ಮೋದಿ ಆಡಳಿತದಲ್ಲಿ ಸಂವಿಧಾನ ಮೌಲ್ಯಗಳ ಮೇಲಿನ ದಾಳಿ ಹೆಚ್ಚಿದೆ: ಸಿಪಿಐಎಂ ಮುಖಂಡ ರಾಮಚಂದ್ರನ್
ಚಿಕ್ಕಮಗಳೂರು, ಆ.6: ಪ್ರಧಾನಿ ಮೋದಿ ನೇತೃತ್ವದ ಬಿಜೆಪಿ ಸರಕಾರ ನವ ಉದಾರೀಕರಣ ನೀತಿಗಳನ್ನು ಜಾರಿ ಮಾಡುತ್ತಿದ್ದು, ಇದು ಕಾರ್ಪೋರೇಟ್ ಸಂಸ್ಥೆಗಳಿಗೆ ಲಾಭ ಮಾಡಿಕೊಟ್ಟಿದೆ. ಮೋದಿ ಸರಕಾರದ ಆರ್ಥಿಕ ನೀತಿಗಳು ದುಡಿಯುವ ವರ್ಗಗಳ ಬದುಕನ್ನು ದುಸ್ತರಗೊಳಿಸಿದ್ದು, ದೇಶಾದ್ಯಂತ ದುಡಿಯುವ ವರ್ಗಗಳು ಬದುಕಿಗಾಗಿ ಸಾಕಷ್ಟು ಸವಾಲುಗಳನ್ನು ಎದುರಿಸುವಂತಾಗಿದೆ ಎಂದು ಸಿಪಿಐ(ಎಂಎಲ್) ರೆಡ್ಸ್ಟಾರ್ನ ರಾಷ್ಟ್ರೀಯ ಪ್ರದಾನ ಕಾರ್ಯದರ್ಶಿ ರಾಮಚಂದ್ರನ್ ಆರೋಪಿಸಿದ್ದಾರೆ.
ನಗರದಲ್ಲಿ ಸೋಮವಾರ ಸುದ್ದಿಗೋಷ್ಠಿಯಲ್ಲಿ ಮಾತನಾಡಿದ ಅವರು, ಮೋದಿ ಸರಕಾರದ ಹಿಂದುತ್ವದ ಬಲವಂತದ ಹೇರಿಕೆಯಿಂದಾಗಿ ದೇಶಾದ್ಯಂತ ದಲಿತರು, ಅಲ್ಪಸಂಖ್ಯಾತರ ಹಾಗೂ ದುಡಿಯುವ ವರ್ಗಗಳ ಮೇಲೆ ನಿರಂತರ ದಾಳಿ ನಡೆಯುವಂತಾಗಿದೆ. ಮಹಿಳೆಯರು ಹಾಗೂ ಮಕ್ಕಳ ಮೇಲಿನ ದೌರ್ಜನ್ಯ ಮಿತಿ ಮೀರಿದೆ, ಇದರ ವಿರುದ್ಧ ಹೋರಾಡಲು ಪರ್ಯಾಯ ಜನತಾ ಹೋರಾಟ ಪ್ರಸಕ್ತ ಅತ್ಯಗತ್ಯವಾಗಿದೆ ಎಂದ ಅವರು, ನವ ಉದಾರೀಕರಣ ನೀತಿಗಳ ಮೂಲಕ ಉಗ್ರ ಬಲಪಂಥೀಯವಾದ, ಕಾರ್ಪೋರೆಟ್ ಶಕ್ತಿಗಳು ಹಾಗೂ ಪ್ಯಾಸಿಸ್ಟ್ ಶಕ್ತಿಗಳ ದುಷ್ಟ ಕೂಟ ಅಂತಾರಾಷ್ಟ್ರೀಯ ಮಟ್ಟದಲ್ಲಿ ತಮ್ಮ ಸಾಮ್ರಾಜ್ಯವನ್ನು ಪ್ರಸಕ್ತ ವಿಸ್ತರಿಸುತ್ತಿದ್ದು, ಇದನ್ನು ಸಮರ್ಥವಾಗಿ ಎದುರಿಸುವ ನಿಟ್ಟಿನಲ್ಲಿ ಕೈಗೊಳ್ಳಬೇಕಾದ ಜನಪರ ಹೋರಾಟಗಳ ಬಗ್ಗೆ ಚರ್ಚಿಸಲು ಸಿಪಿಐಎಂ ರೆಡ್ಸ್ಟಾರ್ ಪಕ್ಷದ ವತಿಯಿಂದ ನ.27ರಿಂದ ಡಿ.ರವರೆಗೆ ಬೆಂಗಳೂರಿನಲ್ಲಿ ಪಕ್ಷದ 11ನೇ ಅಧಿವೇಶನ ಹಮ್ಮಿಕೊಳ್ಳಲಾಗಿದೆ. ಸಮ್ಮೇಳನದ ಅಂಗವಾಗಿ ನ.26ರಂದು ಬೃಹತ್ ಪ್ರತಿಭಟನಾ ಮೆರವಣಿಗೆ ನಡೆಯಲಿದೆ ಎಂದು ರಾಮಚಂದ್ರನ್ ತಿಳಿಸಿದರು.
