ಗುಜರಾತ್ ವಿಜಯ್ ರೂಪಾನಿ ಅಪ್ಪನ ಆಸ್ತಿಯಲ್ಲ: ಜಿಗ್ನೇಶ್ ಮೇವಾನಿ

ಅಹ್ಮದಾಬಾದ್,ಫೆ.18: ದಲಿತ ಕಾರ್ಯಕರ್ತ ಭಾನುಭಾಯಿ ವಾಂಕರ್ ಶುಕ್ರವಾರ ಆಸ್ಪತ್ರೆಯಲ್ಲಿ ಕೊನೆಯುಸಿರೆಳೆದ ಹಿನ್ನೆಲೆಯಲ್ಲಿ ದಲಿತನಾಯಕ, ಗುಜರಾತ್ ಶಾಸಕ, ಜಿಗ್ನೇಶ್ ಮೇವಾನಿ, ಹಾರ್ದಿಕ್ ಪಟೇಲ್ ಮತ್ತು ಅಲ್ಪೇಶ್ ಠಾಕೂರ್ ಗುಜರಾತ್ ಸರಕಾರದ ವಿರುದ್ಧ ತೀವ್ರ ವಾಗ್ದಾಳಿ ಮುಂದುವರಿಸಿದ್ದಾರೆ.

ಅಹ್ಮದಾಬಾದ್-ಗಾಂಧಿನಗರ ಹೆದ್ದಾರಿಯಲ್ಲಿ ಪ್ರತಿಭಟನೆಯ ನೇತೃತ್ವ ವಹಿಸಿದ್ದ ವಡಗಾಮ್‌ನ ಪಕ್ಷೇತರ ದಲಿತ ಶಾಸಕ ಮೇವಾನಿ, ಮುಖ್ಯಮಂತ್ರಿ ವಿಜಯ್ ರೂಪಾನಿ ಮಾನಗೇಡಿಯಾಗಿದ್ದಾರೆ. ನಾಚಿಕೆಯಿಂದ ಅವರೇಕೆ ಸಾಯುತ್ತಿಲ್ಲ?, ಅವರು ನರ್ಮದಾ ನದಿಗೆ ಹಾರಿ ಆತ್ಮಹತ್ಯೆ ಮಾಡಿಕೊಳ್ಳುವುದು ಒಳ್ಳೆಯದು. ಗುಜರಾತ್ ಅವರ ಅಪ್ಪನ ಆಸ್ತಿಯಲ್ಲ ಎಂದು ಕಿಡಿಕಾರಿದರು. ರಾಜ್ಯದಲ್ಲಿ ಪ್ರತಿಭಟನೆಯನ್ನು ತೀವ್ರಗೊಳಿಸಲು ತನ್ನೊಂದಿಗೆ ಕೈ ಜೋಡಿಸುವಂತೆ ಅವರು ಹಾರ್ದಿಕ್ ಮತ್ತು ಠಾಕೂರ್ ಅವರನ್ನು ಕೋರಿಕೊಂಡರು.

ವಾಂಕರ್ ಅವರ ಕುಟುಂಬ ಸದಸ್ಯರನ್ನು ಭೇಟಿಯಾದ ಪಾಟಿದಾರ್ ನಾಯಕ ಹಾರ್ದಿಕ್ ಮತ್ತು ಒಬಿಸಿ ನಾಯಕ ಹಾಗೂ ಕಾಂಗ್ರೆಸ್ ಶಾಸಕ ಠಾಕೂರ್ ಅವರು, ದೃಢವಾದ ಕ್ರಮ ಮತ್ತು ದಲಿತ ಸಮುದಾಯಕ್ಕೆ ನ್ಯಾಯಕ್ಕಾಗಿ ಆಗ್ರಹಿಸಿದರು. ಗುಜರಾತ್ ವಿಧಾನಸಭೆಯಲ್ಲಿ ಪ್ರತಿಪಕ್ಷ ನಾಯಕ ಪರೇಶ್ ಧನಾನಿ ಅವರೂ ವಾಂಕರ್ ಕುಟುಂಬವನ್ನು ಭೇಟಿಯಾಗಿದ್ದರು.

ದಲಿತ ಕುಟುಂಬವೊಂದಕ್ಕೆ ಮಂಜೂರಾಗಿರುವ ಭೂಮಿಯನ್ನು ಅವರಿಗೆ ಹಸ್ತಾಂತರಿ ಸುವಂತೆ ಬೇಡಿಕೆಯನ್ನು ಮಂಡಿಸಿದ್ದ ವಾಂಕರ್(60) ಗುರುವಾರ ಪಾಟಣ್ ಜಿಲ್ಲಾಧಿಕಾರಿಗಳ ಕಚೇರಿಯ ಆವರಣದಲ್ಲಿ ಮೈಗೆ ಬೆಂಕಿ ಹಚ್ಚಿಕೊಂಡಿದ್ದು, ತೀವ್ರ ಸುಟ್ಟಗಾಯಗಳಿಂದ ಶುಕ್ರವಾರ ರಾತ್ರಿ ಅಹ್ಮದಾಬಾದ್‌ನ ಖಾಸಗಿ ಆಸ್ಪತ್ರೆಯಲ್ಲಿ ಕೊನೆಯುಸಿರೆಳೆದಿದ್ದರು.

