ಆದಿಚುಂಚನಗಿರಿ ಮಠದಿಂದ ಸರಕಾರಕ್ಕೆ ನೆರವು: ಭರವಸೆ

ಮಡಿಕೇರಿ, ಆ.26: ಮಹಾಮಳೆಯಿಂದಾಗಿ ಸಂಕಷ್ಟಕ್ಕೆ ಸಿಲುಕಿರುವ ಕೊಡಗಿನ ಗ್ರಾಮಗಳ ಪುನರ್ ನಿರ್ಮಾಣಕ್ಕೆ ಮತ್ತು ನಿರಾಶ್ರಿತರ ಬದುಕಿನಲ್ಲಿ ಹೊಸ ಬೆಳಕನ್ನು ಮೂಡಿಸಲು ಆದಿಚುಂಚನಗಿರಿ ಮಠ ಸರಕಾರಕ್ಕೆ ಅಗತ್ಯ ಸಹಕಾರವನ್ನು ನೀಡಲಿದೆ ಎಂದು ಶ್ರೀ ಡಾ.ನಿರ್ಮಲಾನಂದ ಸ್ವಾಮೀಜಿ ಭರವಸೆ ನೀಡಿದ್ದಾರೆ.

ಪ್ರಾಕೃತಿಕ ವಿಕೋಪಕ್ಕೆ ಸಿಲುಕಿ ಸಂಕಷ್ಟಕ್ಕೆ ಸಿಲುಕಿರುವ ಪ್ರದೇಶಗಳಿಗೆ ಭೇಟಿ ನೀಡಿ, ಮಡಿಕೇರಿಯ ಗೌಡ ಸಮಾಜದ ಸಭಾಂಗಣದಲ್ಲಿ ಶ್ರೀಮಠದಿಂದ ಸಂತ್ರಸ್ತರಿಗಾಗಿ ನಡೆದ ಆರೋಗ್ಯ ಶಿಬಿರದಲ್ಲಿ ಪಾಲ್ಗೊಂಡು ಅವರು ಮಾತನಾಡಿ, ಭಾರೀ ಮಳೆಯಿಂದ ಪ್ರಕೃತಿ ವಿಕೋಪಗಳು ಸಂಭವಿಸುತ್ತಿರುವ ಹಂತದಲ್ಲೇ ಮಠ ಘಟನಾವಳಿಗಳನ್ನು ಅವಲೋಕಿಸಿ, ಸಂತ್ರಸ್ತರ ನೆರವಿಗೆ ಸಾಧ್ಯ ಕ್ರಮಗಳನ್ನು ಕೈಗೊಂಡಿದೆ ಎಂದರು.

ಸಂತ್ರಸ್ತ ಮಕ್ಕಳಿಗೆ ಶಿಕ್ಷಣ- ಪ್ರಾಕೃತಿಕ ವಿಕೋಪದಿಂದ ಆಸ್ತಿ ಪಾಸ್ತಿಗಳನ್ನು ಕಳೆದುಕೊಂಡು ಸಂಕಷ್ಟಕ್ಕೆ ಸಿಲುಕಿರುವ ಕುಟುಂಬಗಳ ಮಕ್ಕಳಿಗೆ ಪ್ರಾಥಮಿಕ ಶಿಕ್ಷಣದಿಂದ ಹಿಡಿದು, ಉನ್ನತ ಶಿಕ್ಷಣದ ಹಂತದವರೆಗೂ ಉಚಿತವಾಗಿ ಶಿಕ್ಷಣವನ್ನು ನೀಡಲು ಮಠ ಸಿದ್ಧವಿದೆ ಎಂದರು.

