ರಾಜಕೀಯದಲ್ಲಿ ಜಾತಿ ನೋಡಿ ಮಣೆ ಹಾಕಲಾಗುತ್ತದೆ: ಮಾಜಿ ಸಚಿವೆ ಲಲಿತಾ ನಾಯಕ್ ಬೇಸರ

ಮೈಸೂರು, ಆ.19: ರಾಜಕೀಯದಲ್ಲಿ ನಾವು ನಡೆದು ಬಂದ ಹಿನ್ನೆಲೆಯ ಜೊತೆಗೆ ಜಾತಿ ನೋಡಿ ಮಣೆ ಹಾಕಲಾಗುತ್ತದೆ ಎಂದು ಮಾಜಿ ಸಚಿವೆ ಬಿ.ಟಿ.ಲಲಿತಾ ನಾಯಕ್ ಬೇಸರ ವ್ಯಕ್ತಪಡಿಸಿದ್ದಾರೆ.

ನಗರದ ಕಲಾಮಂದಿರದ ಕಿರುರಂಗಮಂದಿರದಲ್ಲಿ ರವಿವಾರ ಕರ್ನಾಟಕ ರಾಜ್ಯ ಮಹಿಳಾ ದೌರ್ಜನ್ಯ ವಿರೋಧಿ ಒಕ್ಕೂಟ ವತಿಯಿಂದ ಆಯೋಜಿಸಿದ್ದ ಮಹಿಳೆ-ರಾಜಕಾರಣ-ಹೊಸದಿಕ್ಕು ಚುನಾವಣೆ: ಒಳ ಹೊರಗೆ ಸಂವಾದ ಕಾರ್ಯಕ್ರಮವನ್ನು ಉದ್ಘಾಟಿಸಿ ಅವರು ಮಾತನಾಡಿದರು.

ಬಂಡಾಯ ಸೇರಿದಂತೆ ವಿವಿಧ ಸಂಘಟನೆಗಳ ಜೊತೆಗೆ ಪತ್ರಕರ್ತೆಯಾಗಿ ಬರವಣಿಗೆಯಲ್ಲಿ ತೊಡಗಿಸಿಕೊಂಡ ಕಾರಣ ಅಚಾನಕ್ಕಾಗಿ ರಾಜಕೀಯಕ್ಕೆ ಪ್ರವೇಶ ದೊರೆಯಿತು. ಆದರೆ ಪತ್ರಕರ್ತೆಯಾಗಿ ರಾಜಕಾರಣಿಗಳ ಕಾರ್ಯಗಳನ್ನು ಬರೆದಿದ್ದ ನನಗೆ ರಾಜಕೀಯದ ಮೇಲೆ ಆಸಕ್ತಿಯಿರಲಿಲ್ಲ. ಆದರೆ ಅನೇಕ ಹಿರಿಯರ ಮಾರ್ಗದರ್ಶನದಂತೆ ರಾಜಕೀಯದಲ್ಲಿ ಪ್ರವೇಶ ಮಾಡಿದೆ. ಆ ನಂತರವೇ ರಾಜಕೀಯದ ವಾಸ್ತವ ಸ್ಥಿತಿ ಅರಿವಾಯಿತು ಎಂದರು.

ರಾಜಕಾರಣದಲ್ಲಿ ಏನನ್ನೂ ಹೇಳಬಾರದು. ಬಂದ ಹಣವನ್ನು ಪಡೆದುಕೊಂಡು, ಪಕ್ಷಕ್ಕೂ ಕೊಟ್ಟು, ಮನೆಗಳನ್ನು ಕಟ್ಟಿಕೊಂಡು ಇರಬೇಕು. ಅದರ ಹೊರತಾಗಿ ಮಾತನಾಡಲು ಅವಕಾಶವಿಲ್ಲ. ಅಸಮಾಧಾನ, ಯಾರೋ ಮಾಡಿದ ಕಾರ್ಯಗಳಿಗೆ ತಮ್ಮ ಹೆಸರುಗಳನ್ನು ಬಳಸಿಕೊಳ್ಳುವುದು, ಜಾತಿ ಕೀಳರಿಮೆ ಹೀಗೆ ಅನೇಕ ಸಮಸ್ಯೆಗಳು ಎದುರಾದವು. ವಿಷ ಕೊಟ್ಟು, ಅಮೃತವನ್ನು ಕೊಟ್ಟಿದ್ದೇವೆ ಎಂದು ಹೇಳುವವರಿಗೆ ರಾಜಕೀಯ ಎಂದು ಅಭಿಪ್ರಾಯ ವ್ಯಕ್ತಪಡಿಸಿದರು.

