ಮಲೆನಾಡ ಕಾಫಿ ತೋಟಗಳಲ್ಲೀಗ ಕಾಫಿ ಹೂಗಳ ಕಂಪು

ಚಿಕ್ಕಮಗಳೂರು, ಮಾ.25: ಮಲೆನಾಡು ಎಂದರೆ ತಕ್ಷಣ ನೆನಪಾಗುವುದು ಕಾಫಿ ತೋಟಗಳು. ಅದರಲ್ಲೂ ಚಿಕ್ಕಮಗಳೂರಿಗೆ ಕಾಫಿನಾಡು ಎಂಬ ಅನ್ವರ್ಥನಾಮವೂ ಇದೆ. ಈ ಕಾಫಿನಾಡಿನ ಕಾಫಿ ತೋಟಗಳು ಇದೀಗ ಹೂಗಳ ಕಂಪು ಬೀರುತ್ತಿದ್ದು, ಪ್ರವಾಸಿಗರನ್ನು ಕೈಬೀಸಿ ಕರೆಯುತ್ತಿವೆ. ಮಲೆನಾಡಿನಲ್ಲಿ ಇತ್ತೀಚೆಗೆ ಸುರಿದ ರೇವತಿ ಮಳೆ ಕಾಫಿ ತೋಟಗಳಿಗೆ ಜೀವಕಳೆ ನೀಡಿದ್ದು, ಇದರಿಂದಾಗಿ ಉತ್ತಮ ಬೆಳೆಯ ನಿರೀಕ್ಷೆಯಲ್ಲಿರುವ ಬೆಳೆಗಾರರ ಮುಖದಲ್ಲೂ ಮಂದಹಾಸ ಮೂಡಿದೆ.

ಇಲ್ಲಿನ ಕಣಿವೆ ಪ್ರದೇಶಗಳಲ್ಲಿರುವ ಅರೇಬಿಕಾ, ರೊಬಾಸ್ಟಾ ಕಾಫಿ ತೋಟಗಳು ಇದೀಗ ಕಾಫಿ ಹೂನಿಂದಾಗಿ ನೋಡುಗರ ಕಣ್ಮನ ಸೆಳೆಯುತ್ತಿವೆ. ಪ್ರತೀ ವರ್ಷ ಮಾರ್ಚ್ ತಿಂಗಳಿನಲ್ಲಿ ರೇವತಿ ಮಳೆಯಾಗುವುದು ವಾಡಿಕೆ. ಕಾಫಿ ಬೆಳೆಗಾರರು ಈ ಮಳೆಗೆ ಹೂಮಳೆ ಎಂದು ಕರೆಯುತ್ತಾರೆ. ಸಕಾಲದಲ್ಲಿ ಹೂ ಮಳೆಯಾದಲ್ಲಿ ಕಾಫಿ ಗಿಡಗಳಲ್ಲಿ ಹೂ ಅರಳಿ ತೋಟಗಳ ಮೇಲೆ ಹಾಲಿನ ಎರಕ ಹೊಯ್ದಂತೆ ಕಾಣುವ ಹೂಗಳು ನೋಡುಗರ ಕಣ್ಣಿಗೆ ಹಬ್ಬ. ಜಿಲ್ಲೆಯ ಮೂಡಿಗೆರೆ, ಚಿಕ್ಕಮಗಳೂರು, ಕೊಪ್ಪ, ಶೃಂಗೇರಿ, ಎನ್.ಆರ್.ಪುರ ತಾಲೂಕು ವ್ಯಾಪ್ತಿಯ ಅರೇಬಿಕಾ, ರೊಬಾಸ್ಟಾ ಕಾಫಿ ತೋಟಗಳು ಹೂ ನಗು ಬೀರುತ್ತಿದ್ದು, ಪ್ರವಾಸಿಗರನ್ನು ಕೈಬೀಸಿ ಕರೆಯುತ್ತಿವೆ.

ಶ್ವೇತ ವರ್ಣದ ಹೂವಿನ ಹೊದಿಕೆ ಹೊದ್ದು ಮಲಗಿರುವಂತೆ ಭಾಸವಾಗುವ ಕಾಫಿ ತೋಟಗಳನ್ನು ನೋಡಲು ಪ್ರವಾಸಿಗರು ದಿಂಡಿಯಾಗಿ ಬರುತ್ತಿದ್ದಾರೆ. ಜಿಲ್ಲೆಗೆ ರಜಾ ದಿನಗಳಲ್ಲಿ ಪ್ರವಾಸಕ್ಕೆ ಬರುವ ದೂರದ ಪ್ರವಾಸಿಗರು ರಸ್ತೆ ಬದಿಗಳಲ್ಲಿರುವ ಕಾಫಿ ತೋಟಗಳ ಹೂ ಹಾಗೂ ಹೂವಿನ ಕಂಪಿಗೆ ಬೆರಗಾಗಿ ಫೋಟೊ, ಸೆಲ್ಫಿ ಕ್ಲಿಕ್ಕಿಸುವುದು ಸಾಮಾನ್ಯವಾಗಿದೆ.

