ಕೇಂದ್ರ ಸಚಿವ ಕಿರಣ್ ರಿಜಿಜು-ಕಾಂಗ್ರೆಸ್ ಸಂಸದೆ ರೇಣುಕಾ ನಡುವೆ 'ಶೂರ್ಪನಖಿ ನಗು' ಸಮರ!

ಹೊಸದಿಲ್ಲಿ,ಫೆ.8 : ತಾನು ಕೇಂದ್ರ ಗೃಹ ಖಾತೆಯ ಸಹಾಯಕ ಸಚಿವ ಕಿರೆಣ್ ರಿಜಿಜು ವಿರುದ್ಧ  ಹಕ್ಕುಚ್ಯುತಿ ನಿಲುವಳಿ ಮಂಡಿಸುವುದಾಗಿ ಕಾಂಗ್ರೆಸ್ ಸಂಸದೆ ರೇಣುಕಾ ಚೌಧುರಿ ಹೇಳಿದ್ದಾರೆ. ಶೂರ್ಪನಖಿ ನಗುತ್ತಿರುವ ವೀಡಿಯೋ ಒಂದನ್ನು ರಿಜಿಜು ಶೇರ್ ಮಾಡಿದ್ದೇ ರೇಣುಕಾ ಅವರ ಈ ನಿರ್ಧಾರಕ್ಕೆ ಕಾರಣವಾಗಿದೆ.

ಬುಧವಾರ ಪ್ರಧಾನಿ ನರೇಂದ್ರ ಮೋದಿ ರಾಜ್ಯಸಭೆಯಲ್ಲಿ ರಾಷ್ಟ್ರಪತಿಗಳ ಭಾಷಣಕ್ಕೆ ವಂದನಾ ನಿರ್ಣಯ ಮಂಡಿಸುತ್ತಿದ್ದ ಸಂದರ್ಭ  ಹೇಳಿದ ಕೆಲವೊಂದು ಮಾತುಗಳಿಗೆ ರೇಣುಕಾ ಅವರು ಜೋರಾಗಿ ನಕ್ಕಿದ್ದಕ್ಕೆ ಪ್ರಧಾನಿ ಅವರನ್ನು ಸೂಚ್ಯವಾಗಿ ಅಪಹಾಸ್ಯಗೈದಿದ್ದರು. ಇದರ ಬೆನ್ನಲ್ಲೇ ರಿಜಿಜು ಅವರು ಶೂರ್ಪನಖಿ ನಗುತ್ತಿರುವ ವೀಡಿಯೋ ಪೋಸ್ಟ್ ಮಾಡಿ  ರೇಣುಕಾ ಅವರನ್ನು ವಸ್ತುಶಃ ಶೂರ್ಪನಖಿಗೆ ಹೋಲಿಸಿದ್ದಾರೆ, ಇದೀಗ ಡಿಲೀಟ್ ಮಾಡಲ್ಪಟ್ಟ ಆ ಪೋಸ್ಟ್ ನಲ್ಲಿ ರಿಜಿಜು ಅವರು ರೇಣುಕಾ ಅವರ ಹೆಸರನ್ನು ಉಲ್ಲೇಖಿಸದೇ ಇದ್ದರೂ ಅದು ತನ್ನನ್ನು ಗುರಿಯಾಗಿಸಿಯೇ ಮಾಡಲಾದ ಪೋಸ್ಟ್ ಎಂದು ರೇಣುಕಾ ಬಲವಾಗಿ ನಂಬಿದ್ದಾರೆ. “ಅವರು ಮಹಿಳೆಯೊಬ್ಬರನ್ನು ಅವಮಾನಿಸಿದ್ದಾರೆ. ಇದು ಆಕ್ಷೇಪಾರ್ಹ,'' ಎಂದು ಸುದ್ದಿಗಾರರೊಡನೆ ಮಾತನಾಡುತ್ತಾ ರೇಣುಕಾ ಹೇಳಿದರು.

ಜುಲೈ 7, 1998ರಂದು ಆಗಿನ ಗೃಹ ಸಚಿವ ಎಲ್. ಕೆ. ಅಡ್ವಾಣಿಯವರು ಪ್ರಶ್ನೆಯೊಂದಕ್ಕೆ ಉತ್ತರಿಸುತ್ತಾ  ಬಹು ಉದ್ದೇಶೀಯ ಗುರುತು ಕಾರ್ಡುಗಳ ಅಗತ್ಯತೆಯ ಬಗ್ಗೆ ಹೇಳಿದ್ದರೆಂದೂ ಇದೇ ಆಧಾರ್ ಯೋಜನೆಗೆ ತಳಹದಿಯಾಯಿತೆಂದೂ ಪ್ರಧಾನಿ ರಾಜ್ಯಸಭೆಯಲ್ಲಿ ಹೇಳಿದಾಗ ಚೌಧುರಿ ಜೋರಾಗಿ ನಕ್ಕು ಅದಕ್ಕೆ ಪ್ರತಿಕ್ರಿಯೆ ನೀಡಬಯಸಿದ್ದರೂ ಸಭಾಪತಿ ವೆಂಕಯ್ಯ ನಾಯ್ಡು ಅವರನ್ನು ತಡೆದಿದ್ದರು.