ರಮಾನಾಥ ರೈ ಅಭಿವೃದ್ಧಿ ಕೆಲಸಗಳು ರಾಷ್ಟ್ರದ ಗಮನ ಸೆಳೆದಿವೆ: ಅಬ್ಬಾಸ್ ಅಲಿ

ಬಂಟ್ವಾಳ, ಮೇ 3: ರಮಾನಾಥ ರೈ ಅವರು ಅತೀ ಮುತುವರ್ಜಿಯಿಂದ ಕ್ಷೇತ್ರದಲ್ಲಿ ನಡೆಸಿದ ಶಾಶ್ವತ ಯೋಜನೆ ಹಾಗೂ ಅಭಿವೃದ್ಧಿ ಕೆಲಸಗಳು ರಾಷ್ಟ್ರಮಟ್ಟದಲ್ಲಿ ಗಮನ ಸೆಳೆಯುವ ಮೂಲಕ ಬಂಟ್ವಾಳದ ಚಿತ್ರಣವನ್ನು ಬದಲಿಸಿದ್ದಾರೆ ಎಂದು ಪಾಣೆಮಂಗಳೂರು ಬ್ಲಾಕ್ ಕಾಂಗ್ರೆಸ್ ಅಧ್ಯಕ್ಷ, ತಾಪಂ ಉಪಾಧ್ಯಕ್ಷ ಅಬ್ಬಾಸ್ ಅಲಿ ಅಭಿಪ್ರಾಯಪಟ್ಟಿದ್ದಾರೆ.

ರಾಜ್ಯ ವಿಧಾನ ಸಭಾ ಚುನಾವಣೆಯ ಹಿನ್ನೆಲೆಯಲ್ಲಿ ಬಂಟ್ವಾಳ ವಿಧಾನ ಸಭಾ ಕ್ಷೇತ್ರದಲ್ಲಿ ಕಾಂಗ್ರೆಸ್‌ನ ಪೂರ್ವತಯಾರಿಯ ಕುರಿತು ಅವರು ಪತ್ರಿಕೆ ಯೊಂದಿಗೆ ಮಾತನಾಡಿದರು.

ಕಳೆದ ಮೂರು ದಶಕಗಳಿಂದ ತಾನು ರೈ ಅವರೊಂದಿಗೆ ಒಡನಾಟವನ್ನು ಹೊಂದಿದ್ದೇನೆ. ಅವರು ವೈಯಕ್ತಿಕ ವಿಚಾರಗಳಿಕ್ಕಿಂತ ಹೆಚ್ಚು ಕ್ಷೇತ್ರದ ಜನರ ಕಾಳಜಿ ಹಾಗೂ ಚಿಂತನೆ ಮಾಡುತ್ತಾರೆ. ಅನ್ನಭಾಗ್ಯ, 94ಸಿ, 94ಸಿಸಿ ಹಕ್ಕು ಪತ್ರ ವಿತರಣೆ, ಬಹುಗ್ರಾಮ ಕುಡಿಯುವ ನೀರಿನ ಯೋಜನೆ, ಸರಕಾರಿ ಆಸ್ಪತ್ರೆ, ಮಿನಿವಿಧಾನ ಸೌಧ, ಬಸ್ ನಿಲ್ದಾಣ, ಮೆಸ್ಕಾಂ ಕಟ್ಟಡ, ಟ್ರೀ ಪಾರ್ಕ್‌ಗಳು ಹೀಗೆ ರೈ ಅವರ ಹಲವಾರು ಶಾಶ್ವತ ಯೋಜನೆಗಳು, ಅಭಿವೃದ್ಧಿ ಕಾರ್ಯಗಳು ಜನರ ಕಣ್ಣ ಮುಂದೆಯೇ ಕಾಣುತ್ತಿದ್ದು, ಯಾವುದೇ ಅಪಪ್ರಚಾರಕ್ಕೆ ಕ್ಷೇತ್ರದ ಜನತೆ ಕಿವಿಕೊಡುವುದಿಲ್ಲ. ಅಲ್ಲದೆ, ರೈ ಅವರು ಹೆಗ್ಗಳಿಕೆಯ ಮಾತುಗಳನ್ನು ಆಡಲು ಕೂಡಾ ಹೆಚ್ಚು ಇಷ್ಟ ಪಡುವುದಿಲ್ಲ. ಇವರ ಗುಣ ದೊಡ್ಡದು ಎಂದು ಪ್ರಶಂಸಿದರು.

