ಮೂಡಿಗೆರೆ: ಶಾಸಕ ಎಂ.ಪಿ.ಕುಮಾರಸ್ವಾಮಿ ಅಧ್ಯಕ್ಷತೆಯಲ್ಲಿ ತಾ.ಪಂ. ತ್ರೈಮಾಸಿಕ ಕೆಡಿಪಿ ಸಭೆ

ಮೂಡಿಗೆರೆ, ಆ.13: ಮೂರು ತಿಂಗಳಿಂದ ಸುರಿಯುತ್ತಿರುವ ಧಾರಾಕಾರ ಮಳೆಯಿಂದ 332 ವಿದ್ಯುತ್ ಕಂಬಗಳು ನೆಲಕ್ಕುರುಳಿವೆ. ಅತೀವೃಷ್ಟಿಯಿಂದ ಹಾನಿಯಾದ ಮೂಡಿಗೆರೆ ತಾಲೂಕಿಗೆ ಪ್ಯಾಕೇಜ್ ನೀಡಿ, ಸರಕಾರದಿಂದ ತಾರತಮ್ಯ ನೀತಿ, ಜನ್ನಾಪುದಿಂದ ಕಿರುಗುಂದವರೆಗೆ ರಸ್ತೆಯಲ್ಲಿ ನೀರು ಹರಿಯದಂತೆ ಚರಂಡಿ ನಿರ್ಮಿಸಲು ಬಿಡುಗಡೆಯಾಗಿದ್ದ ಹಣ ಲೋಕೋಪಯೋಗಿ ಇಲಾಖೆಯಿಂದ ದುರುಪಯೋಗ, ಎಂಜಿಎಂ ಸರಕಾರಿ ಆಸ್ಪತ್ರೆಯಲ್ಲಿ ನಡೆಯದ ಶಸ್ತ್ರ ಚಿಕಿತ್ಸೆ ಮತ್ತು ಹೆರಿಗೆ, ರೋಗಿಗಳನ್ನು ಬೇರೆ ಆಸ್ಪತ್ರೆಗೆ ಕಳಿಸುತ್ತಿರುವ ಬಗ್ಗೆ, ಕಂದಾಯ ಇಲಾಖೆಯಯಲ್ಲಿ 94 ಸಿ. ಮತ್ತು ಫಾ.ನಂ 53 ಅರ್ಜಿ ಅಧಿಕಾರಿಗಳ ನಿರ್ಲಕ್ಷ್ಯದಿಂದ ನೆನಗುದಿಗೆ, ಬೇರೆ ಜಿಲ್ಲೆಯಲ್ಲಿ ನಿರಾಶ್ರಿತರಾದವರಿಗೆ ಮೂಡಿಗೆರೆ ತಾಲೂಕಿನ ಕುದುರೆಮುಖದಲ್ಲಿ ಆಶ್ರಯ ಕಲ್ಪಿಸಲು ಸರಕಾರದ ಯತ್ನ ಸೇರಿದಂತೆ ವಿವಿಧ ವಿಚಾರಗಳ ಬಗ್ಗೆ ತಾ.ಪಂ. ಸಭಾಂಗಣದಲ್ಲಿ ಶಾಸಕ ಎಂ.ಪಿ.ಕುಮಾರಸ್ವಾಮಿ ಅವರ ಅಧ್ಯಕ್ಷತೆಯಲ್ಲಿ ಏರ್ಪಡಿಸಿದ್ದ ತ್ರೈಮಾಸಿಕ ಕೆಡಿಪಿ ಸಭೆಯಲ್ಲಿ ಕಾವೇರಿದ ಚರ್ಚೆ ನಡೆಯಿತು. 

