ಲಿಂಬೆಯೊಂದಿಗೆ ಶುಂಠಿರಸದ ಸೇವನೆಯ ಆರೋಗ್ಯಲಾಭಗಳು
ಭಾರತೀಯ ಅಡುಗೆಯಲ್ಲಿ ಪರಿಮಳದೊಂದಿಗೆ ರುಚಿಯನ್ನು ನೀಡುವ ಶುಂಠಿಯನ್ನು ವ್ಯಾಪಕವಾಗಿ ಬಳಸಲಾಗುತ್ತದೆ. ಅದು ಔಷಧೀಯ ಉದ್ದೇಶಕ್ಕಾಗಿಯೂ ಬಳಕೆಯಾಗುತ್ತದೆ. ಇನ್ನೊಂದೆಡೆ ಉತ್ಕರ್ಷಣ ನಿರೋಧಕಗಳ ಆಗರವಾಗಿರುವ ಲಿಂಬೆಯು ಹಲವಾರು ವಿಧಗಳಲ್ಲಿ ಆರೋಗ್ಯವನ್ನು ಉತ್ತೇಜಿಸುತ್ತದೆ.
ಶುಂಠಿಯು ಉರಿಯೂತ ನಿರೋಧಕ ಮತ್ತು ಬ್ಯಾಕ್ಟೀರಿಯಾ ನಿರೋಧಕ ಗುಣಗಳನ್ನು ಹೊಂದಿದ್ದು,ಪಚನಕ್ರಿಯೆಯಲ್ಲಿ ನೆರವಾಗುತ್ತದೆ. ಅದು ಶರೀರದ ತೂಕವನ್ನು ಇಳಿಸುತ್ತದೆ,ಜೀರ್ಣಾಂಗ ವ್ಯವಸ್ಥೆಯನ್ನು ಆರೋಗ್ಯಯುತವಾಗಿಸುತ್ತದೆ, ಚಯಾಪಚಯವನ್ನು ಕ್ರಿಯಾಶೀಲಗೊಳಿಸಲು ನೆರವಾಗುತ್ತದೆ ಮತ್ತು ಕೊಬ್ಬನ್ನು ಕರಗಿಸುತ್ತದೆ. ಲಿಂಬೆಯಲ್ಲಿ ಸಮೃದ್ಧವಾಗಿರುವ ವಿಟಾಮಿನ್ ಸಿ ಶರೀರದಲ್ಲಿರುವ ತ್ಯಾಜ್ಯಗಳು ಮತ್ತು ನಂಜುಗಳನ್ನು ನಿವಾರಿಸುವಲ್ಲಿ ಅತ್ಯಂತ ಪರಿಣಾಮಕಾರಿಯಾಗಿದೆ. ಜೊತೆಗೆ ಶರೀರದಲ್ಲಿ ದ್ರವ ಸಂಗ್ರಹಗೊಳ್ಳುವುದನ್ನು ತಡೆಯುತ್ತದೆ ಮತ್ತು ಹೊಟ್ಟೆಯೂತವನ್ನು ಕಡಿಮೆ ಮಾಡುತ್ತದೆ.
ಶುಂಠಿ ಮತ್ತು ಲಿಂಬೆ ರಸವನ್ನು ರಾತ್ರಿ ಮಲಗುವ ಮುನ್ನ ಸೇವಿಸುವುದರಿಂದ ನಮ್ಮ ಶರೀರಕ್ಕೆ ಹಲವಾರು ಆರೋಗ್ಯಲಾಭಗಳು ದೊರೆಯುತ್ತವೆ. ಅವುಗಳ ಕುರಿತು ಮಾಹಿತಿಯಿಲ್ಲಿದೆ....
► ಶುಂಠಿ ನೀಡುವ ಲಾಭಗಳು
ಮಳೆಗಾಲದಲ್ಲಿ ಮತ್ತು ಚಳಿಗಾಲದಲ್ಲಿ ಗಾಳಿಯಲ್ಲಿ ಅತ್ಯಂತ ಕ್ರಿಯಾಶೀಲವಾಗಿರುವ ಸೂಕ್ಷ್ಮಾಣುಜೀವಿಗಳಿಂದಾಗಿ ನಾವು ಆಗಾಗ್ಗೆ ಅನಾರೋಗ್ಯಕ್ಕೆ ಗುರಿಯಾಗುತ್ತಿರುತ್ತೇವೆ. ಹೀಗಾಗಿ ಶೀತ ಮತ್ತು ಫ್ಲೂವನ್ನು ದೂರವಿಡಲು ಸೂಕ್ತ ರೋಗ ನಿರೋಧಕ ಶಕ್ತಿಯನ್ನು ಕಾಯ್ದುಕೊಳ್ಳುವುದು ಕಠಿಣವಾಗುತ್ತದೆ. ಶುಂಠಿ ನಮ್ಮ ಆಹಾರಲ್ಲಿ ಏಕಿರಬೇಕು ಎನ್ನುವುದಕ್ಕೆ ಇದು ಪ್ರಮುಖ ಕಾರಣವಾಗಿದೆ. ಸೂಕ್ಷ್ಮಾಣುಜೀವಿಗಳ ನಿರೋಧಕವಾಗಿ ಕಾರ್ಯಾಚರಿಸುವ ಅದು ಆಂತರಿಕ ಮತ್ತು ಬಾಹ್ಯ ಬ್ಯಾಕ್ಟೀರಿಯಾಗಳನ್ನು ಕೊಲ್ಲುವ ಸಾಮರ್ಥ್ಯವನ್ನು ಹೊಂದಿದೆ.
