜಾನಪದ ವಿದ್ವಾಂಸರು ಮಂಡಿಸಿದರು. ಆದರೂ ಅನಿವಾರ್ಯ ಕಾರಣಗಳಿಂದಾಗಿ ವಿಶ್ವವಿದ್ಯಾನಿಲಯವನ್ನು ಹಾವೇರಿಯಲ್ಲಿ ಪ್ರಾರಂಭಿಸಲಾಯಿತು ಎಂದು ತಿಳಿಸಿದರು.
ಜಾನಪದ ಕಲೆಯನ್ನು ಮುಂದಿನ ಪೀಳಿಗೆಗೆ ಉಳಿಸಿ: ನಮ್ಮ ಚಾಮರಾಜನಗರ ಜಿಲ್ಲೆಯಲ್ಲಿ ವೀರಗಾಸೆಕುಣಿತ, ಡೊಳ್ಳುಕುಣಿತ, ತೊಗಲುಗೊಂಬೆಯಾಟ, ಸೋಲಿಗರಕುಣಿತ, ಲಂಬಾಣಿ ಕುಣಿತ, ಬುಡಕಟ್ಟು ಜನಾಂಗಗಳ ವಿಶಿಷ್ಠ ಕುಣಿತಗಳು, ಗೊರವರ ಕುಣಿತ, ವೀರ ಮಕ್ಕಳ ಕುಣಿತ, ನಂದಿ ಧ್ವಜ ಕುಣಿತ, ಬೀಸುಕಂಸಾಳೆ, ಕತ್ತಿ ವರಸೆ, ದೊಣ್ಣೆ ವರಸೆ, ಮಾರಿ ಕುಣಿತ, ಕೋಲಾಟ, ಕಾಡೆಮ್ಮೆ ದೊಡ್ಡು ಕುಣಿತ, ಸೂತ್ರದ ಗೊಂಬೆಯಾಟಗಳಂತಹ ವಿಶಿಷ್ಟವಾದ ಜಾನಪದ ಕಲೆಗಳಿದ್ದು, ಇದನ್ನು ಉಳಿಸಿ ಬೆಳೆಸಬೇಕಾದ್ದು ನಮ್ಮೆಲ್ಲರ ಕರ್ತವ್ಯ. ಈ ನಿಟ್ಟಿನಲ್ಲಿ ಎಲ್ಲಾ ಕಲಾವಿದರುಗಳನ್ನು ಗುರುತಿಸಿ ಅವರನ್ನು ಬೆಂಬಲಿಸಿಬೇಕಾದಂತಹ ಕೆಲಸವನ್ನು ಕನ್ನಡ ಸಾಹಿತ್ಯ ಪರಿಷತ್ ಮಾಡುತ್ತಿದ್ದು, ಮತ್ತಷ್ಟು ಕಾರ್ಯಪ್ರವೃತ್ತರಾಗಿ ನಮ್ಮ ಮುಂದಿನ ಪೀಳಿಗೆಗೂ ಜಾನಪದ ಕಲೆಯನ್ನು ಉಳಿಸಬೇಕು ಎಂದು ತಿಳಿಸಿದರು.
ಕಸಾಪ ಜಿಲ್ಲಾಧ್ಯಕ್ಷ ಬಿ.ಎಸ್.ವಿನಯ್ ಮಾತನಾಡಿ, ಕತ್ತಲ ರಾಜ್ಯ ಎಂದು ಕರೆಯಲ್ಪಡುತ್ತಿದ್ದ ಚಾಮರಾಜನಗರ ಜಿಲ್ಲೆ ಜಾನಪದ ಸಾಹಿತ್ಯದ ತವರೂರಾಗಿದೆ. ಈ ನಾಡಿದ ಕುಲದೈವ ಮಲೆ ಮಹದೇಶ್ವರರು ಕೇವಲ ದೇವಮಾನವರಾಗಿರದೆ ಸಾಂಸ್ಕೃತಿಕ ರಾಯಭಾರಿಯಾಗಿದ್ದರು ಎಂದು ಹೇಳಿದರು.