ವಾರದ ಹಿಂದೆಯೇ ಅಧಿಕಾರಿಗಳಿಗೆ ನೋಟಿಸ್ ನೀಡಿದ್ದ ವಾಂಕರ್ ಅವರು ಪಾಟಣ್ ಜಿಲ್ಲಾಧಿಕಾರಿಗಳ ಕಚೇರಿಯ ಆವರಣದಲ್ಲಿ ಪೊಲೀಸರು, ಆ್ಯಂಬುಲೆನ್ಸ್ ಮತ್ತು ಅಗ್ನಿಶಾಮಕ ದಳದ ಉಪಸ್ಥಿತಿಯಲ್ಲಿಯೇ ಆತ್ಮಾಹುತಿ ಮಾಡಿಕೊಂಡಿದ್ದು ಜನರಲ್ಲಿ ವ್ಯಾಪಕ ಆಕ್ರೋಶವನ್ನು ಹುಟ್ಟುಹಾಕಿದೆ. ರಾಜ್ಯ ಸರಕಾರವು ದಲಿತ ಕುಟುಂಬಗಳಿಗೆ ಮಂಜೂರು ಮಾಡಿರುವ ಭೂಮಿಯನ್ನು ಅವುಗಳಿಗೆ ಹಸ್ತಾಂತರಿಸುವಂತೆ ವಾಂಕರ್ ಕೆಲವು ಕಾಲದಿಂದ ಒತ್ತಾಯಿಸುತ್ತಲೇ ಇದ್ದರು.

ಗುರುವಾರ ಹೇಮಾಬೆನ್ ಮತ್ತು ರಾಮಭಾಯಿ ಅವರ ಕುಟುಂಬದೊಂದಿಗೆ ಜಿಲ್ಲಾಧಿಕಾರಿಗಳ ಕಚೇರಿಗೆ ಆಗಮಿಸಿದ್ದ ವಾಂಕರ್ ತನ್ನ ಮೈಮೇಲೆ ಸೀಮೆಎಣ್ಣೆ ಸುರಿದುಕೊಂಡು ಬೆಂಕಿ ಹಚ್ಚಿಕೊಂಡಿದ್ದರು. ಶೇ.96ರಷ್ಟು ಸುಟ್ಟಗಾಯಗಳಾಗಿದ್ದ ಅವರು ಆಸ್ಪತ್ರೆಗೆ ದಾಖಲಾಗಿದ್ದಾಗಿನಿಂದಲೂ ಚಿಂತಾಜನಕ ಸ್ಥಿತಿಯಲ್ಲೇ ಇದ್ದರು.

ವಾಂಕರ್ ಸಾವಿನ ನಂತರ ಶುಕ್ರವಾರ ರಾತ್ರಿ ಮತ್ತು ಶನಿವಾರ ರಾಜ್ಯಾದ್ಯಂತ ದಲಿತ ಕಾರ್ಯಕರ್ತರ ಸರಣಿ ಪ್ರತಿಭಟನೆಗಳು ನಡೆದಿದ್ದು, ಹಲವೆಡೆ ವಾಹನಗಳ ಸಂಚಾರಕ್ಕೆ ತಡೆಯೊಡ್ಡಿ, ಟೈರ್‌ಗಳಿಗೆ ಬೆಂಕಿ ಹಚ್ಚಲಾಗಿತ್ತು.

ವಾಂಕರ್ ಶವವನ್ನು ಸ್ವೀಕರಿಸಲು ನಿರಾಕರಿಸಿರುವ ಅವರ ಕುಟುಂಬವು ರಾಜ್ಯ ಸರಕಾರದ ಮುಂದೆ ಏಳು ಬೇಡಿಕೆಗಳನ್ನು ಮಂಡಿಸಿದೆ. ವಾಂಕರ್ ಅವರ ಶವವನ್ನಿರಿಸಲಾಗಿರುವ ಗಾಂಧಿನಗರದ ಆಸ್ಪತ್ರೆಯಲ್ಲಿ ಸೇರಿದ್ದ ಜನರು ಸಂತ್ರಸ್ತ ಕುಟುಂಬವನ್ನು ಭೇಟಿಯಾಗಲು ಆಗಮಿಸಿದ್ದ ಬಿಜೆಪಿಯ ದಲಿತ ಶಾಸಕರಾದ ಕರ್ಸನ್ ಸೋಲಂಕಿ(ಕಡಿ) ಮತ್ತು ಹಿತು ಕನೋದಿಯಾ(ಇದಾರ್) ಅವರನ್ನು ಹಿಂದಕ್ಕೆ ಕಳುಹಿಸಿದರು. ಆದರೆ ಪಟೇಲ್ ಮತ್ತು ಠಾಕೂರ್ ಕುಟುಂಬವನ್ನು ಭೇಟಿಯಾಗಲು ಅವರು ಅವಕಾಶ ನೀಡಿದರು.

