ವಿಶೇಷ ವಿಪತ್ತು ನಿರ್ವಹಣಾ ಮಂತ್ರಾಲಯ ಸ್ಥಾಪಿಸಿ ಸಚಿವರನ್ನು ನೇಮಿಸಿ: ಸಿಎನ್ಸಿ ಆಗ್ರಹ
ಮಡಿಕೇರಿ, ಸೆ.12: ಕೊಡಗಿನ ಮಡಿಕೇರಿ ಮತ್ತು ಸೋಮವಾರಪೇಟೆ ತಾಲೂಕು ವ್ಯಾಪ್ತಿಯ ಜೋಡುಪಾಲ, ಮದೆನಾಡು, ಸೂರ್ಲಬ್ಬಿಯವರೆಗಿನ ಏಳು ನಾಡುಗಳಲ್ಲಿ ಇತ್ತೀಚೆಗೆ ಸಂಭವಿಸಿದ ಅತಿವೃಷ್ಟಿ ಅನಾಹುತಗಳಲ್ಲಿ ಸಂಕಷ್ಟಕ್ಕೆ ಸಿಲುಕಿರುವ ಸಂತ್ರಸ್ತರಿಗೆ ಪುನರ್ವಸತಿ ಕಲ್ಪಿಸಲು ಮತ್ತು ಪರಿಹಾರ ಕಾರ್ಯವನ್ನು ಚುರುಕುಗೊಳಿಸಲು ರಾಜ್ಯ ಹಾಗೂ ಕೇಂದ್ರ ಸರ್ಕಾರಗಳು ಜಂಟಿಯಾಗಿ ವಿಶೇಷ ವಿಪತ್ತು ನಿರ್ವಹಣಾ ಮಂತ್ರಾಲಯವನ್ನು ಜಿಲ್ಲೆಯಲ್ಲಿ ಸ್ಥಾಪಿಸಿ ಮಂತ್ರಿಯೊಬ್ಬರನ್ನು ನಿಯೋಜಿಸಬೇಕೆಂದು ಕೊಡವ ನ್ಯಾಷನಲ್ ಕೌನ್ಸಿಲ್ ಸಂಘಟನೆ ಆಗ್ರಹಿಸಿದೆ.
ಸುದ್ದಿಗೋಷ್ಠಿಯಲ್ಲಿ ಮಾತನಾಡಿದ ಸಿಎನ್ಸಿ ಅಧ್ಯಕ್ಷ ಎನ್.ಯು.ನಾಚಪ್ಪ ಸಂತ್ರಸ್ತರ ಬೇಡಿಕೆಗಳ ಬಗ್ಗೆ ಸರ್ಕಾರಗಳ ಗಮನ ಸೆಳೆಯಲು ಮತ್ತು ಪರಿಹಾರ ಕಾರ್ಯದ ಗೊಂದಲಗಳನ್ನು ನಿವಾರಿಸಲು ಜನಜಾಗೃತಿ ಮೂಡಿಸುವುದಕ್ಕಾಗಿ ಇದೇ ಸೆ.21 ರಂದು ನಗರದ ಜನರಲ್ ತಿಮ್ಮಯ್ಯ ವೃತ್ತದಲ್ಲಿ ಜನಜಾಗೃತಿಯ ಮಾನವ ಸರಪಳಿ ನಡೆಸಿ, ಜಿಲ್ಲಾಡಳಿತಕ್ಕೆ ಮನವಿ ಸಲ್ಲಿಸಲಾಗುವುದೆಂದು ತಿಳಿಸಿದರು.
ವಿಶೇಷ ವಿಪತ್ತು ನಿರ್ವಹಣಾ ಮಂತ್ರಾಲಯವನ್ನು ಸ್ಥಾಪಿಸಿ ವಿಶೇಷವಾಗಿ ಸಚಿವರೊಬ್ಬರನ್ನು ನೇಮಕ ಮಾಡಿದರೆ ಪರಿಹಾರ ಕಾರ್ಯ ಶೀಘ್ರ ಪೂರ್ಣಗೊಳ್ಳಲಿದೆ. ಪ್ರಸ್ತುತ ಕಾರ್ಯ ನಿರ್ವಹಿಸುತ್ತಿರುವ ಜಿಲ್ಲಾ ಉಸ್ತುವಾರಿ ಸಚಿವರು ಅತ್ಯಂತ ಸರಳ, ಸಜ್ಜನಿಕೆಯ ಸಚಿವರಾಗಿದ್ದು, ಇವರ ಕಾರ್ಯ ವೈಖರಿ ಉತ್ತಮವಾಗಿದೆ. ಆದರೆ ಇವರಿಗೆ ರಾಜ್ಯದ ಮಟ್ಟದಲ್ಲಿ ಹೆಚ್ಚಿನ ಜವಾಬ್ದಾರಿ ಇರುವುದರಿಂದ ಕೊಡಗಿನ ಅತಿವೃಷ್ಟಿ ಪ್ರದೇಶಗಳ ಅಭಿವೃದ್ಧಿ ಮತ್ತು ಸಂತ್ರಸ್ತರ ನಿರ್ವಣೆಗಾಗಿ ಪ್ರತ್ಯೇಕ ಸಚಿವ ಮಂತ್ರಾಲಯದ ಅಗತ್ಯವಿದೆ ಎಂದರು.
