ದೇಶಕ್ಕೆ ನೀಡಿದ ಯಾವ ಭರವಸೆ ಈಡೇರಿಸಿದ್ದೀರಿ? ಪ್ರಧಾನಿ ಮೋದಿಗೆ ಸೋನಿಯಾಗಾಂಧಿ ಪ್ರಶ್ನೆ

ವಿಜಯಪುರ, ಮೇ 8: ದೇಶದ ಜನತೆಗೆ ಕಳೆದ ನಾಲ್ಕು ವರ್ಷಗಳ ಹಿಂದೆ ನೀಡಿದ್ದ ಯಾವ ಭರವಸೆಯನ್ನು ಈಡೇರಿಸಿದ್ದೀರಾ? ರೈತರು, ಯುವಕರು, ಮಹಿಳೆಯರು, ಮಕ್ಕಳು, ಮಧ್ಯಮ ವರ್ಗದವರಿಗಾಗಿ ಏನು ಮಾಡಿದ್ದೀರಾ ಎಂದು ಪ್ರಧಾನಿ ನರೇಂದ್ರಮೋದಿ ವಿರುದ್ಧ ಯುಪಿಎ ಅಧ್ಯಕ್ಷೆ ಸೋನಿಯಾಗಾಂಧಿ ವಾಗ್ದಾಳಿ ನಡೆಸಿದರು.

ಮಂಗಳವಾರ ನಗರದ ಬಬಲೇಶ್ವರದಲ್ಲಿ ಕಾಂಗ್ರೆಸ್ ಅಭ್ಯರ್ಥಿಗಳ ಪರವಾಗಿ ಬೃಹತ್ ಚುನಾವಣಾ ಪ್ರಚಾರ ಸಭೆಯನ್ನುದ್ದೇಶಿಸಿ ಮಾತನಾಡಿದ ಅವರು, ರೈತರ ಕಲ್ಯಾಣಕ್ಕಾಗಿ, ಯುವಕರಿಗೆ ಉದ್ಯೋಗ ಅವಕಾಶ ಕಲ್ಪಿಸಲು, ಮಧ್ಯಮ ವರ್ಗದ ಜನರ ಜೀವನಮಟ್ಟ ಸುಧಾರಿಸಲು, ಮಹಿಳೆಯರು, ಮಕ್ಕಳು, ಹಿಂದುಳಿದವರು, ದಲಿತರು, ಅಲ್ಪಸಂಖ್ಯಾತರ ಸುರಕ್ಷತೆಗೆ ಏನು ಮಾಡಿದ್ದೀರಾ ಎಂದು ಪ್ರಶ್ನಿಸಿದರು.

ನಾಲ್ಕು ವರ್ಷವಾದರೂ ಭ್ರಷ್ಟಾಚಾರ ನಿಯಂತ್ರಣಕ್ಕಾಗಿ ಲೋಕಪಾಲ್ ಯಾಕೆ ನೇಮಕ ಮಾಡಲಿಲ್ಲ. ಭ್ರಷ್ಟಾಚಾರ ನಿಯಂತ್ರಣಕ್ಕೆ ನೀವು ಅನುಸರಿಸುವ ಮಾದರಿ ಯಾವುದು? ವೇದಿಕೆಯಲ್ಲಿ ನಿಮ್ಮ ಅಕ್ಕ ಪಕ್ಕ ಕೂರುವವರ ಮಾದರಿಯೇ ಅಥವಾ ನಿಮ್ಮ ಅತ್ಯಂತ ಆಪ್ತ ಸ್ನೇಹಿತನ ಮಗನ ಮಾದರಿಯನ್ನು ಅನುಸರಿಸುತ್ತೀರಾ? ಎಂದು ಅವರು ಕೇಳಿದರು.

