2014ರಿಂದ ಸೃಷ್ಟಿಯಾಗಿರುವ ಉದ್ಯೋಗಗಳ ಲೆಕ್ಕ ನೀಡಿ: ಸಚಿವರಿಗೆ ಪ್ರಧಾನಿ ಮೋದಿ ಆದೇಶ

ಹೊಸದಿಲ್ಲಿ,ಮೇ 8: ತನ್ನ ಆಡಳಿತದ ನಾಲ್ಕು ವರ್ಷಗಳಲ್ಲಿ ಎಷ್ಟು ಉದ್ಯೋಗಗಳು ಸೃಷ್ಟಿಯಾಗಿವೆ ಎನ್ನುವುದನ್ನು ಲೆಕ್ಕ ಹಾಕುವಂತೆ ಪ್ರಧಾನಿ ನರೇಂದ್ರ ಮೋದಿ ಅವರು ತನ್ನ ಸಂಪುಟ ಸಚಿವರಿಗೆ ನಿರ್ದೇಶ ನೀಡಿದ್ದಾರೆ. 2019ರ ಲೋಕಸಭಾ ಚುನಾವಣೆಯಲ್ಲಿ ಉದ್ಯೋಗ ಸೃಷ್ಟಿಯ ವಿಷಯವು ಪ್ರಮುಖವಾಗಲಿರುವ ಹಿನ್ನೆಲೆಯಲ್ಲಿ ಮೋದಿಯವರ ಸೂಚನೆ ಮಹತ್ವ ಪಡೆದುಕೊಂಡಿದೆ.

ಸಚಿವಾಲಯಗಳು ಕೈಗೊಂಡಿರುವ ಯೋಜನೆಗಳು ಮತ್ತು ಕಾರ್ಯಕ್ರಮಗಳ ವಿವರಗಳು ಮತ್ತು ಅವುಗಳಿಂದ ಸೃಷ್ಟಿಯಾಗಿರುವ ಉದ್ಯೋಗಗಳ ಸಂಖ್ಯೆಯ ವರದಿಯನ್ನು ಸಲ್ಲಿಸುವಂತೆ ಅವುಗಳಿಗೆ ಸೂಚಿಸಲಾಗಿದೆ ಎಂದು ಬಲ್ಲ ಮೂಲಗಳು ತಿಳಿಸಿವೆ. ವಿವಿಧ ಕಾರ್ಯಕ್ರಮಗಳು ಜಿಡಿಪಿಯ ಮೇಲೆ ಎಷ್ಟರ ಮಟ್ಟಿಗೆ ಪರಿಣಾಮವನ್ನು ಬೀರಿವೆ ಎನ್ನುವುದನ್ನೂ ಲೆಕ್ಕ ಹಾಕುವಂತೆ ಅವುಗಳಿಗೆ ತಿಳಿಸಲಾಗಿದೆ.

ಪ್ರತಿ ವರ್ಷ ಒಂದು ಕೋಟಿ ಉದ್ಯೋಗ ಸೃಷ್ಟಿಯ ತನ್ನ ಭರವಸೆಯನ್ನು ಈಡೇರಿಸಲು ಮೋದಿಯವರು ವಿಫಲರಾಗಿದ್ದಾರೆ ಎಂಬ ಪ್ರತಿಪಕ್ಷಗಳ ಆರೋಪವನ್ನು ಎದುರಿಸಲು ಸರಕಾರವು ತನ್ನ ರಿಪೋರ್ಟ್ ಕಾರ್ಡ್‌ನಲ್ಲಿ ಈ ಅಂಕಿಅಂಶಗಳನ್ನು ಬಳಸಿಕೊಳ್ಳಲಿದೆ. 2014ರ ತನ್ನ ಚುನಾವಣಾ ಸಾಧನೆಯನ್ನು ಪುನರಾವರ್ತಿಸಲು ಮೋದಿಯವರು ಬಯಸಿದ್ದರೆ ಉದ್ಯೋಗ ಸೃಷ್ಟಿಯಲ್ಲಿನ ಸಾಧನೆಯು ಅವರ ಪಾಲಿಗೆ ಪ್ರಮುಖ ಅಸ್ತ್ರವಾಗುತ್ತದೆ. ಮೋದಿಯವರ ಆಡಳಿತ ಮೇ 26ರಂದು ನಾಲ್ಕು ವರ್ಷಗಳನ್ನು ಪೂರೈಸುತ್ತಿದ್ದು, ರಾಜ್ಯ ಚುನಾವಣೆಗಳಲ್ಲಿ ಮಿಶ್ರ ಫಲಿತಾಂಶಗಳನ್ನು ಅವರು ನೋಡಿದ್ದಾರೆ. ಮೇ 12ರಂದು ನಡೆಯಲಿರುವ ಕರ್ನಾಟಕ ವಿಧಾನಸಭಾ ಚುನಾವಣೆ ಅವರ ಪಕ್ಷ ಬಿಜೆಪಿಯ ಪಾಲಿಗೆ ಸತ್ವಪರೀಕ್ಷೆಯಾಗಿದೆ. ಕೆಲವೆಡೆ ಅವರ ಜನಪ್ರಿಯತೆ ಕುಸಿದಿದ್ದರೂ ಹೂಡಿಕೆದಾರರು ಈಗಲೂ ಅವರ ಬಗ್ಗೆ ಅದೇ ಒಲವು ಹೊಂದಿದ್ದಾರೆ. 2019ರ ಚುನಾವಣೆಯಲ್ಲಿ ಅಸ್ಪಷ್ಟ ಜನಾದೇಶ ಹೊರಬಿದ್ದರೆ,ವಿಶೇಷವಾಗಿ ಇತರ ದೇಶಗಳಲ್ಲಿ ಬಡ್ಡಿದರಗಳು ಹೆಚ್ಚುತ್ತಿರುವಾಗ ಭಾರತದಲ್ಲಿ ಹೂಡಿಕೆಯನ್ನು ಮಾಡಲು ಹೂಡಿಕೆದಾರರು ಹಿಂಜರಿಯಬಹುದು.