ಕೊಡಗು ಜಿಲ್ಲಾ ವ್ಯಾಪ್ತಿಯಲ್ಲಿ ಮಹಾಮಳೆೆ ಮತ್ತು ಗುಡ್ಡ ಕುಸಿತಗಳಿಂದ ಹಲವಾರು ಗ್ರಾಮಗಳು ಸಂಕಷ್ಟಕ್ಕೆ ಸಿಲುಕಿವೆ. ಇವುಗಳಲ್ಲಿ ಯಾವುದೇ ಗ್ರಾಮವನ್ನು ದತ್ತು ಪಡೆದು ಅಭಿವೃದ್ಧಿ ಪಡಿಸುವ ಬಗ್ಗೆ ಶ್ರೀಮಠ ಆಸಕ್ತವಾಗಿದೆಯಾದರೂ ಈಗಲೇ ಇಂತಹ ವಿಚಾರವನ್ನು ಅಂತಿಮಗೊಳಿಸಲು ಕಾಲ ಪಕ್ವವಾಗಿಲ್ಲವೆಂದರು.

ಇದೀಗ ರಕ್ಷಣಾ ಕಾರ್ಯ, ಮತ್ತಷ್ಟು ಅನಾಹುತಗಳು ಉಂಟಾಗದಂತೆ ತಡೆಯುವ ಕಾರ್ಯಗಳು ನಡೆಯುತ್ತಿದ್ದು, ಇನ್ನಷ್ಟೇ ಅತಿವೃಷ್ಟಿ ಹಾನಿಯ ಬಗ್ಗೆ ವರದಿಯನ್ನು ಸರಕಾರ ತಯಾರಿಸಬೇಕಾಗಿದೆ. ಆದಿಚುಂಚನ ಗಿರಿ ಮಠ ಸಂತ್ರಸ್ತರ ನೆರವಿಗೆ ಸರಕಾರದೊಂದಿಗೆ ಯಾವತ್ತೂ ಕೈಜೋಡಿಸಲಿದೆಯೆಂದು ಪುನರುಚ್ಛರಿಸಿ, ಈಗಾಗಲೇ ಮಠದ ಕಡೆಯಿಂದ ಪ್ರಕೃತಿ ವಿಕೋಪಕ್ಕೆ ಒಳಗಾದ ಗ್ರಾಮಗಳು, ಪುನರ್ವಸತಿ ಕೇಂದ್ರಗಳಿಗೆ ತೆರಳಿ ಅಲ್ಲಿನ ಸಂತ್ರಸ್ತರನ್ನು ಭೇಟಿಯಾಗಿ, ಅವರ ಸಂಕಷ್ಟಗಳನ್ನು ಆಲಿಸಿ ಸಾಂತ್ವನ ನುಡಿಯುವ ಕಾರ್ಯಗಳು ಮಠದ ಕಡೆಯಿಂದ ನಡೆಯುತ್ತಿದೆ. ಈಗಾಗಲೇ ಕುಶಾಲನಗರದಲ್ಲಿ ಶಿಬಿರವನ್ನು ನಡೆಸಲಾಗಿದ್ದು, ಹೆಚ್ಚಿ ನ ಜನ ಸದುಪಯೋಗ ಪಡೆದಿರುವುದಾಗಿ ತಿಳಿಸಿದರು.

ಶಾಸಕ ಬೋಪಯ್ಯ ಮಾತನಾಡಿ, ಜಿಲ್ಲೆೆಯ ಮಡಿಕೇರಿ, ಸೋಮವಾರಪೇಟೆ ವಿಭಾಗಗಳಲ್ಲಿ ಸಾಕಷ್ಟು ಹಾನಿ ಸಂಭವಿಸಿದೆ. ಆದಿಚುಂಚನಗಿರಿ ಮಠ ಆರೋಗ್ಯ ಶಿಬಿರ ಆಯೋಜಿಸಿದೆ. ಇಲ್ಲಿ 400ಕ್ಕೂ ಹೆಚ್ಚಿನ ಸಂತ್ರಸ್ತರು ಆರೋಗ್ಯ ತಪಾಸಣೆಯ ಸೌಲಭ್ಯವನ್ನು ಪಡೆದಿರುವುದಾಗಿ ತಿಳಿಸಿದರು.
ಈ ಸಂದಭರ್ ಹಾಸನ ಶಾಖಾ ಮಠದ ಶ್ರೀ ಶಂಭುನಾಥ ಶ್ರೀ, ರಾಮನಗರದ ಶ್ರೀ ಅನ್ನದಾನಿ ಸ್ವಾಮೀಜಿ ಉಪಸ್ಥಿತರಿದ್ದರು.