ಅನಿಯಮಿತ ಮಲವಿಸರ್ಜನೆಯ ತೊಂದರೆಯು ಹೊಟ್ಟೆ ಬಿಗಿತ, ವಾಕರಿಕೆ,ವಾಂತಿ,ಅತಿಸಾರ ಮತ್ತು ಅಜೀರ್ಣದಂತಹ ಸಮಸ್ಯೆಗಳಿಗೆ ಕಾರಣವಾಗುತ್ತದೆ. ಶುಂಠಿಯು ಈ ತೊಂದರೆಗಳನ್ನು ನಿಯಂತ್ರಿಸುತ್ತದೆ.
ಶುಂಠಿಯು ಶರೀರದಲ್ಲಿ ಚಯಾಪಚಯವನ್ನು ಹೆಚ್ಚಿಸುತ್ತದೆ. ಶುಂಠಿ ಮತ್ತು ಲಿಂಬೆ ಸೇರಿದಾಗ ಅದು ಚಯಾಪಚಯವನ್ನು ಇಮ್ಮಡಿಗೊಳಿಸುತ್ತದೆ. ಶುಂಠಿಯು ಜಠರದಲ್ಲಿ ಹೆಚ್ಚಿನ ಆಮ್ಲ ಉತ್ಪತ್ತಿಯಾಗುವಂತೆ ಮಾಡಿ ಚಯಾಪಚಯಕ್ಕೆ ಉತ್ತಮ ಆರಂಭವನ್ನು ನೀಡುತ್ತದೆ ಮತ್ತು ಹಸಿವೆಯನ್ನು ಹೆಚ್ಚಿಸುವುದರಿಂದ ದೇಹದ ತೂಕವನ್ನು ಹೆಚ್ಚಿಸಿಕೊಳ್ಳಲು ಬಯಸುವವರಿಗೆ ಉತ್ತಮ ಫಲಿತಾಂಶ ನೀಡುತ್ತದೆ. ಇನ್ನೊಂದೆಡೆ ದೇಹದ ತೂಕವನ್ನು ಇಳಿಸಿಕೊಳ್ಳಲು ಬಯಸುವವರಿಗೂ ಅದು ಲಾಭಕಾರಿಯಾಗಿದೆ. ಆಮ್ಲವು ಜಠರದಲ್ಲಿ ಚಯಾಪಚಯವನ್ನು ಕ್ರಿಯಾಶೀಲಗೊಳಿಸುತ್ತದೆ ಮತ್ತು ಹೆಚ್ಚಿನ ಕ್ಯಾಲರಿಗಳು ಮತ್ತು ಕೊಬ್ಬನ್ನು ಕರಗಿಸಲು ನೆರವಾಗುತ್ತದೆ.
ರಕ್ತದಲ್ಲಿ ಸಕ್ಕರೆಯ ಮಟ್ಟವು ಹೆಚ್ಚಾಗುವುದು ಮಧುಮೇಹದ ಅತ್ಯಂತ ಸಾಮಾನ್ಯ ಲಕ್ಷಣವಾಗಿದೆ. ಶುಂಠಿಯು ಹೆಚ್ಚಿನ ಸಕ್ಕರೆ ಮಟ್ಟ ಮತ್ತು ಕಡಿಮೆ ಸಕ್ಕರೆ ಮಟ್ಟದ ವಿರುದ್ಧ ಹೋರಾಡಿ ಅದನ್ನು ನಿಯಂತ್ರಣದಲ್ಲಿರಿಸಲು ನೆರವಾಗುತ್ತದೆ.
► ಲಿಂಬೆಯ ಲಾಭಗಳು
ಲಿಂಬೆ ಮತ್ತು ಶುಂಠಿಯ ರಸವನ್ನು ರಾತ್ರಿ ಸೇವಿಸುವುದರಿಂದ ಮೂತ್ರಪಿಂಡ ಕಲ್ಲುಗಳು ಉಂಟಾಗುವುದನ್ನು ತಡೆಯಬಹುದು. ಲಿಂಬೆರಸವು ಮೂತ್ರದಲ್ಲಿ ಸಿಟ್ರೇಟ್ ಮಟ್ಟವನ್ನು ಹೆಚ್ಚಿಸುತ್ತದೆ ಮತ್ತು ಇದು ಮೂತ್ರಪಿಂಡಗಳಲ್ಲಿ ಕ್ಯಾಲ್ಸಿಯಂ ಕಲ್ಲುಗಳು ರೂಪುಗೊಳ್ಳುವುದನ್ನು ತಡೆಯುತ್ತದೆ.
