ಬುದ್ಧ, ಬಸವ, ಅಂಬೇಡ್ಕರ್ ರನ್ನು ವ್ಯವಸ್ಥೆಯಿಂದ ಹೊರಗಿಡುವ ಹುನ್ನಾರ ನಡೆಯುತ್ತಿದೆ: ಸಾಹಿತಿ ಶಿವಪ್ರಸಾದ್ ವಿಷಾದ

ಚಿಕ್ಕಮಗಳೂರು, ಎ.8: ಬುದ್ಧ, ಬಸವ, ಅಂಬೇಡ್ಕರ್ ಅವರ ಚಿಂತನೆಗಳನ್ನು ಯುವಜನತೆ ಮೈಗೂಡಿಸಿಕೊಂಡಲ್ಲಿ ದೇಶದ ಸಾಮಾಜಿಕ ವ್ಯವಸ್ಥೆ ಪೂರ್ಣ ಪ್ರಮಾಣದಲ್ಲಿ ಪ್ರಗತಿ ಕಾಣಲಿದೆ. ಗೊಡ್ಡು ಸಂಪ್ರದಾಯ, ಮತೀಯ ಗಲಭೆ, ಉಚ್ಛ ನೀಚ ತಾರತಮ್ಯ ವ್ಯವಸ್ಥೆಯಂತಹ ಕೊಳಕು ದೇಶದಲ್ಲಿರುವುದಿಲ್ಲ. ಇವರ ಚಿಂತನೆ, ಮೌಲ್ಯಗಳ ಬಗ್ಗೆ ಪಟ್ಟಭದ್ರರಿಗೆ ಅರಗಿಸಿಕೊಳ್ಳಲು ಸಾಧ್ಯವಾಗದ ಕಾರಣ ಈ ಮೂವರನ್ನು ದೇಶದಿಂದ ಹೊರಹಾಕಲು ವ್ಯವಸ್ಥಿತಿ ಸಂಚು ದೇಶದಲ್ಲಿ ನಡೆಯುತ್ತಿದೆ ಎಂದು ಹಿರಿಯ ಸಾಹಿತಿ ಗೊಲ್ಲಹಳ್ಳಿ ಶಿವಪ್ರಸಾದ್ ಎಚ್ಚರಿಸಿದ್ದಾರೆ.

ನಗರದ ಕುವೆಂಪು ಕಲಾ ಮಂದಿರದಲ್ಲಿ ದಲಿತ ಜಾಗೃತ ವೇದಿಕೆ ಆಯೋಜಿಸಿದ್ದ ದಲಿತ ಜಾಗೃತ ಸಮಾವೇಶ ಮತ್ತು ಸಾಂಸ್ಕೃತಿಕ ಕಾರ್ಯಕ್ರಮ ಉದ್ಘಾಟಿಸಿ ಮಾತನಾಡಿದ ಅವರು, ಬುದ್ಧ, ಬಸವ, ಅಂಬೇಡ್ಕರ್ ಅವರು ಈ ದೇಶ ಕಂಡ ಮಹಾನ್ ಮಾನವತಾವಾದಿಗಳು. ಇವರು ಬೇರೆ ಬೇರೆ ಕಾಲಘಟ್ಟದಲ್ಲಿ ದೇಶದ ಸಾಮಾಜಿಕ ವ್ಯವಸ್ಥೆಯಲ್ಲಿ ಕೀಳಲಾಗದಷ್ಟು ಆಳಕ್ಕಿಳಿದಿದ್ದ ಜಾತಿವ್ಯವಸ್ಥೆ, ಅಸ್ಪøಶ್ಯತೆ, ಅಸಮಾನತೆ, ಲಿಂಗತಾರತಮ್ಮ, ಮಹಿಳಾ ಶೋಷಣೆ, ಮೂಢನಂಬಿಕೆಯಂತಹ ಒಂದೇ ರೀತಿಯ ಜ್ವಲಂತ ಸಮಸ್ಯೆಗಳ ವಿರುದ್ಧ ಹೋರಾಡಿದ್ದಾರೆ. ಇವರ ಹೋರಾಟದಿಂದಾಗಿ ದೇಶದಲ್ಲಿ ಪ್ರಸಕ್ತ ಸಮಾಜಿಕ ವ್ಯವಸ್ಥೆ ಪೂರ್ಣ ಪ್ರಮಾಣದಲ್ಲಿ ಬದಲಾಗದಿದ್ದರೂ ಸಾಕಷ್ಟು ಸುಧಾರಣೆಗಳಾಗಿವೆ. ಈ ಕಾರಣಕ್ಕೆ ಬುದ್ಧ, ಬಸವ, ಅಂಬೇಡ್ಕರ್ ಅವರನ್ನು ಇಡೀ ವಿಶ್ವವೇ ಒಪ್ಪಿದೆ. ಕೊಂಡಾಡುತ್ತಿದೆ. ಅವರ ವಿಚಾರಗಳನ್ನು ಅಧ್ಯಯನ ವಿಷಯಗಳನ್ನಾಗಿ ಅಳವಡಿಸಿಕೊಂಡು ಮೌಲ್ಯ, ಸಿದ್ಧಾಂತಗಳನ್ನು ಅಲ್ಲಿ ಪಾಲಿಸಲಾಗುತ್ತಿದೆ ಎಂದರು.

