ಅಧಿಕ ರಕ್ತದೊತ್ತಡ ತಗ್ಗಿಸಲು ಸರಳ ಮನೆಮದ್ದುಗಳು

ಅಧಿಕ ರಕ್ತದೊತ್ತಡ ಇಂದು ಜಗತ್ತಿನಲ್ಲಿ ಹಲವರನ್ನು ಕಾಡುತ್ತಿರುವ ಆರೋಗ್ಯ ಸಮಸ್ಯೆಯಾಗಿದೆ. ಅದು ಪಾರ್ಶ್ವವಾಯು, ಹೃದಯಾಘಾತ, ಅಂಧತ್ವ, ಮೂತ್ರಪಿಂಡಗಳಿಗೆ ಹಾನಿಯ ಜೊತೆಗೆ ಶರೀರದ ಪ್ರಮುಖ ಅಂಗಾಂಗಗಳ ಕಾರ್ಯ ನಿರ್ವಹಣೆಗೆ ಅಡ್ಡಿಯನ್ನುಂಟು ಮಾಡಬಲ್ಲುದು. ಹೀಗಾಗಿಯೇ ಅದು ‘ಸೈಲೆಂಟ್ ಕಿಲ್ಲರ್’ ಎಂಬ ಹೆಸರಿನಿಂದ ಕುಖ್ಯಾತವಾಗಿದೆ.

ಅಧಿಕ ರಕ್ತದೊತ್ತಡ ಸಮಸ್ಯೆ ವ್ಯಾಪಕವಾಗಿದೆಯಾದರೂ ಸೂಕ್ತ ಆಹಾರ ಪದ್ಧತಿ ಮತ್ತು ಔಷಧಿಗಳ ಮೂಲಕ ಅದನ್ನು ನಿಯಂತ್ರಣದಲ್ಲಿರಿಸಬಹುದು. ಜೀವನಶೈಲಿಯಲ್ಲಿ ಬದಲಾವಣೆಗಳು, ಪರ್ಯಾಯ ಔಷಧಿಗಳ ಜೊತೆಗೆ ಅಧಿಕ ರಕ್ತದೊತ್ತಡವನ್ನು ನಿಯಂತ್ರಿಸಲು ಪರಿಣಾಮಕಾರಿ ಮನೆಮದ್ದುಗಳೂ ಇವೆ. ಇಲ್ಲಿದೆ ಅಂತಹ ಕೆಲವು ಮನೆಮದ್ದುಗಳ ಕುರಿತು ಮಾಹಿತಿ......

♦ ತರಕಾರಿ ಮತ್ತು ಹಣ್ಣುಗಳು

ಬಹಳಷ್ಟು ತರಕಾರಿಗಳು ಮತ್ತು ಹಣ್ಣುಗಳು ಅಧಿಕ ರಕ್ತದೊತ್ತಡವನ್ನು ಪರಿಣಾಮಕಾರಿ ಯಾಗಿ ನಿಯಂತ್ರಿಸಬಲ್ಲ ಅಗತ್ಯ ಸಂಯುಕ್ತಗಳನ್ನು ಒಳಗೊಂಡಿವೆ. ಗಜ್ಜರಿ, ಟೊಮೆಟೊ, ಲಿಂಬೆ, ಬಾಳೇಹಣ್ಣು ಮತ್ತು ಕಲ್ಲಂಗಡಿ ಹಣ್ಣು ಇವುಗಳಲ್ಲಿ ಸೇರಿವೆ.

