ಟ್ಯೂಮರ್ ಪತ್ತೆ ಬಳಿಕ ನಟ ಇರ್ಫಾನ್ ಖಾನ್ ಗೆ ಶಾರೂಕ್ ಖಾನ್ ನೆರವಾದದ್ದು ಹೀಗೆ...
ಹೊಸದಿಲ್ಲಿ, ಜೂ.24: ಟ್ಯೂಮರ್ ಚಿಕಿತ್ಸೆಗಾಗಿ ಲಂಡನ್ ನಲ್ಲಿರುವ ಬಾಲಿವುಡ್ ನಟ ಇರ್ಫಾನ್ ಖಾನ್ ಗೆ ಶಾರೂಕ್ಖಾನ್ ನೆರವಾಗಿದ್ದಾರೆ ಎಂದು ಸ್ಪಾಟ್ಬಾಯ್ ವರದಿ ಮಾಡಿದೆ.
ಅನಾರೋಗ್ಯವಿರುವುದು ಪತ್ತೆಯಾದ ಬಳಿಕ, ಲಂಡನ್ ಗೆ ತೆರಳುವ ಮುನ್ನ ಇರ್ಫಾನ್ ಖಾನ್ ಅವರನ್ನು ಶಾರೂಖ್ ಭೇಟಿಯಾಗಿದ್ದರು. ಇರ್ಫಾನ್ ಪತ್ನಿ ಸುತಾಪಾ ಈ ಬಗ್ಗೆ ಮಾಹಿತಿ ನೀಡಿದ ಹಿನ್ನೆಲೆಯಲ್ಲಿ ಶಾರೂಕ್ಖಾನ್ ಭೇಟಿ ನೀಡಿದ್ದರು. ಶಾರೂಖ್ ಇರ್ಫಾನ್ ಜತೆಗೆ ಎರಡು ಗಂಟೆ ಕಾಲ ಮಾತುಕತೆ ನಡೆಸಿದರು ಎನ್ನಲಾಗಿದೆ. ಇದೇ ಸಂದರ್ಭ ಶಾರೂಖ್ ಲಂಡನ್ನಲ್ಲಿರುವ ತಮ್ಮ ಅಪಾರ್ಟ್ಮೆಂಟ್ ಕೀಲಿಯನ್ನು ವಾಸ್ತವ್ಯಕ್ಕಾಗಿ ಈ ದಂಪತಿಗೆ ಹಸ್ತಾಂತರಿಸಿ ನೆರವಾಗಿದ್ದಾರೆ ಎಂದು ಸ್ಪಾಟ್ಬಾಯ್ ವರದಿ ಮಾಡಿದೆ.
ಇತ್ತೀಚೆಗಷ್ಟೇ ತಮ್ಮ ಅನಾರೋಗ್ಯದ ಬಗ್ಗೆ ಇರ್ಫಾನ್ ಖಾನ್ ಮಾತನಾಡಿದ್ದರು. "ನಾನು ಬೇರೆಯೇ ಆಟದಲ್ಲಿದ್ದೆ. ವೇಗದ ರೈಲಿನಲ್ಲಿ ಸಂಚರಿಸುತ್ತಿದ್ದೆ, ಕನಸುಗಳು, ಯೋಜನೆಗಳು, ಗುರಿಗಳಿದ್ದವು, ಅವುಗಳಲ್ಲಿಯೇ ಮಗ್ನನಾಗಿದ್ದೆ. ಆಗ ಥಟ್ಟನೇ ಯಾರೋ ನನ್ನ ಭುಜ ತಟ್ಟಿದಾಗ ನಾನು ತಿರುಗಿ ನೋಡಿದಾಗ ಅಲ್ಲಿ ಟಿಸಿ, 'ನೀವು ತಲುಪಬೇಕಾದ ಸ್ಥಳ ಬರಲಿದೆ. ಕೆಳಗಿಳಿಯಿರಿ' ಅನ್ನುತ್ತಾನೆ. ನನಗೆ ಗೊಂದಲ. `ಇಲ್ಲ ಇಲ್ಲ ನನ್ನ ತಲುಪಬೇಕಾದ ಸ್ಥಳ ಬಂದಿಲ್ಲ' ಎನ್ನುತ್ತೇನೆ. `ಆದರೆ ಇದುವೇ ಅದು, ಕೆಲವೊಮ್ಮೆ ಹಾಗೆಯೇ ಆಗುತ್ತದೆ' ಎಂದು ಆತ ಹೇಳುತ್ತಾನೆ. ಸಾಗರದಲ್ಲಿ ತೇಲುತ್ತಿರುವ ಮರದ ತೊಗಟೆಯಂತಿರುವ ನಿಮಗೆ ಅಲ್ಲಿನ ಅಲೆಗಳು ಹೇಗಿರಬಹುದೆಂದು ಊಹಿಸಲು ಅಸಾಧ್ಯವಾಗುತ್ತದೆ ಹಾಗೂ ಅವುಗಳನ್ನು ನಿಯಂತ್ರಿಸಲು ನೀವು ಹತಾಶರಾಗಿ ಪ್ರಯತ್ನಿಸುತ್ತೀರಿ. ಇಂತಹ ಒಂದು ಹೆದರಿಕೆ ಹುಟ್ಟಿಸುವ ಸನ್ನಿವೇಶದಲ್ಲಿ ಆಸ್ಪತ್ರೆಯಲ್ಲಿದ್ದಾಗ ನಾನು ನನ್ನ ಪುತ್ರನ ಬಳಿ 'ಈಗಿನ ರೀತಿಯಲ್ಲಿ ಈ ಕಷ್ಟವನ್ನು ಎದುರಿಸದಂತೆ ಮಾಡುವುದನ್ನೇ ನಾನು ನನ್ನಿಂದ ನಿರೀಕ್ಷಿಸುತ್ತಿದ್ದೇನೆ. ನಾನು ನನ್ನ ಕಾಲುಗಳ ಮೇಲೆ ನಿಲ್ಲಬೇಕಿದೆ. ಭೀತಿ ಮತ್ತು ಭಯ ನನ್ನನ್ನು ಆಕ್ರಮಿಸಬಾರದು' ಎನ್ನುತ್ತೇನೆ. ಇಷ್ಟರವರೆಗೆ ನೀವು ನೋವಿನ ಬಗ್ಗೆ ತಿಳಿದಿದ್ದರೆ ಈಗ ಅದರ ಸ್ವರೂಪ ಹಾಗೂ ತೀವ್ರತೆಯ ಅನುಭವ ನಿಮಗಾಗುತ್ತದೆ. ಯಾವುದೇ ಸಮಾಧಾನ, ಪ್ರೇರಣೆಯು ಕೆಲಸ ಮಾಡುತ್ತಿಲ್ಲ. ಇಡೀ ಜಗತ್ತೇ ನೋವು ಹಾಗೂ ಈ ನೋವು ದೇವರಿಗಿಂತಲೂ ದೊಡ್ಡದಾಗಿದೆ ಎಂದು ಅನಿಸಿದೆ' ಎಂದು ಇರ್ಫಾನ್ ಹೇಳಿದ್ದರು.
