ವಾಜಪೇಯಿ ಬರೆದ ಹಾಡಿನಲ್ಲಿ ನಟಿಸಿದ್ದ ಪ್ರಸಿದ್ಧ ಬಾಲಿವುಡ್ ನಟ ಯಾರು ಗೊತ್ತಾ?

ಹೊಸದಿಲ್ಲಿ, ಆ.17: ಗುರುವಾರ ಮಾಜಿ ಪ್ರಧಾನಿ ಅಟಲ್ ಬಿಹಾರಿ ವಾಜಪೇಯಿಯವರು ಕೊನೆಯುಸಿರೆಳೆದಿದ್ದು, ಇಡೀ ದೇಶ ಅಗಲಿದ ನಾಯಕನಿಗೆ ಶ್ರದ್ಧಾಂಜಲಿ ಸಲ್ಲಿಸುತ್ತಿದ್ದರೆ, ಬಾಲಿವುಡ್ ತಾರೆಯರು ಕೂಡಾ ತಮ್ಮ ಟ್ವಿಟ್ಟರ್ ಹ್ಯಾಂಡಲ್‍ಗಳ ಮೂಲಕ ಅಂತಿಮ ನಮನ ಸಲ್ಲಿಸಿದರು.

ಬಾಲಿವುಡ್ ನಟ ಶಾರೂಖ್‍ ಖಾನ್ ಶ್ರದ್ಧಾಂಜಲಿ ಸಲ್ಲಿಸಲು ಆಯ್ಕೆ ಮಾಡಿಕೊಂಡದ್ದು ಇನ್‍ಸ್ಟಾಗ್ರಾಂ ಹ್ಯಾಂಡಲ್. "ವಾಜಪೇಯಿಯವರ ಪ್ರಭಾವ ನನ್ನ ಜೀವನದ ಮೇಲೆ ಬೀರಿದ್ದು, ಈ ಯುಗದಲ್ಲಿ ಹುಟ್ಟಿದ ನಾನು ಅದೃಷ್ಟಶಾಲಿ" ಎಂದು ಹೇಳಿಕೊಂಡಿದ್ದಾರೆ. ಜತೆಗೆ ಈ ಮುತ್ಸದ್ಧಿ ರಾಜಕಾರಣಿಯನ್ನು ಭೇಟಿ ಮಾಡಿದ ಕ್ಷಣವನ್ನು ಮೆಲುಕು ಹಾಕಿಕೊಂಡಿದ್ದಾರೆ. ವಾಜಪೇಯಿಯವರು ಬರೆದ ಹಾಡುಗಳ ಆಲ್ಬಂ ಒಂದರಲ್ಲಿ ಶಾರೂಕ್ ನಟಿಸಿದ್ದಾರೆ.

ಅವರ ಪೋಸ್ಟ್ ಈ ರೀತಿ ಇದೆ: "ನಾನು ಬೆಳೆಯುವ ಹಂತದಲ್ಲಿ ದಿಲ್ಲಿಯಲ್ಲಿ ವಾಜಪೇಯಿ ಮಾಡುವ ಪ್ರತಿ ಭಾಷಣಕ್ಕೂ ತಂದೆ ನನ್ನನ್ನು ಕರೆದೊಯ್ಯುತ್ತಿದ್ದರು. ವರ್ಷಗಳು ಕಳೆದಂತೆ ಅವರನ್ನು ಭೇಟಿ ಮಾಡುವ ಮತ್ತು ಕಾವ್ಯ, ಸಿನಿಮಾ, ರಾಜಕೀಯ ಮತ್ತು ನಮ್ಮ ಮೊಣಕಾಲು ಸಮಸ್ಯೆಗಳ ಬಗ್ಗೆ ಚರ್ಚಿಸುವ ಅವಕಾಶ ನನಗೆ ಸಿಕ್ಕಿತು. ಅವರ ಒಂದು ಕವನಕ್ಕೆ ತೆರೆಯ ಮೇಲೆ ನಟಿಸುವ ಸೌಭಾಗ್ಯವೂ ನನಗೆ ಸಿಕ್ಕಿತು. ಮನೆಯಲ್ಲಿ ಅವರನ್ನು ಹೆಮ್ಮೆಯಿಂದ "ಬಾಪ್‍ ಜಿ" ಎಂದು ಕರೆಯಲಾಗುತ್ತಿತ್ತು. ಇಂದು ದೇಶ ತಂದೆ ಸಮಾನ ವ್ಯಕ್ತಿಯನ್ನು, ಶ್ರೇಷ್ಠ ನಾಯಕನನ್ನು ಕಳೆದುಕೊಂಡಿದೆ. ವೈಯಕ್ತಿಕವಾಗಿ ನಾನು ನನ್ನ ಬಾಲ್ಯದ ಒಂದು ಭಾಗವನ್ನು ಮತ್ತು ನಗುವುದನ್ನು ಕಲಿತ, ಕಾವ್ಯದ ನೆನಪುಗಳೊಂದಿಗೆ ಬೆಳೆದ ಅಂಶವನ್ನು ಕಳೆದುಕೊಂಡಿದ್ದೇನೆ. ನನ್ನ ಜೀವನದ ಆರಂಭಿಕ ವರ್ಷಗಳಲ್ಲಿ ಅವರ ಪ್ರಭಾವ ನನ್ನ ಮೇಲಾದದ್ದಕ್ಕೆ ನಾನು ಅದೃಷ್ಟಶಾಲಿ ಅಂದುಕೊಳ್ಳುತ್ತೇನೆ. ಅವರ ಆತ್ಮಕ್ಕೆ ಶಾಂತಿ ಸಿಗಲಿ. ಅವರ ಕುಟುಂಬ ಹಾಗೂ ಸ್ನೇಹಿತರಿಗೆ ನನ್ನ ಹೃದಯಾಂತರಾಳದ ಸಾಂತ್ವನ. ನಿಮ್ಮ ನಗುಮುಖವನ್ನು ನಾನು ಕಳೆದುಕೊಳ್ಳುತ್ತಿದ್ದೇನೆ ಬಾಪ್‍ಜೀ.."