ಕಾಂಗ್ರೆಸ್ ಮುಕ್ತ ಭಾರತ ನಿರ್ಮಾಣ ಮಾಡಬೇಕೆಂಬುದು ನರೇಂದ್ರಮೋದಿಗೆ ಪ್ರಮುಖ ಕೆಲಸವಾಗಿದೆ. ಅವರೊಬ್ಬ ಉತ್ತಮ ಭಾಷಣಕಾರ, ಒಬ್ಬ ಕಲಾವಿದನಂತೆ ಭಾಷಣ ಮಾಡುತ್ತಾರೆ. ಕೇವಲ ಭಾಷಣದಿಂದ ದೇಶದ ಬಡವರ ಹೊಟ್ಟೆ ತುಂಬುವುದಾದರೆ ಮತ್ತಷ್ಟು ಭಾಷಣಗಳನ್ನು ಮಾಡಲಿ ಎಂದು ಸೋನಿಯಾಗಾಂಧಿ ಹೇಳಿದರು. ಕೇವಲ ಭಾಷಣದಿಂದ ಹೊಟ್ಟೆ ತುಂಬುವುದಿಲ್ಲ. ಅದಕ್ಕಾಗಿ ಅಕ್ಕಿ, ಬೇಳೆ ಬೇಕು. ಅನಾರೋಗ್ಯಪೀಡಿತರು ಆರೋಗ್ಯವಂತಾಗಲು ಆಸ್ಪತ್ರೆಗಳಲ್ಲಿ ಔಷಧಿಗಳು ಬೇಕು, ಮಹಿಳೆಯರ ಸಶಕ್ತಿಕರಣ, ಯುವಕರಿಗೆ ಉದ್ಯೋಗ ಅವಕಾಶಗಳು, ರೈತರಿಗೆ ಸೌಲಭ್ಯಗಳು ಭಾಷಣದಿಂದ ಸಿಗುವುದಿಲ್ಲ. ಅದಕ್ಕಾಗಿ, ದಿಟ್ಟ ನಿಲುವು, ದೃಢ ಸಂಕಲ್ಪ ಬೇಕು ಎಂದು ಅವರು ತಿಳಿಸಿದರು.

ಬೆಲೆ ಏರಿಕೆ ಇವತ್ತು ಗಗನಕ್ಕೇರಿದೆ. ಸಮಾಜದ ಬಡ, ಮಧ್ಯಮ ವರ್ಗದವರು ಸಂಕಷ್ಟಗಳನ್ನು ಎದುರಿಸುತ್ತಿದ್ದಾರೆ. ಇದನ್ನು ಗಮನಿಸದೆ ನರೇಂದ್ರಮೋದಿ ಸರಕಾರ ಪೆಟ್ರೋಲ್, ಡಿಸೇಲ್, ಗೃಹ ಬಳಕೆಯ ಅಡುಗೆ ಅನಿಲ ಸಿಲಿಂಡರ್ ಬೆಲೆಯನ್ನು ನಿರಂತರವಾಗಿ ಏರಿಸುತ್ತಿದೆ ಎಂದು ಸೋನಿಯಾಗಾಂಧಿ ಆರೋಪಿಸಿದರು.

ಪ್ರಧಾನಿ ಎಲ್ಲಿ ಹೋದರು ಸುಳ್ಳು ಹೇಳುವುದನ್ನು ಅಭ್ಯಾಸ ಮಾಡಿಕೊಂಡಿದ್ದಾರೆ. ಇತಿಹಾಸದ ಜೊತೆ ಚೆಲ್ಲಾಟವಾಡುವುದು, ನಮ್ಮ ದೇಶದ ಮಹಾನ್ ವ್ಯಕ್ತಿಗಳು, ಸೈನಿಕರ ಹೆಸರನ್ನು ತಮ್ಮ ರಾಜಕೀಯ ಲಾಭಕ್ಕಾಗಿ ಬಳಕೆ ಮಾಡಿಕೊಳ್ಳುತ್ತಿದ್ದಾರೆ. ಇವೆಲ್ಲ ಒಬ್ಬ ಪ್ರಧಾನಿಗೆ ಶೋಭೆ ತರುತ್ತದೆಯೆ? ಕೇವಲ ಮಾತುಗಳನ್ನು ಹೇಳುತ್ತಾ, ಪ್ರಮುಖ ವಿಷಯಗಳು ಬಂದಾಗ ಮೌನ ವಹಿಸುವ ಇಂತಹ ಯಾವುದಾದರೂ ಪ್ರಧಾನಿಯನ್ನು ನೀವು ನೋಡಿದ್ದೀರಾ ಎಂದು ಅವರು ಪ್ರಶ್ನಿಸಿದರು.

