ಶೃಂಗೇರಿ: ನಕ್ಸಲ್ ಪೀಡಿತ ಗ್ರಾಮಗಳಲ್ಲಿ ಶೇ.90 ಮತದಾನ

ಶೃಂಗೇರಿ, ಮೇ 13: ತಾಲೂಕಿನಲ್ಲಿ ಶೇಕಡಾ 80ರಷ್ಟು ಮತದಾನ ನಡೆದಿದ್ದು, ನಕ್ಸಲ್ ಪೀಡಿತ ಪ್ರದೇಶಗಳಾದ ಕೆರೆಕಟ್ಟೆ, ಬುಕಡಿಬ್ಯೆಲು, ಹಂಚಿನಕೂಡಿಗೆ, ಮಲ್ನಾಡ್, ಹರೂರು, ನೆಮ್ಮಾರ್‍ಮಕ್ಕಿ, ಸುಂಕದಮಕ್ಕಿ, ಕಡ್ಕಲ್, ಭಲೇಕಡಿ, ಸಿಂದೋಡಿ, ದಿಂದೋಡಿ, ಯಡದಾಳು ಮುಂತಾದ ಕಡೆ ಶೇ.90ರಷ್ಟು ಮತದಾನವಾದ ಬಗ್ಗೆ ಶನಿವಾರ ಸಂಜೆ ವರದಿಯಾಗಿದೆ.

ತಾಲೂಕಿನಲ್ಲಿ ಒಟ್ಟು ಒಂಬತ್ತು ಗ್ರಾಪಂ ಹಾಗೂ ಒಂದು ಪ.ಪಂ. ಗಳಿದ್ದು, ಯಾವುದೇ ಅಹಿತಕರ ಘಟನೆಗಳು ವರದಿಯಾಗದೇ ಶಾಂತಿಯುತ ಮತದಾನ ನಡೆದಿದೆ. ಬೆಳಗ್ಗೆ ಮತದಾನ ಪ್ರಕ್ರಿಯೆ ಮಂದಗತಿಯಿಂದ ಆರಂಭವಾಗಿತ್ತು. ನಂತರ ಮಧ್ಯಾಹ್ನದ ಬಳಿಕ ಚುರುಕುಗೊಂಡಿತ್ತು. ಮೆಣಸೆ ಗ್ರಾಪಂನ ಪಡುಬ್ಯೆಲು ಮತದಾನ ಕೇಂದ್ರದಲ್ಲಿ ತಾಂತ್ರಿಕ ದೋಷದಿಂದ ಮತಯಂತ್ರ ಕೈಕೊಟ್ಟಿದ್ದರಿಂದ ಸುಮಾರು ಅರ್ಧಗಂಟೆ ಮತದಾರರು ಕಾಯುವ ಪರಿಸ್ಥಿತಿ ಉಂಟಾಯಿತು. ವಿಕಲಚೇತನರಿಗಾಗಿ ಹಾಗೂ ಹಿರಿಯ ನಾಗರಿಕರಿಗಾಗಿ ಚುನವಣಾ ಆಯೋಗವು ವೀಲ್ಹ್ ಚೇರ್ ವ್ಯವಸ್ಥೆ ಮಾಡಿದ್ದು, ಇದರ ಸಮರ್ಪಕ ಬಳಕೆಯಾಗುತ್ತಿದ್ದುದು ಕೆಲ ಮತಗಟ್ಟೆಗಳಲ್ಲಿ ಕಂಡು ಬಂತು. ಬಿರುಬಿಸಿಲಿನ ನಡುವೆ ಗ್ರಾಮೀಣ ಪ್ರದೇಶಗಳಲ್ಲಿ ಜನರು ಹುಮ್ಮಸ್ಸಿನಿಂದ ಬಂದು ಮತದಾನ ಮಾಡಿದ್ದು ಹಲವು ಕಡೆ ಕಂಡು ಬಂದಿತ್ತು. ಶೃಂಗೇರಿ ಪಟ್ಟಣದ ಸರಕಾರಿ ಬಾಲಕಿಯರ ಪಾಠಶಾಲೆಯಲ್ಲಿ ಪಿಂಕ್‍ ಮತಗಟ್ಟೆಯನ್ನು ಸ್ಥಾಪಿಸಲಾಗಿದ್ದು, ಅಲ್ಲಿನ ಮಹಿಳಾ ಅಧಿಕಾರಿಗಳು ಪಿಂಕ್ ಸೀರೆ ಧರಿಸಿದ್ದು ವಿಶೇಷವಾಗಿತ್ತು.

