ಮೂಡಿಗೆರೆ: ಹಾಲಿ ಶಾಸಕರಿಗೆ ಮತಹಾಕದಿರಲು ದಲಿತರ ನಿರ್ಧಾರ

ಚಿಕ್ಕಮಗಳೂರು, ಎ.11: ಮೂಡಿಗೆರೆ ಮೀಸಲು ವಿಧಾನಸಭೆ ಕ್ಷೇತ್ರದ ಹಾಲಿ ಜೆಡಿಎಸ್ ಶಾಸಕರ ವಿರುದ್ದ ಕ್ಷೇತ್ರದ ದಲಿತರು ತಿರುಗಿಬಿದ್ದಿದ್ದು, ಹಾಲಿ ಶಾಸಕ ಬಿ.ಬಿ.ನಿಂಗಯ್ಯ ಅವರಿಗೆ ಈ ಬಾರಿ ದಲಿತರು ಮತಹಾಕದಿರಲು ನಿರ್ಧರಿಸಿದ್ದಾರೆ ಎನ್ನಲಾಗಿದೆ.

ಕ್ಷೇತ್ರದಾದ್ಯಂತ ಶಾಸಕರು ದಲಿತರ ಮತ ಪಡೆದು 5 ವರ್ಷಗಳ ಕಾಲ ಅಧಿಕಾರ ಚಲಾಯಿಸಿದ್ದರೂ ದಲಿತರಿಗೆ ಸೂಕ್ತ ಸ್ಥಾನಮಾನ ನೀಡುವಲ್ಲಿ ವಿಫಲರಾಗಿದ್ದಾರೆ. ದಲಿತರ ಬಡಾವಣೆಗಳ ಅಭಿವೃದ್ಧಿ ಸೇರಿದಂತೆ ದಲಿತರ ಸಮಸ್ಯೆಗಳನ್ನು ಬಗೆಹರಿಸುವ ನಿಟ್ಟಿನಲ್ಲಿ ಶಾಸಕರು ದಿವ್ಯ ನಿರ್ಲಕ್ಷ್ಯ ವಹಿಸಿದ್ದಾರೆಂದು ಆರೋಪದ ಮೇರೆಗೆ ಕ್ಷೇತ್ರ ವ್ಯಾಪ್ತಿಯ ದಲಿತ ಸಂಘಟನೆಗಳ ಒಕ್ಕೂಟ ಈ ತೀರ್ಮಾನಕ್ಕೆ ಬಂದಿದ್ದು, ಇದರಿಂದಾಗಿ ಮೂಡಿಗೆರೆ ಕ್ಷೇತ್ರದ ಜೆಡಿಎಸ್ ಅಭ್ಯರ್ಥಿ ಹಾಗೂ ಹಾಲಿ ಶಾಸಕರಿಗೆ ಸಂಕಷ್ಟ ಎದುರಾಗಿದೆ.

ಚಿಕ್ಕಮಗಳೂರಿನ ಐಜಿ ರಸ್ತೆಯಲ್ಲಿರುವ ಸಭಾಂಗಣವೊಂದರಲ್ಲಿ ಮೂಡಿಗೆರೆ ಕ್ಷೇತ್ರವ್ಯಾಪ್ತಿಯ ವಿವಿಧ ದಲಿತ ಸಂಘಟನೆಗಳ ಒಕ್ಕೂಟದ ನೂರಾರು ಮುಖಂಡರು, ಕಾರ್ಯಕರ್ತರು ಬುಧವಾರ ಸಭೆ ನಡೆಸಿದ್ದು, ಸಭೆಯಲ್ಲಿ ಕ್ಷೇತ್ರದ ಹಾಲಿ ಶಾಸಕರು ದಲಿತರ ವಿರೋಧಿ ನಿಲುವು ತಳೆದಿದ್ದು, ಈ ಬಾರಿ ಅವರಿಗೆ ದಲಿತರು ಮತ ಹಾಕದಂತೆ ಮಾಡಲು ಅಗತ್ಯವಿರುವ ಕ್ರಮಗಳನ್ನು ಕೈಗೊಳ್ಳುವ ನಿಟ್ಟಿನಲ್ಲಿ ದೃಢ ತೀರ್ಮಾನಕ್ಕೆ ಬರಲಾಗಿದೆ. ಈ ನಿಟ್ಟಿನಲ್ಲಿ ಸಭೆಯಲ್ಲಿ ವಿವಿಧ ಸಂಘಟನೆಗಳ ದಲಿತ ಮುಖಂಡರು ತಮ್ಮ ಅಭಿಪ್ರಾಯಗಳನ್ನು ತಿಳಿಸಿದ್ದು, ಎಲ್ಲರೂ ಒಮ್ಮತದಿಂದ ಈ ನಿಲುವಿಗೆ ಬದ್ಧರಾಗಿರಲು ಒಪ್ಪಿದ್ದಾರೆನ್ನಲಾಗಿದೆ.