ರಾಜ್ಯ ಸರಕಾರ ಕ್ರಿಯಾ ಯೋಜನೆ ತಯಾರಿಸುವಾಗ, ಬಯಲು ಸೀಮೆಯಂತೆ ಮಲೆನಾಡಿಗೆ ಕಡಿಮೆ ಪ್ರಮಾಣದ ಅನುದಾನ ಬಿಡುಗಡೆ ಮಾಡಬಾರದು. ಮಲೆನಾಡಿನಲ್ಲಿ ಮಳೆ ಪ್ರಮಾಣ ಹೆಚ್ಚಾಗಿದೆ. ಇಲ್ಲಿನ ಸರಕಾರಿ ಕಟ್ಟಡಗಳು ಮಳೆಗಾಲದಲ್ಲಿ ಸೋರಿಕೆಯಾಗುತ್ತಿದೆ. ಹಾಗಾಗಿ ಮಲೆನಾಡು ಭಾಗದ ಶಾಸಕರು, ಪಕ್ಷಬೇಧ ಮರೆತು, ಸರಕಾರದ ಗಮನ ಸೆಳೆದು ಹೆಚ್ಚು ಅನುದಾನ ತರಬೇಕು ಎಂದು ಜಿ.ಪಂ. ಸದಸ್ಯ ಪ್ರಭಾಕರ್ ತಿಳಿಸಿದಾಗ, ಮಲೆನಾಡು ಭಾಗದಲ್ಲಿ 30 ಮಂದಿ ಶಾಸಕರು, 4 ಮಂದಿ ಸಂಸದರಿದ್ದಾರೆ. ಕಸ್ತೂರಿರಂಗನ್ ವರದಿಯ ಬಗ್ಗೆ ಸುಪ್ರೀಂ ಕೋರ್ಟ್‍ಗೆ ಸರಕಾರ 25ರೊಳಗೆ ಅಫಿದವಿಟ್ ಸಲ್ಲಿಸಬೇಕು. ಅದರ ಬಗ್ಗೆ ಮಲೆನಾಡು ಭಾಗದ ಶಾಸಕರು, ಸಂಸದರು ತಲೆಕೆಡಿಸಿಕೊಳ್ಳುತ್ತಿಲ್ಲ. ಇನ್ನು ಅತೀವೃಷ್ಟಿಯ ಬಗ್ಗೆ ಚಕಾರವೆತ್ತುತ್ತಿಲ್ಲ. ನಾನೊಬ್ಬನೇ ತಲೆಕೆಡಿಸಿಕೊಳ್ಳುವಂತಾಗಿದೆ ಎಂದು ಶಾಸಕ ಎಂ.ಪಿ.ಕುಮಾರಸ್ವಾಮಿ ತಿಳಿಸಿದರು. 

ಗ್ರಾಮಾಂತರ ಪ್ರದೇಶದಲ್ಲಿ 94ಸಿ 9462 ಅರ್ಜಿಗಳು ಬಂದಿದ್ದು, 1513 ಅರ್ಜಿಗಳನ್ನು ಸಕ್ರಮಗೋಳಿಸಲಾಗಿದೆ. 818 ಹಕ್ಕುಪತ್ರ ವಿತರಿಸಲಾಗಿದೆ. 698 ಬಾಕಿ ಇದೆ. ಪಟ್ಟಣದಲ್ಲಿ 70 ಅರ್ಜಿಯ ಪೈಕಿ 5ಕ್ಕೆ ಹಕ್ಕುಪತ್ರ ವಿತರಿಸಲಾಗಿದೆ. 65 ಇತ್ಯರ್ಥವಾಗಿದ್ದು, ಬಾಕಿ ಉಳಿದಿಲ್ಲ. ಫಾ.ನಂ.53 ಯಲ್ಲಿ 3535 ಹಕ್ಕುಪತ್ರ ಇದುವರೆಗೆ ನೀಡಿದೆ. ಚುನಾವಣೆ ನಂತರ ಮೂವರು ತಹಸೀಲ್ದಾರರು ವರ್ಗಾವಣೆಯಾಗಿದ್ದಾರೆ. ಸರಕಾರಿ ಕಾರ್ಡ್ ತರಿಸಲು ಮುಂದಾಗುವ ಹೊತ್ತಿಗೆ ತಹಸೀಲ್ದಾರ್‍ ಗಳು ವರ್ಗಾವಣೆಯಾಗಿದ್ದರಿಂದ ಉಳಿದ ಅರ್ಜಿ ವಿಲೇವಾರಿ ಆಗಿಲ್ಲ ಎಂದು ತಹಸೀಲ್ದಾರ್ ಮಾಹಿತಿ ನೀಡಿದಾಗ, ಮಧ್ಯ ಪ್ರವೇಶಿಸಿದ ಶಾಸಕ ಎಂ.ಪಿ.ಕುಮಾರಸ್ವಾಮಿ, ಹಿಂದೆ ತಾನು ಶಾಸಕನಾಗಿದ್ದಾಗ ಅಂದಿನ ಕಂದಾಯ ಸಚಿವ ಶ್ರೀನಿವಾಸ್ ಪ್ರಸಾದ್ ಅವರ ಗಮನ ಸೆಳೆದು ಎಲ್ಲಾ ಅರ್ಜಿಗಳ ಇತ್ಯರ್ಥಕ್ಕೆ ಮುಂದಾಗಿದ್ದು, ಈ ವಿಚಾರದಲ್ಲಿ ಅಧಿಕಾರಿಗಳು ದಿಕ್ಕು ತಪ್ಪಿದ್ದಾರೆ. ಹಾಗಾಗಿ ಅರ್ಜಿಗಳು ನೆನೆಗುದಿಗೆ ಬಿದ್ದಿದೆ. ಆ.15ರ ಸ್ವಾತಂತ್ರ್ಯ ದಿನಾಚರಣೆಗೆ ಜಿಲ್ಲಾ ಉಸ್ತುವಾರಿ ಸಚಿವ ಕೆ.ಜಿ.ಜಾರ್ಜ್ ಅವರು ಜಿಲ್ಲೆಗೆ ಆಗಮಿಸಲಿದ್ದಾರೆ. ಆಗ ಈ ಬಗ್ಗೆ ಚರ್ಚಿಸೋಣ ಎಂದು ತಿಳಿಸಿದರು. 