ಕಾಫಿಯನ್ನೇ ಅವಲಂಬಿಸಿ ಲಕ್ಷಾಂತರ ಜನರು ಜೀವನ ನಡೆಸುತ್ತಿದ್ದಾರೆ. ಹವಾಮಾನ ವೈಪರೀತ್ಯದಿಂದಾಗಿ ಇಳುವರಿ,ಧಾರಣೆ ಕುಸಿತದಂತಹ ಸಮಸ್ಯೆಗಳನ್ನು ಬೆಳೆಗಾರರು ಎದುರಿಸುತ್ತಿದ್ದಾರೆ. ಈ ಮಧ್ಯೆ ಸಕಾಲದಲ್ಲಿ ಮಳೆಯಾಗದಿರುವುದರಿಂದ ಕಾಫಿ ಬೆಳೆಗಾರರು ತೋಟಗಳನ್ನು ಉಳಿಸಿಕೊಳ್ಳಲು ಹರಸಾಹಸಪಡುತ್ತಿದ್ದಾರೆ. ಸಕಾಲದಲ್ಲಿ ನೀರು ಪೂರೈಕೆಯಾಗದಿದ್ದಲ್ಲಿ ಕಾಫಿ ಗಿಡಗಳಲ್ಲಿ ಹೂ ಅರಳದೇ ಕಾಯಿ ಕಟ್ಟುವುದಿಲ್ಲ. ಈ ಕಾರಣಕ್ಕೆ ಲಭ್ಯವಿರುವ ಬಾವಿ, ನದಿಗಳಿಂದ ಸಕಾಲದಲ್ಲಿ ನೀರು ಪೂರೈಸಲು ಲಕ್ಷಾಂತರ ಹಣ ವ್ಯಯಿಸಿ ಡೀಸೆಲ್, ವಿದ್ಯುತ್ ಪಂಪ್‌ಸೆಟ್‌ಗಳ ಮೂಲಕ ತೋಟಗಳಿಗೆ ನೀರು ಪೂರೈಸಲು ಪರದಾಡುವುದು ಸಾಮಾನ್ಯವಾಗಿದೆ. ಈ ಬಾರಿ ರೇವತಿ ಮಳೆ ಸಕಾಲದಲ್ಲಿ ಸುರಿದಿರುವುದರಿಂದ ಬೆಳೆಗಾರರ ಈ ಖರ್ಚು ಉಳಿದಿದೆ. ಕಾಫಿ ಗಿಡಗಳಲ್ಲಿ ಹೂ ಅರಳಿ ನಿಂತಿದ್ದು, ಮೊಗ್ಗು ಮೂಡುತ್ತಿರುವುದರಿಂದ ಈ ಬಾರಿ ಉತ್ತಮ ಉಳುವರಿಯಾಗುವ ನಿರೀಕ್ಷೆಯಲ್ಲಿ ಬೆಳೆಗಾರರಿದ್ದಾರೆ.

ಕಳೆದ ಕೆಲ ವರ್ಷಗಳಿಂದ ಅರೇಬಿಕಾ, ರೋಬಾಸ್ಟಾ ಕಾಫಿಗೆ ಉತ್ತಮ ಧಾರಣೆ ಇರುವುದರಿಂದ ಉತ್ತಮ ಬೆಳೆಯ ನಿರೀಕ್ಷೆಯಲ್ಲಿದ್ದಾರೆ. ಕಾಫಿ ತೋಟಗಳಲ್ಲಿ ಮಿಶ್ರ ಬೆಳೆಯಾಗಿ ಬೆಳೆಯುವ ಕಾಳು ಮೆಣಸು ಧಾರಣೆ ಕುಸಿದು ಬೆಳೆಗಾರರು ಸಂಕಷ್ಟದಲ್ಲಿರುವ ಹೊತ್ತಿನಲ್ಲಿ ಕಾಫಿ ಇಳುವರಿಯನ್ನು ಹೆಚ್ಚಿಸುವ ಹೂ ಮಳೆ ಸಕಾಲದಲ್ಲಿ ಬೆಳೆಗಾರರ ಮುಖದಲ್ಲಿ ಹಾಗೂ ಕಾಫಿನಾಡಿನ ಕಳೆಯನ್ನೂ ಹೆಚ್ಚಿಸಿವೆ.

ರೇವತಿ ಮಳೆ ಸಕಾಲದಲ್ಲಿ ಸುರಿದಿರುವುದರಿಂದ ಬೆಳೆಗಾರರು ಕೊಂಚ ನಿಟ್ಟುಸಿರು ಬಿಟ್ಟಿದ್ದಾರೆ. ಕಾಫಿ ಗಿಡಗಳಲ್ಲಿ ಅರಳಿದ ಹೂಗಳು ಮೊಗ್ಗಾಗಿ ಕಾಯಿಯಾಗಿ ಬಲಿತುಕೊಳ್ಳಲು ಇನ್ನೂ ಒಂದೆಡರೆಡು ಮಳೆಯ ಅಗತ್ಯವಿದೆ. ಈ ಮಳೆಯಾಗದಿದ್ದಲ್ಲಿ ಹೂಗಳು ಬಿಸಿಲಿಗೆ ಒಣಗಿ ಹೋಗಿ ಕಾಯಿಗಳು ಗಿಡಗಳಲ್ಲಿ ನಿಲ್ಲುವುದಿಲ್ಲ. ಉತ್ತಮ ಮಳೆಯಾದಲ್ಲಿ ಈ ಬಾರಿ ಬಂಪರ್ ಬೆಳೆ ನಿರೀಕ್ಷಿಸಬಹುದು. ಕಾಫಿ ಕಳೆದ ಕೆಲ ವರ್ಷಗಳಿಂದ ಸ್ಥಿರ ಬೆಲೆ ಇದೆ. ಉತ್ತಮ ಬೆಳೆಯಾದಲ್ಲಿ ಕಾಳು ಮೆಣಸು ಬೆಲೆ ಕುಸಿತ ನೀಡಿರುವ ಅಘಾತದಿಂದ ಬೆಳೆಗಾರರು ಕೊಂಚವಾದರೂ ಸುಧಾರಿಸಿಕೊಳ್ಳಲು ಸಾಧ್ಯವಾಗಲಿದೆ.
-ರವಿಕುಮಾರ್, ಕಾಫಿ ಬೆಳೆಗಾರ, ಆಲ್ದೂರು.