ಈ ಸಂಬಂಧ ನಡೆದ ಸಭೆಯಲ್ಲಿ ಮೂಡಿಗೆರೆಯ ಹಿರಿಯ ದಲಿತ ಮುಖಂಡ ರಾಮಯ್ಯ ಮಾತನಾಡಿ, ಸಂವಿಧಾನ ವಿರೋಧಿ ಶಕ್ತಿಗಳು ಅಂಬೇಡ್ಕರ್ ಅವರು ರಚಿಸಿರುವ ಸಂವಿಧಾನವನ್ನೇ ಬದಲಾಯಿಸುವ ಬಗ್ಗೆ ಮಾತನಾಡುತ್ತಿದ್ದಾರೆ. ಎಲ್ಲೆಡೆ ದಲಿತರ ಮೇಲೆ ಹಲ್ಲೆಗಳಾಗುತ್ತಿದ್ದು, ಸ್ವಾಭಿಮಾನದಿಂದ ಬದುಕಲು ಸವರ್ಣೀಯರ ಅಪ್ಪಣೆ ಪಡೆಯಬೇಕಾದ ಸ್ಥಿತಿ ನಿರ್ಮಾಣವಾಗಿದೆ. ಮೇಲ್ವರ್ಗದವರ ಮಾತಿಗೆ ವಿರುದ್ಧವಾಗಿ ನಡೆದವರನ್ನು ಹಾಡುಹಗಲೇ ಕೊಲೆ ಮಾಡಲಾಗುತ್ತಿದೆ. ಇಂತಹ ಪರಿಸ್ಥಿತಿಯಲ್ಲಿ ದಲಿತ ಜನಪ್ರತಿನಿಧಿಗಳು ದಲಿತರ ಆತ್ಮಬಲವನ್ನು ಹೆಚ್ಚಿಸುವ ಕೆಲಸ ಮಾಡುವ ನಿಟ್ಟಿನಲ್ಲಿ ಸಂವಿಧಾನ ವಿರೋಧಿಗಳ ವಿರುದ್ಧ ಧ್ವನಿ ಎತ್ತಬೇಕು. ಆದರೆ ಮೀಸಲು ಕ್ಷೇತ್ರಗಳ ದಲಿತರ ಪಡಗಳಿಂದ ಅಧಿಕಾರದ ಗದ್ದುಗೆ ಏರಿದ ಬಳಿಕ ದಲಿತ ಶಾಸಕರು ಮೇಲ್ವರ್ಗದವರ ಅಣತಿಯಂತೆ ಕುಣಿಯುತ್ತಿದ್ದಾರೆ. ಜಿಲ್ಲೆಯ ಮೀಸಲು ಕ್ಷೇತ್ರದಲ್ಲಿ ಈ ಬಾರಿ ಜನಪರ ಕೆಲಸ, ದಲಿತರ ಧ್ವನಿಯಾಗುವವರು ಯಾರೆಂಬುದನ್ನು ಎಲ್ಲ ದಲಿತ ಮುಖಂಡರು ಚರ್ಚಿಸಿ ದಲಿತ ಮಾತಿನಂತೆ ನಡೆಯುವ ಭರವಸೆ ನೀಡುವವರಿಗೆ ಮತಹಾಕುವಂತೆ ತಿಳಿಸಿದರು.

ದಲಿತ ಸಂಘಟನೆಯ ಯುವ ಸದಸ್ಯೆ ಚೇತನಾ ಮಾಡಿ, ಎಲ್ಲ ಪಕ್ಷಗಳ ಅಭ್ಯರ್ಥಿಗಳು ಗೆದ್ದ ಬಳಿಕ ದಲಿತರನ್ನು ಮರೆತಿದ್ದಾರೆ. ಮೀಸಲು ಕ್ಷೇತ್ರಗಳ ದಲಿತ ಶಾಸಕರೆ ದಲಿತರನ್ನು ಮರೆತರೆ ನಮಗೆ ಯಾರು ಗತಿ ? ಅಂಬೇಡ್ಕರ್ ನೀಡಿದ ಮೀಸಲಾತಿ ಹಕ್ಕಿನಡಿಯಲ್ಲಿ ರಾಜಕೀಯ ಅಧಿಕಾರ ಪಡೆದು ದಲಿತರ ಉದ್ಧಾರಕ್ಕಾಗಿ ಶ್ರಮಿಸದೇ ಮೇಲ್ವರ್ಗದವರ ಅಣತಿಯಂತೆ ಕುಣಿಯುವವರನ್ನು ನಮ್ಮ ಪ್ರತಿನಿಧಿಗಳೆಂದು ಒಪ್ಪಿಕೊಳ್ಳಲು ಸಾಧ್ಯವಿಲ್ಲ. ಈ ಬಾರಿ ಕ್ಷೇತ್ರದಲ್ಲಿ ದಲಿತರ ಒಗ್ಗಟ್ಟನ್ನು ಪ್ರದರ್ಶಿಸಬೇಕು. ದಲಿತರ ವಿರೋಧಿಗಳಿಗೆ ತಕ್ಕ ಪಾಠ ಕಲಿಸಬೇಕು. ಇದಕ್ಕಾಗಿ ಎಲ್ಲ ದಲಿತರ ಸಂಘಟನೆಗಳ ಒಗ್ಗೂಡಬೇಕು. ನಿಲುವಿಗೆ ಬದ್ಧರಾಗಿರಬೇಕು ಎಂದರು.

