ಜಾಕ್ವೆಲಿನ್ ಕಣ್ಣಿಗೆ ಏಟು: ನಿಲ್ಲದ ರೇಸ್3 ಶೂಟಿಂಗ್
ಬಾಲಿವುಡ್ ನಟಿ ಜಾಕ್ವೆಲಿನ್ ಫೆರ್ನಾಂಡಿಸ್, ರೇಸ್3 ಚಿತ್ರದಲ್ಲಿ ಸ್ಟಂಟ್ ದೃಶ್ಯಗಳಲ್ಲಿ ಡ್ಯೂಪ್ ಇಲ್ಲದೆ ನಟಿಸುವ ಮೂಲಕ ಸುದ್ದಿಯಾಗಿದ್ದರು. ಆದರೆ ತೀರಾ ಇತ್ತೀಚೆಗೆ ಆಕೆ ಸ್ಕ್ವಾಷ್ ಆಡುತ್ತಿದ್ದಾಗ ಕಣ್ಣಿಗೆ ಗಾಯಮಾಡಿಕೊಂಡು ಅನಿವಾರ್ಯವಾಗಿ ಆಕೆ ಕೆಲವು ದಿನ ವಿಶ್ರಾಂತಿ ಪಡೆಯಬೇಕಾಗಿತ್ತು. ಆದರೆ ಹಾಗೆಂದು ರೇಸ್3ನ ಕ್ಲೈಮಾಕ್ಸ್ ದೃಶ್ಯದ ಚಿತ್ರೀಕರಣವನ್ನು ಮುಂದೂಡಲು ನಿರ್ದೇಶಕರು ಸಿದ್ಧರಿಲ್ಲ. ಹೀಗಾಗಿ ನಿರ್ದೇಶಕರು ಇಡೀ ಕ್ಲೈಮಾಕ್ಸ್ ದೃಶ್ಯದಲ್ಲಿ ಆಕೆಯ ಕಣ್ಣಿಗೆ ಸನ್ಗ್ಲಾಸ್ಗಳನ್ನು ಧರಿಸಿ ನಟಿಸುವಂತೆ ಮಾಡಿದ್ದಾರೆ.
ಈ ವಿಷಯವನ್ನು ಜಾಕ್ವೆಲಿನ್ ಇನ್ಸ್ಟಾಗ್ರಾಮ್ನಲ್ಲಿ ಅಭಿಮಾನಿಗಳ ಜೊತೆ ಹಂಚಿಕೊಂಡಿದ್ದಾರೆ ‘‘ ನನ್ನ ಬಲಗಣ್ಣಿಗೆ ಗಾಯಮಾಡಿಕೊಂಡಿದ್ದೇನೆ. ಹೀಗಾಗಿ ಇಡೀ ಕ್ಲೈಮಾಕ್ಸ್ ದೃಶ್ಯದಲ್ಲಿ ನಾನು ಸನ್ಗ್ಲಾಸ್ ಧರಿಸಲಿದ್ದೇನೆ. ಇದಕ್ಕಾಗಿ ಶಾಕ್ ಆಗದಿರಿ’’ ಎಂದು ಜಾಕ್ವೆಲಿನ್ ಅಭಿಮಾನಿಗಳೊಂದಿಗೆ ಹೇಳಿಕೊಂಡಿದ್ದಾರೆ. ಸಲ್ಮಾನ್ ಹಾಗೂ ಜಾಕ್ವೆಲಿನ್ ಈ ಮೊದಲು ಕಿಕ್ನಲ್ಲಿ ಜೊತೆಯಾಗಿ ನಟಿಸಿದ್ದರು. ಆ ಚಿತ್ರ ಬಾಕ್ಸ್ಆಫೀಸ್ನಲ್ಲಿ ಭರ್ಜರಿ ಗೆಲುವು ಕಂಡಿತ್ತು. ಎಬಿಸಿಡಿ ಸರಣಿ ಚಿತ್ರಗಳಿಂದ ಸ್ಟಾರ್ನಿರ್ದೇಶಕನಾಗಿರುವ ರೆಮೊ ಡಿಸೋಜಾ ರೇಸ್3 ಚಿತ್ರಕ್ಕೆ ಆ್ಯಕ್ಷನ್ ಕಟ್ ಹೇಳಿದ್ದಾರೆ. ಸಲ್ಮಾನ್ ಹಾಗೂ ಜಾಕ್ವೆಲಿನ್ ಅಲ್ಲದೆ, ಅನಿಲ್ ಕಪೂರ್, ಬಾಬಿ ಡಿಯೋಲ್, ಡೈಸಿ ಶಾ ಹಾಗೂ ಸಾಖೀಬ್ ಸಲೀಂ ಮುಖ್ಯಪಾತ್ರಗಳಲ್ಲಿದ್ದಾರೆ.
