ಪಡ್ಡದಂಡ್ಕ ಹಲ್ಲೆ ಪ್ರಕರಣ : ಮಸೀದಿ-ಮದರಸ ವಿಚಾರಗಳ ಮಧ್ಯೆ ಅಲ್ಲ, ಕುಟುಂಬಗಳ ಮಧ್ಯೆ

ಮೂಡುಬಿದಿರೆ, ಜೂ. 8: ಪಡ್ಡಂದಡ್ಕದಲ್ಲಿ ಜೂನ್.5ರಂದು ಎರಡು ಮುಸ್ಲಿಂ ಸಂಘಟನೆಗಳ ನಡೆದ ಹಲ್ಲೆ ಪ್ರಕರಣವು ಮಸೀದಿಯ ಆವರಣದಲ್ಲಿ ಅಲ್ಲ. ಮಸೀದಿ ಮತ್ತು ಮದರಸದ ವಿಚಾರವು ಅಲ್ಲ, ಸಂಘಟನೆಯ ವಿಚಾರವೂ ಅಲ್ಲ. ಎರಡು ಕುಟುಂಬಗಳ ಮಧ್ಯೆ ನಡೆದ ವಿಚಾರ ಹೊರತು ಇದರಲ್ಲಿ ಮಸೀದಿಯ ಜಮಾತಿನವರ ಪಾತ್ರವಿಲ್ಲ ಎಂದು ನೂರುಲ್ ಹುದಾ ಜುಮ್ಮಾ ಮಸೀದಿಯ ಕಾರ್ಯದರ್ಶಿ ಮಹಮ್ಮದ್ ಶಾಫಿ ಸ್ಪಷ್ಟ ಪಡಿಸಿದ್ದಾರೆ.

ಅವರು ಮೂಡುಬಿದಿರೆ ಪ್ರೆಸ್‌ಕ್ಲಬ್‌ನಲ್ಲಿ ಗುರುವಾರ ನಡೆದ ಪತ್ರಿಕಾಗೋಷ್ಠಿಯಲ್ಲಿ ಈ ಬಗ್ಗೆ ಮಾತನಾಡಿದರು. ನೂರುಲ್ ಹುಧಾ ಜುಮ್ಮಾ ಮಸೀದಿ ಹಾಗೂ ಅರೆಬಿಕ್ ಶಾಲೆಯು ಸುಮಾರು 83 ವರ್ಷಗಳಿಂದ ಸಮಸ್ತದ ಅಧೀನದಲ್ಲಿ ಕಾರ್ಯಚರಿಸುತ್ತಿದ್ದು, 8ವರ್ಷಗಳ ಹಿಂದೆ ಒಂದು ಪಂಗಡವು ಮದರಸದ ವಿಛಾರದಲ್ಲಿ ತಕರಾರು ಎತ್ತಿ ಘರ್ಷಣೆಗೆ ಎಡೆ ಮಾಡಿಕೊಟ್ಟಿದ್ದು ಈ ಬಗ್ಗೆ ವೇಣೂರು ಠಾಣಾ ವ್ಯಾಪ್ತಿಯಲ್ಲಿ ಪ್ರಕರಣ ದಾಖಲಾಗಿದ್ದು ಬೆಳ್ತಂಗಡಿಯ ಉಚ್ಛ ನ್ಯಾಯಾಲಯದಲ್ಲಿ ಹಾಗೂ ಬೆಂಗಳೂರಿನ ಉಚ್ಛ ನ್ಯಾಯಾಲಯದಲ್ಲಿ ಪ್ರಕರಣಗಳು ದಾಖಲಾಗಿದ್ದು ಉಚ್ಛ ನ್ಯಾಯಾಲಯವು ಮಸೀದಿಯ ಆಡಳಿತ ಕಮಿಟಿಯ ಪರವಾಗಿ ತೀರ್ಪನ್ನು ನೀಡರುತ್ತದೆ. ತದ ನಂತರ ಘರ್ಷಣೆಗೆ ಕಾರಣರಾಗಿದ್ದ ಗುಂಪಿನ ನಾಯಕರಾದ ರೌಡಿಶೀಟರ್ ಪಿ.ಎಸ್. ಶಬೀರ್ ಮಸೀದಿಯ ಕಂಪೌಡ್‌ನ ಹತ್ತಿರವಿರುವ ಮನೆಯಲ್ಲಿ ಅನಧಿಕೃತವಾಗಿ ಮದರಸವನ್ನು ಸ್ಥಾಪಿಸಿ ಧರ್ಮವಿರೋಧಿ ಚಟುವಟಿಕೆಯನ್ನು ಮಾಡುತ್ತಿದ್ದಲ್ಲದೆ ಜೀವನ ನಿರ್ವಹಣೆಗಾಗಿ ಹಣ ಕಲೆಕ್ಷನ್ ಮಾಡುತ್ತಿದ್ದಾರೆಂದು ಆರೋಪಿಸಿದರು.