ಮೂಡಿಗೆರೆ ತಾಲೂಕಿನಲ್ಲಿ ಕಳಸ ಇನಾಂ ಭೂಮಿ ಸಮಸ್ಯೆ ಸುಪ್ರೀಂ ಕೋರ್ಟ್ ನಲ್ಲಿದೆ. ಮಸಗಲಿ ವಿಚಾರ ಸುಪ್ರಿಂ ಕೋರ್ಟ್‍ನಲ್ಲಿ ಇತ್ಯರ್ಥವಾಗಿದೆ. ಅಲ್ಲಿನ ನಿವಾಸಿಗಳು ನಿರಾಶ್ರಿತರಾಗಲೂಬಹುದು. ಅಂಕೋಲ ಹುಬ್ಬಳಿ ರೈಲ್ವೇ ಯೋಜನೆಗೆ ಅಲ್ಲಿ ನಿರಾಶ್ರಿತರಾದವರಿಗೆ ಕುದುರೆಮುಖದಲ್ಲಿ ಜಾಗ ನೀಡಲು ಸ್ಥಳ ಆಯ್ದುಕೊಳ್ಳಲಾಗಿದೆ. ಇಲ್ಲಿ ಸ್ಥಳ ನೀಡಿದರೆ ಅರಣ್ಯ ನಾಶವಾಗುತ್ತದೆ. ಇಲ್ಲಿನ ನಿರಾಶ್ರಿತರಿಗೆ ಜಾಗವಿಲ್ಲ. ಅಲ್ಲಿನವರಿಗೆ ಜಾಗ ಕೊಟ್ಟರೆ ಇಲ್ಲಿಯವರನ್ನು ಎಲ್ಲಿಗೆ  ಕಳುಹಿಸಬೇಕೆಂಬುದು ಪ್ರಶ್ನಿಸಿ, ಜಾಗ ನೀಡದಿರಲು ನಿರ್ಣಯ ಕೈಗೊಳ್ಳಲಾಯಿತು. 

ತಾ.ಪಂ. ಅಧ್ಯಕ್ಷ ಕೆ.ಸಿ.ರತನ್ ಮಾತನಾಡಿ, ಅತೀವೃಷ್ಟಿ ವಿಚಾರವಾಗಿ ಕೊಡಗು ಜಿಲ್ಲೆಗೆ ವಿಶೇಷ ಪ್ಯಾಕೇಜ್ ನೀಡಲಾಗಿದೆ. ಮೂಡಿಗೆರೆಗೆ ಪ್ಯಾಕೇಜ್ ನೀಡದೇ ಸರಕಾರ ತಾರತಮ್ಯ ನೀತಿ ಅನುಸರಿಸುತ್ತಿದೆ. ಇದು ಸರಿಯಲ್ಲ. ಕೊಡಗು ಜಿಲ್ಲೆ ಮತ್ತು ಮೂಡಿಗೆರೆ ತಾಲೂಕಿನಲ್ಲಿ ಒಂದೇ ರೀತಿಯ ಮಳೆಯಾಗಿದೆ. ಆಸ್ತಿಪಾಸ್ತಿ ನಷ್ಟ ಉಂಟಾಗಿದೆ. ಹಾಗಾಗಿ ಒಂದೇ ರೀತಿಯ ಪ್ಯಾಕೇಜ್ ನೀಡಬೇಕೆಂದು ಒತ್ತಾಯಿಸಿದರು. 

