ಬರಲಿದೆ ಸಂಜು ಸಿನೆಮಾದ 2ನೇ ಭಾಗ?
ರಣ್ಬೀರ್ ಕಪೂರ್ ನಟಿಸಿರುವ ಸಂಜು ಸಿನೆಮಾ ಬಿಡುಗಡೆಯಾದ ಹನ್ನೆರಡನೇ ದಿನಕ್ಕೇ ಬಾಲಿವುಡ್ ಬಾಕ್ಸ್ ಆಫೀಸ್ನ ಎಲ್ಲ ದಾಖಲೆಗಳನ್ನು ನುಂಗಿ ನೀರು ಕುಡಿದಿದೆ. ಈಗಾಗಲೇ 278.58 ಕೋಟಿ ರೂ. ಬಾಚಿರುವ ಸಂಜು ಮುನ್ನೂರು ಕೋಟಿ ರೂ. ಗಳಿಸುವತ್ತ ಮುನ್ನುಗ್ಗುತ್ತಿದೆ. ಆದರೆ, ರಾಜ್ಕುಮಾರ್ ಹಿರಾನಿ ನಿರ್ದೇಶನದ ಈ ಚಿತ್ರದಲ್ಲಿ ಸಂಜಯ್ ದತ್ ಜೀವನದ ಹಲವು ಮಜಲುಗಳನ್ನು ತೋರಿಸಿಲ್ಲ ಎಂಬ ಅಸಮಾಧಾನವನ್ನು ಪ್ರೇಕ್ಷಕರು ವ್ಯಕ್ತಪಡಿಸಿದ್ದಾರೆ. ಮುಖ್ಯವಾಗಿ ದತ್ ಬೋರ್ಡಿಂಗ್ ಶಾಲೆಯಲ್ಲಿ ಕಲಿಯುತ್ತಿದ್ದ ದಿನಗಳು, ಅವರ ಮೊದಲ ಇಬ್ಬರು ಪತ್ನಿಯರು ಮತ್ತು ಮಗಳು ತ್ರಿಶಾಲಾ ಬಗ್ಗೆ ಸಂಜು ಸಿನೆಮಾದಲ್ಲಿ ಯಾವ ಉಲ್ಲೇಖವೂ ಇಲ್ಲ ಎಂಬುದು ಪ್ರೇಕ್ಷಕರ ಆರೋಪ. ಹಾಗಾಗಿಯೇ ಈಗ ಸಂಜು ನಿರ್ಮಾಪಕರು ಈ ಚಿತ್ರದ ಸೀಕ್ಷಲ್ ತಯಾರಿಸಲು ನಿರ್ಧರಿಸಿದ್ದಾರೆ ಎಂಬ ಮಾತುಗಳು ಬಾಲಿವುಡ್ ಗಲ್ಲಿಗಳಿಂದ ಕೇಳಿಬರುತ್ತಿದೆ. ಲೇಖಕ ಅಭಿಜಿತ್ ಜೋಶಿ ಹೇಳುವಂತೆ ಸಂಜು ಸಿನೆಮಾದಲ್ಲಿ ಸಂಜಯ್ ದತ್ ಜೀವನದ ಕೇವಲ 150 ಪುಟಗಳನ್ನು ಮಾತ್ರ ಆರಿಸಿಕೊಳ್ಳಲಾಗಿದೆ. ಇನ್ನೂ ದತ್ತ ಜೀವನದ 600 ಪುಟಗಳು ಹೇಳಲು ಬಾಕಿಯಿದೆ. ವರದಿಗಳನ್ನು ನಂಬುವುದಾದರೆ, ಸಂಜು ಸಿನೆಮಾ ವೀಕ್ಷಿಸಿದ ಬಳಿಕ ಖುದ್ದು ಸಂಜಯ್ ದತ್ ಅಳುತ್ತಲೇ ಹಿರಾನಿ ಮತ್ತು ರಣ್ಬೀರ್ನನ್ನು ಅಪ್ಪಿಕೊಂಡಿದ್ದರು. ನಂತರ ತಾನು ಪ್ರೇಕ್ಷಕನಿಗೆ ಇನ್ನೂ ಕೆಲವು ಕತೆಗಳನ್ನು ಹೇಳಬೇಕಿದೆ. ಹಾಗಾಗಿ ಈ ಚಿತ್ರದ ಸೀಕ್ಷಲ್ ನಿರ್ಮಿಸುವಂತೆ ತಿಳಿಸಿದ್ದರು ಎನ್ನಲಾಗಿದೆ. ವ್ಯಕ್ತಿಯ ಜೀವನಚರಿತ್ರೆಯನ್ನು ಆಧರಿಸಿ ನಿರ್ಮಿಸ ಲಾಗುವ ಸಿನೆಮಾಗಳ ಎರಡನೇ ಭಾಗವನ್ನು ನಿರ್ಮಿಸುವುದು ಬಾಲಿವುಡ್ನ ಇತ್ತೀಚಿನ ಟ್ರೆಂಡ್ ಎಂದು ಹೇಳಲಾಗುತ್ತಿದೆ. ಕ್ಯಾಪ್ಟನ್ ಕೂಲ್ ಮಹೇಂದ್ರ ಸಿಂಗ್ ಧೋನಿಯ ಜೀವನ ಆಧರಿಸಿದ ಎಮ್.ಎಸ್ ಧೋನಿ-ದಿ ಅನ್ಟೋಲ್ಡ್ ಸ್ಟೋರಿ ಚಿತ್ರದ ಸೀಕ್ವಲ್ ಈಗಾಗಲೇ ತಯಾರಾಗುತ್ತಿದೆ.
