ಉಡುಪಿ: ಜಿಲ್ಲಾ ವಲಯ ಕಾರ್ಯಕ್ರಮಗಳಿಗೆ 444.57ಕೋಟಿ ರೂ. ಅನುದಾನ

ಉಡುಪಿ, ಜು.3: 2018-19ನೇ ಸಾಲಿನ ಜಿಲ್ಲಾ ವಲಯ ಕಾರ್ಯಕ್ರಮ ಗಳಿಗೆ ಸರಕಾರ, ಉಡುಪಿ ಜಿಲ್ಲಾ ಪಂಚಾಯತ್‌ಗೆ ಒಟ್ಟು 444.57 ಕೋಟಿ ರೂ.ಗಳ ಅನುದಾನದ ಗುರಿಯನ್ನು ನಿಗದಿ ಪಡಿಸಿದೆ. ಇವುಗಳಲ್ಲಿ ಜಿಪಂ ಕಾರ್ಯಕ್ರಮಗಳಿಗೆ 166.15 ಕೋಟಿ ರೂ, ತಾಪಂ ಕಾರ್ಯಕ್ರಮಗಳಿಗೆ 277.75 ಕೋಟಿ ರೂ. ಹಾಗೂ ಗ್ರಾಪಂ ಕಾರ್ಯಕ್ರಮಗಳಿಗೆ 67 ಲಕ್ಷ ರೂ. ಅನುದಾನ ನಿಗದಿಯಾಗಿದೆ.

ಜಿಪಂ ಕಾರ್ಯಕ್ರಮಗಳಲ್ಲಿ 48.52 ಕೋಟಿ ರೂ. ವೇತನಗಳಿಗೆ ನಿಗದಿ ಯಾದರೆ ಉಳಿದ 117.63 ಕೋಟಿ ರೂ. ಅಭಿವೃದ್ಧಿ ಕಾರ್ಯಕ್ರಮಗಳಿಗೆ ಮೀಸಲಿರಿಸಲಾಗಿದೆ. ತಾಪಂ ಕಾರ್ಯಕ್ರಮಗಳಲ್ಲಿ 189.26 ಕೋಟಿ ರೂ.ವೇತನಕ್ಕೆ ಉಳಿದ 88.49 ಕೋಟಿ ರೂ.ವೇತನೇತರ ಕಾರ್ಯಕ್ರಮಗಳಿಗೆ ಮೀಸಲಾಗಿದೆ.

ಜಿಪಂ ಕಾರ್ಯಕ್ರಮಗಳಲ್ಲಿ 65.04 ಕೋಟಿ ರೂ. ಅನುದಾನವನ್ನು ಸಾರ್ವಜನಿಕ ಶಿಕ್ಷಣ ಇಲಾಖೆಯ ಕಾರ್ಯಕ್ರಮಗಳಿಗೆ ನಿಗದಿ ಪಡಿಸಲಾಗಿದೆ. ಅಕ್ಷರ ದಾಸೋಹಕ್ಕೆ ಮೀಸಲಾಗಿರುವ 29.91 ಕೋಟಿ ರೂ.ಗಳಲ್ಲಿ 86,198 ವಿದ್ಯಾರ್ಥಿಗಳಿಗೆ ಮಧ್ಯಾಹ್ನದ ಬಿಸಿಯೂಟ ಹಾಗೂ ಸರಕಾರಿ ಪ್ರಾಥಮಿಕ ಶಾಲೆಗಳ 6 ಮತ್ತು 7ನೇ ತರಗತಿಗಳಲ್ಲಿರುವ ಹೆಣ್ಣುಮಕ್ಕಳ ಮತ್ತು ಪರಿಶಿಷ್ಟ ಜಾತಿ ಮತ್ತು ಪಂಗಡಗಳ ವಿದ್ಯಾರ್ಥಿಗಳ ಶುಲ್ಕ ಮರುಪಾವತಿಗೆ ವಿನಿಯೋಗಿ ಸಲಾಗುವುದು.