ಬಂಟ್ವಾಳದಲ್ಲಿ ರಮಾನಥ ರೈಗೆ ಸಮಾನ ಪ್ರತಿಸ್ಫರ್ಧಿ ಯಾರೂ ಇಲ್ಲ. ರಮಾನಾಥ ರೈ ಅವರಿಗೆ, ಅವರೇ ಸಾಟಿ. ರೈ ಅವರ ವಿಶ್ರಾಂತಿ ರಹಿತ ಅಭಿವೃದ್ಧಿ ಯಿಂದ ತಾಲೂಕಿನ ಜನರು ಹಾಗೂ ಪಕ್ಷದ ಕಾರ್ಯಕರ್ತರು ಹೆಮ್ಮೆ ಪಡುತ್ತಿದ್ದಾರೆ ಎಂದು ಸಂತಸ ವ್ಯಕ್ತಪಡಿಸಿದರು.

ರಮಾನಾಥ ರೈ ಅವರು ಎಲ್ಲ ವರ್ಗದ ಜನರನ್ನು ಸಮಾನಾಗಿ ಕಂಡವರು. ಅಲ್ಲದೆ, ಅಲ್ಪಸಂಖ್ಯಾತ ಸಮುದಾಯಕ್ಕೂ ಹೆಚ್ಚಿನ ಸಹಾಯ ಹಾಗೂ ಅಭಿವೃದ್ಧಿ ಮಾಡಿದ್ದಾರೆ. ಮುಸ್ಲಿಮರಿಗೆ ಅನ್ಯಾಯ ಮಾಡಲಾಗಿದೆ ಎಂಬ ಆರೋಪ ಸುಳ್ಳು. ಇತರ ಧರ್ಮವನ್ನು ಗೌರವದಿಂದ ಕಾಣುವ ಗುಣ ಅವರದು. ರೈ ಅವರು ಯಾವತ್ತೊ ಜಾತಿ, ಧರ್ಮ ರಾಜಕಾರಣಕ್ಕೆ ಬೆಂಬಲ ನೀಡಿದವರಲ್ಲ. ಅವರು ಜಾತ್ಯತೀತ ಸಿದ್ಧಾಂತವನ್ನು ಬಲವಾಗಿ ನಂಬಿದವರು ಎಂದರು.

ರೈ ಅವರು ಈ ಭಾಗದ ಶಾಸಕರಾದ ನಂತರ ಹೆಚ್ಚಿನ ಗ್ರಾಮ ಪಂಚಾಯತ್, ತಾಲೂಕು ಪಂಚಾಯತ್, ಪುರಸಭೆ, ಎಪಿಎಂಸಿ, ಭೂ ಅಭಿವೃದ್ಧಿ ಬ್ಯಾಂಕ್ ಕಾಂಗ್ರೆಸ್‌ನ ಅಧಿಕಾರದಲ್ಲಿದೆ. ಕ್ಷೇತ್ರದಲ್ಲಿ ಹೆಚ್ಚಿನ ಜಿಪಂ ಸ್ಥಾನಗಳನ್ನು ಕಾಂಗ್ರೆಸ್ ಗೆದ್ದಿದೆ ಎಂದರು. ಒಂದೇ ಕ್ಷೇತ್ರದಿಂದ ಹಾಗೂ ಒಂದೇ ಪಕ್ಷದಿಂದ ಸತತ 8ನೆ ಬಾರಿ ಸ್ಫರ್ಧಿಸುವ ಕೀರ್ತಿ ರಮಾನಾಥ ರೈ ಅವರದು ಎಂದು ಸಂತಸ ವ್ಯಕ್ತಪಡಿಸಿದರು.

ಈ ಬಾರಿಯೂ ನಮ್ಮದೇ ಗೆಲುವು: ಕಳೆದ 5 ವರ್ಷಗಳಿಂದ ತಾಲೂಕಿನ ಅಭಿವೃದ್ಧಿ ಕಾರ್ಯಗಳನ್ನು ಜನರಿಗೆ ತಿಳಿಸುವ ಕೆಲಸ ಪಕ್ಷದ ವತಿಯಿಂದ ನಡೆಯುತ್ತಿದೆ. ಪ್ರತೀ ಗ್ರಾಮ ಬೂತ್-ವಲಯ ಮಟ್ಟದಲ್ಲಿ ಸಮಿತಿ ರಚನೆ, ಮತದಾರರ ನೋಂದಣಿ, ನಮ್ಮ ಬೂತ್-ನಮ್ಮ ಹೊಣೆ ಕಾರ್ಯಾಗಾರ, ಮನೆ ಮನೆಗೆ ಕಾಂಗ್ರೆಸ್, ಮತದಾರರ ಪುಟಕ್ಕೆ ಒಬ್ಬ ಸತ್ಯವಾದಿಯ ನೇಮಕ, ವಯಲ ಮಟ್ಟದ ಉಸ್ತುವಾರಿ ನೇಮಕ, ಬ್ಲಾಕ್ ಪದಾಧಿಕಾರಿಗಳ ನೇಮಕ, ಒಂದು ಕುಟುಂಬ ಒಂದು ಪುಟ ಅಭಿಯಾನ, ಮುಂಚೂಣಿ ಘಟಕಗಳ ಅಧ್ಯಕ್ಷರ, ಪದಾಧಿಕಾರಿಗಳ ನೇಮಕ, ಸರಣಿ ಸಭೆಗಳು-ಸಮಾವೇಶ, ಮಹಿಳಾ-ಯುವ ಕಾಂಗ್ರೆಸ್ ಆಧ್ಯತೆ ಇವೆಲ್ಲ ಕಾರ್ಯಗಳು ನಡೆಯುತ್ತಿದೆ. ಬೂತ್ ಮಟ್ಟದಲ್ಲಿ 2 ಸುತ್ತಿನ ಪ್ರಚಾರ ಕಾರ್ಯ ಮುಕ್ತಾಯಗೊಂಡಿದೆ ಎಂದ ಅವರು, ಈ ಬಾರಿಯೂ ಗೆಲುವು ನಮ್ಮದೇ ಎಂದು ವಿಶ್ವಾಸ ವ್ಯಕ್ತಪಡಿಸಿದರು.

ಮುಸ್ಲಿಮರಿಗೆ ಅನ್ಯಾಯ ಮಾಡಿಲ್ಲ: ಕ್ಷೇತ್ರದ ಜನರು ರೈ ಅವರ ಮೇಲೆ ಅಪಾರ ನಂಬಿಕೆಯನ್ನಿಟ್ಟಿದ್ದಾರೆ. ಎಲ್ಲರಿಗೂ ಸಮಬಾಳು ಸಮಪಾಲು ಎಂಬ ಸಿದ್ಧಾಂತ ಅವರದು. ಬಂಟ್ವಾಳದಲ್ಲಿ ಬಿಜೆಪಿಗೆ ಪ್ರಚಾರ ಮಾಡಲು ಯಾವುದೇ ವಿಷಯವಿಲ್ಲ. ಅದಕ್ಕಾಗಿ ಸುಳ್ಳು ಹೇಳಿಕೆಯನ್ನು ನೀಡುವ ಮೂಲಕ ಅಪಪ್ರಚಾರದಲ್ಲಿ ತೊಡಗಿಗೊಂಡಿದ್ದಾರೆ. ಒಂದು ಕಡೆ ಅಲ್ಪಸಂಖ್ಯಾತರ ಓಲೈಕೆ ಮಾಡಲಾಗುತ್ತಿದೆ ಆರೋಪ ಮಾಡಿದರೆ ಮತ್ತೊಂದೆಡೆ ಅಲ್ಪಸಂಖ್ಯಾತರ ಅನ್ಯಾಯ ಮಾಡಲಾಗಿದೆ ಎಂದು ಆರೋಪ ಮಾಡುತ್ತಿದ್ದಾರೆ. ಇದರ ಬಗ್ಗೆ ಜನರಿಗೆ ಸ್ಪಷ್ಟವಾದ ಅರಿವಿದೆ. ಜಿಲ್ಲೆ ಸಹಿತ ತಾಲೂಕಿನ ವಿವಿಧ ಕ್ಷೇತ್ರಗಳಲ್ಲಿ ಅಲ್ಪಸಂಖ್ಯಾತ ಸಮುದಾಯ ನಾಯಕರನ್ನು ನಿಗಮದ ಅಧ್ಯಕ್ಷರು, ನಾಮನಿರ್ದೇಶಿತವಾಗಿಯೂ ನೇಮಕ ಮಾಡಿದ್ದಾರೆ. ಗ್ರಾಪಂ ಅಧ್ಯಕ್ಷ, ಉಪಾಧ್ಯಕ್ಷ, ಪುರಸಭಾಯಲ್ಲಿ ಅಧ್ಯಕ್ಷ ಉಪಾಧ್ಯಕ್ಷ ಸ್ಥಾನ, ತಾಪಂನಲ್ಲಿ ಅಧ್ಯಕ್ಷ, ಉಪಾಧ್ಯಕ್ಷ ಸ್ಥಾನ, ಸ್ಥಾಯಿ ಸಮಿತಿ ಸ್ಥಾನ ಅಲ್ಲದೆ, ಹಲವಾರು ಬಾರಿ ಮೇಯರ್ ಸ್ಥಾನವನ್ನು ಕೂಡಾ ನೀಡುವ ಮೂಲಕ ಶ್ರಮಿಸಿದ್ದಾರೆ ಎಂದ ಅವರು, ಜಿಲ್ಲೆಯ ಸಾಮರಸ್ಯ ಹಾಗೂ ಸೌಹಾರ್ದತೆಗೆ ಎಂದೆಂದಿಗೂ ಪೂರಕವಾಗಿ ಕೆಲಸ ಮಾಡುತ್ತಿದ್ದಾರೆ. ಯಾವುದೇ ಸಭೆ ಸಮಾರಂಭ, ಧಾರ್ಮಿಕ ಕಾರ್ಯಕ್ರಮ ಹಾಗೂ ಖಾಸಗಿ ಕಾರ್ಯಕ್ರಮಗಳಲ್ಲಿ ಸೌಹಾರ್ದದ ಬಗ್ಗೆ ಸ್ಟಷ್ಟ ಮಾತುಗಳಲ್ಲಿ ಸ್ಪಲ್ಪ ಸಮಯವಾದರೂ ಮಾತನಾಡುವುದು ಅವರ ಜಾತ್ಯತೀತ ತತ್ವವನ್ನು ಪ್ರತಿಬಿಂಬಿಸುತ್ತದೆ  ಎಂದರು.

