ದೇಶದ 100 ವಿಶ್ವವಿದ್ಯಾನಿಲಯಗಳ ಪಟ್ಟಿಯಲ್ಲಿ ಯೆನೆಪೊಯ ವಿವಿ

ಮಂಗಳೂರು, ಎ. 4: ಭಾರತದ ಮಾನವ ಸಂಪನ್ಮೂಲ ಅಭಿವೃದ್ಧಿ ಸಚಿವಾಲಯ ಪ್ರಕಟಿಸಿರುವ ಎನ್‌ಐಆರ್‌ಎಫ್ ರ‍್ಯಾಂಕಿಂಗ್‌ನಲ್ಲಿ ದೇಶದ ಪ್ರಥಮ 100 ವಿಶ್ವವಿದ್ಯಾನಿಲಯಗಳ ಪಟ್ಟಿಯಲ್ಲಿ ಯೆನೆಪೊಯ ವಿಶ್ವವಿದ್ಯಾನಿಲಯ ಸ್ಥಾನವನ್ನು ಪಡೆದಿದೆ.

ಎ. 3ರಂದು ಸಚಿವಾಲಯ ಪ್ರಕಟಿಸಿರುವ 100 ವಿಶ್ವವಿದ್ಯಾನಿಲಯಗಳ ಪಟ್ಟಿಯಲ್ಲಿ ಯೆನೆಪೊಯ ವಿಶ್ವವಿದ್ಯಾನಿಲಯ 92ನೆ ಸ್ಥಾನವನ್ನು ತನ್ನ ದಾಗಿಸಿಕೊಂಡಿದೆ. ಇದು ಯೆನೆಪೊಯ ವಿವಿಗೆ ದೊರಕಿದ ಅತೀ ದೊಡ್ಡ ಗೌರವವಾಗಿದೆ. ಕಳೆದ ವರ್ಷ ಈ ಪಟ್ಟಿಯಲ್ಲಿ ಯೆನೆಪೊಯ ವಿವಿ 100ರಿಂದ 150ರವೆಗಿನ ಸಾಲಿನಲ್ಲಿ ಗುರುತಿಸಿಕೊಂಡಿತ್ತು.

ವಿಶ್ವವಿದ್ಯಾನಿಲಯಗಳು, ಶಿಕ್ಷಣ ಹಾಗೂ ಕಾಲೇಜುಗಳ ಮೌಲ್ಯಮಾಪನಕ್ಕೆ ಸಂಬಂಧಿಸಿದ ಪ್ಯಾರಾ ಮೀಟರ್‌ಗಳಲ್ಲಿ ಕಲಿಕೆ ಮತ್ತು ಬೋಧನೆಯಲ್ಲಿ 19ನೆ ಸ್ಥಾನ, ಔಟ್‌ರೀಚ್ ಮತ್ತು ಒಳಗೊಳ್ಳುವಿಕೆ ಪ್ಯಾರಾಮೀಟರ್‌ಗಳಲ್ಲಿ 7ನೆ ಸ್ಥಾನವನ್ನು ಯೆನೆಪೊಯ ವಿವಿ ಪಡೆದಿದೆ.

ಇದೇ ವೇಳೆ, ಯೆನೆಪೊಯ ಮೆಡಿಕಲ್ ಕಾಲೇಜು ಎನ್‌ಐಆರ್‌ಎಫ್ ನಿಂದ ದೇಶದ ಸಂಸ್ಥೆಗಳ ಒಟ್ಟಾರೆ ಶ್ರೇಯಾಂಕದಲ್ಲಿ 100ರಿಂದ 150ರ ಸ್ಥಾನದಲ್ಲಿ ಗುರುತಿಸಿಕೊಂಡಿದೆ. ಯೆನೆಪೊಯ ವಿಶ್ವವಿದ್ಯಾನಿಲಯವು ಶಿಕ್ಷಣದ ಗುಣಮಟ್ಟವನ್ನು ಸುಧಾರಿಸುವ ನಿಟ್ಟಿನಲ್ಲಿ ಗಮನಾರ್ಹ ಕ್ರಮಗಳನ್ನು ಕೈಗೊಳ್ಳುತ್ತಿದೆ. ಈ ವರ್ಷದ ಈ ಶ್ರೇಯಾಂಕವು ಯೆನೆಪೊಯ ವಿವಿಯ ಎತ್ತರವನ್ನ ಮತ್ತಷ್ಟು ಉತ್ತುಂಗಕ್ಕೇರಿಸುವಲ್ಲಿ ತಂಡಕ್ಕೆ ಪ್ರೇರಣೆಯಾಗಿದೆ ಎಂದು ಪ್ರಕಟನೆ ತಿಳಿಸಿದೆ.