ಗಾಂಧಿ ವಿಚಾರಗಳನ್ನು ಕೈಬಿಟ್ಟರೆ ಶಾಂತಿಗೆ ಧಕ್ಕೆ: ಕೆ.ನೀಲಾ

ಧಾರವಾಡ, ಆ.10: ಕೈಯೊಳಗೆ ಭಗವದ್ಗೀತೆ ಹಿಡಿದು ಎಲ್ಲರನ್ನೂ ಪ್ರೀತಿಸುವ, ಅಹಿಂಸೆಯ ಸಂದೇಶ ಸಾರಿದ ಮಹಾತ್ಮ ಗಾಂಧಿ ಇಂದಿಗೂ ಪ್ರತಿಯೊಬ್ಬ ಭಾರತೀಯನನ್ನು ಕಾಡುವ ಮಹಾನ್ ಚೇತನವಾಗಿದ್ದಾರೆ ಎಂದು ಚಿಂತಕಿ ಕೆ.ನೀಲಾ ಅಭಿಪ್ರಾಯಪಟ್ಟಿದ್ದಾರೆ.

ಕನ್ನಡ ಮತ್ತು ಸಂಸ್ಕೃತಿ ಇಲಾಖೆ, ರಂಗಾಯಣ, ಕವಿವಿ ಗಾಂಧಿ ಅಧ್ಯಯನ ವಿಭಾಗದ ಸಹಯೋಗದಲ್ಲಿ ಕವಿವಿ ಆವರಣದ ಸುವರ್ಣ ಮಹೋತ್ಸವ ಸಭಾಭವನದಲ್ಲಿ ಆಯೋಜಿಸಿದ್ದ ಸಮಾರಂಭದಲ್ಲಿ ಬೋಳುವಾರು ಮುಹಮ್ಮದ್ ಕುಂಞಿ ಅವರ ‘ಪಾಪು ಗಾಂಧಿ-ಗಾಂಧಿ ಬಾಪು’ ಆದ ಕಥೆ ಆಧರಿಸಿದ ರಂಗರೂಪ ‘ಗಾಂಧಿ 150’ ಒಂದು ರಂಗ ಪಯಣಕ್ಕೆ ಚಾಲನೆ ನೀಡಿ ಅವರು ಮಾತನಾಡಿದರು.

ಗಾಂಧಿ ಅವರ ಚಿಂತನೆಗಳನ್ನು ಕೈಬಿಟ್ಟು ಕೇವಲ ಅವರ ಚಿತ್ರದ ಮೂಲಕ ವ್ಯಕ್ತಿತ್ವವನ್ನು ಬೇರೆಯಾಗಿ ಕಟ್ಟಿಕೊಡುತ್ತಿರುವ ಕಾರ್ಯಗಳು ನಿಲ್ಲಬೇಕು. ಅವರ ಸಂದೇಶಗಳನ್ನು ನಿಜವಾದ ಅರ್ಥದಲ್ಲಿ ಆಚರಿಸಿ, ಸೌಹಾರ್ದ ಭಾರತ ನಿರ್ಮಿಸಬೇಕು ಎಂದು ಅವರು ಕರೆ ನೀಡಿದರು.

ಮಹಾತ್ಮ ಗಾಂಧಿಯವರ ಹುಟ್ಟಿನಿಂದ ಹಿಡಿದು ಅವರು ಮಹಾತ್ಮರಾಗುವವರೆಗೆ ಬೆಳೆದ ಚರಿತ್ರೆಯನ್ನು ರಂಗರೂಪಕ್ಕೆ ಅಳವಡಿಸಿರುವ ರಂಗಾಯಣದ ಕಾರ್ಯ ಪ್ರಶಂಸನೀಯವಾದುದು. ಭಾರತ ಎಲ್ಲ ಧರ್ಮೀಯರ ನೆಲ, ಇಲ್ಲಿ ಶಾಂತಿ ಬೇಕು ಯುದ್ಧ ಬೇಡ, ಪರಸ್ಪರ ಪ್ರೀತಿಸುವ, ಗೌರವಿಸುವ ಭಾವವನ್ನು ಯುವ ಜನಾಂಗ ಬೆಳೆಸಿಕೊಳ್ಳಬೇಕು. ಈ ನಾಟಕವು ಕರ್ನಾಟಕ ರಾಜ್ಯದ ಎಲ್ಲೆಡೆ ಸತತ ನಾಲ್ಕು ತಿಂಗಳ ಕಾಲ ಪ್ರದರ್ಶನಗೊಳ್ಳಲಿದೆ. ಪ್ರತಿಯೊಬ್ಬ ಕನ್ನಡಿಗ ಈ ನಾಟಕ ನೋಡಬೇಕು ಎಂದು ನೀಲಾ ಹೇಳಿದರು.

ಇಡೀ ಭಾರತವನ್ನು ಸೈಕಲ್ ಮೂಲಕ ಸುತ್ತಿ ಮಹಾತ್ಮ ಗಾಂಧೀಜಿಯವರ ಚಟುವಟಿಕೆಗಳನ್ನು ದಾಖಲಿಸುತ್ತಿರುವ ಎಂ.ಆರ್.ಪ್ರಭಾಕರ್ ಮಾತನಾಡಿ, ಬರಿ ಮೈ ಫಕೀರ ಎಂದು ಕರೆದ ಬ್ರಿಟಿಷರೇ ಮಹಾತ್ಮ ಗಾಂಧೀಜಿಯವರ ಕುರಿತು ಅಂಚೆ ಚೀಟಿಗಳನ್ನು ಬಿಡುಗಡೆ ಮಾಡಿದ್ದಾರೆ ಎಂದರು.