ಶಿಕ್ಷಣ ಪದ್ಧತಿ ಬದಲಾಯಿಸಬೇಕು: ಮೌಢ್ಯ ವಿರೋಧಿಸುವಂತಹ ಶಿಕ್ಷಣ ಅವಶ್ಯಕವಾಗಿದೆ. ರಾವಣನನ್ನು ರಾಕ್ಷಸನೆಂದು ಬಿಂಬಿಸಲಾಗಿದೆ. ಅವನು ಒಳ್ಳೆಯವನೇ ಯಾರು ಕೆಟ್ಟವರಲ್ಲ ಸಮಾನತೆ ಎಂಬುದು ಮುಖ್ಯ. ದೇವಸ್ಥಾನಗಳು ಚಿಂತನಗೆ ಹಚ್ಚುವುದಿಲ್ಲ, ಧರ್ಮ, ಜಾತಿ ವ್ಯಾಪಾರೀಕರಣವಾಗಿದ್ದು, ಪ್ರಕೃತಿಯಲ್ಲಿ ನಮ್ಮ ಜವಾಬ್ದಾರಿಯನ್ನು ಅರಿತು ನಡೆಯಬೇಕು ಎಂದು ತಿಳಿಸಿದರು.

ಮಹಿಳೆಯರಿಗೆ ಸ್ವಾತಂತ್ರ ಸಿಕ್ಕಿಲ್ಲ. ಸಂವಿಧಾನವು ಏನನ್ನು ಕೊಡಬೇಕು, ಏನನ್ನು ಕೊಡಬಾರದು ಎಂಬಿತ್ಯಾದಿ ನೀತಿ ನಿಯಮ ರೂಪಿಸಿದೆ ಅದನ್ನು ಅರಿತು ನಡೆಯಬೇಕು ಎಂದ ಅವರು, 21ನೇ ಶತಮಾನದಲ್ಲಿ ನಮ್ಮ ಹಕ್ಕುಗಳನ್ನು ಪ್ರಶ್ನಿಸಲು ಅವಕಾಶವನ್ನು ಸಂವಿಧಾನ ಒದಗಿಸಿಕೊಟ್ಟಿದೆ. ಮಹಿಳಾ ಚಳವಳಿಗಳು ನಿರಂತರವಾಗಿ ನಡೆಯಬೇಕಿದೆ. ಮೀಸಲಾತಿಯನ್ನು ಪಡೆದು ರಾಜಕೀಯ ಸೇರಿದಂತೆ ಇತರೆ ಕ್ಷೇತ್ರಗಳಲ್ಲಿ ಅಭಿವೃದ್ಧಿಯನ್ನು ಸಾಧಿಸಲು ಚಳವಳಿಗಳನ್ನು ಅಸ್ತ್ರವನ್ನಾಗಿ ಬಳಸಿಕೊಳ್ಳಬೇಕು ಎಂದು ಹೇಳಿದರು.

ರೈತ ಸಂಘದ ನಂದಿನಿ ಜಯರಾಮ್ ಅವರು ಮಾತನಾಡಿದರು.
ಕಾರ್ಯಕ್ರಮಕ್ಕೂ ಮುನ್ನ ನಡೆದ ಸಮತಾಗೀತೆ, ಬೀದಿನಾಟಕವು ಪ್ರೇಕ್ಷಕರ ಗಮನಸೆಳೆಯಿತು.ಜಿಲ್ಲಾ ಪಂಚಾಯತ್ ಮಾಜಿ ಅಧ್ಯಕ್ಷೆ ಡಾ.ಪುಷ್ಪಾ ಅಮರ್‌ನಾಥ್, ಮಹಿಳಾ ಹೋರಾಟಗಾರ್ತಿ ಮಾಳವಿಕಾ ಗುಬ್ಬಿವಾಣಿ, ಸರಸ್ವತಿ ಮತ್ತಿತರರು ಉಪಸ್ಥಿತರಿದ್ದರು.