ಶೇ.70 ಕ್ಕಿಂತ ಹೆಚ್ಚು ಮತದಾನ: ಸಂಜೀವ್‌ ಕುಮಾರ್

ಬೆಂಗಳೂರು, ಮೇ 12: ರಾಜ್ಯ ವಿಧಾನಸಭೆಯ 222 ಕ್ಷೇತ್ರಗಳಿಗೆ ನಡೆದ ಚುನಾವಣೆಯಲ್ಲಿ ಶೇ.70ಕ್ಕಿಂತ ಹೆಚ್ಚು ಮತದಾನವಾಗಿರುವ ಸಾಧ್ಯತೆಯಿದೆ. ಈಗಲೇ ನಿರ್ದಿಷ್ಟವಾಗಿ ಅಂಕಿ ಸಂಖ್ಯೆಗಳನ್ನು ಹೇಳಲು ಸಾಧ್ಯವಿಲ್ಲ ಎಂದು ರಾಜ್ಯ ಮುಖ್ಯ ಚುನಾವಣಾಧಿಕಾರಿ ಸಂಜೀವ್‌ಕುಮಾರ್ ತಿಳಿಸಿದ್ದಾರೆ.

ಶನಿವಾರ ವಿಕಾಸಸೌಧದಲ್ಲಿ ಸುದ್ದಿಗೋಷ್ಠಿಯನ್ನುದ್ದೇಶಿಸಿ ಮಾತನಾಡಿದ ಅವರು, ಸಣ್ಣಪುಟ್ಟ ಘಟನೆಗಳು ಹೊರತುಪಡಿಸಿ ರಾಜ್ಯಾದ್ಯಂತ ಬಹುತೇಕ ಶಾಂತಿಯುತವಾಗಿ ಮತದಾನ ನಡೆದಿದೆ. ಯುವಜನತೆ, ಹಿರಿಯ ನಾಗರಿಕರು, ಮಹಿಳೆಯರು ಹೆಚ್ಚಿನ ಪ್ರಮಾಣದಲ್ಲಿ ಮತ ಚಲಾಯಿಸಿದ್ದಾರೆ ಎಂದರು.
ಚುನಾವಣಾ ಆಯೋಗದ ಜೊತೆಗೆ ಎಲ್ಲ ಇಲಾಖೆಗಳ ಸಹಕಾರ ಇತ್ತು. ನೋಡಲ್ ಅಧಿಕಾರಿಗಳು, ಅರೆ ಸೇನಾ ಪಡೆಯ ಸಿಬ್ಬಂದಿ, ಪೊಲೀಸ್ ಸಿಬ್ಬಂದಿ, ಚುನಾವಣಾ ಕರ್ತವ್ಯಕ್ಕೆ ನಿಯೋಜಿಸಲ್ಪಟ್ಟಿದ್ದ ಎಲ್ಲ ಸಿಬ್ಬಂದಿಗಳಿಗೂ ಧನ್ಯವಾದಗಳು. ಕೇಂದ್ರ ಚುನಾವಣಾ ಆಯೋಗದ ಮಾರ್ಗದರ್ಶನ ಹಾಗೂ ಸಹಕಾರದಿಂದ ಯಶಸ್ವಿಯಾಗಿ ಚುನಾವಣೆ ನಡೆಸಲು ಸಾಧ್ಯವಾಯಿತು ಎಂದು ಅವರು ಹೇಳಿದರು.

ಕೆಲವೆಡೆ ವಿವಿ ಪ್ಯಾಟ್ ಸಮಸ್ಯೆಯಾಗಿತ್ತು. 212 ಬ್ಯಾಲೆಟ್ ಯೂನಿಟ್, 340 ಕಂಟ್ರೋಲ್ ಯೂನಿಟ್, 698 ವಿವಿ ಪ್ಯಾಟ್ ವಿಫಲವಾಗಿದ್ದವು, ಅವುಗಳನ್ನು ಬದಲಾಯಿಸಿದ್ದೇವೆ. ಬಿಇಎಲ್‌ನ 600ಕ್ಕೂ ಹೆಚ್ಚು ಎಂಜಿನಿಯರ್‌ಗಳು ಇವಿಎಂಗಳ ಬಗ್ಗೆ ನಿಗಾವಹಿಸಿದ್ದರು ಎಂದು ಅವರು ಹೇಳಿದರು.