ಪ್ರಧಾನಿ ನರೇಂದ್ರ ಮೋದಿ ಸರಕಾರ ಅಧಿಕಾರಕ್ಕೆ ಬಂದಾಗಿನಿಂದ ದೇಶಾದ್ಯಂತ ಬಲಪಂಥೀಯವಾದ ವಿಜೃಂಬಿಸುತ್ತಿದೆ. ಸರಕಾರ ಜಾರಿ ಮಾಡುತ್ತಿರುವ ಉದಾರೀಕರಣ ಹಾಗೂ ನವ ಆರ್ಥಿಕ ನೀತಿಗಳು ಜನರ ಪರವಾಗಿರದೆ ಬಹುರಾಷ್ಟ್ರೀಯ ಕಂಪೆನಿಗಳ ಪರವಾಗಿವೆ. ಈ ನೀತಿಗಳು ದೇಶಾದ್ಯಂತ ದುಡಿಯುವ ವರ್ಗಗಳ ಬದುಕುವ ಹಕ್ಕನ್ನೇ ನಾಶ ಮಾಡುತ್ತಿವೆ ಎಂದು ಟೀಕಿಸಿದ ಅವರು, ಮೋದಿ ಸರಕಾರ ನವ ಆರ್ಥಿಕ ನೀತಿಗಳನ್ನು ಪ್ಯಾಸಿಸ್ಟ್ ಶಕ್ತಿಗಳನ್ನು ಬಳಸಿಕೊಂಡು ಜಾರಿ ಮಾಡುತ್ತಿವೆ. ಈ ಆರ್ಥಿಕ ನೀತಿಗಳು ಜನರ ಮೇಲೆ ಸವಾರಿ ಮಾಡುತ್ತಾ ಜನಸಮಾನ್ಯರ ಹಣವನ್ನು ಲೂಟಿ ಮಾಡುತ್ತಿವೆ ಎಂದು ಜರಿದರು.
ಮೋದಿ ಸರಕಾರದ ದೇಶಾದ್ಯಂತ ಪ್ಯಾಸಿಸ್ಟ್ ಶಕ್ತಿಗಳ ಮೂಲಕ ಮುಕ್ತವಾಗಿ ಸಾಮ್ರಾಜ್ಯಶಾಯಿಗಳಿಗೆ ಪೂರಕವಾಗಿ ನವ ಆರ್ಥಿಕ ನೀತಿಗಳನ್ನು ಜಾರಿ ಮಾಡಿದ್ದರಿಂದ ದೇಶದಲ್ಲಿ ಕಾರ್ಪೋರೆಟ್ ಶಕ್ತಿಗಳಿಗೆ ಲಾಭವಾಗುತ್ತಿದ್ದು, ಜಿಎಸ್ಟಿ ಹಾಗೂ ನೋಟುಗಳ ರದ್ದತಿಯಿಂದಾಗಿ ಕಾರ್ಪೋರೆಟ್ ಶಕ್ತಿಗಳಿಗೆ ಲಾಭವಾಗಿದೆ. ಈ ಶಕ್ತಿಗಳು ಕಾರ್ಮಿಕರ, ದುಡಿಯುವ ವರ್ಗಗಳನ್ನು ದೋಚುತ್ತಾ ಅವರ ಹೋರಾಟದ ಹಕ್ಕುಗಳನ್ನೇ ಹತ್ತಿಕ್ಕುತ್ತಿವೆ. ಕೃಷಿ ಕ್ಷೇತ್ರ ಕಾರ್ಪೋರೆಟ್ ಶಕ್ತಿಗಳ ಪಾಲಾಗುತ್ತಿವೆ. ಶಿಕ್ಷಣ ಕ್ಷೇತ್ರ ಖಾಸಗೀಕರಣಗೊಂಡು ಬಡವರ ಶಿಕ್ಷಣದ ಹಕ್ಕನ್ನೂ ಕಸಿಯಲಾಗುತ್ತಿದೆ. ಆರೋಗ್ಯ ಕ್ಷೇತ್ರ ದುಬಾರಿಯಾಗುತ್ತಿದೆ, ಅಗತ್ಯ ವಸ್ತುಗಳ ಬೆಲೆಗಳು ಗಗನಕ್ಕೇರುತ್ತಿವೆ. ನಿರುದ್ಯೋಗ ತಾಂಡವವಾಡುತ್ತಾ, ಭಷ್ಟಾಚಾರ ಮಿತಿ ಮೀರಿದೆ ಎಂದು ಅವರು ವಾಗ್ದಾಳಿ ನಡೆಸಿದರು.