ಜೂನ್ 5ರಂದು ನಡೆದ ಘಟನೆಯು ಕುಟುಂಬದ ವಿಚಾರದಲ್ಲಿ ರೌಡಿಶೀಟರ್‌ಗಳಾದ ಶಬೀರ್ ಮತ್ತು ಆತನ ಬಾವ ರಹೀಂ ಮಧ್ಯೆ ನಡೆದಿದ್ದು ಮಸೀದಿಯ ಅರ್ಧ ಕಿ.ಮೀ ದೂರದಲ್ಲಿ ಇವರಿಬ್ಬರ ಮಧ್ಯೆ ಪರಸ್ಪರ ಮಾತಿನ ಚಕಮಕಿ ನಡೆದಿದ್ದು, ತಡರಾತ್ರಿ ರಹೀಂ ಮನೆಗೆ ಶಬೀರ್ ಮತ್ತು ಅವರ ತಂಡವು ಮನೆಗೆ ನುಗ್ಗಿ ದಾಂಧಲೆ ಮಾಡಿದ್ದು ಈ ಬಗ್ಗೆ ಜೊತೆ ಕಾರ್ಯದರ್ಶಿ ಬಶೀರ್ ಅವರಿಗೆ ನೆರೆಕರೆಯವರು ಫೋನ್ ಮಾಡಿದ್ದು ಆಗ ಬಶೀರ್ ಅವರು ಸ್ಥಳಕ್ಕೆ ಬಂದು ನೋಡಿದಾಗ ಘಟನೆ ನಡೆದಿತ್ತು. ಈ ವಿಚಾರವನ್ನು ಅವರು ಮಸೀದಿಯ ಅಧ್ಯಕ್ಷರಾದ ಯು.ಕೆ ಮಹಮ್ಮದ್ ಅವರಿಗೆ ತಿಳಿಸಿದರು. ಮಹಮ್ಮದ್ ಅವರು ಸ್ಥಳಕ್ಕೆ ಆಗಮಿಸಿದಾಗ ರೌಡಿಶೀಟರ್ ಶಬೀರ್‌ನ ತಂಡ ಏಕಾಏಕಿ ದಾಳಿ ನಡೆಸಿದ್ದು ಘರ್ಷಣೆಗೆ ಕಾರಣ ಅದಲ್ಲದೆ ಪಿ.ಎಸ್ ಶಬೀರ್ ಅವರ ಹೆಂಡತಿಗೆ ಮಾನಭಂಗಕ್ಕೆ ಯತ್ನ ಎಂಬ ಆರೋಪ ಸುಳ್ಳು ಎಂದು ತಿಳಿಸಿದರು.

ಊರಿನಲ್ಲಿ ಹಿಂದೂ ಮುಸ್ಲಿಂರ ಮಧ್ಯೆ ಕೋಮು ಸಾಮರಸ್ಯವನ್ನು ಕದಡುವ ಮತ್ತು ಸದಾ ಸಮುದಾಯಗಳ ಮಧ್ಯೆ ಜಗಳವಾಡುತ್ತಿರುವ ಈ ಇಬ್ಬರು ರೌಡಿಶೀಟರ್‌ಗಳನ್ನು ಊರಿನಿಂದ ಗಡಿಪಾರು ಮಾಡಿದರೆ ಊರಿಗೆ ಉತ್ತಮ ಎಂಬ ಅಭಿಪ್ರಾಯವನ್ನು ವ್ಯಕ್ತಪಡಿಸಿದರು.

ಮಸೀದಿಯ ಅಧ್ಯಕ್ಷ ಹಾಜಿ ಯು.ಕೆ ಮಹಮ್ಮದ್, ಜೊತೆ ಕಾರ್ಯದರ್ಶಿ ಮಹಮ್ಮದ್ ಬಶೀರ್ ಹಾಗೂ ಸದಸ್ಯ ಬಶೀರ್ ಪತ್ರಿಕಾಗೋಷ್ಠಿಯಲ್ಲಿ ಉಪಸ್ಥಿತರಿದ್ದರು.