ಮೋಟಮ್ಮ ಪುತ್ರಿ ನಯನಾರಿಂದ ಸ್ಪಪಕ್ಷದ ಕಾರ್ಯಕರ್ತರಿಗೆ ಬೆದರಿಕೆ: ಬಿಜೆಪಿ ಆರೋಪ

ಚಿಕ್ಕಮಗಳೂರು, ಎ.28 : ಕಾಂಗ್ರೆಸ್ ಅಭ್ಯರ್ಥಿ, ಎಮ್ಮೆಲ್ಸಿ ಮೋಟಮ್ಮ ಕ್ಷೇತ್ರವನ್ನು ಸಂಪೂರ್ಣವಾಗಿ ಕಡೆಗಣಿಸಿದ್ದು, ಚುನಾವಣೆ ಸಂದರ್ಭದಲ್ಲಿ ಕ್ಷೇತ್ರದ ಜನರನ್ನು ಅವರು ನೆನಪಿಸಿಕೊಳ್ಳುತ್ತಿದ್ದಾರೆ. ಇದನ್ನು ಅವರದೇ ಪಕ್ಷದ ಕಾರ್ಯಕರ್ತರು ಪ್ರಶ್ನಿಸಿದಾಗ ಮೋಟಮ್ಮ ಪುತ್ರಿ ನಯನಾ ಮೋಟಮ್ಮ ಕಾರ್ಯಕರ್ತರಿಗೆ ಬೆದರಿಕೆ ಹಾಕಿರುವ ಘಟನೆ ಶನಿವಾರ ಕ್ಷೇತ್ರದ ಆವತಿ ಗ್ರಾಮದಲ್ಲಿ ನಡೆದಿದೆ. ಮುಂದಿನ ದಿನಗಳಲ್ಲಿ ಮೋಟಮ್ಮ ಗೆಲುವು ಸಾಧಿಸಿದಲ್ಲಿ ಕ್ಷೇತ್ರದ ಜನತೆ ಯಾವ ರೀತಿಯಲ್ಲಿ ದೌರ್ಜನ್ಯಕ್ಕೆ ಒಳಗಾಗಬಹುದು ಎಂಬುದಕ್ಕೆ ಇದು ಮಾದರಿಯಾಗಿದೆ ಎಂದು ಮೂಡಿಗೆರೆ ವಿಧಾನಸಭಾ ಕ್ಷೇತ್ರದ ಬಿ.ಜೆ.ಪಿ. ಚುನಾವಣಾ ಉಸ್ತುವಾರಿ ಬಾಳೆಹೊನ್ನೂರು ಕೆ.ವೆಂಕಟೇಶ್ ಆರೋಪಿಸಿದ್ದಾರೆ.

ಈ ಸಂಬಂಧ ಪತ್ರಿಕಾ ಹೇಳಿಕೆ ನೀಡಿರುವ ಅವರು, ಕಳೆದ 12 ವರ್ಷಗಳಿಂದ ಎಂಎಲ್ಸಿ ಆಗಿ ಕ್ಷೇತ್ರದ ಒಡನಾಟವನ್ನು ಬಿಟ್ಟು ಬೆಂಗಳೂರಿನಲ್ಲಿ ಮೋಟಮ್ಮ ವಾಸ್ತವ್ಯ ಹೂಡಿದ್ದರು, ಈ ಬಾರಿ ಹೈಕಮಾಂಡ್‍ನಿಂದ ಟಿಕೆಟ್ ಗಿಟ್ಟಿಸಿಕೊಂಡು ಬಂದು ಹಣ ಮತ್ತು ಅಧಿಕಾರದ ಬಲದಿಂದ ಚುನಾವಣೆ ಗೆಲ್ಲುತ್ತೇನೆ ಎಂದು ಕ್ಷೇತ್ರದಲ್ಲಿ ಅವರು ಹಾಗೂ ಅವರ ಬೆಂಬಲಿಗರು ಓಡಾಡುತ್ತಿದ್ದಾರೆ. ಇವರಿಗೆ ಮಗಳು ನಯನಾ ಸಾಥ್ ನೀಡಿ ಪ್ರಚಾರದಲ್ಲಿ ತೊಡಗಿದ್ದಾರೆ. ನಯನಾ ಮೋಟಮ್ಮ ಹೋದ ಕಡೆಯೆಲ್ಲೆಲ್ಲಾ ತನ್ನದೇ ಪಕ್ಷದ ಕಾರ್ಯಕರ್ತರನ್ನು ಬಾಯಿಗೆ ಬಂದಂತೆ ಬೈಯುತ್ತಾ ಬೆದರಿಕೆ ಹಾಕುತ್ತಿದ್ದಾರೆ. ಅಲ್ಲದೇ ನಯನಾ ನೇತೃತ್ವದಲ್ಲಿ ಮತದಾರರಿಗೆ ಹಣದ ಆಮೀಷ ಒಡ್ಡುತ್ತಿರುವುದು ತಿಳಿದು ಬಂದಿದೆ ಎಂದರು.

