ತುಮ್ಹಾರಿ ಸುಲು ತಮಿಳು ರಿಮೇಕ್ ಗೆ ಜ್ಯೋತಿಕಾ
ಕಳೆದ ವರ್ಷ ಪ್ರೇಕ್ಷಕರಿಂದಲೂ, ವಿಮರ್ಶಕರಿಂದಲೂ ಮೆಚ್ಚುಗೆಗೆ ಪಾತ್ರವಾಗಿರುವ ತುಮ್ಹಾರಿ ಸುಲು ಇದೀಗ ತಮಿಳಿಗೆ ರಿಮೇಕ್ ಆಗುತ್ತಿದೆ. ಚಿತ್ರದಲ್ಲಿ ನಾಯಕಿಯಾಗಿ ಜ್ಯೋತಿಕಾ ನಟಿಸುತ್ತಿದ್ದಾರೆ. ‘ಮೋಳಿ’, ‘ಅಭಿಯುಂ ನಾನುಂ’ ಅಂತಹ ಕೆಲವು ಹೃದಯಸ್ಪರ್ಶಿ ಕಥೆಯುಳ್ಳ ಚಿತ್ರ ಗಳನ್ನು ನೀಡಿರುವ ರಾಧಾಮೋಹನ್ ಈ ಚಿತ್ರಕ್ಕೆ ಆ್ಯಕ್ಷನ್ ಕಟ್ ಹೇಳುತ್ತಿದ್ದಾರೆ. ಚಿತ್ರದ ಬಗ್ಗೆ ಜ್ಯೋತಿಕಾ ಹಾಗೂ ರಾಧಾಮೋಹನ್ ಅಂತಿಮ ಸುತ್ತಿನ ಮಾತುಕತೆ ನಡೆಸುತ್ತಿದ್ದು, ಶೀಘ್ರದಲ್ಲೇ ಈ ಬಗ್ಗೆ ಅಧಿಕೃತ ಪ್ರಕಟನೆೆ ಹೊರಬೀಳಲಿದೆ.
ಜ್ಯೋತಿಕಾ ಸದ್ಯ ಮಣಿರತ್ನಂ ನಿರ್ದೇಶನದ ಚಿತ್ರದ ಶೂಟಿಂಗ್ನಲ್ಲಿ ನಿರತರಾಗಿದ್ದರೆ, ರಾಧಾ ಮೋಹನ್ ಅವರು ಉದಯೋನ್ಮುಖ ನಟ ವಿಕ್ರಮ್ ಪ್ರಭು ನಾಯಕನಾಗಿ ರುವ ಚಿತ್ರದ ನಿರ್ದೇಶನದ ಕೆಲಸದಲ್ಲಿ ಮಗ್ನರಾಗಿದ್ದಾರೆ. ಈ ಚಿತ್ರದ ಕೆಲಸ ಪೂರ್ಣಗೊಳ್ಳುತ್ತಿದ್ದಂತೆಯೇ, ರಾಧಾಮೋಹನ್ ಅವರು ತುಮ್ಹಾರಿ ಸುಲು ಚಿತ್ರದ ರಿಮೇಕ್ ಪ್ರಾಜೆಕ್ಟ್ ಕೈಗೆತ್ತಿಕೊಳ್ಳಲಿದ್ದಾರೆ.
ಈ ಮೊದಲು ಜ್ಯೋತಿಕಾ ಅವರು ರಾಧಾಮೋಹನ್ ನಿರ್ದೇಶನದ ಮೋಳಿ ಚಿತ್ರದಲ್ಲಿ ನಟಿಸಿದ್ದರು. ಮೋಳಿಯಲ್ಲಿ ಜ್ಯೋತಿಕಾರ ಮೂಕ ಹಾಗೂ ಕಿವುಡು ಯುವತಿಯ ಪಾತ್ರ ಭಾರೀ ಪ್ರಶಂಸೆ ಗಿಟ್ಟಿಸಿತ್ತು. ಮಹಿಳಾ ಪ್ರಧಾನ ಕಥಾವಸ್ತುವಿರುವ ಈ ಚಿತ್ರಕ್ಕೆ ವಿಮರ್ಶಕರು ಹಾಗೂ ಪ್ರೇಕ್ಷಕರ ಮುಕ್ತಕಂಠದ ಪ್ರಶಂಸೆ ದೊರೆತಿತ್ತು.
ತುಮ್ಹಾರಿ ಸುಲುವಿನಲ್ಲಿ ರೇಡಿಯೊ ಜಾಕಿಯಾಗಿ ವಿದ್ಯಾಬಾಲನ್ ಅವರ ಅಭಿನಯಕ್ಕೆ ಭಾರೀ ಪ್ರಶಂಸೆ ವ್ಯಕ್ತವಾಗಿತ್ತು. ಇದೀಗ ಆ ಪಾತ್ರ ವನ್ನು ತಮಿಳಿನಲ್ಲಿ ನಟಿಸುವುದಕ್ಕೆ ಜ್ಯೋತಿಕಾರಷ್ಟು ಉತ್ತಮ ಆಯ್ಕೆ ಮತ್ತೊಬ್ಬರಿರಲಾರರು ಎಂಬ ಮಾತುಗಳು ತಮಿಳು ಚಿತ್ರರಂಗದಲ್ಲಿ ಕೇಳಿಬರುತ್ತಿದೆ.
ಜ್ಯೋತಿಕಾ ನಾಯಕಿಯಾಗಿ ನಟಿಸಿರುವ ನಾಚಿಯಾರ್ ಕಳೆದ ವಾರ ತೆರೆಕಂಡಿದ್ದು, ಪ್ರೇಕ್ಷಕರಿಂದ ಉತ್ತಮ ಪ್ರತಿಕ್ರಿಯೆ ವ್ಯಕ್ತವಾಗಿದೆ.
