ದಕ್ಷಿಣ ಭಾರತದಲ್ಲಿ ಆರೋಗ್ಯಕರ ರಾಜಕೀಯ ವಾತಾವರಣವಿಲ್ಲ: ಮಾಜಿ ಸಭಾಪತಿ ಬಿ.ಎಲ್.ಶಂಕರ್

ಬೆಂಗಳೂರು, ಜೂ.24: ನೆರೆಯ ಕೇರಳ ರಾಜ್ಯವನ್ನು ಹೊರತುಪಡಿಸಿದರೆ ದಕ್ಷಿಣ ಭಾರತದ ಯಾವ ರಾಜ್ಯಗಳಲ್ಲಿಯೂ ಆರೋಗ್ಯಕರ ರಾಜಕೀಯ ವಾತಾವರಣವಿಲ್ಲ ಎಂದು ಮಾಜಿ ಸಭಾಪತಿ ಡಾ.ಬಿ.ಎಲ್.ಶಂಕರ್ ಅಭಿಪ್ರಾಯಿಸಿದ್ದಾರೆ.

ರವಿವಾರ ನಗರದ ರವೀಂದ್ರ ಕಲಾಕ್ಷೇತ್ರದಲ್ಲಿ ಭಾರತ ಯಾತ್ರಿ ಕೇಂದ್ರದಿಂದ ಆಯೋಜಿಸಿದ್ದ ಕೆ.ಎಸ್.ನಾಗರಾಜ್ ಅವರ ‘ಬಸವನಗುಡಿ ರಾಜಕೀಯ ದರ್ಶನ’ ಮತ್ತು ‘ಕನ್ನಡಿಯೊಳಗಿನ ಗಂಟು’ ಕೃತಿ ಬಿಡುಗಡೆ ಮಾಡಿ ಮಾತನಾಡಿದ ಅವರು, ದಕ್ಷಿಣ ಭಾರತದಲ್ಲಿ ಕೇರಳ ಹೊರತುಪಡಿಸಿ ಕರ್ನಾಟಕ, ತಮಿಳುನಾಡು, ಆಂಧ್ರ ಹಾಗೂ ತೆಲಂಗಾಣದಲ್ಲಿ ಅನಾರೋಗ್ಯಕರ ರಾಜಕಾರಣ ನಡೆಯುತ್ತಿದೆ. ಇಂದು ಬೇಕು ಎನ್ನುವವರು ಹೆಚ್ಚಿದ್ದಾರೆ ಹೊರತು, ಬೇಡ ಅನ್ನುವವರು ಕಡಿಮೆ. ಇಂದಿನ ರಾಜಕೀಯ ಚಿತ್ರಣವನ್ನೇ ಗಮನಿಸಿದರೆ, ಕಾಂಗ್ರೆಸ್ ಸೇರಿದಂತೆ ಮಿತ್ರ ಪಕ್ಷಗಳಲ್ಲೂ ಸಚಿವ ಸ್ಥಾನ ಬೇಡ ಎನ್ನುವ ಮನ್ಸು ಯಾರಿಗೂ ಇಲ್ಲ ಎಂದು ಟೀಕಿಸಿದರು.

ಇಂದಿನ ಸಂದರ್ಭದಲ್ಲಿ ಪ್ರಜಾಪ್ರಭುತ್ವ ತನ್ನ ವೌಲ್ಯವನ್ನು ಕಳೆದುಕೊಳ್ಳುತ್ತಿದೆ. ಚುನಾವಣೆಗಳು ಹಣ ಮತ್ತು ಜಾತಿ ಆಧಾರದ ಮೇಲೆ ಕೆಲಸ ಮಾಡುತ್ತಿವೆ. ಹೀಗಾಗಿ, ಹಣ ಮತ್ತು ಜಾತಿ ರಾಜಕಾರಣ ವಿರುದ್ಧ ದೇಶದಾದ್ಯಂತ ಚರ್ಚೆ ಮತ್ತು ಹೋರಾಟಗಳು ತೀವ್ರಗೊಳ್ಳಬೇಕಾಗಿದೆ ಎಂದರು.