ಮೋಟಮ್ಮ ಅವರು ಶಾಸಕಿ, ಸಚಿವೆಯಾಗಿ ಕ್ಷೇತ್ರದ ದಲಿತರಿಗೆ ಬಡ, ಹಿಂದುಳಿದವರೂ ಸೇರಿದಂತೆ ಮತದಾರರಿಗೆ ನೀಡಿರುವ ಕೊಡುಗೆ ಏನೆಂದು ಜನರೇ ಪ್ರಶ್ನಿಸುತ್ತಿದ್ದಾರೆ. ಇದನ್ನೇ ಕ್ಷೇತ್ರದ ಆವತಿ ಹೋಬಳಿ ಕಾರ್ಯಕರ್ತರು ಪ್ರಶ್ನಿಸಿದಾಗ ನಯನಾ ಮೋಟಮ್ಮ ಸ್ಪಕ್ಷದ ಕಾರ್ಯಕರ್ತರಿಗೆ ಬೆದರಿಕೆ ಹಾಕಿದ್ದಾರೆ. ಈ ಘಟನೆಯ ವೀಡಿಯೊವನ್ನು ಅವರದೇ ಕಾರ್ಯಕರ್ತರು ಸಾಮಾಜಿಕ ಜಾಲತಾಣಗಳಲ್ಲಿ ಹರಿಬಿಡುವ ಮೂಲಕ ಪಕ್ಷದೊಳಗೆ ಮೋಟಮ್ಮ ಅವರ ದೌರ್ಜನ್ಯವನ್ನು ಜನರ ಮುಂದಿಟ್ಟಿದ್ದಾರೆ. ನಯನಾ ಮೋಟಮ್ಮ ಈ ಹಿಂದೆಯೂ ಯುವ ಕಾಂಗ್ರೆಸ್ ಚುನಾವಣೆ ನಡೆಯುತ್ತಿದ್ದ ಸಂದರ್ಭದಲ್ಲಿ ಈಗಿನ ಯುವ ಕಾಂಗ್ರೇಸ್ ಮೂಡಿಗೆರೆ ಕ್ಷೇತ್ರ ಸಮಿತಿ ಅಧ್ಯಕ್ಷರಿಗೆ ತನ್ನ ಬೆಂಬಲಿಗರಿಂದ ಥಳಿಸಿದ್ದನ್ನು ಇಲ್ಲಿ ಸ್ಮರಿಸಬಹುದಾಗಿದೆ. ಈ ಹಿಂದೆ ತಾಯಿ ಮಾಡುತ್ತಿದ್ದ ದೌರ್ಜನ್ಯವನ್ನು ಮಗಳು ಮುಂದುವರಿಸುತ್ತಿರುವುದು ಮುಂದಿನ ದಿನಗಳಲ್ಲಿ ಇವರ ಅಧಿಕಾರದ ಕಾರ್ಯಸೂಚಿಯ ಭಾಗ ಎನಿಸುತ್ತಿದ್ದು, ಮತದಾರರು ಜಾಗೃತರಾಗಬೇಕೆಂದು ಅವರು ಹೇಳಿಕೆಯಲ್ಲಿ ತಿಳಿಸಿದ್ದಾರೆ.

