ತನ್ನ ಈ ಚಿತ್ರ ಬಿಡುಗಡೆ ಮಾಡಿ ಎಂದು ಬಿಗ್ ಬಿಯೇ ಅಂಗಲಾಚುತ್ತಿದ್ದಾರೆ...!
ಮುಂಬೈ, ಮಾ.26: ಬಾಲಿವುಡ್ ನ ಹಿರಿಯ ನಟ, ಬಿಗ್ ಬಿ ಅಮಿತಾಬ್ ಬಚ್ಚನ್ ಅವರಿಗೆ ವಯಸ್ಸಾಗಿದ್ದರೂ ಅದೇ ಉತ್ಸಾಹವನ್ನು ಇಂದಿಗೂ ಉಳಿಸಿಕೊಂಡಿದ್ದಾರೆ. ಮೇಲಿಂದ ಮೇಲೆ ಚಿತ್ರಗಳಲ್ಲಿ ನಟಿಸುತ್ತಿರುವ ಅವರಿಗೂ ಇಂದಿಗೂ ಬೇಡಿಕೆಯಿದೆ. ಆದರೆ ತಾನು ನಟಿಸಿದ್ದ ಚಿತ್ರವೊಂದರ ಬಿಡುಗಡೆಗಾಗಿ ಇಂದು ಅಮಿತಾಬ್ ಅಂಗಲಾಚುತ್ತಿದ್ದಾರೆ ಎಂದರೆ ನಂಬಲೇಬೇಕು. ಈ ಚಿತ್ರ ಬೇರ್ಯಾವುದೂ ಅಲ್ಲ, ಶೂಜಿತ್ ಸರ್ಕಾರ್ ನಿರ್ದೇಶನದ 'ಶೂ ಬೈಟ್'.
ನನೆಗುದಿಗೆ ಬಿದ್ದಿರುವ 'ಶೂಬೈಟ್' ಚಿತ್ರದ ಬಿಡುಗಡೆಗೆ ಮನವಿ ಮಾಡಿಕೊಂಡ ಮೆಗಾಸ್ಟಾರ್ ಅಮಿತಾಬ್ ಬಚ್ಚನ್ ಅವರ ಟ್ವಿಟರ್ ಮನವಿಯನ್ನು ನಿರ್ದೇಶಕ ಶೂಜಿತ್ ಸರ್ಕಾರ್ ಬೆಂಬಲಿಸಿದ್ದಾರೆ. ಚಿತ್ರವನ್ನು ಥಿಯೇಟರ್ ಗೆ ತರುವ ಸಲುವಾಗಿ ನನ್ನ ಮನೆಯನ್ನು ಮಾರಲು ಕೂಡಾ ಸಿದ್ಧ ಎಂದು ಅವರು ಹೇಳಿದ್ದಾರೆ.
ಶೂಜಿತ್ ಸರ್ಕಾರ್ ನಿರ್ದೇಶನದ ಎರಡನೇ ಚಿತ್ರವಾದ 'ಶೂಬೈಟ್'ನಲ್ಲಿ ಬಿಗ್ ಬಿ ಜತೆಗೆ ಸಾರಿಕಾ, ದಿಯಾ ಮಿರ್ಜಾ, ನವಾಜುದ್ದೀನ್ ಸಿದ್ದಿಕಿ ಮತ್ತಿತರರು ತಾರಾಗಣದಲ್ಲಿದ್ದಾರೆ. ನಿರ್ಮಾಪಕರ ಕಾನೂನು ಹೋರಾಟದಿಂದಾಗಿ ಈ ಚಿತ್ರ ಬಿಡುಗಡೆಯ ಭಾಗ್ಯ ಕಂಡಿಲ್ಲ.
ಶುಕ್ರವಾರ ಈ ಬಗ್ಗೆ ಟ್ವೀಟ್ ಮಾಡಿದ್ದ ಬಿಗ್ ಬಿ, "ಹೌದು..ಯುಟಿವಿ & ಡಿಸ್ನಿ... ಆಂತರಿಕ ಚರ್ಚೆ, ಸಮಸ್ಯೆ ಅಥವಾ ವೈಯಕ್ತಿಕ ವಾದಗಳನ್ನು ಬದಿಗಿಟ್ಟು, ಶೂಜಿತ್ ಸರ್ಕಾರ್ ಅವರ ಅವರ ವಿನೂತನ ಕಥಾನಕ ಮತ್ತು ಚಿತ್ರವನ್ನು ಇತರರು ಆಸ್ವಾದಿಸಲು ಅವಕಾಶ ಮಾಡಿಕೊಡಬೇಕು.. ದಯವಿಟ್ಟು" ಎಂದು ಕೋರಿದ್ದರು.
ಆ ಬಳಿಕ ಚಿತ್ರದ ಎರಡು ಪೋಸ್ಟರ್ ಗಳನ್ನು ಶೇರ್ ಮಾಡಿ, "ಪ್ಲೀಸ್..ಪ್ಲೀಸ್..ಪ್ಲೀಸ್..ಯುಟಿವಿ & ಡಿಸ್ನಿ ಅಥವಾ ಇತರ ಯಾರಾದರೂ ಇದನ್ನು ಹೊಂದಿದ್ದರೆ...ವಾರ್ನರ್, ಯಾರಾದರೂ...ಈ ಚಿತ್ರವನ್ನು ಬಿಡುಗಡೆ ಮಾಡಿ...ಕಠಿಣ ಶ್ರಮವನ್ನು ಹಾಕಲಾಗಿದೆ...??? ಸೃಜನಶೀಲತೆಯನ್ನು ಕೊಲ್ಲಬೇಡಿ!!" ಎಂದು ಮನವಿ ಮಾಡಿದ್ದಾರೆ.