ಮಳೆಗಾಲ ಮತ್ತು ಚಳಿಗಾಲದಲ್ಲಿ ಶರೀರದ ನಿರೋಧಕ ಶಕ್ತಿಯು ಕಡಿಮೆಯಾದಾಗ ಶುಂಠಿಯಂತೆ ಲಿಂಬೆ ಕೂಡ ಉತ್ತಮ ಪೂರಕವಾಗಿದೆ. ಶೀತ,ಕೆಮ್ಮು ಮತ್ತು ಗಂಟಲಿನ ಕಿರಿಕಿರಿಯಿಂದ ಪಾರಾಗಲು ಲಿಂಬೆರಸ ಬೆರೆಸಿದ ಶುಂಠಿಯ ಟೀ ಸೇವನೆ ಒಳ್ಳೆಯದು. ಲಿಂಬೆರಸವು ತೂಕವನ್ನು ಇಳಿಸುವ ಮತ್ತು ಜೀರ್ಣವ್ಯವಸ್ಥೆಗೆ ನೆರವಾಗುವ ತನ್ನ ಗುಣಗಳಿಗಾಗಿ ಹೆಸರಾಗಿದೆ. ಅದರಲ್ಲಿರುವ ಉತ್ಕರ್ಷಣ ನಿರೋಧಕಗಳು ಜೀರ್ಣಾಂಗವನ್ನು ಮತ್ತು ಯಕೃತ್ತನ್ನು ಸ್ವಚ್ಛಗೊಳಿಸುತ್ತವೆ. ನೀವು ದೇಹತೂಕವನ್ನು ಇಳಿಸುವ ಆಹಾರಕ್ರಮವನ್ನು ಅನುಸರಿಸುತ್ತಿದ್ದರೆ ಲಿಂಬೆಯನ್ನು ಅದರಲ್ಲಿ ಸೇರಿಸಿಕೊಳ್ಳಿ. ಅದು ನಿಮ್ಮ ಶರೀರವನ್ನು ನಂಜುಗಳಿಂದ ಮುಕ್ತಗೊಳಿಸುತ್ತದೆ ಮತ್ತು ಮೈಮಾಟವನ್ನು ಉತ್ತಮಗೊಳಿಸುತ್ತದೆ.
ನಿಮ್ಮ ಶರೀರವು ಕ್ಷಾರೀಯವಾಗಿದ್ದರೆ ಅದು ಆಮ್ಲೀಯತೆಗೆ ಸಂಬಂಧಿಸಿದಂತೆ ಸೂಕ್ತ ಸಮತೋಲನವನ್ನು ಕಾಯ್ದಕೊಳ್ಳುತ್ತದೆ. ನಿಮ್ಮ ಶರೀರವು ಅತಿಯಾಗಿ ಆಮ್ಲೀಯವಾಗಿದ್ದರೆ ಅದರಿಂದ ಉಂಟಾಗುವ ನಂಜು ಮೊಡವೆಗಳು,ತೂಕ ಹೆಚ್ಚಳ,ನಿಶ್ಶಕ್ತಿ ಇತ್ಯಾದಿಗಳಿಗೆ ಕಾರಣವಾಗುತ್ತದೆ. ಲಿಂಬೆಯನ್ನೊಳಗೊಂಡ ರಸವು ಶರೀರದಲ್ಲಿ ಪಿಎಚ್ ಮಟ್ಟವನ್ನು ಸಮತೋಲನದಲ್ಲಿರಿಸಲು ನೆರವಾಗುತ್ತದೆ,ಸ್ವಚ್ಛ ಚರ್ಮ ಮತ್ತು ಹೆಚ್ಚಿನ ಶಕ್ತಿಯನ್ನು ನೀಡುತ್ತದೆ ಹಾಗೂ ಆರೋಗ್ಯಕರವಾದ ದೇಹತೂಕವನ್ನು ಕಾಯ್ದುಕೊಳ್ಳಲು ನೆರವಾಗುತ್ತದೆ.
ಈ ಆರೋಗ್ಯಲಾಭಗಳನ್ನು ಪಡೆಯಲು ಲಿಂಬೆರಸವನ್ನು ಸಿದ್ಧಗೊಳಿಸಿ ಅದಕ್ಕೆ ಒಂದಿಷ್ಟು ಜೇನು ಮತ್ತು ತುರಿದ ಶುಂಠಿಯನ್ನು ಬೆರೆಸಿ ರಾತ್ರಿ ಮಲಗುವ ಮುನ್ನ ಸೇವಿಸಿ.