ನಯನಾ ಮೋಟಮ್ಮ ಕಾರ್ಯಕರ್ತರಿಗೆ ಬೆದರಿಕೆ ಹಾಕಿಲ್ಲ:
ಸೋಲಿನ ಹತಾಶೆಯಲ್ಲಿ ಬಿಜೆಪಿ ಕಾಂಗ್ರೆಸ್ ಪಕ್ಷ ಹಾಗೂ ಅಭ್ಯರ್ಥಿ ಮೋಟಮ್ಮ ಅವರ ವಿರುದ್ಧ ಅಪಪ್ರಚಾರ ಮಾಡಲು ಮುಂದಾಗಿದೆ. ಆವತಿ ಗ್ರಾಮದಲ್ಲಿ ಕಾಂಗ್ರೆಸ್ ಕಾರ್ಯಕರ್ತರಿಗೆ ನಯನಾ ಮೋಟಮ್ಮ ಪಕ್ಷ ವಹಿಸಿದ್ದ ಜವಬ್ದಾರಿಗಳ ಬಗ್ಗೆ ಮನವರಿಕೆ ಮಾಡಿಕೊಟ್ಟಿದ್ದಾರೆಯೇ ಹೊರತು, ಬೆದರಿಕೆ ಹಾಕಿದ್ದಾರೆನ್ನುವುದು ಬಿಜೆಪಿ ಅವರ ಕುತಂತ್ರ ರಾಜಕಾರಣದ ಹುನ್ನಾರ ಮಾತ್ರ ಎಂದು ಮಾಜಿ ಜಿಪಂ ಸದಸ್ಯ ಹಾಗೂ ಕಾಂಗ್ರೆಸ್ ವಕ್ತಾರ ಅನಂತ್ ತಿರುಗೇಟು ನೀಡಿದ್ದಾರೆ.

ಶನಿವಾರ ಕ್ಷೇತ್ರ ವ್ಯಾಪ್ತಿಯ ಆವತಿ ಗ್ರಾಮಕ್ಕೆ ಚುನಾವಣಾ ಪ್ರಚಾರ ಕಾರ್ಯ ನಿಮಿತ್ತ ಭೇಟಿ ನೀಡಿದ್ದ ನಯನಾ ಮೋಟಮ್ಮ ಗ್ರಾಮದ ಕಾರ್ಯಕರ್ತರನ್ನು ಸೇರಿಸಿ ಅವರಿಗೆ ಪಕ್ಷ ವಹಿಸಿದ್ದ ಜವಬ್ದಾರಿಗಳ ಬಗ್ಗೆ ಮನವರಿಕೆ, ತಿಳುವಳಿಕೆ ಹೇಳಿದ್ದಾರಷ್ಟೆ. ಆದರೆ ಕೆಲ ಕಿಡಿಗೇಡಿಗಳು ನಯನಾ ಹಾಗೂ ಕಾರ್ಯಕರ್ತರ ನಡುವೆ ನಡೆದ ಚರ್ಚೆಯನ್ನು ವೀಡಿಯೊ ಮಾಡಿ ಬೆದರಿಕೆ ಹಾಕಿದ್ದಾರೆಂದು ಅಪಪ್ರಚಾರ ಮಾಡುತ್ತಿದ್ದಾರೆ. ಕ್ಷೇತ್ರದಾದ್ಯಂತ ಮೋಟಮ್ಮ ತಮ್ಮದೇ ಆದ ವರ್ಚಸ್ಸು ಹೊಂದಿದ್ದಾರೆ. ಶಾಸಕರಾಗಿ, ಸಚಿವೆಯಾಗಿ, ಎಮ್ಮೆಲ್ಸಿಯಾಗಿ ಅವರು ಕ್ಷೇತ್ರದ ದಲಿತರು, ಹಿಂದುಳಿದ ವರ್ಗದವರಿಗೆ, ಕಾಫಿ ಬೆಳೆಗಾರರೂ ಸೇರಿದಂತೆ ಮತದಾರರಿಗೆ ನೀಡಿರುವ ಕೊಡುಗೆಗಳ ಬಗ್ಗೆ ಮತದಾರರಿಗೆ ನೆನಪಿದೆ. ಈ ಕಾರಣಕ್ಕೆ ಮೋಟಮ್ಮ ಹೋದಲ್ಲೆಲ್ಲಾ ಉತ್ತಮ ಪ್ರತಿಕ್ರಿಯೆ ಸಿಗುತ್ತಿದೆ. ಇದನ್ನು ಮನಗಂಡಿರುವ ಬಿಜೆಪಿ ಅಭ್ಯರ್ಥಿ ಕುಮಾರಸ್ವಾಮಿ ಹಾಗೂ ಅವರ ಬೆಂಬಲಿಗರಿಗೆ ಚುನಾವಣೆಗೂ ಮುನ್ನ ಸೋಲಿನ ಮುನ್ಸೂಚನೆ ಸಿಕ್ಕಿದೆ. ಈ ಕಾರಣಕ್ಕೆ ಮೋಟಮ್ಮ ಅವರ ಬಗ್ಗೆ ಅಪಪ್ರಚಾರ ಮಾಡಲು ಯಾವುದೇ ವಿಷಯಗಳು ಸಿಗದಿದ್ದರಿಂದ ಕಾಂಗ್ರೆಸ್ ಕಾರ್ಯಕರ್ತರು ಹಾಗೂ ಮುಖಂಡರ ನಡುವೆ ನಡೆದ ಚರ್ಚೆಗೆ ಬೆದರಿಕೆಯ ಸ್ವರೂಪ ನೀಡಿ ಕತೆ ಹೆಣೆದಿದ್ದಾರೆ. ಇದು ಬಿಜೆಪಿ ಮುಖಂಡರು ಸೋಲಿನ ಹತಾಶೆಯಿಂದ ಮಾಡುತ್ತಿರುವ ಅಪಪ್ರಚಾರ ಮಾತ್ರ. ಇದಕ್ಕೆ ಕಾರ್ಯಕರ್ತರು, ಮತದಾರರು ತಲೆ ಕೆಡಿಸಿಕೊಳ್ಳದೇ ಕ್ಷೇತ್ರದ ಅಭಿವೃದ್ಧಿಗಾಗಿ ಕನಸು ಕಟ್ಟಿಕೊಂಡಿರುವ ಮೋಟಮ್ಮ ಅವರನ್ನು ಚುನಾವಣೆಯಲ್ಲಿ ಗೆಲ್ಲಿಸಬೇಕೆಂದು ಮನವಿ ಅವರು ಮನವಿ ಮಾಡಿದ್ದಾರೆ.

ಆವತಿ ಗ್ರಾಮದಲ್ಲಿ ನಡೆದ ಈ ಚರ್ಚೆಯ ಬಗ್ಗೆ ಗ್ರಾಮದ ಅದೇ ಕಾರ್ಯಕರ್ತರೇ ಈ ಸಂಬಂಧ ಹೇಳಿಕೆ ನೀಡಿದ್ದು, ಈ ಬಗ್ಗೆ ಬಿಜೆಪಿ ಹರಡಿಸಿರುವ ಬೆದರಿಕೆ, ದೌರ್ಜನ್ಯ ಎಂಬ ವದಂತಿಗಳು ಕೇವಲ ಅವರ ಹತಾಶೆಯ ಮನಸ್ಥಿತಿಗೆ ಹಿಡಿದ ಕನ್ನಡಿ. ಮೋಟಮ್ಮ ಅವರ ಗೆಲುವನ್ನು ತಡೆಯಲು ಇಂತಹ ಅಪಪ್ರಚಾರ ಮತದಾರರ ಮನಸ್ಥಿತಿಯನ್ನು ಬದಲಾಯಿಸಲು ಸಾಧ್ಯವಿಲ್ಲ ಎಂಬುದನ್ನು ಬಿಜೆಪಿ ಮುಖಂಡರು ಅರಿತಲ್ಲಿ ಮುಂದೆ ಅವರಿಗೆ ಕ್ಷೇತ್ರದಲ್ಲಿ ಜನರು ಗೌರವ ನೀಡುತ್ತಾರೆ. ಬಿಜೆಪಿ ಅಭ್ಯರ್ಥಿ ಕುಮಾರಸ್ವಾಮಿ ಅವರ ವ್ಯಕ್ತಿತ್ವ  ಬಗ್ಗೆ ಇಡೀ ಕ್ಷೇತ್ರದ ಜನರೂ ನೆನಪಿಟ್ಟುಕೊಂಡಿದ್ದಾರೆಂದು ಅನಂತ್ ತಿಳಿಸಿದರು.