ಜಿಲ್ಲೆಯ ಸುಮಾರು 60 ಮಸೀದಿಗಳಿಗೆ ಅನುದಾನ ಸಹಿತ ಹೆಚ್ಚಿನ ದೇವಸ್ಥಾನಗಳಲ್ಲಿ ಇವರ ಕೊಡುಗೆ ಇದ್ದೇ ಇದೆ. ಅಲ್ಪಸಂಖ್ಯಾತ ಸಮುದಾಯ ಭವನ, ಹಾಸ್ಟೆಲ್‌ಗಳು ಹೀಗೆ ಅಲ್ಪಸಂಖ್ಯಾತರಿಗೆ 7ಕೋಟಿ ರೂ. ವಿಶೇಷ ಅನುದಾನವನ್ನು ಬಿಡುಗಡೆಗೊಳಿಸಿ, ಅಲ್ಪಸಂಖ್ಯಾತ ಕಾಲನಿಗಳನ್ನು ಅಭಿವೃದ್ಧಿ ಮಾಡಿದ್ದಾರೆ ಎಂದ ಅವರು, ಕಳೆದ ಬಾರಿ ಚುನಾವಣೆಯಲ್ಲಿ ಜಾತ್ಯತೀತ ಮುಸ್ಲಿಮರು ರೈ ಅವರನ್ನು ಬೆಂಬಲಕ್ಕೆ ನಿಂತಿದ್ದು, ಈ ಬಾರಿಯೂ ಉತ್ಸುಕರಾಗಿದ್ದಾರೆ ಎಂದು ಹೇಳಿದರು.

ಈ ಬಾರಿ ಅಭಿವೃದ್ಧಿಪರ ಮತಗಳು ಹಾಗೂ ಜಾತ್ಯತೀತ ಮತಗಳು ಒಂದಾಗಿದ್ದು, ಇದು ಇವರ ಗೆಲುವಿಗೆ ಇನ್ನಷ್ಟು ಬಲ ನೀಡಲಿದೆ. ಕಳೆದ ಬಾರಿಗಿಂತ ದುಪ್ಪಟ್ಟು ಅಂತರದಲ್ಲಿ ಗೆಲುವು ಸಾಧಿಸಲಿದ್ದಾರೆ.
-ಅಬ್ಬಾಸ್ ಅಲಿ, ಪಾಣೆಮಂಗಳೂರು ಬ್ಲಾಕ್ ಕಾಂಗ್ರೆಸ್ ಅಧ್ಯಕ್ಷ