ಜಾಗತಿಕ ಭ್ರಷ್ಟಾಚಾರ ಸೂಚ್ಯಂಕ: ಭಾರತದ ಸ್ಥಾನವೆಷ್ಟು ಗೊತ್ತಾ?

 ಹೊಸದಿಲ್ಲಿ,ಫೆ.22: ಜಾಗತಿಕ ಭ್ರಷ್ಟಾಚಾರ ಸೂಚ್ಯಂಕದಲ್ಲಿ ಭಾರತವು 81ನೇ ಸ್ಥಾನವನ್ನು ಪಡೆದಿದೆ. ಟ್ರಾನ್ಸ್‌ಪರೆನ್ಸಿ ಇಂಟರ್‌ನ್ಯಾಶನಲ್ ಬಿಡುಗಡೆಗೊಳಿಸಿದ ಈ ಸೂಚ್ಯಂಕದಲ್ಲಿ ಏಶ್ಯ ಪೆಸಿಫಿಕ್ ಪ್ರಾಂತದಲ್ಲಿ ಲಂಚಗುಳಿತನ ಹಾಗೂ ಪತ್ರಿಕಾ ಸ್ವಾತಂತ್ರದ ಉಲ್ಲಂಘನೆಯ ಗರಿಷ್ಠ ಪ್ರಕರಣಗಳು ವರದಿಯಾದ ರಾಷ್ಟ್ರಗಳ ಸಾಲಿನಲ್ಲಿಯೂ ಭಾರತ ಸ್ಥಾನ ಪಡೆದುಕೊಂಡಿದೆ.

 2017ರ ಸಾಲಿನಲ್ಲಿ ಸಾರ್ವಜನಿಕರಂಗದ ಭ್ರಷ್ಟಾಚಾರಕ್ಕೆ ಸಂಬಂಧಿಸಿ 180 ದೇಶಗಳು ಹಾಗೂ ಪ್ರಾಂತಗಳಿಗೆ ರ್ಯಾಂಕಿಂಗ್ ನೀಡಿರುವ ಈ ಸೂಚ್ಯಂಕದಲ್ಲಿ ಭಾರತವು 81 ಸ್ಥಾನದಲ್ಲಿದೆ. 2016ರ ಸೂಚ್ಯಂಕದಲ್ಲಿ ಭಾರತವು 176 ರಾಷ್ಟ್ರಗಳ ಪೈಕಿ 79ನೇ ರ್ಯಾಂಕ್ ಪಡೆದಿತ್ತು.

ಸಿರಿಯ, ದಕ್ಷಿಣ ಸುಡಾನ್ ಹಾಗೂ ಸೊಮಾಲಿಯಾ ದೇಶಗಳು ಕ್ರಮವಾಗಿ 14,12 ಹಾಗೂ 9 ರ್ಯಾಂಕ್‌ಗಳೊಂದಿಗೆ ಅತ್ಯಂತ ಕಳಪೆ ಸ್ಥಾನದಲ್ಲಿವೆ.

  ಈ ಸೂಚ್ಯಂಕವು 0 ರಿಂದ 100 ಅಂಕಗಳನ್ನು ಮಾನದಂಡವಾಗಿ ಬಳಸಿಕೊಂಡಿದ್ದು, 0 ಅಂಕವು ಅತ್ಯಧಿಕ ಭ್ರಷ್ಟಾಚಾರವೆನಿಸಿದ್ದರೆ, 100ನೇ ಅಂಕವು ಅತ್ಯಂತ ಭ್ರಷ್ಟಾಚಾರ ಮುಕ್ತವೆಂದು ಪರಿಗಣಿಸಲಾಗಿದೆ.

ನೂತನ ರ್ಯಾಂಕಿಂಗ್‌ನಲ್ಲಿ ನ್ಯೂಝಿಲ್ಯಾಂಡ್ ಹಾಗೂ ಡೆನ್ಮಾರ್ಕ್ ಕ್ರಮವಾಗಿ 89 ಹಾಗೂ 88 ಅಂಕಗಳನ್ನು ಪಡೆದಿದ್ದು ಕಡಿಮೆ ಭ್ರಷ್ಟಾಚಾರವಿರುವ ರಾಷ್ಟ್ರಗಳ ಪೈಕಿ ಮುಂಚೂಣಿಯಲ್ಲಿವೆ. 41 ಅಂಕಗಳನ್ನು ಪಡೆದಿರುವ ಚೀನಾವು ಪಟ್ಟಿಯಲ್ಲಿ 71ನೇ ಸ್ಥಾನದಲ್ಲಿದ್ದರೆ, 37 ಅಂಕಗಳೊಂದಿಗೆ ಬ್ರೆಝಿಲ್ 96ನೇ ಸ್ಥಾನದಲ್ಲಿದೆ. 29 ಅಂಕ ಪಡೆದಿರುವ ರಶ್ಯವು 135ನೇ ರ್ಯಾಂಕ್ ಪಡೆದುಕೊಂಡಿದೆ.