ಕನ್ನಡ ಸಾಹಿತ್ಯ ಪರಿಷತ್ ವಿಶ್ವದಲ್ಲೇ ಅತಿ ಹೆಚ್ಚು ಆಜೀವ ಸದಸ್ಯತ್ವ ಹೊಂದಿರುವ ಸಂಸ್ಥೆಯಾಗಿದ್ದು, ಇದು 4ಲಕ್ಷ ಸದಸ್ಯರನ್ನು ಹೊಂದಿದೆ. ಮೈಸೂರು ಜಿಲ್ಲೆಯಿಂದ ವಿಭಜನೆಗೊಂಡಾಗ ಚಾಮರಾಜನಗರ ಜಿಲ್ಲೆಯಲ್ಲಿ 78 ಜನ ಸದಸ್ಯರಿದ್ದರು. ಬಳಿಕ ಹಂತ ಹಂತವಾಗಿ ಸದಸ್ಯತ್ವವನ್ನು ನೀಡಲಾಗುತ್ತಿದ್ದು, ಇದೀಗ ಸದಸ್ಯತ್ವದ ಸಂಖ್ಯೆ 5ಸಾವಿರ ದಾಟಿದೆ. ಆದರೆ ಹನೂರು ಭಾಗದಲ್ಲಿ ಸದಸ್ಯತ್ವ ಕಡಿಮೆಯಿದೆ. ಹನೂರು ಪಟ್ಟಣವು ನೂತನ ತಾಲೂಕು ಕೇಂದ್ರವಾಗಿದ್ದು, ಮುಂದಿನ ದಿನಗಳಲ್ಲಿ ಇಲ್ಲಿಯೂ ಹೆಚ್ಚಿನ ಸದಸ್ಯತ್ವವನ್ನು ನೀಡಿ ಒಂದು ಮತಕೇಂದ್ರವನ್ನು ತೆರೆಯಬೇಕೆಂಬ ಗುರಿಯಿದೆ. ಆದುದರಿಂದ ಸಾಹಿತ್ಯ ಪ್ರೇಮಿಗಳು, ಕನ್ನಡ ಅಭಿಮಾಣಿಗಳು ಹೆಚ್ಚಿನ ಸಂಖ್ಯೆಯಲ್ಲಿ ಸದಸ್ಯತ್ವ ನೋಂದಣಿ ಮಾಡಿಕೊಳ್ಳಬೇಕು ಎಂದು ಮನವಿ ಮಾಡಿದರು.
ಕಾರ್ಯಕ್ರಮದಲ್ಲಿ ಸಮ್ಮೇಳನದ ಸರ್ವಾಧ್ಯಕ್ಷ ನಾಗರಾಜು, ಸಾಲೂರು ಬೃಹನ್ಮಠದ ಪಟ್ಟದಗುರುಸ್ವಾಮಿಗಳು, ಜಿ.ಪಂ ಸದಸ್ಯರಾದ ಮರುಗದಮಣಿ, ಇಷರತ್ಭಾನು, ಲೇಖಾರವೀಂದ್ರ, ಮುಳ್ಳೂರು ಕಮಲ್, ಪ.ಪಂ ಅಧ್ಯಕ್ಷೆ ಮಮತಾ ಮಹಾದೇವು, ಸದಸ್ಯ ಬಾಲರಾಜ್ನಾಯ್ಡು, ಕ್ಷೇತ್ರ ಶಿಕ್ಷಣಾಧಿಕಾರಿ ಸ್ವಾಮಿ, ಕಸಾಪ ತಾಲೂಕು ಅಧ್ಯಕ್ಷ ನಂಜುಂಡಸ್ವಾಮಿ, ವಲಯ ಅಧ್ಯಕ್ಷ ಶ್ರೀನಿವಾಸ್ನಾಯ್ಡು, ಪದಾಧಿಕಾರಿಗಳಾದ ಗುರುಸ್ವಾಮಿ, ಆಶೋಕ್ ,ಈರೇಂದ್ರ , ಹಾಜರಿದ್ದರು.