ಸರಕಾರವು ಜಾರಿಗೆ ತಂದಿರುವ ‘ಮೇಕ್ ಇನ್ ಇಂಡಿಯಾ’ದಂತಹ ಕಾರ್ಯಕ್ರಮಗಳು ದಾಖಲೆಯ ವಿದೇಶಿ ನೇರ ಹೂಡಿಕೆಯನ್ನು ಆಕರ್ಷಿಸಲು ನೆರವಾಗಿವೆಯಾದರೂ,ಅವುಗಳಿಂದ ಎಷ್ಟು ಉದ್ಯೋಗಗಳು ಸೃಷ್ಟಿಯಾಗಿವೆ ಎಂಬ ಬಗ್ಗೆ ಯಾವುದೇ ಅಧಿಕೃತ ದತ್ತಾಂಶಗಳಿಲ್ಲ. 2016,ನವೆಂಬರ್‌ನಲ್ಲಿ ಜಾರಿಗೊಳಿಸಿದ್ದ ನೋಟು ನಿಷೇಧವು ಪರಿಸ್ಥಿತಿಯನ್ನು ಇನ್ನಷ್ಟು ಹದಗೆಡಿಸಿದ್ದು,ಹಲವಾರು ಜನರು ಉದ್ಯೋಗಗಳನ್ನು ಕಳೆದುಕೊಂಡಿದ್ದಾರೆ.

ನೋಟು ನಿಷೇಧಕ್ಕೆ ಮುನ್ನ ನಾಗಾಲೋಟದಿಂದ ಮುನ್ನಡೆಯುತ್ತಿದ್ದ ಆರ್ಥಿಕತೆಯ ಬೆಳವಣಿಗೆಯು 2018ರ ಹಣಕಾಸು ವರ್ಷದಲ್ಲಿ ನಾಲ್ಕು ವರ್ಷಗಳ ಕನಿಷ್ಠ ಶೇ.6.6 ಕುಸಿದಿದೆ ಎಂದು ಅಂದಾಜಿಸಲಾಗಿದೆ. ಉಚ್ಛ್ರಾಯದ ವರ್ಷಗಳಲ್ಲಿಯೂ ನಿರುದ್ಯೋಗ ದರ ಅಧಿಕವಾಗಿಯೇ ಇತ್ತು.

ಭಾರತದ ನಿರುದ್ಯೋಗ ದರವು ಮಾರ್ಚ್‌ನಲ್ಲಿ ದಾಖಲಾಗಿದ್ದ 15 ತಿಂಗಳುಗಳ ಗರಿಷ್ಠ ಮಟ್ಟ ಶೇ.6.23ಕ್ಕೆ ಹೋಲಿಸಿದರೆ ಎಪ್ರಿಲ್‌ನಲ್ಲಿ ಶೇ.5.86ಕ್ಕೆ ಇಳಿದಿದೆ ಎಂದು ಮುಂಬೈನ ಉದ್ಯಮ ಮಾಹಿತಿ ಸಂಸ್ಥೆ ಸೆಂಟರ್ ಫಾರ್ ಮಾನಿಟರಿಂಗ್ ಇಂಡಿಯನ್ ಇಕಾನಮಿಯು ತಿಳಿಸಿದೆ.

ಮುಂದಿನ ಚುನಾವಣೆಯಲ್ಲಿ ಪುನರಾಯ್ಕೆಯನ್ನು ಬಯಸಿರುವ ಮೋದಿಯವರ ಪಾಲಿಗೆ ಉದ್ಯೋಗ ಸೃಷ್ಟಿಯು ಅತ್ಯಂತ ಹೆಚ್ಚಿನ ಆದ್ಯತೆಯ ವಿಷಯವಾಗಿದೆ ಎಂದು ಮೂಲಗಳು ತಿಳಿಸಿವೆ.