51 ಸರಕಾರಿ ಪ್ರೌಢ ಶಾಲೆಗಳ ಕಟ್ಟಡ ನಿರ್ವಹಣಾ ಕಾಮಗಾರಿಗಳಿಗೆ 85 ಲಕ್ಷ ರೂ. ಹಾಗೂ 56 ಶಾಲೆ ಮತ್ತು ಕಚೇರಿಗಳಿಗೆ ಪೀಠೋಪಕರಣಗಳನ್ನು ಒದಗಿಸಲು ಸಾಮಗ್ರಿಗಳ ಸರಬರಾಜು ವಲಯದಡಿ 30ಲಕ್ಷ ರೂ.ಗಳನ್ನು ಕಾಯ್ದಿರಿಸಲಾಗಿದೆ. ಯುವ ಸಬಲೀಕರಣ ಮತ್ತು ಕ್ರೀಡಾ ಇಲಾಖೆಗೆ ಕ್ರೀಡಾಂಗಣ ನಿರ್ವಹಣೆಗೆ 68.50 ಲಕ್ಷ ಲಭ್ಯವಿದ್ದು, ಇದರಲ್ಲಿ ಜಿಲ್ಲಾ ಕ್ರೀಡಾಂಗಣ, ಈಜುಕೊಳ, ಟೆನಿಸ್ ಕೋರ್ಟ್ ಅಲ್ಲದೇ ಕಾರ್ಕಳ ಮತ್ತು ಹೆಜಮಾಡಿ ಕ್ರೀಡಾಂಗಣಗಳ ನಿರ್ವಹಣೆಯೂ ಸೇರಿದೆ. ಕ್ರೀಡಾಕೂಟ ಮತ್ತು ರ್ಯಾಲಿಗಳ ಸಂಘಟನೆಗೆ 30 ಲಕ್ಷ ರೂ.ಗಳನ್ನು ನಿಗದಿಮಾಡಲಾಗಿದೆ. ಕ್ರೀಡಾ ಶಾಲೆಯ ನಿರ್ವಹಣೆಗೆ 19.50 ಲಕ್ಷ ರೂ. ಹಾಗೂ ಒಳಾಂಗಣ ಕ್ರೀಡಾಂಗಣದ ನಿರ್ವಹಣೆಗೆ 30 ಲಕ್ಷ ರೂ. ಹಂಚಿಕೆಯಾಗಿದೆ. ಕ್ರೀಡೋಪಕರಣಗಳ ಖರೀದಿಗೆ 1.14 ಲಕ್ಷ ರೂ. ನೀಡಲಾಗಿದೆ.

ಕನ್ನಡ ಮತ್ತು ಸಂಸ್ಕೃತಿ ಇಲಾಖೆ ಮೂಲಕ ಬಯಲು ರಂಗಮಂದಿರದ ನಿರ್ಮಾಣಕ್ಕೆ 6 ಲಕ್ಷ ರೂ.ನಿಗದಿಯಾಗಿದೆ. ಜಿಲ್ಲಾ ಆಯುಷ್ ಕಚೇರಿಗೆ 2.14 ಕೋಟಿ ರೂ.ಅನುದಾನ ಹಂಚಿಕೆಯಾಗಿದೆ. ಕಟ್ಟಡ ವಲಯದಡಿ ಬೆಳಪು, ಕಾಳಾವಾರ, ಗುಲ್ವಾಡಿ, ಬೆಳ್ಳಾಲ, ಕೆರ್ವಾಶೆ ಹಾಗೂ ಅಮಾಸೆಬೈಲು ಸರಕಾರಿ ಆಯುರ್ವೇದ ಚಿಕಿತ್ಸಾಲಯ ಕಟ್ಟಡ ಕಾಮಗಾರಿಗೆ 15ಲಕ್ಷ ರೂ. ನೀಡಲಾಗಿದೆ.