ನಕ್ಸಲ್ ಪೀಡಿತ ಪ್ರದೇಶಗಳಲ್ಲಿ ಪೋಲಿಸ್ ಬಿಗಿ ಬಂದೋಬಸ್ತ್ ಮಾಡಲಾಗಿತ್ತು. ತಾಲೂಕಿನ ಒಟ್ಟು 49 ಮತಗಟ್ಟೆಗಳ ಪೈಕಿ ಮೆಣಸೆ ಗ್ರಾಪಂನ ಎಂಟು ಬೂತ್‍ಗಳಲ್ಲಿ ಶೇ.90ರಷ್ಟು ಮತದಾನ ನಡೆದರೆ, ನೆಮ್ಮಾರ್ ಗ್ರಾಪಂನಲ್ಲಿ ಐದು ಬೂತ್‍ಗಳಿದ್ದು ಶೇ.90ರಷ್ಟು ಮತದಾನ ನಡೆದ ಬಗ್ಗೆ ವರದಿಯಾಗಿದೆ.

ಅಡ್ಡಗದ್ದೆ ಗ್ರಾ.ಪಂನಲ್ಲಿ ನಾಲ್ಕು ಬೂತ್‍ಗಳಿದ್ದು ಶೇಕಡಾ 89.90ರಷ್ಟು ಮತದಾನ ನಡೆದಿದೆ. ಮರ್ಕಲ್ ಗ್ರಾ.ಪಂನಲ್ಲಿ ಆರು ಮತಗಟ್ಟೆಗಳಿದ್ದು, ಶೇಕಡಾ 88ರಷ್ಟು ಮತದಾನ ನಡೆಯಿತು. ಧರೇಕೊಪ್ಪ ಗ್ರಾ.ಪಂನ ನಾಲ್ಕು ಮತಗಟ್ಟೆಗಳಿದ್ದು ಶೇಕಡಾ 89.5ರಷ್ಟು ಮತದಾನ ನಡೆದಿದೆ. ಕೆರಕಟ್ಟೆ ಗ್ರಾ.ಪಂನಲ್ಲಿ ನಾಲ್ಕು ಮತಗಟ್ಟೆ ಕೇಂದ್ರಗಳಿದ್ದು, ಶೇ.92ರಷ್ಟು ಮತದಾನವಾಗಿದೆ. ಬೇಗಾರು ಗ್ರಾಪಂನಲ್ಲಿ ಶೇ.85ರಷ್ಟು ಮತದಾನವಾಗಿದ್ದು, ಅಲ್ಲಿ ಐದು ಬೂತ್‍ಗಳನ್ನು ಒದಗಿಸಲಾಗಿತ್ತು. ಕುತೂಗೋಡು ಗ್ರಾ.ಪಂನಲ್ಲಿ ನಾಲ್ಕು ಮತಗಟ್ಟೆಗಳಿದ್ದು, ಶೇ.90ರಷ್ಟು ಮತಚಲಾಯಿಸಲಾಗಿದೆ. ವಿದ್ಯಾರಣ್ಯಪುರ ಗ್ರಾಪಂನಲ್ಲಿ ಏಳು ಮತಗಟ್ಟೆಗಳಿದ್ದು, ಶೇ.86ರಷ್ಟು ಮತದಾನ ನಡೆದಿದೆ. ಶೃಂಗೇರಿ ಪಪಂ ವ್ಯಾಪ್ತಿಯಲ್ಲಿ 4 ಮತಗಟ್ಟೆಗಳಿದ್ದು, 156ರ ಮತಕೇಂದ್ರದಲ್ಲಿ ಶೇ.73, ಪಟ್ಟಣದ 157 ಮತಕೇಂದ್ರದಲ್ಲಿ ಶೇ.73ರಷ್ಟು ಮತದಾನ ಹಾಗೂ 158 ಮತಕೇಂದ್ರದಲ್ಲಿ ಶೇ.74 ಹಾಗೂ 159ರ ಮತಗಟ್ಟೆಯಲ್ಲಿ ಶೇ.80ರಷ್ಟು ಮತದಾನ ನಡೆದ ಬಗ್ಗೆ ವರದಿಯಾಗಿದೆ.