ದಲಿತ ಕಾರ್ಯಕರ್ತರು ಮತ್ತು ವಾಂಕರ್ ಕುಟುಂಬದೊಂದಿಗೆ ಮಾತುಕತೆಗಾಗಿ ಸರಕಾರವು ಗಾಂಧಿನಗರ ಜಿಲ್ಲಾಧಿಕಾರಿ, ಐಜಿಪಿ ಮತ್ತು ಸಾಮಾಜಿಕ ಸಬಲೀಕರಣ ಕಾರ್ಯದರ್ಶಿ ಅವರನ್ನೊಳಗೊಂಡ ನಿಯೋಗವೊಂದನ್ನು ಕಳುಹಿಸಿತ್ತಾದರೂ, ಬಿಕ್ಕಟ್ಟನ್ನು ಬಗೆಹರಿಸುವಲ್ಲಿ ಈ ಭೇಟಿ ವಿಫಲಗೊಂಡಿದೆ.

ವಾಂಕರ್ ಕುಟುಂಬದ ಪ್ರಮುಖ ಬೇಡಿಕೆಗಳನ್ನು ಒಪ್ಪಿಕೊಂಡಿರುವುದಾಗಿ ಸರಕಾರವು ಹೇಳಿದೆಯಾದರೂ ಲಿಖಿತ ರೂಪದಲ್ಲಿ ಸ್ಪಷ್ಟ ಭರವಸೆಗಾಗಿ ದಲಿತರು ಪಟ್ಟು ಹಿಡಿದಿದ್ದಾರೆ.

ಅವರ ಎಲ್ಲ ಪ್ರಮುಖ ಬೇಡಿಕೆಗಳನ್ನು ನಾವು ಒಪ್ಪಿಕೊಂಡಿದ್ದೇವೆ. ವಾಂಕರ್ ಅವರು ಹೋರಾಟ ನಡೆಸುತ್ತಿದ್ದ ಕುಟುಂಬದ ಹೆಸರಿನಲ್ಲಿ ಭೂಮಿಯನ್ನು ಕಾನೂನುಬದ್ಧವಾಗಿ ವರ್ಗಾಯಿಸುತ್ತೇವೆ. ವಾಂಕರ್ ಕುಟುಂಬಕ್ಕೆ ಎಂಟು ಲ.ರೂ.ಪರಿಹಾರ ನೀಡುತ್ತೇವೆ ಮತ್ತು ಸರಕಾರಿ ನೌಕರರಾಗಿರುವ ಅವರ ಕುಟುಂಬ ಸದಸ್ಯರನ್ನು ಅವರ ಊರಿಗೆ ಸಮೀಪವೇ ವರ್ಗಾವಣೆಗೊಳಿಸುತ್ತೇವೆ ಎಂದು ಉಪ ಮುಖ್ಯಮಂತ್ರಿ ನಿತಿನ್ ಪಟೇಲ್ ಅವರು ಸುದ್ದಿಗಾರರಿಗೆ ತಿಳಿಸಿದರು.

ವಾಂಕರ್ ಕುಟುಂಬವು ಒಪ್ಪಿಕೊಂಡಿರುವಂತೆ ನಿವೃತ್ತ ಉಚ್ಚ ನ್ಯಾಯಾಲಯದ ನ್ಯಾಯಾಧೀಶರ ನೇತೃತ್ವದಲ್ಲಿ ವಿಚಾರಣಾ ಆಯೋಗ ಅಥವಾ ವಿಶೇಷ ತನಿಖಾ ತಂಡವನ್ನೂ ಸರಕಾರವು ರಚಿಸಲಿದೆ ಎಂದೂ ಅವರು ಹೇಳಿದರು.

ಆದರೆ ಸರಕಾರದ ಭರವಸೆಗಳಿಗೆ ಪ್ರತಿಭಟನಾಕಾರರನ್ನು ಮಣಿಸಲು ಸಾಧ್ಯವಾಗಿಲ್ಲ. ಮೇವಾನಿ ನೇತೃತ್ವದಲ್ಲಿ ವ್ಯಾಪಕ ಪ್ರತಿಭಟನೆಗಳು ನಡೆದಿವೆ.

ರಾಜ್ಯದ್ಯಂತ 33 ಜಿಲ್ಲೆಗಳಲ್ಲಿ ಭೂರಹಿತ ದಲಿತರಿಗೆ ಭೂಮಿಯನ್ನು ಹಸ್ತಾಂತರಿಸಲು ಮುಖ್ಯ ಕಾರ್ಯದರ್ಶಿಗಳು ಅಧಿಸೂಚನೆಯನ್ನು ಹೊರಡಿಸಬೇಕು. ಅಲ್ಲಿಯವರೆಗೂ ನಾವು ನಮ್ಮ ಹೋರಾಟವನ್ನು ಮುಂದುವರಿಸುತ್ತೇವೆ ಎಂದು ಮೇವಾನಿ ಘೋಷಿಸಿದರು.