ದೇಶದ ಪ್ರತಿ ಗ್ರಾಮಕ್ಕೆ ವಿದ್ಯುತ್ ಸಂಪರ್ಕ ನೀಡಲಾಗಿದೆ ಎಂದ ಪ್ರಧಾನಿ ಮೋದಿ: ಆದರೆ ವಾಸ್ತವವೇನು ?

ಹೊಸದಿಲ್ಲಿ, ಎ.30: ಪ್ರತಿಯೊಂದು ಮನೆಗೂ ವಿದ್ಯುಚ್ಛಕ್ತಿ ಸೌಲಭ್ಯ ನೀಡಿ ಭಾರತೀಯರ ಜೀವನವನ್ನು ಸುಧಾರಿಸಲಾಗುವುದು ಎಂಬ ಭರವಸೆಯೊಂದಿಗೆ ಪ್ರಧಾನಿ ನರೇಂದ್ರ ಮೋದಿ 2014ರಲ್ಲಿ ಅಧಿಕಾರಕ್ಕೆ ಬಂದಿದ್ದರು. ಈ ತಿಂಗಳೊಳಗಾಗಿ 18,000ಕ್ಕೂ ಅಧಿಕ ಗ್ರಾಮಗಳಿಗೆವಿದ್ಯುಚ್ಛಕ್ತಿ ಒದಗಿಸುವ ಗುರಿ ಸರಕಾರಕ್ಕಿದೆ ಹಾಗೂ ಅದು ಈ ಗುರಿಯನ್ನು  ಇನ್ನೇನು ಮುಟ್ಟಲಿದೆ ಎಂದೇ ಹೇಳಲಾಗುತ್ತಿದೆ.

ಆದರೂ ದೇಶದ 3.2 ಕೋಟಿ ಮನೆಗಳು ಕತ್ತಲಲ್ಲಿರುತ್ತವೆ. ಗ್ರಾಮವೊಂದರ ಶೇ.10ರಷ್ಟು ಮನೆಗಳು, ಶಾಲೆಗಳು ಆಸ್ಪತ್ರೆಗಳು ಹಾಗೂ ಸಾರ್ವಜನಿಕ ಸ್ಥಳಗಳಲ್ಲಿ ವಿದ್ಯುಚ್ಛಕ್ತಿ ಸಂಪರ್ಕವಿದ್ದರೆ ಆ ಗ್ರಾಮ ವಿದ್ಯುತ್ತೀಕರಣಗೊಂಡಿದೆ ಎಂಬುದು ಸರಕಾರದ ಲೆಕ್ಕಾಚಾರವಾಗಿದೆ.

ಆದರೆ  ಹೊಸದಾಗಿ ವಿದ್ಯುಚ್ಛಕ್ತಿ ಸಂಪರ್ಕ ಪಡೆದಿರುವ ಗ್ರಾಮಗಳಲ್ಲಿ ಶೇ.8ಕ್ಕಿಂತ ಕಡಿಮೆ ಮನೆಗಳಿಗೆ ವಿದ್ಯುತ್ ಸಂಪರ್ಕವೊದಗಿಸಲಾಗಿದೆ. ಸರಕಾರಿ ಅಂಕಿಅಂಶಗಳ ಪ್ರಕಾರ  ಕಳೆದ ಅಕ್ಟೋಬರ್ ತಿಂಗಳಲ್ಲಿ  ಗುರುತಿಸಲ್ಪಟ್ಟ 3.68 ಕೋಟಿ ಮನೆಗಳಲ್ಲಿ ಶೇ.13ರಷ್ಟು ಮನೆಗಳಿಗೆ  ವಿದ್ಯುತ್ ಸಂಪರ್ಕವೊದಗಿಸಲಾಗಿದೆ. ಸರಕಾರದ ಮುಂದಿನ ಗುರಿಯನ್ನು ತಲುಪಬೇಕಾದರೆ ಈಗ ಅದು ಪಡುತ್ತಿರುವ ಶ್ರಮದ ಮೂರು ಪಟ್ಟು ಅಧಿಕ ಶ್ರಮವಹಿಸಬೇಕಾಗುತ್ತದೆ ಎಂದು ವರದಿಯೊಂದು ತಿಳಿಸುತ್ತದೆ. ಆದರೂ 2019ರೊಳಗಾಗಿ ಎಲ್ಲಾ ಮನೆಗಳಿಗೂ ವಿದ್ಯುತ್ ಸಂಪರ್ಕ ಒದಗಿಸಲು ಸರಕಾರ ಸಫಲವಾಗಬಹುದೆಂದು ಅನಿಸುತ್ತಿಲ್ಲ. ಅದಕ್ಕೆ ಇನ್ನೂ ಹಲವು ವರ್ಷಗಳೇ ಬೇಕಾಗಬಹುದು ಎಮದು ತಜ್ಞರೊಬ್ಬರು ವಿವರಿಸುತ್ತಾರೆ.