ಸಭೆಯಲ್ಲಿ ವಿವಿಧ ದಲಿತ ಸಂಘಟನೆಗಳ ಮುಖಂಡರಾದ ಓಂ ಪ್ರಕಾಶ್, ದುರ್ಗೇಶ್, ಲೋಕೇಶ್ ಮಾವಿನಗುಣಿ, ಮಂಜುನಾಥ್ ಬೆರಣಗೋಡು, ಉಮೇಶ್, ಹೆಡದಾಳು ಕುಮಾರ್, ಧಮೇಶ್, ಸುರೇಶ್ ಸೇರಿದಂತೆ ವಿವಿಧ ದಲಿತ ಸಂಘಟನೆಗಳ ನೂರಾರು ಕಾರ್ಯಕರ್ತರು ಭಾಗವಹಿಸಿದ್ದರು.

ಒಟ್ಟಿನಲ್ಲಿ ಚಿಕ್ಕಮಗಳೂರಿನಲ್ಲಿ ಬುಧವಾರ ನಡೆದ ದಲಿತ ಸಂಘಟನೆಗಳ ಒಕ್ಕೂಟದ ಸಭೆಯ ನಿರ್ಧಾರದಿಂದಾಗಿ ಮೂಡಿಗೆರೆಯ ಹಾಲಿ ಶಾಸಕರಿಗೆ ಸಂಕಷ್ಟ ಎದುರಾಗಿದ್ದು,  ದಲಿತ ಮುಖಂಡರು ಹಾಲಿ ಶಾಸಕನ್ನು ದಲಿತ ವಿರೊಧಿ ಶಾಸಕ ಎಂದು ಕರೆದು ಮತಹಾಕದಿರಲು ನಿರ್ಧರಿಸಿರುವುದರಿಂದ ಶಾಸಕರು ಇಕ್ಕಟ್ಟಿಗೆ ಸಿಲುಕುವಂತಾಗಿದೆ. ಇದರೊಂದಿಗೆ ದಲಿತರು ಮುಂದಿನ ದಿನಗಳಲ್ಲಿ ಈ ಸಂಬಂಧ ಬೃಹತ್ ಸಭೆ ಕರೆದು ಜಿಲ್ಲೆಯ ಐದೂ ಕ್ಷೇತ್ರಗಳಲ್ಲಿ ದಲಿತರು ತಮ್ಮ ಮತಗಳನ್ನು ಯಾರಿಗೆ ಹಾಕಬೇಕೆಂಬ ಬಗ್ಗೆಯೂ ತೀರ್ಮಾನಿಸಲು ನಿರ್ಧರಿಸಿದ್ದಾರೆಂದು ತಿಳಿದು ಬಂದಿದೆ.

ಮೂಡಿಗೆರೆ ಕ್ಷೇತ್ರದಲ್ಲಿ ದಲಿತರ ಮತಗಳು ನಿರ್ಣಾಯಕವಾಗಿವೆ. ದಲಿತರು ಮನಸು ಮಾಡಿದಲ್ಲಿ ಯಾವ ಅಭ್ಯರ್ಥಿಗಳನ್ನಾದರೂ ಸೋಲಿಸಬಹುದು. ಗೆಲ್ಲಿಸಲೂ ಬಹುದು. ದಲಿತರ ಭಾವನೆಗಳಿಗೆ ಕಿಮ್ಮುತ್ತು ನೀಡದ ಕೋಮುವಾದಿ ಪಕ್ಷಗಳ ಅಭ್ಯರ್ಥಿಗನ್ನು ಗೆಲ್ಲಿಸಬೇಕೆ? ಅಥವಾ ದಲಿತರ ಪರವಾಗಿ ಚಿಂತಿಸುವ ಅಭ್ಯರ್ಥಿ ಬೇಕೆಂಬುದರ ಬಗ್ಗೆ ಚಿಂತಿಸಲು ಇದು ಸಕಾಲ. ಮೂಡಿಗೆರೆ ಕ್ಷೇತ್ರದಲ್ಲಿ ದಲಿತರ ಯಾವ ಸಮಸ್ಯೆಗಳಿಗೂ ಹಾಲಿ ಶಾಸಕ ನಿಂಗಯ್ಯ ಸ್ಪಂದಿಸಿಲ್ಲ. ದಲಿತರ ಸಮಸ್ಯೆಗಳಿಗೆ ಸ್ಪಂದಿಸದವರಿಗೆ ಈ ಬಾರಿಯ ಚುನಾವಣೆಯಲ್ಲಿ ತಕ್ಕ ಪಾಠ ಕಲಿಸಬೇಕಿದೆ.
- ಯಲಗುಡಿ ಹೊನ್ನಯ್ಯ, ದಲಿತ ಮುಖಂಡ