ಇಂದಿನ ರಾಜಕೀಯ ಸ್ಥಿತಿಯಲ್ಲಿ ಯುವಕರನ್ನು ಬೆಳೆಸುವ ಬದಲಿಗೆ, ಸ್ವಾರ್ಥ ಸಾಧನೆಗೆ ಮುಂದಾಗಿದ್ದಾರೆ ಎಂದ ಅವರು, ಮಾಜಿ ಸಿಎಂ ರಾಮಕೃಷ್ಣ ಹೆಗಡೆ ಅವರ ಕಾಲದಿಂದ ಸಚಿವರಾಗಿ ಕೆಲಸ ಮಾಡಿದವರು ಇಂದಿಗೂ ಸಚಿವ ಸ್ಥಾನದ ಆಕಾಂಕ್ಷಿಯಾಗಿದ್ದಾರೆ. ಹಿರಿಯರು ಅಧಿಕಾರದ ಆಸೆಯನ್ನು ತ್ಯಜಿಸಬೇಕು. ಯುವಕರನ್ನು ಬೆಳೆಸಲು ಮುಂದಾಗಬೇಕು.

ಮಾಜಿ ಸಿಎಂಗಳಾದ ರಾಮಕೃಷ್ಣ ಹೆಗಡೆ, ಜೆ.ಎಚ್.ಪಟೇಲ್ ಮತ್ತು ನಿಜಲಿಂಗಪ್ಪ ಸಚಿವ ಸಂಪುಟದಲ್ಲಿ ಹೆಚ್ಚಿನ ಸಂಖ್ಯೆಯಲ್ಲಿ ಯುವಕರಿಗೆ ಆದ್ಯತೆ ನೀಡಿದ್ದರು ಎಂದು ಸ್ಮರಿಸಿಕೊಂಡ ಅವರು, ಈ ಪ್ರವೃತ್ತಿ ಮರುಕಳಿಸಬೇಕಿದೆ ಎಂದು ತಿಳಿಸಿದರು.

ಜನತಾ ಪರಿವಾರ ರಾಷ್ಟ್ರ ಮತ್ತು ರಾಜ್ಯ ರಾಜಕಾರಣಕ್ಕೆ ಹೆಸರಾಂತ ರಾಜಕಾರಣಿಗಳನ್ನು ನೀಡಿತು. ಅದೇ ರೀತಿ ಪಕ್ಷ ಇಬ್ಭಾಗವಾಗುವ ಮೂಲಕ, ಹಲವು ಯುವ ನಾಯಕರ ಭವಿಷ್ಯದ ಅಂತ್ಯಕ್ಕೂ ಕೂಡ ಕಾರಣವಾಯಿತು. ಇಂತಹ ರಾಜಕೀಯ ಮುಖಂಡರಲ್ಲಿ ಕೆ.ಎಸ್.ನಾಗರಾಜ್ ಒಬ್ಬರಾಗಿದ್ದಾರೆಂದು ಹೇಳಿದರು.

ಪ್ರಸ್ತುತ ದಿನಗಳಲ್ಲಿ ಯಶಸ್ಸನ್ನು ಗಳಿಸುವ ರೀತಿಯೇ ಬೇರೆಯಾಗಿದೆ. ಸರಿ-ತಪ್ಪೋ ಒಟ್ಟಿನಲ್ಲಿ ಪ್ರಚಾರ ಪಡೆದುಕೊಳ್ಳಬೇಕು. ಜನರು ನನ್ನನ್ನು ಗುರುತಿಸಬೇಕು ಎಂಬ ತೋರಿಕೆಯ ಮನೋಭಾವ ಹೆಚ್ಚುತ್ತಿದೆ. ಇಂದಿನ ರಾಜಕಾರಣವನ್ನು ಸಂಪೂರ್ಣ ವ್ಯಾಪಾರಿಕರಣಗೊಳಿಸಿ ತಮ್ಮ ಮುಷ್ಠಿಯಲ್ಲೇ ಇಟ್ಟುಕೊಳ್ಳಬೇಕೆಂಬ ವ್ಯವಸ್ಥಿತ ಪ್ರಯತ್ನ ದೇಶ ಹಾಗೂ ರಾಜ್ಯದಲ್ಲಿ ನಡೆಯುತ್ತಿದೆ. ಅಧಿಕಾರದ ದಾಹದಲ್ಲಿ ಜನರ ಹಿತಾಸಕ್ತಿಯನ್ನು ಬಲಿಕೊಡಲಾಗುತ್ತಿದೆ ಎಂದರು.