2000ರಿಂದೀಚೆಗೆ ದೇಶ ವಿದ್ಯುತ್ತೀಕರಣದಲ್ಲಿ ಸಾಕಷ್ಟು ಪ್ರಗತಿ ಕಂಡಿದೆ. 2016ರಲ್ಲಿ ದೇಶದ ಶೇ.82ರಷ್ಟು ಜನಸಂಖ್ಯೆಗೆ ವಿದ್ಯುತ್ ತಲುಪಿತ್ತು.  ಈ ಶತಮಾನದ ಆಗಮನಕ್ಕಿಂತ ಮುಂಚೆ ಅದರ ಕೇವಲ ಶೇ.43ರಷ್ಟು ಜನಸಂಖ್ಯೆಗೆ ವಿದ್ಯುತ್ ತಲುಪಿತ್ತು. ಆದರೂ 2016ರಲ್ಲಿ ವಿಶ್ವದ ಕಾಲುಭಾಗದಷ್ಟು ಜನಸಂಖ್ಯೆಯ ಬಳಿ ವಿದ್ಯುತ್ ಸಂಪರ್ಕವಿಲ್ಲದೇ ಇದ್ದರೆ ಅದರಲ್ಲಿ ಭಾರತೀಯರ ಸಂಖ್ಯೆ 2.39 ಕೋಟಿಯಷ್ಟಾಗಿತ್ತು.

ವಿದ್ಯುತ್ ಸಚಿವಾಲಯದ ಅಂದಾಜಿನ ಪ್ರಕಾರ ಭಾರತದಲ್ಲಿ ಎಲ್ಲಾ ಮನೆಗಳಿಗೆ ವಿದ್ಯುತ್ ಸಂಪರ್ಕವೊದಗಿಸಲು ವಿದ್ಯುತ್ ಉತ್ಪಾದನಾ ಸಾಮರ್ಥ್ಯ 28 ಗಿಗಾವಾಟ್ ಆಗಬೇಕಿದೆ. ಸದ್ಯ ವಿದ್ಯುಚ್ಛಕ್ತಿ ಸಂಪರ್ಕ ಹೊಂದದ ಮನೆಗಳು ದೇಶದ 24 ರಾಜ್ಯಗಳಲ್ಲಿ ಹರಡಿಕೊಂಡಿವೆ. ದೇಶದಲ್ಲಿಯೇ ಅತ್ಯಧಿಕ ಸಂಖ್ಯೆಯ ಸಂಸದರನ್ನು ಹೊಂದಿರುವ ಉತ್ತರ ಪ್ರದೇಶದಲ್ಲಿ ಶೇ 42ರಷ್ಟು ಮನೆಗಳಿಗೆ ವಿದ್ಯುತ್ ಸಂಪರ್ಕವಿಲ್ಲವಾಗಿದೆ ಎಂದು ಸರಕಾರಿ ಅಂಕಿಅಂಶಗಳೇ ಹೇಳುತ್ತವೆ. ಪ್ರಧಾನಿ ನರೇಂದ್ರ ಮೋದಿಯ ವಾರಣಾಸಿ ಕ್ಷೇತ್ರವಿರುವ  ರಾಜ್ಯವಾದ ಉತ್ತರ ಪ್ರದೇಶವು  2014ರ ಬಿಜೆಪಿ ಗೆಲುವಿನಲ್ಲಿ ಮಹತ್ತರ ಪಾತ್ರ ವಹಿಸಿತ್ತು ಎಂಬುದನ್ನು ಇಲ್ಲಿ ಉಲ್ಲೇಖಿಸಬಹುದು.

ವಿದ್ಯುತ್ ವಿತರಣಾ ವ್ಯವಸ್ಥೆ ರಾಜ್ಯ ಸರಕಾರಗಳ ಅಧೀನದಲ್ಲಿ ಬರುತ್ತಿದ್ದು, ಅವುಗಳು ತಮ್ಮ ವಿದ್ಯುತ್ ವಿತರಣಾ ಕಂಪೆನಿಗಳ ಮೂಲಕ ಸರಕಾರಕ್ಕೆ ಆರ್ಥಿಕ ನಷ್ಟದ ಹೊರತಾಗಿಯೂ  ಗ್ರಾಮೀಣ ಮನೆಗಳು ಹಾಗೂ ರೈತರಿಗೆ ರಿಯಾಯಿತಿದರದಲ್ಲಿ ವಿದ್ಯುತ್ ಒದಗಿಸಿ ಅದನ್ನು ರಾಜಕೀಯ ಅಸ್ತ್ರವನ್ನಾಗಿಸಿದೆಯೆಂಬುದು ಸುಳ್ಳಲ್ಲ. ಮಾರ್ಚ್ 2015ರಲ್ಲಿ ವಿವಿಧ ರಾಜ್ಯಗಳ ವಿದ್ಯುತ್ ವಿತರಣಾ ಕಂಪೆನಿಗಳು ಸುಮಾರು  6.17 ಬಿಲಿಯನ್ ಡಾಲರ್ ನಷ್ಟ ಅನುಭವಿಸಿವೆ ಎಂದು ವಿದ್ಯುತ್ ಇಲಾಖೆಯ ಇತ್ತೀಚಿಗಿನ ವರದಿ ತಿಳಿಸುತ್ತದೆ.