ಹೆಬ್ಬಾಳ ಕ್ಷೇತ್ರದ ಲೊಟ್ಟೆಗೊಲ್ಲಹಳ್ಳಿಯ ಮತಗಟ್ಟೆ ಸಂಖ್ಯೆ 2ರಲ್ಲಿ ಇವಿಎಂ ಯಂತ್ರದ 9ನೆ ಕ್ರಮ ಸಂಖ್ಯೆಯ ಬಟನ್ ಸಿಕ್ಕಿ ಹಾಕಿಕೊಂಡಿದ್ದ ಪರಿಣಾಮವಾಗಿ ಯಾರಿಗೆ ಮತ ಹಾಕಿದರೂ ಆ ಬಟನ್ ಎದುರು ದೀಪ ಬೆಳಗುತ್ತಿತ್ತು. ಆದುದರಿಂದ, ಈ ಮತಗಟ್ಟೆಯಲ್ಲಿ ಮೇ 14ರಂದು ಬೆಳಗ್ಗೆ 7 ರಿಂದ ಸಂಜೆ 6ರವರೆಗೆ ಮರು ಮತದಾನ ನಡೆಸಲಾಗುವುದು. ಈಗಾಗಲೆ ಮತದಾನ ಮಾಡಿರುವವರು ಮತ್ತೆ ಮತ ಹಾಕಬೇಕು. ಯಾವ ಬೆರಳಿಗೆ ಶಾಯಿ(ಇಂಕ್) ಹಾಕಬೇಕು ಎಂಬುದರ ಕುರಿತು ಶೀಘ್ರದಲ್ಲೆ ನಿರ್ಧರಿಸಲಾಗುವುದು.

ಚುನಾವಣೆ ನಡೆಯದ ಜಯನಗರ ಹಾಗೂ ರಾಜರಾಜೇಶ್ವರಿನಗರ ವಿಧಾನಸಭಾ ಕ್ಷೇತ್ರಗಳಲ್ಲಿ ಚುನಾವಣೆ ನಡೆಸಲು ಸಿದ್ಧತೆಗಳನ್ನು ಆರಂಭಿಸಲಾಗಿದೆ. 222 ಕ್ಷೇತ್ರಗಳ ಮತದಾನದ ಎಣಿಕೆ ಕಾರ್ಯವು ಮೇ 15ರಂದು ನಡೆಯಲಿದ್ದು, ಅಂದೇ ಫಲಿತಾಂಶ ಹೊರಬೀಳಲಿದೆ ಎಂದು ಸಂಜೀವ್‌ಕುಮಾರ್ ತಿಳಿಸಿದರು.

ಚುನಾವಣಾ ಅಕ್ರಮಗಳಿಗೆ ಸಂಬಂಧಿಸಿದಂತೆ 40 ಸಾವಿರ ಎಫ್‌ಐಆರ್‌ಗಳನ್ನು ದಾಖಲಿಸಲಾಗಿದೆ. 182 ಕೋಟಿ ರೂ.ಮೌಲ್ಯದ ನಗದು, ಚಿನ್ನಾಭರಣ, ಮದ್ಯ ಹಾಗೂ ಇನ್ನಿತರ ವಸ್ತುಗಳನ್ನು ವಶಪಡಿಸಿಕೊಳ್ಳಲಾಗಿದೆ. 600 ಪಿಂಕ್ ಮತಗಟ್ಟೆಗಳನ್ನು ಸ್ಥಾಪಿಸಲಾಗಿದೆ. ವಿಕಲಚೇತನರಿಗಾಗಿ 26 ಮತಗಟ್ಟೆಗಳನ್ನು ಸ್ಥಾಪಿಸಲಾಗಿತ್ತು ಎಂದು ಅವರು ಹೇಳಿದರು.