 ಆದಾಗ್ಯೂ, ನೂತನ ರ್ಯಾಂಕಿಂಗ್‌ನಲ್ಲಿ ಭಾರತದ ಅಂಕವು ಹಿಂದಿನ ಸಾಲಿನಂತೆ 40ರಲ್ಲಿಯೇ ಉಳಿದುಕೊಂಡಿದೆ. 2015ರಲ್ಲಿ ಭಾರತವು 38 ಅಂಕಗಳನ್ನು ಪಡೆದಿತ್ತು. ನೆರೆಯ ರಾಷ್ಟ್ರವಾದ ಪಾಕಿಸ್ತಾನವು 32 ಅಂಕಗಳನ್ನು ಪಡೆದಿದ್ದು, 117ನೇ ರ್ಯಾಂಕ್ ಗಳಿಸಿದೆ.

‘‘ ಏಶ್ಯ ಪೆಸಿಫಿಕ್ ಪ್ರಾಂತದ ಕೆಲವು ರಾಷ್ಟ್ರಗಳಲ್ಲಿ ಪತ್ರಕರ್ತರು, ಸಾಮಾಜಿಕ ಕಾರ್ಯಕರ್ತರು, ಪ್ರತಿಪಕ್ಷ ನಾಯಕರು ಹಾಗೂ ಕಾನೂನು ಅನುಷ್ಠಾನ ಸಿಬ್ಬಂದಿ ಅಥವಾ ಕಣ್ಗಾವಲು ಸಂಸ್ಥೆಗಳು ಬೆದರಿಕೆಗೊಳಗಾಗುತ್ತಿವೆ, ಕೆಲವು ಪ್ರಕರಣಗಳಲ್ಲಂತೂ ಹತ್ಯೆಗಳೂ ನಡೆದಿವೆ’’ ಎಂದು ಟ್ರಾನ್ಸ್‌ಪರೆನ್ಸಿ ಇಂಟರ್‌ನ್ಯಾಶನಲ್ ತನ್ನ ವರದಿಯಲ್ಲಿ ತಿಳಿಸಿದೆ.

ಏಶ್ಯ ಪೆಸಿಫಿಕ್ ಪ್ರಾಂತದಲ್ಲಿರು ರಾಷ್ಟ್ರಗಳ ಪೈಕಿ ಫಿಲಿಪ್ಪೀನ್ಸ್, ಭಾರತ ಹಾಗೂ ಮಾಲ್ಡೀವ್ಸ್‌ಗಳಲ್ಲಿ ಭ್ರಷ್ಟಾಚಾರ ಅತ್ಯಧಿಕವಾಗಿದೆ ಹಾಗೂ ಪತ್ರಿಕಾ ಸ್ವಾತಂತ್ರ್ಯ ಕಡಿಮೆಯಿದೆ ಮತ್ತು ಪತ್ರಕರ್ತರ ಹತ್ಯೆಯ ಘಟನೆಗಳು ಅತ್ಯಧಿಕವಾಗಿ ವರದಿಯಾಗಿರುವೆಯೆಂದು ಅದು ಹೇಳಿದೆ.

ಕಳೆದ ಆರು ವರ್ಷಗಳಿಂದೀಚೆಗೆ ಈ ದೇಶಗಳಲ್ಲಿ ಭ್ರಷ್ಟಾಚಾರ ಕುರಿತ ವರದಿಗಳ ತಯಾರಿಯಲ್ಲಿ ತೊಡಗಿದ್ದ ಸುಮಾರು 15 ಪತ್ರಕರ್ತರು ಕೊಲೆಯಾಗಿದ್ದಾರೆಂದು ಪತ್ರಕರ್ತರ ರಕ್ಷಣಾ ಸಮಿತಿ(ಸಿಪಿಜೆ)ಯೊಂದು ಪ್ರಕಟಿಸಿದ ವರದಿಯನ್ನು ಟ್ರಾನ್ಸ್‌ಪರೆನ್ಸಿ ಇಂಟರ್‌ನ್ಯಾಶನಲ್ ಈ ಸಂದರ್ಭದಲ್ಲಿ ಪ್ರಸ್ತಾಪಿಸಿದೆ.