ಗಾಡ್ಫಾದರ್ನ ಚಿತ್ರಕ್ಕೆ ಕಂಗನಾ ನಾಯಕಿ
‘ಲೈಫ್ ಇನ್ ಎ ಮೆಟ್ರೊ’ ಹಾಗೂ ‘ಗ್ಯಾಂಗ್ಸ್ಟರ್’ನಂತಹ ಚಿತ್ರಗಳನ್ನು ನೀಡಿರುವ ಕಂಗನಾ ರಾಣಾವತ್ ಮತ್ತು ಅನುರಾಗ್ ಕಶ್ಯಪ್, ಈಗ ಇನ್ನೊಂದು ಚಿತ್ರದಲ್ಲಿ ಮತ್ತೆ ಒಟ್ಟುಗೂಡುತ್ತಿದ್ದಾರೆ. ಈ ನಟಿ-ನಿರ್ದೇಶಕ ಜೋಡಿಯು, ‘ಇಮಾಲಿ’ ಎಂದು ಹೆಸರಿಡಲಾದ ಚಿತ್ರದಲ್ಲಿ ಒಂದಾಗಲಿದ್ದಾರೆ. ರೋಮ್ಯಾಂಟಿಕ್ ಕಥಾವಸ್ತುವುಳ್ಳ ಈ ಚಿತ್ರದ ನಾಯಕನ್ಯಾರೆಂಬುದು ಇನ್ನೂ ಸ್ಪಷ್ಟವಾಗಿಲ್ಲ. ಏನೇ ಇದ್ದರೂ ಕಂಗನಾ ಮಾತ್ರ ಚಿತ್ರದ ಹಿರೋಯಿನ್ ಆಗಿ ನಟಿಸುವುದು ಈಗ ಶೇ.100ರಷ್ಟು ಕನ್ಫರ್ಮ್ ಆಗಿದೆ.
ಆದರೆ ಈ ಚಿತ್ರದ ಬಗ್ಗೆ ಯಾವುದೇ ವಿವರಗಳನ್ನು ಬಿಟ್ಟುಕೊಡಲು ಕಂಗನಾ ಅಥವಾ ಅನುರಾಗ್ ಕಶ್ಯಪ್ ಸಿದ್ಧರಿಲ್ಲ. ಆದರೆ ಇಮಾಲಿ, ಈ ವರ್ಷದ ಕೊನೆಗೆ ಚಿತ್ರೀಕರಣ ಆರಂಭಿಸಲಿರುವ ಬಗ್ಗೆ ಕಂಗನಾ ಸುಳಿವು ನೀಡಿದ್ದಾರೆ. ಅನುರಾಗ್ ಕಶ್ಯಪ್ ಚಿತ್ರರಂಗದಲ್ಲಿ ತನಗೆ ‘ಗಾಡ್ಫಾದರ್’ ಆಗಿದ್ದು, ಇಂದು ನಾನು ಏನಾದರೂ ಆಗಿದ್ದರೆ, ಅದಕ್ಕೆ ಅವರೇ ಕಾರಣರು ಎಂದು ಬಾಲಿವುಡ್ನ ಈ ಜನಪ್ರಿಯ ನಟಿ ಕೃತಜ್ಞತೆ ವ್ಯಕ್ತಪಡಿಸುತ್ತಾರೆ.
ಬರೋಬ್ಬರಿ 12 ವರ್ಷಗಳ ಹಿಂದೆ ಅನುರಾಗ್ ಕಶ್ಯಪ್, ತನ್ನ ರೋಮ್ಯಾಂಟಿಕ್-ಡ್ರಾಮಾ ಕಥಾವಸ್ತುವಿನ ಚಿತ್ರ ಗ್ಯಾಂಗ್ಸ್ಟರ್ ಮೂಲಕ ಕಂಗನಾಳನ್ನು ಬಾಲಿವುಡ್ಗೆ ಪರಿಚಯಿಸಿದ್ದರು. ಈ ಚಿತ್ರದಲ್ಲಿನ ಅಭಿನಯಕ್ಕಾಗಿ ಕಂಗನಾಗೆ, ಹಲವಾರು ಪ್ರಶಸ್ತಿ ಪ್ರದಾನ ಕಾರ್ಯಕ್ರಮಗಳಲ್ಲಿ ಶ್ರೇಷ್ಠ ನವನಟಿ ಪುರಸ್ಕಾರಗಳು ಲಭಿಸಿದ್ದವು.
