ರಾಜಕಾರಣಿಗಳೇ ನಮ್ಮ ಹಕ್ಕುಗಳನ್ನು ನಮಗೆ ನೀಡಿ: ಆದಿವಾಸಿ ಹಕ್ಕುಗಳ ಸಮನ್ವಯ ಸಮಿತಿ ಒತ್ತಾಯ

ಮಡಿಕೇರಿ, ಮೇ.10: ಕರ್ನಾಟಕ ರಾಜ್ಯದ ವಿವಿಧ ಜಿಲ್ಲೆಗಳಲ್ಲಿರುವ ಆದಿವಾಸಿಗಳಂತೆ ಕೊಡಗಿನ ಆದಿವಾಸಿಗಳು ಕೂಡ ಅನೇಕ ಸಮಸ್ಯೆಗಳಲ್ಲಿ ಸಿಲುಕಿ ಸಂಕಷ್ಟವನ್ನು ಎದುರಿಸುತ್ತಿದ್ದು, ಚುನಾವಣಾ ಅಖಾಡದಲ್ಲಿರುವ ರಾಜಕಾರಣಿಗಳು ನಮ್ಮ ಬೇಡಿಕೆಗಳನ್ನು ಈಡೇರಿಸಲು ಅಗತ್ಯ ಕ್ರಮಗಳನ್ನು ಕೈಗೊಳ್ಳಬೇಕೆಂದು ಕರ್ನಾಟಕ ಆದಿವಾಸಿ ಹಕ್ಕುಗಳ ಸಮನ್ವಯ ಸಮಿತಿ ಒತ್ತಾಯಿಸಿದೆ. 

ಪೋಡು, ಹಾಡಿ ಕಲೋನಿ, ಪೈಸಾರಿ ಮುಂತಾದ ಜನವಸತಿ ಪ್ರದೇಶಗಳಲ್ಲಿ ಮೂಲಭೂತ ಸೌಕರ್ಯಗಳಿಂದ ವಂಚಿತರಾಗಿ ಆದಿವಾಸಿಗಳು ಬದುಕು ಸಾಗಿಸುತ್ತಿದ್ದಾರೆ. ಕೊಡಗಿನಲ್ಲಿ ವಿಶೇಷವಾಗಿ ಕಾಫಿತೋಟಗಳ ಲೈನ್ ಮನೆಗಳಲ್ಲಿ ಯಾವುದೇ ಕಾನೂನಾತ್ಮಕ ಸೌಲಭ್ಯಗಳು ಇಲ್ಲದೆ ದಿನ ಕಳೆಯುತ್ತಿದ್ದಾರೆ. ಸ್ವಂತ ಮನೆಯಿಲ್ಲ, ಗುರುತಿಗೆ ಯಾವುದೇ ಅಧಿಕೃತ ದಾಖಲೆಗಳಿಲ್ಲ, ಅನ್ನಭಾಗ್ಯದ ಚೀಟಿಯಿಲ್ಲ, ಜಾತಿ ನಿರೂಪಿಸಲು ಜಾತಿ ಪ್ರಮಾಣ ಪತ್ರ ಇಲ್ಲ, ಮತ ಚೀಟಿ ಮೊದಲೇ ಇಲ್ಲ. ಹೀಗೆ ಇಲ್ಲಗಳ ನಡುವೆ ಸಿಲುಕಿ ಬದುಕುತ್ತಿರುವ ಆದಿವಾಸಿ ಜನಾಂಗಗಳ ಸ್ಥಿತಿಗತಿಯನ್ನು ಮೇ 12 ರಂದು ನಡೆಯುವ ವಿಧಾನಸಭಾಚುನಾವಣೆಯ ಸಂದರ್ಭದಲ್ಲಿ ಜನತೆಯ ಗಮನಕ್ಕೆ ತರುತ್ತಿರುವುದಾಗಿ ಜಿಲ್ಲಾ ಕಾರ್ಯದರ್ಶಿ ವೈ.ಕೆ.ಗಣೇಶ್ ಪತ್ರಿಕಾ ಹೇಳಿಕೆಯಲ್ಲಿ ತಿಳಿಸಿದ್ದಾರೆ.