‘ಬಾಲಕ ಪವನ್ ಕುಮಾರ್ ಶಿಕ್ಷಣಕ್ಕೆ ನೆರವು’
ಪ್ರಾಕೃತಿಕ ವಿಕೋಪದ ಕರಾಳ ಛಾಯೆ ಮುಗ್ಧ ಬಾಲಕ ಪವನ್‌ಕುಮಾರ್‌ನನ್ನು ಆವರಿಸದಂತೆ, ಆತನ ಶಿಕ್ಷಣಕ್ಕೆ ಎಲ್ಲ ನೆರವನ್ನು ನೀಡುವುದಾಗಿ ಆದಿಚುಂಚನಗಿರಿ ಮಠದ ಡಾ.ನಿರ್ಮಲಾನಂದ ಸ್ವಾಮೀಜಿ ಬಾಲಕನನ್ನು ಎದೆಗವಚಿಕೊಂಡು ಅಭಯವನ್ನಿತ್ತರು. ಮಡಿಕೇರಿಯ ಅನತಿ ದೂರದಲ್ಲಿರುವ, ಪ್ರಕೃತಿ ವಿಕೋಪದಿಂದ ನಲುಗಿರುವ ಮಕ್ಕಂದೂರಿನ ನಿವಾಸಿ ಶೋಭಾವತಿ ಮತ್ತು ಮಗ ಪವನ್ ಕುಮಾರ್ ಅವರ ಮನೆ ಮತ್ತು ಒಂದಷ್ಟು ಜಾಗ ಕುಸಿದ ಗುಡ್ಡದಡಿ ಸಿಲುಕಿ ನಿರ್ವಸತಿಗರಾಗಿದ್ದಾರೆ. ಬಾಲಕನ ದೊಡ್ಡಮ್ಮ ಪ್ರಮೀಳಾ ಅವರು ಅದೇ ಗ್ರಾಮದಲ್ಲಿ ನೆಲೆಸಿದ್ದು, ಇವರ ಮನೆ ಹಾನಿಗೊಳಗಾಗದಿದ್ದರೂ ಅಪಾಯದಲ್ಲಿರುವುದರಿಂದ ಇವರೆಲರೂ ಮಡಿಕೇರಿಯ ಶ್ರೀ ಲಕ್ಷ್ಮೀ ನರಸಿಂಹ ಕಲ್ಯಾಣ ಮಂಟಪದ ಪುನರ್ವಸತಿ ಕೇಂದ್ರದಲ್ಲಿದ್ದಾರೆ. ರವಿವಾರ ಗೌಡ ಸಮಾಜದಲ್ಲಿ ಆಯೋಜಿತ ಆರೋಗ್ಯ ಶಿಬಿರಕ್ಕೆ ಮಗನೊಂದಿಗೆ ಆಗಮಿಸಿದ ಶೋಭಾವತಿ, ಮಗನ ಶಿಕ್ಷಣಕ್ಕೆ ಅಗತ್ಯ ನೆರವನ್ನು ಡಾ. ನಿರ್ಮಲಾನಂದ ಸ್ವಾಮೀಜಿಗಳನ್ನು ಕೋರಿಕೊಂಡಾಗ ಅವರು, ಬಾಲಕನ ಮೈದಡವಿ ನೆರವು ನೀಡುವ ಅಭಯವನ್ನು ನೀಡಿದರು.