ಆದಾಗ್ಯೂ, ಹೃತಿಕ್ ಅಭಿನಯದ ಕೈಟ್ಸ್ ಚಿತ್ರದ ಸೆಟ್ನಲ್ಲಿ ಕಂಗನಾ ಹಾಗೂ ಅನುರಾಗ್ ನಡುವೆ ತೀವ್ರ ವಿರಸವುಂಟಾಗಿತ್ತು. ಕೈಟ್ಸ್ನ ನಿರ್ದೇಶಕರಾಗಿದ್ದ ಅನುರಾಗ್, ಇನ್ನೋರ್ವ ನಟಿ ಬಾರ್ಬರಾ ಮೋರಿಗೆ ಚಿತ್ರದಲ್ಲಿ ಹೆಚ್ಚು ಪ್ರಾಶಸ್ತ್ತ್ಯವನ್ನು ನೀಡಿದ್ದರು ಎಂದು ಕಂಗನಾ ಬಹಿರಂಗವಾಗಿ ದೂರಿದ್ದರು.ಅದರೆ ಆನಂತರ ಮತ್ತೆ ಇವರಿಬ್ಬರು ಮತ್ತೆ ರಾಜಿಯಾದ ಬಳಿಕ ಅನುರಾಗ್ ಕಶ್ಯಪ್ ಅವರು ಸಂದರ್ಶನವೊಂದರಲ್ಲಿ, ಚಿತ್ರರಂಗಕ್ಕೆ ಕಂಗನಾರಂತಹ ಪ್ರತಿಭಾವಂತ ನಟಿಯನ್ನು ಪರಿಚಯಿಸಿರುವುದಕ್ಕೆ ತನಗೆ ಹೆಮ್ಮೆಯಿದೆ ಎಂದು ಹೇಳಿಕೊಂಡಿದ್ದರು. ಒಟ್ಟಿನಲ್ಲಿ ಇಮಾಲಿ ಚಿತ್ರದ ಮೂಲಕ ಕಂಗನಾ ಅನುರಾಗ್ ಕಶ್ಯಪ್ ಒಟ್ಟಾಗುತ್ತಿರುವುದು ಬಾಲಿವುಡ್ನಲ್ಲಿ ಹೊಸ ಸಂಚಲನವನ್ನು ಸೃಷ್ಟಿಸಿದೆ. ಪ್ರಸ್ತುತ ಕಂಗನಾ ಏಕ್ತಾ ಕಪೂರ್ ನಿರ್ಮಾಣದ ಮೆಂಟಲ್ ಹೈ ಕ್ಯಾ ಚಿತ್ರದಲ್ಲಿ ನಟಿಸುತ್ತಿ ದ್ದಾರೆ. ರಾಜ್ಕುಮಾರ್ ರಾವ್ ಚಿತ್ರದ ನಾಯಕ. ಕಂಗನಾ ಮಣಿಕರ್ಣಿಕಾ ಎಂಬ ಬಿಗ್ಬಜೆಟ್ ಚಿತ್ರದಲ್ಲಿಯೂ ನಟಿಸುತ್ತಿದ್ದು, ಆದರಲ್ಲಿ ಆಕೆ ಝಾನ್ಸಿ ರಾಣಿ ಲಕ್ಷ್ಮೀ ಬಾಯಿಯ ಪಾತ್ರದಲ್ಲಿ ಕಾಣಿಸಿಕೊಳ್ಳುತ್ತಿದ್ದಾರೆ.