ಮೋದಿ ಅವರು ಈ ಆಡಳಿತ ನೀತಿಯಿಂದ ದೇಶಾದ್ಯಂತ ಜನತೆ ರೋಸಿ ಹೋಗಿದ್ದು, ಮೋದಿ ವಿರುದ್ಧ ಎಲ್ಲೆಡೆ ಕೂಗು ಏಳಲಾರಂಭಿಸಿರುವುದು ಉತ್ತಮ ಬೆಳವವಣಿಗೆಯಾಗಿದೆ. ಮುಂದಿನ ಚುನಾವಣೆಯಲ್ಲಿ ಜನತೆ ಮೋದಿ ಅವರನ್ನು ಮತದಾನದ ಮೂಲಕವೇ ಮೂಲೆಗುಂಪು ಮಾಡಲಿದ್ದಾರೆ. ಮೋದಿ ಸದೆಬಡೆಯಲು ಕಾಂಗ್ರೆಸ್ ಸೇರಿದಂತೆ ಬಿಜೆಪಿಯೇತರ ಪಕ್ಷಗಳು ಒಂದಾಗಿವೆಯಾದರೂ ಅವುಗಳು ಅಧಿಕಾರಕ್ಕೆ ಬಂದಲ್ಲಿ ಬಿಜೆಪಿಗಿಂತ ಭಿನ್ನ ಆಡಳಿತ ನೀಡುವಲ್ಲಿ ಯಶ ಕಾಣಲಾರವು. ಆದ್ದರಿಂದ ದೇಶದ ದುಡಿಯುವ ವರ್ಗಗಳು, ಕಾರ್ಮಿಕರು, ರೈತರು, ದಲಿತರು, ಅಲ್ಪಸಂಖ್ಯಾತರು, ಮಹಿಳೆಯರ ಉತ್ತಮ ಬದುಕಿನ ಹಕ್ಕಿಗಾಗಿ ಪರ್ಯಾಯ ಜನತಾ ಆಂದೋಲದ ಅಗತ್ಯವಿದ್ದು, ಈ ಸಂಬಂಧ ಹೋರಾಟ ರೂಪಿಸಲು ಪಕ್ಷದ ಅಧಿವೇಶನಲ್ಲಿ ಚರ್ಚಿಸಲಾಗುವುದು. ನವೆಂಬರ್ ನಲ್ಲಿ ನಡೆಯುವ ಪಕ್ಷದ ಈ ಕಾರ್ಯಕ್ರಮದಲ್ಲಿ 17 ರಾಜ್ಯಗಳ ಪ್ರತಿನಿಧಿಗಳು ಹಾಗೂ ವಿದೇಶದ ಪ್ರತಿನಿಧಿಗಳೂ ಭಾಗವಹಿಸಲಿದ್ದಾರೆಂದ ಅವರು, ದುಡಿಯುವ ವರ್ಗದ ಜನತೆ ಹಾಗೂ ಪ್ರಗತಿಪರ ಸಂಘಟನೆಗಳ ಮುಖಂಡರು ಪಾಲ್ಗೊಂಡು ಅಧಿವೇಶನವನ್ನು ಯಶಸ್ವಿಗೊಳಿಸಬೇಕೆಂದು ರಾಮಚಂದ್ರನ್ ಕರೆ ನೀಡಿದರು.
ಸುದ್ದಿಗೋಷ್ಠಿಯಲ್ಲಿ ಪಕ್ಷದ ಮುಖಂಡ ರುದ್ರಯ್ಯ ಮತ್ತಿತರರು ಉಪಸ್ಥಿತರಿದ್ದರು.