ಆರ್‌ಎಂವಿ ಎರಡನೆ ಹಂತದ ಮತಗಟ್ಟೆಯೊಂದರಲ್ಲಿ ಇವಿಎಂನ ಯಾವ ಬಟನ್ ಒತ್ತಿದರೂ ಕಮಲದ ಚಿನ್ಹೆಗೆ ಮತ ಬೀಳುತ್ತಿತ್ತು ಎಂದು ಬ್ರಿಜೇಶ್ ಕಾಳಪ್ಪ ಮಾಡಿರುವ ಆರೋಪ ಸತ್ಯಕ್ಕೆ ದೂರವಾದದ್ದು. ಲೊಟ್ಟೆಗೊಲ್ಲಹಳ್ಳಿಯ ಮತಗಟ್ಟೆ ಸಂಖ್ಯೆ 2ರಲ್ಲಿ ಮಾತ್ರ ಇಂತಹ ಸಮಸ್ಯೆಯಾಗಿತ್ತು. ಅಲ್ಲಿ ಮೇ 14ರಂದು ಮರು ಮತದಾನ ನಡೆಸಲು ತೀರ್ಮಾನಿಸಲಾಗಿದೆ. ಈ ಒಂದು ಪ್ರಕರಣ ಹೊರತುಪಡಿಸಿದರೆ ರಾಜ್ಯದ ಯಾವುದೆ ಭಾಗದಲ್ಲಿ ಅಂತಹ ಪ್ರಕರಣ ಕಂಡು ಬಂದಿಲ್ಲ.
-ಸಂಜೀವ್‌ಕುಮಾರ್, ರಾಜ್ಯ ಮುಖ್ಯಚುನಾವಣಾಧಿಕಾರಿ

ಸಂಜೆಯ 6ರವರೆಗೆ ಶೇಕಡವಾರು ಮತದಾನ
ಬೆಳಗಾವಿ-ಶೇ.71
ಬಾಗಲಕೋಟೆ-ಶೇ.68
ವಿಜಯಪುರ(ಬಿಜಾಪುರ)-ಶೇ.63
ಕಲಬುರಗಿ(ಗುಲ್ಬರ್ಗ)-ಶೇ.56
ಬೀದರ್-ಶೇ.59
ರಾಯಚೂರು-ಶೇ.61
ಕೊಪ್ಪಳ-ಶೇ.70
ಗದಗ-ಶೇ.68
ಧಾರವಾಡ-ಶೇ.66
ಉತ್ತರ ಕನ್ನಡ-ಶೇ.71
ಹಾವೇರಿ-ಶೇ.76
ಬಳ್ಳಾರಿ-ಶೇ.66
ಚಿತ್ರದುರ್ಗ-ಶೇ.76
ದಾವಣಗೆರೆ-ಶೇ.70
ಶಿವಮೊಗ್ಗ-ಶೇ.73
ಉಡುಪಿ-ಶೇ.75
ಚಿಕ್ಕಮಗಳೂರು-ಶೇ.70
ತುಮಕೂರು-ಶೇ.73
ಚಿಕ್ಕಬಳ್ಳಾಪುರ-ಶೇ.79
ಕೋಲಾರ-ಶೇ.77
ಬೆಂಗಳೂರು ಗ್ರಾಮಾಂತರ-ಶೇ.76
ರಾಮನಗರ-ಶೇ.80
ಮಂಡ್ಯ-ಶೇ.78
ಹಾಸನ-ಶೇ.77
ದಕ್ಷಿಣ ಕನ್ನಡ-ಶೇ.73
ಕೊಡಗು-ಶೇ.69
ಮೈಸೂರು-ಶೇ.68
ಚಾಮರಾಜನಗರ-ಶೇ.78
ಯಾದಗಿರಿ-ಶೇ.60
ಬೆಂಗಳೂರು(ಕೇಂದ್ರ)-ಶೇ.51
ಬೆಂಗಳೂರು(ಉತ್ತರ)-ಶೇ.49
ಬೆಂಗಳೂರು(ದಕ್ಷಿಣ)-ಶೇ.49
ಬೆಂಗಳೂರು(ನಗರ)-ಶೇ.51