ಪ್ರಸ್ತುತ ಜಿಲ್ಲೆಯ ಕೆಲವು ಭಾಗಗಳಲ್ಲಷ್ಟೆ ಉಂಟಾದ ಅತಿವೃಷ್ಟಿಯ ಹಾನಿಯನ್ನು ಇಡೀ ಜಿಲ್ಲೆಯಲ್ಲೆ ನಡೆದಿದೆ ಮತ್ತು ಕೊಡಗು ಸಂಪೂರ್ಣ ಜಲಸಮಾಧಿಯಾಗಿದೆ ಎಂದು ಕೆಲವು ಮಾಧ್ಯಮಗಳು ಕೂಡ ಕಪೋಲ ಕಲ್ಪಿತ ವದಂತಿಗಳನ್ನು ಹಬ್ಬಿಸುವ ಮೂಲಕ ಸಾಕಷ್ಟು ಹಣ ಸಂಗ್ರಹಿಸುತ್ತಿವೆ ಎಂದು ಆರೋಪಿಸಿದ ನಾಚಪ್ಪ, ಸಂಗ್ರಹವಾದ ಕೋಟ್ಯಾಂತರ ರೂ.ಹಣದಿಂದ ನಿರಾಶ್ರಿತರಿಗೆ ಮನೆ ನಿರ್ಮಿಸಿಕೊಡಲಿ ಎಂದು ಒತ್ತಾಯಿಸಿದರು.
ವಿಶ್ವ ಮಟ್ಟದಲ್ಲಿ ಅನುಕಂಪವನ್ನು ಗಿಟ್ಟಿಸಿಕೊಳ್ಳುವ ಮೂಲಕ ಭಾರೀ ಪ್ರಮಾಣದಲ್ಲಿ ಪರಿಹಾರ ಸಾಮಾಗ್ರಿ ಮತ್ತು ಹಣ ಬರುತ್ತಿದ್ದು, ಸಾಕಷ್ಟು ದುರುಪಯೋಗವಾಗಿರುವ ಬಗ್ಗೆ ಸಂಶಯವಿದೆ. ಆದ್ದರಿಂದ ಪ್ರಕರಣವನ್ನು ಉನ್ನತ ಮಟ್ಡದ ತನಿಖೆಗೆ ಒಪ್ಪಿಸುವಂತೆ ಮುಖ್ಯ ನ್ಯಾಯಮೂರ್ತಿಗಳಿಗೆ ಮನವಿ ಸಲ್ಲಿಸಲಾಗುವುದೆಂದು ನಾಚಪ್ಪ ತಿಳಿಸಿದರು.