♦ ಚಹಾ

ಶುಂಠಿ, ಯಾಲಕ್ಕಿ ಇತ್ಯಾದಿಗಳನ್ನು ಬಳಸಿ ತಯಾರಿಸಲಾದ ಚಹಾ ಅಧಿಕ ರಕ್ತದೊತ್ತಡವನ್ನು ತಗ್ಗಿಸುವಲ್ಲಿ ಪರಿಣಾಮಕಾರಿಯಾಗಿದೆ. ಆರೋಗ್ಯವರ್ಧಕ ಪೇಯ ಗಳಾದ ಇವು ಉತ್ತಮ ಸ್ವಾದವನ್ನೂ ಹೊಂದಿರುತ್ತವೆ.
♦ ಎಳ್ಳೆಣ್ಣೆ
ಎಳ್ಳೆಣ್ಣೆಯು ಕೊಲೆಸ್ಟ್ರಾಲ್ ಮಟ್ಟವನ್ನು ತಗ್ಗಿಸಬಲ್ಲ ಒಳ್ಳೆಯ ಕೊಬ್ಬನ್ನೊಳಗೊಂಡಿದೆ. ಇದರ ಜೊತೆಗೆ ಅದರಲ್ಲಿರುವ ಉತ್ಕರ್ಷಣ ನಿರೋಧಕಗಳಾದ ಸಿಸೆಮಾಲ್ ಮತ್ತು ಸಿಸೆಮಿನ್ ಎಂಬ ರಾಸಾಯನಿಕಗಳು ಅಧಿಕ ರಕ್ತದೊತ್ತಡವನ್ನು ನಿಯಂತ್ರಿಸುತ್ತವೆ. ಹೀಗಾಗಿ ಅಧಿಕ ರಕ್ತದೊತ್ತಡದಿಂದ ಬಳಲುತ್ತಿರುವ ರೋಗಿಗಳು ಇತರ ಖಾದ್ಯತೈಲಗಳ ಬದಲು ಎಳ್ಳೆಣ್ಣೆಯನ್ನು ಬಳಸುವುದು ಹಿತಕರ.

♦ ಜೇನು

ಹಲವಾರು ಔಷಧೀಯ ಗುಣಗಳನ್ನು ಹೊಂದಿರುವ ಜೇನು ರಕ್ತದೊತ್ತಡವನ್ನು ತಗ್ಗಿಸುವಲ್ಲಿ ವಿಶೇಷ ಪರಿಣಾಮಕಾರಿಯಾಗಿದೆ ಎನ್ನುವುದು ಅಧ್ಯಯನಗಳಿಂದ ಸಾಬೀತಾಗಿದೆ. ರಕ್ತನಾಳಗಳನ್ನು ಸುಸ್ಥಿತಿಯಲ್ಲಿರಿಸುವ ಜೇನನ್ನು ಕಚ್ಚಾರೂಪದಲ್ಲಿ ಸೇವಿಸುವು ದರಿಂದ ರಕ್ತದೊತ್ತಡ ಮಟ್ಟವನ್ನು ನಿಯಂತ್ರಿಸಬಹುದು.

♦ ಗಿಡಮೂಲಿಕೆಗಳು,ಸಂಬಾರ ವಸ್ತುಗಳು

ಕೆಲವು ಗಿಡಮೂಲಿಕೆಗಳು, ಸಂಬಾರ ವಸ್ತುಗಳು ಮತ್ತು ಬೀಜಗಳು ಅಧಿಕ ರಕ್ತದೊತ್ತಡ ಚಿಕಿತ್ಸೆಯಲ್ಲಿ ಅತ್ಯುತ್ತಮ ಪರಿಣಾಮಗಳನ್ನು ಬೀರುವ ಗುಣಗಳನ್ನು ಹೊಂದಿವೆ. ಬೆಳ್ಳುಳ್ಳಿಯು ರಕ್ತವನ್ನು ತೆಳುವಾಗಿಸುತ್ತದೆ ಮತ್ತು ರಕ್ತನಾಳಗಳಲ್ಲಿ ರಕ್ತ ಹೆಪ್ಪುಗಟ್ಟುವುದನ್ನು ತಡೆಯುತ್ತದೆ. ಸೂರ್ಯಕಾಂತಿ ಬೀಜಗಳು ಕೊಲೆಸ್ಟ್ರಾಲ್ ಮಟ್ಟವನ್ನು ತಗ್ಗಿಸುತ್ತವೆ. ಸೆಲೆರಿ ಬೀಜಗಳಿಂದ ತೆಗೆದ ರಸ, ಅಗಸೆ ಬೀಜಗಳು, ಅರಿಷಿಣ,ಕಲ್ಲಂಗಡಿ ಬೀಜಗಳು ಇತ್ಯಾದಿಗಳು ಅಧಿಕ ರಕ್ತದೊತ್ತಡವನ್ನು ಪರಿಣಾಮಕಾರಿಯಾಗಿ ತಗ್ಗಿಸುವ ಗುಣಗಳನ್ನು ಹೊಂದಿವೆ.