ಅಮೆರಿಕ, ಜರ್ಮನಿ, ಆಸ್ಟ್ರೇಲಿಯಾ ಸೇರಿದಂತೆ ಜಗತ್ತಿನ 137 ರಾಷ್ಟ್ರಗಳು ಮಹಾತ್ಮ ಗಾಂಧಿಯವರ ಅಂಚೆ ಚೀಟಿಗಳನ್ನು ಹೊರತಂದಿವೆ. ವಿಶ್ವದಲ್ಲೇ ಅತಿ ಹೆಚ್ಚು ದೇಶಗಳಿಂದ ಗೌರವ ಪಡೆದ ವ್ಯಕ್ತಿ ಗಾಂಧೀಜಿಯಾಗಿದ್ದಾರೆ. ಅವರ ಕುರಿತ 450 ಹೆಚ್ಚು ಪ್ರಕಾರದ ಅಂಚೆ ಚೀಟಿಗಳನ್ನು ಸಂಗ್ರಹಿಸುತ್ತಿದ್ದೇನೆ ಎಂದು ಅವರು ಹೇಳಿದರು.

ರಂಗ ನಿರ್ದೇಶಕ ಡಾ.ಶ್ರೀಪಾದಭಟ್ ಮಾತನಾಡಿ, ಗಾಂಧೀಜಿಯವರ ಕುರಿತ ಸಣ್ಣಪುಟ್ಟ ವಿಚಾರಗಳನ್ನು ಅರಿಯದ ಎಷ್ಟೋ ಜನ ಅವರನ್ನು ಟೀಕಿಸುವಂತೆ ಪ್ರೇರೇಪಿಸುವ ಕೆಲಸಗಳು ವ್ಯವಸ್ಥಿತವಾಗಿ ನಡೆಯುತ್ತಿವೆ. ವಿದ್ಯಾರ್ಥಿ, ಯುವಜನರಿಗೆ ಸರಿಯಾದ ತಿಳುವಳಿಕೆ ನೀಡಿ, ಗಾಂಧೀ ಚಿಂತನೆಗಳ ಆಚರಣೆಯಿಂದ ಸಿಗುವ ಸುಖ, ಶಾಂತಿಗಳನ್ನು ನೆಲೆಗೊಳಿಸುವ ಆಶಯವಿದೆ ಎಂದರು.

ಹಿರಿಯ ರಂಗಕರ್ಮಿ ಪ್ರಸನ್ನ ಮಾತನಾಡಿ, ಪಾತ್ರಗಳನ್ನು ನಾವೆಲ್ಲ ನಿಜ ಜೀವನದಲ್ಲಿ ನಿರ್ವಹಿಸುತ್ತಿರುತ್ತೇವೆ. ಗಾಂಧೀ ಅವರ ಅನುಕರಣೆಗಿಂತ ವಿಚಾರಗಳ ಅಳವಡಿಕೆ ಮುಖ್ಯ ಎಂದರು. ಕನ್ನಡ ಮತ್ತು ಸಂಸ್ಕೃತಿ ಇಲಾಖೆ ಜಂಟಿ ನಿರ್ದೇಶಕ ಬಲವಂತರಾವ್ ಪಾಟೀಲ್, ರಂಗಾಯಣದ ನಿರ್ದೇಶಕ ಪ್ರಮೋದ್ ಶಿಗ್ಗಾಂವ್, ಕವಿವಿ ಗಾಂಧಿ ಅಧ್ಯಯನ ವಿಭಾಗದ ಮುಖ್ಯಸ್ಥ ಡಾ.ಶಿವಾನಂದ ಶೆಟ್ಟರ್ ಸೇರಿದಂತೆ ಇನ್ನಿತರರು ಉಪಸ್ಥಿತರಿದ್ದರು.

ಗಾಂಧಿ ತತ್ವಗಳನ್ನು ಈ ದೇಶದಿಂದ ಓಡಿಸುವ ಶಕ್ತಿಗಳ ವಿಚಾರಗಳನ್ನು ಸಾಹಿತಿಗಳು, ಕಲಾವಿದರು, ಪತ್ರಕರ್ತರು, ಯುವಜನ, ವಿದ್ಯಾರ್ಥಿಗಳು ಅರ್ಥ ಮಾಡಿಕೊಳ್ಳಬೇಕು. ಗಾಂಧಿ ವಿಚಾರಗಳ ಆಚರಣೆಯಿಂದ ಮಾತ್ರ ದೇಶದಲ್ಲಿ ಉಗ್ರಗಾಮಿ, ಹಿಂಸಾತ್ಮಕ ಚಟುವಟಿಕೆಗಳನ್ನು ತಡೆದು ಶಾಂತಿ ಸ್ಥಾಪಿಸಬಹುದು.
-ಡಾ.ರಂಜಾನ್ ದರ್ಗಾ ಸಾಹಿತಿ, ಹಿರಿಯ ಪತ್ರಕರ್ತ