ಪರಿಹಾರ ಸಾಮಾಗ್ರಿ ಭಾರೀ ಪ್ರಮಾಣದಲ್ಲಿ ದುರುಪಯೋಗವಾಗಿದ್ದು, ಬಟ್ಟೆಬರೆಗಳನ್ನು ಉಳ್ಳವರು ಪಡೆದುಕೊಂಡು, ಹರಕಲು ಮುರುಕಲು ಸಾಮಾಗ್ರಿಗಳನ್ನು ಸಂತ್ರಸ್ತರಿಗೆ ನೀಡಲಾಗಿದೆ, ಪ್ರತಿ ಗ್ರಾಮ ಪಂಚಾಯತ್ ಗಳಲ್ಲಿ ಓಟ್ ಬ್ಯಾಂಕ್ಗಾಗಿ ಉಳ್ಳವರಿಗೆ ಪರಿಹಾರವನ್ನು ವಿತರಿಸಲಾಗಿದೆ. ಕೊಡಗಿನ ಏಳು ನಾಡುಗಳಲ್ಲಿ ಸಂಭವಿಸಿರುವ ಜಲಸ್ಫೋಟಕ್ಕೆ ಹೋಂಸ್ಟೇಗಳು ಕಾರಣ ಎನ್ನುವ ಅವೈಜ್ಞಾನಿಕ ವಾದವನ್ನು ಮುಂದಿಡಲಾಗುತ್ತಿದೆ. ಇದರ ಹಿಂದೆ ದೊಡ್ಡ ಮಟ್ಟದ ಹೊಟೇಲ್ ಉದ್ಯಮದ ಲಾಭಿಯೇ ಇದೆ ಎಂದು ಆರೋಪಿಸಿದರು. ವಾಸ್ತವವಾಗಿ ಅನಾಹುತಗಳಿಗೆ ಹಾರಂಗಿ ಅಣೆಕಟ್ಟೆಯ ಹಿನ್ನೀರೆ ಪ್ರಮುಖ ಕಾರಣವೆಂದು ನಾಚಪ್ಪ ಅಭಿಪ್ರಾಯಪಟ್ಟರು.
ಸಂತ್ರಸ್ತ ಕಾಲೂರು ಗ್ರಾಮದ ಚಂಡೀರ ರಾಜ ತಿಮ್ಮಯ್ಯ ಮಾತನಾಡಿ, ಮನೆ ಮತ್ತು ತೋಟವನ್ನು ನಾನು ಕಳೆದುಕೊಂಡಿದ್ದೇನೆ. ಹೀಗಿದ್ದೂ ನಾನು ನನ್ನ ಗ್ರಾಮವನ್ನು ಯಾವುದೇ ಕಾರಣಕ್ಕೂ ಬಿಟ್ಟು ಹೋಗುವುದಿಲ್ಲ. ನಮ್ಮ ಬದುಕನ್ನು ಮತ್ತೆ ಅದೇ ಗ್ರಾಮದಲ್ಲಿ ಕಟ್ಟಿಕೊಳ್ಳುತ್ತೇವೆ ಎಂದರು.
ನಾಪಂಡ ಅರುಣ್ ಮಾತನಾಡಿ, ಆಸ್ತಿಪಾಸ್ತಿಗಳನ್ನು ಕಳೆದುಕೊಂಡಿರುವ ನಮಗೆ ನಮ್ಮ ಗ್ರಾಮದಿಂದ ಹತ್ತಾರು ಕಿ.ಮೀ. ದೂರದಲ್ಲಿ ಪುನರ್ವಸತಿ ಕಲ್ಪಿಸಿದಲ್ಲಿ ಅಲ್ಲಿಗೆ ತೆರಳಲು ಸಾಧ್ಯವಿಲ್ಲ, ನಾವಿರುವ ಗ್ರಾಮದಲ್ಲೆ ಪುನರ್ವಸತಿ ಕಲ್ಪಿಸಬೇಕೆಂದು ಒತ್ತಾಯಿಸಿದರು.
ಕಾಲೂರು ಗ್ರಾಮದ ಕೊಳುಮಾಡಂಡ ಸಾಬು ಉತ್ತಪ್ಪ ಅವರು, ಏಳು ನಾಡುಗಳಲ್ಲಿನ ಸಂತ್ರಸ್ತರಿಗಾಗಿ ಅವರಿರುವ ಪ್ರದೇಶದಲ್ಲೆ ಪರಿಹಾರ ಕೇಂದ್ರ್ರಗಳನ್ನು ಕಲ್ಪಿಸಿಕೊಡುವುದು ಅವಶ್ಯವೆಂದು ತಿಳಿಸಿದರೆ, ಸೂರ್ಲಬ್ಬಿಯ ಮುದ್ದಂಡ ಮಧು ಅವರು, ನಮ್ಮ ಊರು, ನಾವು ಸಾಕಿದ ದನ ಕರುಗಳನ್ನು ಬಿಟ್ಟು ಬೇರೆಡೆಗೆ ತೆರಳಲು ಸಿದ್ಧರಿಲ್ಲವೆಂದು ಸ್ಪಷ್ಟಪಡಿಸಿದರು.
ಪತ್ರಿಕಾಗೋಷ್ಠಿಯಲ್ಲಿ ಮುತ್ತ್ ನಾಡಿನ ಚಂಡೀರ ಶಾಂತಿ ಉಪಸ್ಥಿತರಿದ್ದರು.