ನಮಗೂ ಸ್ಪತಂತ್ರ ಭಾರತದಲ್ಲಿ ಎಲ್ಲರಂತೆ ಬದುಕುವ ಹಕ್ಕಿದೆ, ಆದರೆ ಅನೇಕ ವರ್ಷಗಳಿಂದ ನಮ್ಮ ಸಮುದಾಯ ಸಾಮಾಜಿಕ, ಆರ್ಥಿಕ ಹಾಗೂ ಶೈಕ್ಷಣಿಕವಾಗಿ ಹಿಂದುಳಿದಿದೆ. ನಮಗೂ ಎಲ್ಲರಂತೆ ಬದುಕಲು ಅವಕಾಶ ಮಾಡಿಕೊಡುವುದು ಆಳುವ ಸರ್ಕಾರಗಳ ಕರ್ತವ್ಯವಾಗಿದೆ. ನಮ್ಮ ಹಾಡಿ, ಪೋಡು, ಊರುಗಳಿಗೆ ಸಮೀಪದಲ್ಲಿ ಶಾಲೆಗಳಿರುವಂತೆ ವ್ಯವಸ್ಥೆ ಕಲ್ಪಿಸಬೇಕು, ಆಶ್ರಮ ಶಾಲೆಗಳನ್ನು ಎಲ್ಲಾ ಮೂಲಭೂತ ಸೌಕರ್ಯಗಳೊಂದಿಗೆ ಮಕ್ಕಳ ಅಭಿರುಚಿಗೆ ತಕ್ಕಂತೆ ಆಕರ್ಷಕಗೊಳಿಸಬೇಕು, ಆಶ್ರಮ ಶಾಲೆಗಳಿಗೆ ಖಾಯಂ ಶಿಕ್ಷಕರನ್ನು ನೇಮಿಸಿ ಮಕ್ಕಳ ಶಿಕ್ಷಣಕ್ಕೆ ಒತ್ತು ನೀಡಬೇಕು, ಶಿಕ್ಷಣ ಇಲಾಖೆ ಇತರ ಶಾಲೆಗಳಿಗೆ ವಿತರಿಸುವ ಎಲ್ಲಾ ಪರಿಕರಗಳನ್ನು ನಮ್ಮ ಶಾಲೆಗಳಿಗೂ ವಿತರಿಸಬೇಕು, ಆಶ್ರಮ ಶಾಲೆಗಳಲ್ಲಿ ಒಬ್ಬ ಆಪ್ತ ಸಮಾಲೋಚಕರನ್ನು ನೇಮಿಸಬೇಕು, ಮಕ್ಕಳ ಕ್ರೀಡಾ ಅಭ್ಯುದಯಕ್ಕಾಗಿ ವಿಶೇಷ ಕಾರ್ಯಕ್ರಮ ಜಾರಿ ಮಾಡಬೇಕು.

ಈಗಾಗಲೇ ಪ್ರೌಢ ಶಿಕ್ಷಣ ಮುಗಿಸಿರುವ ಮಕ್ಕಳಿಗೆ ಅವರ ಶೈಕ್ಷಣಿಕ ಯೋಗ್ಯತೆಗನುಸಾರ ಉದ್ಯೋಗ ತರಬೇತಿ ಮತ್ತು ಕೋಚಿಂಗ್ ವ್ಯವಸ್ಥೆ ಮಾಡಬೇಕು, ಮಕ್ಕಳ ಶಿಕ್ಷಣಕ್ಕೆ ಪ್ರಯಾಣ ಸೌಕರ್ಯ ನೀಡುವ ಮೂಲಕ ವನ್ಯಜೀವಿಯಿಂದ ರಕ್ಷಣೆ ನೀಡಬೇಕು, ಮನೆಗಳನ್ನು ನಿರ್ಮಿಸಿಕೊಡಬೇಕು, ವಾಸಸ್ಥಳಕ್ಕೆ ರಸ್ತೆ ವ್ಯವಸ್ಥೆ ಮಾಡಬೇಕು, ಬೀದಿ ದೀಪಗಳ ಅಳವಡಿಕೆಯಾಗಬೇಕು, ಕುಡಿಯುವ ನೀರಿನ ವ್ಯವಸ್ಥೆ, ಸ್ಮಶಾನ ಜಾಗ ಸೇರಿದಂತೆ ಸಮುದಾಯ ಭವನ ನೀಡಬೇಕು, ಸೌಲಭ್ಯಗಳನ್ನು ಪಡೆಯಲು ದಾಖಲೆಗಳು ಇಲ್ಲದಿರುವುದೇ ಕಾರಣವಾಗಿದ್ದು, ವಾಸಿಸುತ್ತಿರುವ ಸ್ಥಳಕ್ಕೆ ಹಕ್ಕು ಪತ್ರ ಹಾಗೂ ಜಾತಿ ದೃಢೀಕರಣ ಪತ್ರ, ಮತದಾರರ ಚೀಟಿ, ಪಡಿತರ ಚೀಟಿ, ಆಧಾರ್, ಬ್ಯಾಂಕ್ ಖಾತೆ ನೀಡಬೇಕು,