ನಾಡಿಗೆ ಹೆಸರಾಂತ ರಾಜಕಾರಣಿಗಳನ್ನು, ಸಾಹಿತಿಗಳನ್ನು, ಹೋರಾಟಗಾರರನ್ನು ನೀಡಿದ ಹಿರಿಮೆ ಬಸವನಗುಡಿ ಕ್ಷೇತ್ರಕ್ಕೆ ಸಲ್ಲುತ್ತದೆ. ಇಲ್ಲಿನ ನ್ಯಾಷನಲ್ ಕಾಲೇಜು ಮೈದಾನ ರಾಜಕೀಯ ಸಮಾವೇಶಗಳ ತಾಣವಾಗಿತ್ತು. ಹಲವು ಜನಪರ ಹೋರಾಟಗಳು ಇಲ್ಲಿಂದಲೇ ರೂಪ ಪಡೆದುಕೊಳ್ಳುತ್ತಿದ್ದವು ಎಂದರು.

ಶಾಸಕ ಎಲ್.ರವಿಸುಬ್ರಮಣ್ಯ ಮಾತನಾಡಿ, ಓಲೈಕೆ ರಾಜಕಾರಣ ಯಾರಿಗೂ ಶೋಭೆ ಅಲ್ಲ. ಇತ್ತೀಚಿನ ದಿನಗಳಲ್ಲಿ ಹಣವಿಲ್ಲದೆ ಚುನಾವಣೆಗೆ ಸ್ಪರ್ಧೆ ಮಾಡಿ ಗೆಲ್ಲುವುದು ಕಷ್ಟಕರ. ಮೊದಲು ಈ ಪದ್ಧತಿ ನಿರ್ಮೂಲನೆವಾಗಬೇಕು. ಆಗ ಮಾತ್ರ ಉತ್ತಮ ಹಾಗೂ ಜನಪರ ರಾಜಕಾರಣಿಗಳು ಗೆದ್ದು ಬರಲು ಸಾಧ್ಯವಾಗುತ್ತದೆ ಎಂದು ತಿಳಿಸಿದರು.

ಪ್ರಾಧ್ಯಾಪಕ ಡಾ.ಸುಬ್ರಮಣ್ಯ ಸ್ವಾಮಿ ‘ಬಸವನಗುಡಿ ರಾಜಕೀಯ ದರ್ಶನ’ ಕೃತಿ ಕುರಿತು ಮಾತನಾಡಿ, ಈ ಪುಸ್ತಕದಲ್ಲಿ ಲೇಖರು 1952 ರಿಂದ 2014ರ ವರೆಗಿನ ರಾಜಕಾರಣದ ಬಗ್ಗೆ ಅಂಕಿ-ಅಂಶ ಸಮೇತ ನೀಡಿದ್ದಾರೆ. ಈ ಓದುಗರಿಗೆ ಬಸವನ ಗುಡಿ ಕ್ಷೇತ್ರದ ರಾಜಕೀಯ ನೋಟಗಳ ಜತೆಗೆ ಸಾಹಿತ್ಯ, ಸಾಂಸ್ಕೃತಿ ಹಾಗೂ ಭೌಗೋಳಿಕ ಚಿತ್ರಣವನ್ನು ನೀಡುತ್ತದೆ ಎಂದು ಶ್ಲಾಘಿಸಿದರು. ಉದಯ ಭಾನು ಕಲಾ ಸಂಘದ ಸಂಸ್ಥಾಪಕ ಅಧ್ಯಕ್ಷ ಎನ್.ನರಸಿಂಹನ್ ಉಪಸ್ಥಿತರಿದ್ದರು.