ಮುಖ್ಯಮಂತ್ರಿ ಸಿದ್ದರಾಮಯ್ಯ ನೇತೃತ್ವದ ಸರಕಾರವು ಸಮಾಜದ ಎಲ್ಲ ವರ್ಗಗಳ ಅಭಿವೃದ್ಧಿಗಾಗಿ ಮುಂದಿಟ್ಟಿರುವ ಹೆಜ್ಜೆಗಳು ನಿಜಕ್ಕೂ ಪ್ರಶಂಸನೀಯ. ಕರ್ನಾಟಕವನ್ನು ಅಭಿವೃದ್ಧಿಯಲ್ಲಿ ದೇಶದಲ್ಲೆ ಮೊದಲ ಸ್ಥಾನಕ್ಕೆ ತಲುಪಿಸಿದೆ. ಅಲ್ಲದೆ, ಬಡವರು, ಸಾಮಾನ್ಯ ಜನರು, ರೈತರಿಗಾಗಿ ಅನ್ನಭಾಗ್ಯ, ಕ್ಷೀರಭಾಗ್ಯ, ಕೃಷಿಭಾಗ್ಯ, ಕೃಷಿಯಂತ್ರಧಾರೆ ಸೇರಿದಂತೆ ಅನೇಕ ಯೋಜನೆಗಳನ್ನು ಜಾರಿಗೆ ತಂದಿದೆ ಎಂದು ಸೋನಿಯಾಗಾಂಧಿ ಮೆಚ್ಚುಗೆ ವ್ಯಕ್ತಪಡಿಸಿದರು.

ಬಡವರಿಗೆ ಕಡಿಮೆ ಬೆಲೆಯಲ್ಲಿ ಉತ್ತಮ ಹಾಗೂ ರುಚಿಕರವಾದ ಭೋಜನ ನೀಡಲು ಇಂದಿರಾ ಕ್ಯಾಂಟೀನ್ ಆರಂಭಿಸಲಾಗಿದೆ. ಆದರೆ, ನಮ್ಮ ವಿರೋಧಿಗಳು ಇಂತಹ ಬಡವರ ಪರವಾದ ಯೋಜನೆಗಳಿಗೂ ವಿರೋಧ ಮಾಡುತ್ತಾರೆ. ನಾವು ಜನರಿಗೆ ಉದ್ಯೋಗ ಕಲ್ಪಿಸಲು ನರೇಗಾ ಯೋಜನೆ ಜಾರಿಗೆ ತಂದಾಗಲೂ ಬಿಜೆಪಿ ಹಾಗೂ ನರೇಂದ್ರಮೋದಿ ಇದನ್ನು ವಿರೋಧಿಸಿ, ಅಪಹಾಸ್ಯ ಮಾಡಿದ್ದರು ಎಂದು ಅವರು ಹೇಳಿದರು.

ಸತತ ಬರಗಾಲದಿಂದ ಕಂಗೆಟ್ಟಿದ್ದ ರೈತರಿಗೆ ಕೇಂದ್ರ ಸರಕಾರದಿಂದ ನೆರವು ಒದಗಿಸಲು ಸಿದ್ದರಾಮಯ್ಯ, ಪ್ರಧಾನಿ ಬಳಿ ಸಮಯ ಕೇಳಿದರು. ಆದರೆ, ಅವರು ನಿಮಗೆ ನೆರವು ನೀಡುವುದಿರಲಿ, ಮುಖ್ಯಮಂತ್ರಿಗೆ ಭೇಟಿ ಮಾಡಲು ಕಾಲಾವಕಾಶ ನೀಡಿಲ್ಲ. ಆ ಮೂಲಕ ಕೇವಲ ಮುಖ್ಯಮಂತ್ರಿ ಅಷ್ಟೇ ಅಲ್ಲ, ರಾಜ್ಯದ ರೈತರು ಹಾಗೂ ಅವರ ಕುಟುಂಬಗಳಿಗೂ ಮೋದಿ ಅಪಮಾನ ಮಾಡಿದರು ಎಂದು ಸೋನಿಯಾಗಾಂಧಿ ಆಕ್ರೋಶ ವ್ಯಕ್ತಪಡಿಸಿದರು. ಬಿಜೆಪಿ ಆಡಳಿತವಿರುವ ರಾಜ್ಯಗಳಲ್ಲಿ ಬರಗಾಲ ಬಂದರೆ ಸಾವಿರಾರು ಕೋಟಿ ರೂ.ನೆರವು ನೀಡಿದ ನರೇಂದ್ರಮೋದಿ ಸರಕಾರ, ಕರ್ನಾಟಕದ ರೈತರಿಗೆ ಮಾತ್ರ ನೆರವು ನೀಡಿಲ್ಲ. ಮೋದಿಯವರೇ ಇದೇನಾ ನಿಮ್ಮ ಸಬ್ಕಾ ಸಾಥ್, ಸಬ್ಕಾ ವಿಕಾಸ್ ಎಂದು ಅವರು ಪ್ರಶ್ನಿಸಿದರು.