♦ ಸೀಯಾಳ

ಸೀಯಾಳದ ನೀರಿನಲ್ಲಿ ಪೊಟ್ಯಾಷಿಯಂ ಸಮೃದ್ಧವಾಗಿದ್ದು, ಇದು ರಕ್ತದೊತ್ತಡವನ್ನು ತಗ್ಗಿಸುವಲ್ಲಿ ನೆರವಾಗುತ್ತದೆ. ನೈಸರ್ಗಿಕ ಪಾನೀಯವಾಗಿರುವ ಇದು ಆರೋಗ್ಯವರ್ಧಕ ವಾಗಿದ್ದು ರಕ್ತದೊತ್ತಡವನ್ನು ನಿಯಂತ್ರಣ ದಲ್ಲಿರಿಸುತ್ತದೆ.

♦ ಡಾರ್ಕ್ ಚಾಕಲೇಟ್

ಚಾಕಲೇಟ್‌ಗಳನ್ನು ಇಷ್ಟಪಡದವರು ಯಾರಿದ್ದಾರೆ? ಡಾರ್ಕ್ ಚಾಕಲೇಟ್‌ಗಳು ಅಧಿಕ ರಕ್ತದೊತ್ತಡವನ್ನು ನಿಯಂತ್ರಣದಲ್ಲಿರಿಸಲು ನೆರವಾಗುತ್ತವೆ. ಅದರ ಸಣ್ಣತುಂಡಿನ ಸೇವನೆಯು ಅಚ್ಚರಿದಾಯಕ ಪರಿಣಾಮಗಳನ್ನು ನೀಡುತ್ತದೆ.

♦ ಒಮೆಗಾ-3 ಫ್ಯಾಟಿ ಆ್ಯಸಿಡ್‌ಗಳು
 ಒಮೆಗಾ-3 ಫ್ಯಾಟಿ ಆ್ಯಸಿಡ್‌ಗಳನ್ನು ಒಳಗೊಂಡಿರುವ ಆಹಾರಗಳು ಅಧಿಕ ರಕ್ತದೊತ್ತಡವನ್ನು ಯಶಸ್ವಿಯಾಗಿ ನಿಯಂತ್ರಿಸುತ್ತವೆ. ಇದನ್ನು ಹಲವಾರು ಅಧ್ಯಯನಗಳು ಸಾಬೀತುಗೊಳಿಸಿವೆ.

♦ ವ್ಯಾಯಾಮ ಮತ್ತು ಸಂಗೀತ

ನಿಯಮಿತ ವ್ಯಾಯಾಮ ಮಾಡುವುದರಿಂದ ಮತ್ತು ಸಂಗೀತವನ್ನು ಕೇಳುವುದರಿಂದ ರಕ್ತದೊತ್ತಡವನ್ನು ಪರಿಣಾಮಕಾರಿ ಯಾಗಿ ನಿಯಂತ್ರಿಸಬಹುದು. ಇವು ಅಧಿಕ ರಕ್ತದೊತ್ತಡ ರೋಗಿಗಳು ಅನುಸರಿಸಬಹುದಾದ ಅತ್ಯಂತ ನೈಸರ್ಗಿಕ ಪರಿಹಾರ ಮಾರ್ಗಗಳಾಗಿವೆ.