ಬುದ್ಧ, ಬಸವ, ಅಂಬೇಡ್ಕರ್ ಅವರನ್ನು ವಿಶ್ವ ಒಪ್ಪಿದ್ದರೂ ಭಾರತೀಯ ಸಮಾಜದಲ್ಲಿ ಕೆಲವರು ಒಪ್ಪುತ್ತಿಲ್ಲ. ಈ ಮೂವರನ್ನು ವ್ಯವಸ್ಥೆಯಿಂದ ಹೊರಗಿಡುವ ಹುನ್ನಾರವನ್ನು ಪಟ್ಟಭದ್ರ ಹಿತಾಸಕ್ತಿಗಳು ನಡೆಸುತ್ತಿದ್ದಾರೆ. ಆದರ್ಶ ವ್ಯಕ್ತಿಗಳ ಆಶಯಗಳನ್ನು ವ್ಯವಸ್ಥಿತವಾಗಿ ತೆರೆಮರೆಗೆ ಸರಿಸಲಾಗುತ್ತಿದೆ, ಕಾರ್ಪೊರೇಟ್ ಕುಳಗಳು ಸಾಂಸ್ಕøತಿಕ ಸತ್ಯಗಳನ್ನು ಛಿದ್ರ ಮಾಡಿ ಸನಾತನ ವಾದಕ್ಕೆ ಜೀವ ನೀಡುವ ಕೆಲಸ ಮಾಡುತ್ತಿರುವುದರಿಂದ ಮನುಷ್ಯನನ್ನು ಮನುಷ್ಯನಾಗಿ ನೋಡದ ದುಸ್ಥಿತಿ ನಿರ್ಮಾಣವಾಗಿದೆ ಎಂದು ವಿಷಾದ ವ್ಯಕ್ತಪಡಿಸಿದರು.

ಪ್ರಸಕ್ತ ಇಂತಹ ವ್ಯವಸ್ಥೆಯಲ್ಲಿ ಯುವಜನತೆ ಗೊಂದಲಕ್ಕೆ ಸಿಲುಕಿದೆ. ಸಮಾಜವನ್ನು ಅರ್ಥೈಸಿಕೊಳ್ಳಲು ವಿಫಲವಾಗಿದೆ. ಸಮಾಜದಲ್ಲಿ ಭಿನ್ನತೆ ಹುಟ್ಟಿಕೊಳ್ಳುತ್ತಿದೆ. ಜಾತಿ ಪರಧಿಯ ಬಂಧನದಿಂದ ಹೊರಬರಬೇಕಾದ ನಾವು ಸಾಂಸ್ಕøತಿಕ ದಾಳಿಯಿಂದ ಮತ್ತಷ್ಟು ಬಂಧನಕ್ಕೊಳಗಾಗುತ್ತಿದ್ದೇವೆ ಎಂದ ಅವರು, ಬಸವಣ್ಣನ ಆದರ್ಶ, ಅಂಬೇಡ್ಕರ್ ಅವರ ಚಿಂತನೆ ಹಾಗೂ ಬುದ್ಧನ ಧ್ಯಾನದ ಸ್ಥಿತಿಗೆ ಬಂದಾಗ ಮಾತ್ರ ಸಮಾಜದ ಒಳನೋಟದ ದರ್ಶನವಾಗುತ್ತದೆ ಎಂದರು.

ಬಹುಜನ ದಲಿತ ಸಂಘರ್ಷ ಸಮಿತಿಯ ರಾಜ್ಯಾಧ್ಯಕ್ಷ ಡಾ.ಆರ್.ಎಂ.ಎನ್.ರಮೇಶ್, ಅರಣ್ಯ ಮತ್ತು ವಸತಿ ವಿಹಾರ ಧಾಮಗಳ ನಿಗಮ ಅಧ್ಯಕ್ಷ ಎ.ಎನ್.ಮಹೇಶ್, ಬಹುಜನ ದಲಿತ ಸಂಘರ್ಷ ಸಮಿತಿ ರಾಜ್ಯಾಧ್ಯಕ್ಷ ಡಾ.ಆರ್.ಎಂ.ಎನ್.ರಮೇಶ್, ನಿವೃತ್ತ ಪಾಚಾರ್ಯ ಎಚ್.ಎಂ.ರುದ್ರಸ್ವಾಮಿ, ಪತ್ರಕರ್ತ ದಿನೇಶ್ ಪಟವರ್ಧನ್, ಶ್ರೀನಿವಾಸ ದಂಟರಮಕ್ಕಿ ಮಾತನಾಡಿದರು.

ಸಮಾರಂಭದ ಅಂಗವಾಗಿ ಕಾರ್ಯಕ್ರಮದಲ್ಲಿ ಕ್ರಾಂತಿಗೀತೆಗಳು ಮಾರ್ದನಿಸಿದವು. ದಲಿತ ಜಾಗೃತ ವೇದಿಕೆ ಅಧ್ಯಕ್ಷ ಕೆ.ಜೆ.ಮಂಜುನಾಥ್ ಕಾರ್ಯಕ್ರಮದ ಅಧ್ಯಕ್ಷತೆ ವಹಿಸಿದ್ದರು. ಜಾಗೃತ ವಿದ್ಯಾರ್ಥಿ ವೇದಿಕೆಯ ಅಂಗಡಿ ಚಂದ್ರು, ಎಂ.ಜಿ.ಲೋಕೇಶ್, ಸಿಪಿಐ ಮುಖಂಡ ಬಿ.ಅಮ್ಝದ್, ರೈತ ಸಂಘ ಗುರುಶಾಂತಪ್ಪ ಮತ್ತಿತರರು ಕಾರ್ಯಕ್ರಮದಲ್ಲಿ ಉಪಸ್ಥಿತರಿದ್ದರು.