ಸಮಾಜ ಕಲ್ಯಾಣ ಇಲಾಖೆಗೆ 4.94 ಕೋಟಿ ರೂ.ಹಂಚಿಕೆಯಾಗಿದ್ದು, ಇದರಲ್ಲಿ ಪರಿಶಿಷ್ಟ ಜಾತಿ ವಿದ್ಯಾರ್ಥಿಗಳ ವಿದ್ಯಾರ್ಥಿ ವೇತನಕ್ಕೆ 1.63ಕೋಟಿ ರೂ., ಪುರಸ್ಕಾರಕ್ಕೆ 85 ಲಕ್ಷರೂ., ವಿದ್ಯಾರ್ಥಿ ನಿಲಯಗಳ ನಿರ್ವಹಣೆಗೆ 1.51ಕೋಟಿ ರೂ. ಒದಗಿಸಲಾಗಿದೆ. ಪರಿಶಿಷ್ಟ ಪಂಗಡಗಳ ಕಲ್ಯಾಣಕ್ಕೆ (ಐಟಿಡಿಪಿ) 6.47 ಕೋಟಿ ರೂ. ಹಂಚಿಕೆಯಾಗಿದೆ.

ಹಿಂದುಳಿದ ವರ್ಗಗಳ ಕಲ್ಯಾಣ ಇಲಾಖೆಗೆ 13.44 ಕೋಟಿ ರೂ.ಹಂಚಿಕೆಯಾಗಿದ್ದು, ಇದರಲ್ಲಿ ವಿದ್ಯಾರ್ಥಿ ನಿಲಯಗಳ ನಿರ್ವಹಣೆಗೆ 9.96 ಕೋಟಿ ರೂ., ವಿದ್ಯಾರ್ಥಿಗಳ ವಿವಿಧ ಶುಲ್ಕ ಪಾವತಿಗೆ 8.53ಕೋಟಿ ರೂ., 14 ವಿದ್ಯಾರ್ಥಿ ನಿಲಯಗಳ ನಿರ್ವಹಣೆಗೆ 31.91ಲಕ್ಷ ರೂ ನೀಡಲಾಗಿದೆ. ಅಲ್ಪಸಂಖ್ಯಾತರ ಕಲ್ಯಾಣ ಕಾರ್ಯಕ್ರಮದಡಿ 61.67 ಲಕ್ಷ ರೂ.ಹಂಚಿಕೆ ಮಾಡಲಾಗಿದೆ.

ಇನ್ನು ಮಹಿಳಾ ಮತ್ತು ಮಕ್ಕಳ ಕಲ್ಯಾಣ ಹಾಗೂ ಅಂಗವಿಕಲರ ಕಲ್ಯಾಣ ಇಲಾಖೆಯ ಕಾರ್ಯಕ್ರಮಗಳಿಗೆ 85.67 ಲಕ್ಷ ರೂ., ಕೃಷಿ ಇಲಾಖೆಗೆ 1.86 ಕೋಟಿ ರೂ., ತೋಟಗಾರಿಕಾ ಇಲಾಖೆಗೆ 1.88ಕೋಟಿ ರೂ., ಪಶುಸಂಗೋಪನಾ ಇಲಾಖೆಗೆ 2.26 ಕೋಟಿ ರೂ.ಗಳ ಕ್ರಿಯಾ ಯೋಜನೆಯನ್ನು ತಯಾರಿಸಲಾಗಿದೆ.ಮೀನುಗಾರಿಕಾ ಇಲಾಖೆಗೆ 1.02ಕೋಟಿ ರೂ, ಸಾಮಾಜಿಕ ಅರಣ್ಯ ವಿಭಾಗಕ್ಕೆ 1.94ಕೋಟಿ ರೂ.ಗಳನ್ನು ನೀಡಲಾಗಿದೆ.
ಈ ಕ್ರಿಯಾಯೋಜನೆಗೆ ಶನಿವಾರ ನಡೆದ ಉಡುಪಿ ಜಿಲ್ಲಾ ಪಂಚಾಯತ್‌ನ ಸಾಮಾನ್ಯ ಸಭೆಯಲ್ಲಿ ಅನುಮೋದನೆ ಪಡೆಯಲಾಯಿತು.