ಓ ಮೆಣಸೇ..
ನಾವು ಮೋದಿ ಮುಕ್ತ ಭಾರತ ನೋಡುವ ಕನಸು ಕಾಣುತ್ತಿದ್ದೇವೆ - ರಾಜ್ ಠಾಕ್ರೆ, ಎಂ.ಎನ್.ಎಸ್.ನಾಯಕ್
ಬಿಜೆಪಿಯೊಳಗೂ ಇದೇ ಕನಸು ಕಾಣುತ್ತಿರುವ ಹಲವರಿದ್ದಾರೆ.
---------------------
ಮಹಾತ್ಮಾಗಾಂಧಿ ಕಟ್ಟಾ ಹಿಂದೂ ಆಗಿದ್ದರು - ಮೋಹನ್ ಭಾಗವತ್, ಆರೆಸ್ಸೆಸ್ ಮುಖ್ಯಸ್ಥ
ಅದಕ್ಕಾಗಿಯೇ ತಾನೆ ಅವರನ್ನು ಕೊಂದಿರುವುದು.
---------------------
ವೀರಶೈವರು, ಲಿಂಗಾಯತರು ಹಿಂದೂ ಧರ್ಮದಿಂದ ಹೊರ ಹೋಗುವುದರಲ್ಲಿ ಅರ್ಥವಿಲ್ಲ - ವಿಶ್ವೇಶತೀರ್ಥ ಸ್ವಾಮೀಜಿ, ಪೇಜಾವರ ಮಠ
ಬ್ರಾಹ್ಮಣ ಧರ್ಮ ಹೊರಗೆ ಹೋಗುವುದಾದರೆ ನಾವು ಒಳಗುಳಿಯುತ್ತೇವೆ ಎನ್ನುವುದು ಅವರ ವಾದ.
---------------------
ಜೆಡಿಎಸ್ಗೆ ಅಧಿಕಾರ ನೀಡಿದರೆ ವಿಧಾನಸೌಧವನ್ನೇ ನಿಮ್ಮ ಮನೆಬಾಗಿಲಿಗೆ ತರುತ್ತೇನೆ - ಎಚ್.ಡಿ.ಕುಮಾರಸ್ವಾಮಿ, ಮಾಜಿ ಮುಖ್ಯಮಂತ್ರಿ
ನಿಮ್ಮ ಮನೆ ಬಾಗಿಲಿಗೆ?
---------------------
ಜಾತಿ ಜಗಳ ಹೆಚ್ಚಿಸುವುದರಲ್ಲಿ ಕಾಂಗ್ರೆಸ್ ಎತ್ತಿದ ಕೈ - ಡಿ.ವಿ.ಸದಾನಂದ ಗೌಡ,
ಕೇಂದ್ರ ಸಚಿವ ಯಡಿಯೂರಪ್ಪ-ಈಶ್ವರಪ್ಪರ ಜಗಳ ಯಾರು ಹುಟ್ಟಿಸಿ ಹಾಕಿದ್ದು?
---------------------
ಮಂಡ್ಯದಲ್ಲಿ ಕಾಂಗ್ರೆಸ್ಗೆ ನನ್ನಂತಹ ಲೀಡರ್ ಸಿಗ್ತಾರಾ? - ಅಂಬರೀಷ್, ಶಾಸಕ
ಕಾಂಗ್ರೆಸ್ನ ದಯನೀಯ ಸ್ಥಿತಿಗೆ ಹಿಡಿದ ಕನ್ನಡಿ ನೀವು.
---------------------
ಬಿಜೆಪಿಯ ಷಡ್ಯಂತ್ರದಿಂದಾಗಿ ನಾನು 16ದಿನ ಜೈಲಿನಲ್ಲಿರಬೇಕಾಯಿತು - ಪ್ರಮೋದ್ ಮುತಾಲಿಕ್, ಶ್ರೀರಾಮಸೇನೆ ಮುಖಂಡ
ಜೀವನಪೂರ್ತಿ ಜೈಲಲ್ಲಿರಬೇಕಾಗಿತ್ತು ನೀವು. ನಿಜಕ್ಕೂ ಬಿಜೆಪಿಯದು ಷಡ್ಯಂತರವೇ ಸರಿ.
---------------------
ಕಾಂಗ್ರೆಸ್ಗೆ ಹಿಂದಿನಿಂದ ಚೂರಿಹಾಕಿದವರು ಯಾರೂ ಯಶಸ್ಸು ಕಂಡಿಲ್ಲ - ಅಭಯಚಂದ್ರ ಜೈನ್, ಶಾಸಕ
ಮುಂದಿನಿಂದಲೇ ಚೂರಿ ಹಾಕಿ ಎಂದು ಸಲಹೆಯೆ?
--------------------
ತಂದೆ, ಚಿಕ್ಕಪ್ಪ ಸೇರಿ ನನ್ನ ಪೂರ್ವಜರು ಮೂಲತಃ ಕಾಂಗ್ರೆಸಿಗರು - ಅಶೋಕ್ ಖೇಣಿ, ಶಾಸಕ
ಮನುಷ್ಯರ ಪೂರ್ವಜರ ಬಗ್ಗೆ ಡಾರ್ವಿನ್ ಬೇರೆಯೇ ತರ್ಕವನ್ನು ಹೊಂದಿದ್ದಾನೆ.