ಸಿದ್ದರಾಮಯ್ಯ ಸರಕಾರವು 22 ಲಕ್ಷ ರೈತರ ಸಾಲ ಮನ್ನಾ ಮಾಡಿತು. ಇದಲ್ಲದೆ, ರೈತರ ಪರವಾಗಿ ಅನೇಕ ಯೋಜನೆಗಳನ್ನು ಜಾರಿಗೆ ತಂದ ಪರಿಣಾಮವಾಗಿ ಇವತ್ತು ಹಣ್ಣು, ತರಕಾರಿ, ಮಸಾಲೆ ಪದಾರ್ಥಗಳ ಉತ್ಪಾದನೆ ಹಾಗೂ ರಫ್ತಿನಲ್ಲಿ ದೇಶದ ಪ್ರಮುಖ ಮೂರು ರಾಜ್ಯಗಳ ಪೈಕಿ ಕರ್ನಾಟಕವು ಒಂದಾಗಿದೆ ಎಂದು ಸೋನಿಯಾಗಾಂಧಿ ಹೇಳಿದರು.

ರಾಜ್ಯದ ಜನತೆಯು ಮೇ 12ರಂದು ರಾಜ್ಯದ ಸರ್ವತೋಮುಖ ಅಭಿವೃದ್ಧಿಗಾಗಿ ಮತ್ತೊಮ್ಮೆ ಕಾಂಗ್ರೆಸ್ ಪಕ್ಷವನ್ನು ಸ್ಪಷ್ಟ ಬಹುಮತದೊಂದಿಗೆ ಗೆಲ್ಲಿಸುವ ಮೂಲಕ ಸಮಾನತೆ, ಸಹೋದರತೆಯ ಸಂದೇಶವನ್ನು ಸಾರುವ ಬಸವ ತತ್ವದ ವಿರೋಧಿಗಳಿಗೆ ತಕ್ಕ ಉತ್ತರ ನೀಡಿ ಎಂದು ಸೋನಿಯಾಗಾಂಧಿ ಮನವಿ ಮಾಡಿದರು.

ವಿಜಯಪುರ ಮಹಾತ್ಮ, ಮಹಾಪುರುಷರ ಭೂಮಿ. ದೇಶಕ್ಕೆ ಸಮಾನತೆ, ಸಹೋದರತೆಯ ಸಂದೇಶ ಸಾರಿದ ಬಸವಣ್ಣನ ಬಸವ ತತ್ವದ ಕೇಂದ್ರ. ನರೇಂದ್ರಮೋದಿ ಹೊಸ ಹೊಸ ಭರವಸೆಗಳನ್ನು ನೀಡಿ, ದ್ವೇಷ ಹುಟ್ಟಿ ಹಾಕಿ ಹೋಗುತ್ತಾರೆ. ಆದರೆ, ನಾವು ಬಿಜೆಪಿ ಕುಟಿಲ ನೀತಿಗಳನ್ನು ಯಶಸ್ವಿಯಾಗಲು ಬಿಡುವುದಿಲ್ಲ ಎಂದು ಅವರು ಹೇಳಿದರು.