ಬಾಳೂರು ಪೊಲೀಸ್ ಠಾಣೆ ವ್ಯಾಪ್ತಿಯಲ್ಲಿ ನ್ಯಾಬೆಲೆ ಅಂಗಡಿಯೊಂದರ ಪಡಿತರದಾರರಿಗೆ ವಿತರಿಸಬೇಕಾಗಿದ್ದ ಅಕ್ಕಿಯನ್ನು ಆಟೋವೊಂದರಲ್ಲಿ ಸಾಗಿಸಲಾಗಿದೆ ಎಂಬುದರ ಬಗ್ಗೆ ಸ್ಥಳೀಯರೊಬ್ಬರು ವೀಡಿಯೋ ಮಾಡಿ ದೂರು ನೀಡಿದ್ದಾರೆ. ಅಕ್ಕಿ ಸಾಗಿಸುವ ವ್ಯಕ್ತಿಯ ವಿರುದ್ಧ ಕ್ರಮ ಕೈಗೊಳ್ಳುವುದು ಬಿಟ್ಟು, ದೂರು ನೀಡಿದ ವ್ಯಕ್ತಿ ವಿರುದ್ಧವೇ ಬಾಳೂರು ಠಾಣೆಗೆ ದೂರು ನೀಡಲಾಗಿದೆ. ಹಾಗಾದರೆ ಸಾರ್ವಜನಿಕರಿಗೆ ಸಾಮಾಜಿಕ ನ್ಯಾಯ ಕೇಳುವ ಹಕ್ಕು ಇಲ್ಲವೇ ಎಂದು ತಾ.ಪಂ. ಅಧ್ಯಕ್ಷ ಕೆ.ಸಿ.ರತನ್ ಪ್ರಶ್ನಿಸಿದಾಗ, ಸಭೆಯಲ್ಲಿ ಗೊಂದಲ ಏರ್ಪಟ್ಟಿತ್ತು. ಎಲ್ಲಾ ಸದಸ್ಯರು. ಅಧಿಕಾರಿಗಳ ವಿರುದ್ಧ ವಿರೋಧ ವ್ಯಕ್ತಪಡಿಸಿದರು. 

ತಾ.ಪಂ.ಉಪಾಧ್ಯಕ್ಷೆ ಸವಿತಾ ರಮೇಶ್, ಸ್ಥಾಯಿ ಸಮಿತಿ ಅಧ್ಯಕ್ಷ ಸುಂದರ್ ಕುಮಾರ್, ಜಿ.ಪಂ. ಸದಸ್ಯರಾದ ಪ್ರಭಾಕರ್, ಅಮಿತಾ ಮುತ್ತಪ್ಪ, ಶಾಮಣ್ಣ, ತಹಸೀಲ್ದಾರ್ ಪ್ರಬಾರ ಕಾರ್ಯ ನಿರ್ವಹಣಾಧಿಕಾರಿ ಪ್ರಕಾಶ್ ಸೇರಿದಂತೆ ವಿವಿಧ ಇಲಾಖೆ ಅಧಿಕಾರಿಗಳು ಹಾಜರಿದ್ದರು. 

ತಾಲೂಕು ಆಡಳಿತದಿಂದ ಹೊಯ್ಸಳ ಕ್ರೀಡಾಂಗಣದಲ್ಲಿ ಆಚರಿಸುವ ಸ್ವಾತಂತ್ಯ ದಿನಾಚರಣೆಗೆ ಸರಕಾರದಿಂದ ಕೇವಲ 25 ಸಾವಿರ ಹಣ ನೀಡಲಾಗುತ್ತಿದೆ. ಇಷ್ಟು ಸಣ್ಣ ಮೊತ್ತದಲ್ಲಿ ಅದ್ದೂರಿಯಾಗಿ ಸ್ವಾತಂತ್ರ್ಯ ದಿನ ಆಚರಿಸಲು ಸಾಧ್ಯವೇ? ಈ ಹಣದಲ್ಲಿ ಅದ್ದೂರಿಯಾಗಿ ಆಚರಿಸಲು ಸಾಧ್ಯವಿಲ್ಲ. ಇನ್ನು ಹೆಚ್ಚಿನ ಹಣ ನೀಡಬೇಕು

-ಅಮಿತಾ ಮುತ್ತಪ್ಪ, ಜಿ.ಪಂ. ಸದಸ್ಯೆ

ಗೋಣಿಬೀಡು ನೆಮ್ಮದಿ ಕೇಂದ್ರ ಸರಿಯಾಗಿ ಕಾರ್ಯ ನಿರ್ವಹಿಸುತ್ತಿಲ್ಲ. ರೈತರಿಗೆ ಪಹಣಿ ವಿತರಿಸಲು ಮತ್ತು ಆಧಾರ್ ಕಾರ್ಡ್ ಸಹಿತ ಇನ್ನಿತರೇ ಸರಕಾರಿ ದೃಡೀಕರಣ ನೀಡಲು ನೆಟ್‍ವರ್ಕ್ ಇಲ್ಲ ಎನ್ನಲಾಗುತ್ತಿದೆ. ಈ ನೆಮ್ಮದಿ ಕೇಂದ್ರವನ್ನು ಸರಿಪಡಿಸಿ

-ಸುಂದರ್ ಕುಮಾರ್, ಸ್ಥಾಯಿ ಸಮಿತಿ ಅಧ್ಯಕ್ಷ