ಆದಿವಾಸಿಗಳು ತಲತಲಾಂತರಗಳಿಂದ ಹಿಂದುಳಿದಿರುವುದರಿಂದ ಈಗಲೂ ಹಿಂಜರಿಕೆಯಿಂದ ಬದುಕು ಸಾಗಿಸುತ್ತಿದ್ದು, ನಮ್ಮ ಆತ್ಮ ವಿಶ್ವಾಸ ಮೂಡಿಸುವುದಕ್ಕಾಗಿ ಸಾಮಾಜಿಕ ಕ್ರಮಗಳಾದ ನಮ್ಮ ಭಾಷೆ, ಸಾಂಸ್ಕೃತಿಕ ಆಚಾರ ವಿಚಾರ, ಉಳಿಸಿ ಒಳ್ಳೆಯ ಅಂಶಗಳನ್ನು ಬೆಳಸಲು ಇರುವ ಸಾಂಸಕೃತಿಕ ಚಟುವಟಿಕೆಗಳಿಗೆ ಉತ್ತೇಜನ ನೀಡಬೇಕು, ಕನಿಷ್ಟ ಕೂಲಿಗಿಂತ ಕಡಿಮೆ ಕೂಲಿಗೆ ಕೆಲಸ ಮಾಡಬೇಕಾದ ದುಸ್ಥಿತಿ ಇದ್ದು, ಕನಿಷ್ಟ ಕೂಲಿ ಖಾತರಿ ಪಡಿಸಬೇಕು, ಉದ್ಯೋಗ ಖಾತರಿಯ ಕೆಲಸದ ಚೌಕಟ್ಟಿಗೆ ನಮ್ಮನ್ನು ಅಳವಡಿಸಬೇಕು, ಮಾಲಿಕರ ಬಳಿ ಮಾಡಿರುವ ಸಾಲವನ್ನು ಸರ್ಕಾರ ವಹಿಸಿಕೊಂಡು ಸಾಲ ಮುಕ್ತರನ್ನಾಗಿಸಿ ಸ್ವತಂತ್ರವಾಗಿ ಕೆಲಸ ಮಾಡುವ ವಾತಾವರಣ ಸೃಷ್ಟಿಸಬೇಕು, ವಿದ್ಯಾವಂತ ಮಕ್ಕಳಿಗೆ ವಿವಿಧ ಯೋಜನೆಗಳ ತರಬೇತಿ ನೀಡಬೇಕು, ತೋಟದ ಲೈನ್‍ನಲ್ಲಿರುವ ಆದಿವಾಸಿಗಳಿಗೂ ಕೃಷಿ ಮಾಡಲು ಕೃಷಿ ಭೂಮಿ ನೀಡಬೇಕು, ಆದಿವಾಸಿಗಳಿಗೆ ಕೃಷಿ ಮಾಡಲು ಸ್ಥಳ ಇಲ್ಲದಿರುವುದರಿಂದ ಅರಣ್ಯ ಹಕ್ಕು ಕಾಯ್ದೆಯನ್ನು ಪರಿಣಾಮಕಾರಿಯಾಗಿ ಜಾರಿ ಮಾಡಿ ಅದನ್ನು ಪಡೆಯಲು ಇರುವ ಕ್ರಮಗಳನ್ನು ಸರಳಗೊಳಿಸಬೇಕು, ಯೋಜನೆಗಳ ಪರಿಣಾಮ, ಪ್ರಯೋಜನ, ಪ್ರಭಾವ, ಉಪಯೋಗಗಳ ಕುರಿತು ಕಾಲ ಕಾಲಕ್ಕೆ ವಿಶ್ಲೇಷಣೆ, ವಿಮರ್ಶೆ ಮಾಡುವುದಕ್ಕೆ ಖಾಯಂ ವ್ಯವಸ್ಥೆ ಕಲ್ಪಿಸಬೇಕು. ಈ ಹಕ್ಕುಗಳ ಬಗ್ಗೆ 'ರಾಜಕಾರಣಿಗಳೇ ನಮ್ಮ ಹಕ್ಕುಗಳನ್ನು ನಮಗೆ ನೀಡಿ' ಎಂದು ಚುನಾವಣಾ ಅಖಾಡದಲ್ಲಿರುವ ರಾಜಕಾರಣಿಗಳ ಗಮನಕ್ಕೆ ತರುತ್ತಿರುವುದಾಗಿ ವೈ.ಕೆ.ಗಣೇಶ್ ತಿಳಿಸಿದ್ದಾರೆ. 

ಕರ್ನಾಟಕ ಆದಿವಾಸಿ ಹಕ್ಕುಗಳ ಸಮನ್ವಯ ಸಮಿತಿ, ಅಖಿಲ ಭಾರತ ಮಟ್ಟದಲ್ಲಿ ಆದಿವಾಸಿಗಳ ಹಕ್ಕುಗಳಿಗಾಗಿ ಸಂಘಟಿಸಲಾಗಿರುವ ಆದಿವಾಸಿ ಅಧಿಕಾರ್ ಮಂಚ್‍ನ ಸಂಯೋಜಿತ ಸಂಘಟನೆಯಾಗಿ ಕಾರ್ಯ ನಿರ್ವಹಿಸುತ್ತಿದ್ದು, ಆದಿವಾಸಿಗಳ ಬೇಡಿಕೆಗಳ ಈಡೇರಿಕೆಗಾಗಿ ಒತ್ತಾಯಿಸಿ ಹೋರಾಟ ಮುಂದುವರಿಯಲಿದೆ ಎಂದು ಹೇಳಿದ್ದಾರೆ.