---------------------
ನನ್ನ ಹಿಂದಿರುವುದು ದೇವರು ಮತ್ತು ಜನರೇ ಹೊರತು ಬಿಜೆಪಿ ಅಲ್ಲ - ರಜನಿಕಾಂತ್, ನಟ
ನಿಮ್ಮ ಮುಂದೆ ಇರುವುದರ ಕುರಿತಂತೆ ಜನರಿಗೆ ಅನುಮಾನವಿದೆ.
---------------------
ಶಿರೂರು ಸ್ವಾಮೀಜಿ ಮಾತುಗಳು ಸಂಶಯಾಸ್ಪದ -ರಘುಪತಿ ಭಟ್, ಮಾಜಿ ಶಾಸಕ
ಏನಿದ್ದೂ ಪದ್ಮಪ್ರಿಯ ಸಾವಿನಷ್ಟು ಅಲ್ಲ.
---------------------
ನಮೋ ಎಂದರೆ ನಮಗೇ ಮೋಸ - ಪ್ರಮೋದ್ ಮಧ್ವರಾಜ್, ಸಚಿವ
ಅಗತ್ಯ ಬಿದ್ದರೆ ಕಾಂಗ್ರೆಸ್ಗೆ ಮೋಸ.
---------------------
ರಾಜಕಾರಣಿಗಳಿಗೆ ಧಾರ್ಮಿಕ ವಿಚಾರಗಳನ್ನು ಬಗೆಹರಿಸುವ ಯೋಗ್ಯತೆ ಇನ್ನೂ ಬಂದಿಲ್ಲ - ಸಿ.ಟಿ.ರವಿ, ಶಾಸಕ
ಧಾರ್ಮಿಕ ವಿಚಾರಗಳನ್ನು ರಾಜಕೀಯಗೊಳಿಸುವ ಯೋಗ್ಯತೆಯಷ್ಟೇ ಅವರದು.
---------------------
ದೇಶಕ್ಕಾಗಿ ಸಾಯುವುದಲ್ಲ, ದೇಶಕ್ಕಾಗಿ ಬದುಕಬೇಕು ಎಂದು ಆರೆಸ್ಸೆಸ್ ನಮಗೆ ಹೇಳಿಕೊಟ್ಟಿದೆ - ಕಲ್ಲಡ್ಕ ಪ್ರಭಾಕರ್ ಭಟ್, ಆರೆಸ್ಸೆಸ್ ಪ್ರಮುಖ್
ಇತರರನ್ನು ಸಾಯಿಸಿ ನೀವೊಬ್ಬರೇ ಬದುಕುವುದೇ?
---------------------
ಬಿಜೆಪಿಯಲ್ಲಿ ಜೈಲಿಗೆ ಹೋಗದೇ ಇದ್ದವರು ಯಾರಾದರೂ ಇದ್ದರೆ ಕಾಂಗ್ರೆಸ್ಗೆ ಬರಲಿ - ಶಾಮನೂರು ಶಿವಶಂಕರಪ್ಪ, ಶಾಸಕ
ಮುಂದಿನ ಬಾರಿ ಬಿಜೆಪಿಯ ಶಾಸಕಾಂಗ ಸಭೆ ಜೈಲಿನಲ್ಲೇ ಹಮ್ಮಿಕೊಳ್ಳುತ್ತಾರಂತೆ.
---------------------
ಬಿಜೆಪಿ ಕೌರವರ ಪಕ್ಷ, ಕಾಂಗ್ರೆಸ್ ಪಾಂಡವರು - ರಾಹುಲ್ಗಾಂಧಿ, ಕಾಂಗ್ರೆಸ್ ಅಧ್ಯಕ್ಷ
ಸೀರೆ ಎಳೆಸಿಕೊಳ್ಳುವವರು ಯಾರು?
---------------------
ಬ್ರಾಹ್ಮಣರೂ ಪ್ರತ್ಯೇಕ ಧರ್ಮದ ಮಾನ್ಯತೆ ಪಡೆದರೆ ತಪ್ಪೇನಿಲ್ಲ - ಎಂ.ಬಿ.ಪಾಟೀಲ್, ಸಚಿವ
ದೇಶದ ಸರ್ವ ಸಾಮಾಜಿಕ ಸಮಸ್ಯೆಗಳಿಗೆ ಅದುವೇ ಪರಿಹಾರ.
---------------------
ನನ್ನ ರಾಜಕೀಯ ಏಳಿಗೆಗೆ ಸಂಘ ಪರಿವಾರದ ರೀತಿ ಯಡಿಯೂರಪ್ಪರೂ ಕಾರಣ - ಕೆ.ಎಸ್.ಈಶ್ವರಪ್ಪ, ಬಿಜೆಪಿ ನಾಯಕ
ಅದಕ್ಕಾಗಿ ಅವರಿಬ್ಬರೂ ಈಗ ಪರಿತಪಿಸುತ್ತಿದ್ದಾರೆ.
