ಅಮೆರಿಕ ಪೌರತ್ವ ತಡೆಯಲು ಟ್ರಂಪ್ ಸರಕಾರದಿಂದ ಇನ್ನಷ್ಟು ಅಡಚಣೆ

ವಾಶಿಂಗ್ಟನ್, ಸೆ. 23: ಆಹಾರ ಮತ್ತು ನಗದು ನೆರವು ಸೇರಿದಂತೆ ಸರಕಾರಿ ಸವಲತ್ತುಗಳನ್ನು ಪಡೆದಿರುವ ಹಾಗೂ ಮುಂದಕ್ಕೆ ಪಡೆಯಬಹುದಾದ ವಲಸಿಗರಿಗೆ ಅಮೆರಿಕದ ಟ್ರಂಪ್ ಸರಕಾರವು, ಹೊಸ ನಿಯಮಗಳ ಪ್ರಕಾರ ಹಸಿರು ಕಾರ್ಡ್‌ಗಳನ್ನು ನಿರಾಕರಿಸಬಹುದಾಗಿದೆ.

ಇದು ಅಮೆರಿಕದಲ್ಲಿ ವಾಸಿಸುತ್ತಿರುವ ಲಕ್ಷಾಂತರ ಭಾರತೀಯರ ಮೇಲೆ ಪರಿಣಾಮ ಬೀರಲಿದೆ.

ಹೊಸ ನಿಯಮಗಳಿಗೆ ಆಂತರಿಕ ಭದ್ರತಾ ಕಾರ್ಯದರ್ಶಿ ಸೆಪ್ಟಂಬರ್ 21ರಂದು ಸಹಿ ಹಾಕಿದ್ದಾರೆ ಹಾಗೂ ನಿಯಮಗಳನ್ನು ಆಂತರಿಕ ಸಚಿವಾಲಯದ ವೆಬ್‌ಸೈಟ್‌ನಲ್ಲಿ ಹಾಕಲಾಗಿದೆ.

ಆದರೆ, ನೂತನ ನಿಯಮಗಳ ವಿರುದ್ಧ ಸಿಲಿಕಾನ್ ಕಣಿವೆಯಲ್ಲಿರುವ ತಂತ್ರಜ್ಞಾನ ಉದ್ದಿಮೆಗಳು ಮತ್ತು ರಾಜಕೀಯ ನಾಯಕರು ಕಿಡಿಗಾರಿದ್ದಾರೆ.

  ಎಚ್-4 ವೀಸಾದಾರರ ಉದ್ಯೋಗ ಪರ್ಮಿಟ್‌ಗಳನ್ನು ರದ್ದುಗೊಳಿಸುವುದಕ್ಕೆ ಸಂಬಂಧಿಸಿದ ನಿರ್ಧಾರವನ್ನು ಮೂರು ತಿಂಗಳಲ್ಲಿ ತೆಗೆದುಕೊಳ್ಳಲಾಗುವುದು ಎಂಬುದಾಗಿ ಟ್ರಂಪ್ ಸರಕಾರವು ಅಮೆರಿಕದ ಫೆಡರಲ್ ನ್ಯಾಯಾಲಯವೊಂದಕ್ಕೆ ಮಾಹಿತಿ ನೀಡಿದ ಒಂದು ದಿನದ ಬಳಿಕ ಈ ಹೊಸ ನಿರ್ಬಂಧಗಳನ್ನು ಹೇರಲಾಗಿದೆ.

ಅಮೆರಿಕದಲ್ಲಿ ಎಚ್-1ಬಿ ವೀಸಾದಡಿ ಮಾಹಿತಿ ತಂತ್ರಜ್ಞಾನ ಕ್ಷೇತ್ರದಲ್ಲಿ ಕೆಲಸ ಮಾಡುತ್ತಿರುವ ವಿದೇಶಿಯರ ಸಂಗಾತಿಗಳಿಗೆ ಎಚ್-4 ವೀಸಾಗಳನ್ನು ನೀಡಲಾಗುತ್ತದೆ.

ಎಚ್-4 ವೀಸಾಗಳನ್ನು ಹೊಂದಿರುವವರಲ್ಲಿ ಭಾರತೀಯ ಮಹಿಳೆಯರೇ ಅಧಿಕ.

ನಿಯಮ ಏನು ಹೇಳುತ್ತದೆ?

ನೂತನ ನಿಯಮಗಳ ಪ್ರಕಾರ, ಸ್ಥಾನಮಾನ ಅಥವಾ ವೀಸಾದಲ್ಲಿ ಬದಲಾವಣೆ ತರಲು ಬಯಸುವ ವಿದೇಶಿ ವಲಸಿಗರು, ಯಾವುದೇ ಸಮಯದಲ್ಲಿ ನಾವು ಬದುಕಲಿಕ್ಕಾಗಿ ಸರಕಾರದ ಆಶ್ರಯ ಕೋರುವುದಿಲ್ಲ ಅಥವಾ ಸರಕಾರದಿಂದ ನೆರವು ಪಡೆದುಕೊಳ್ಳುವ ಸಾಧ್ಯತೆಯಿಲ್ಲ ಎಂಬುದನ್ನು ನಿರೂಪಿಸಬೇಕು.

‘‘ಅಮೆರಿಕದಲ್ಲಿ ವಾಸ್ತವ್ಯವನ್ನು ಮುಂದುವರಿಸಬಯಸುವ ಅಥವಾ ಸ್ಥಾನಮಾನ ಬದಲಾಯಿಸಬಯಸುವ ಎಲ್ಲ ವಲಸಿಗರು, ನಾವು ಸರಕಾರದ ಯಾವುದೇ ಸವಲತ್ತುಗಳನ್ನು ಹಿಂದೆ ಸ್ವೀಕರಿಸಿಲ್ಲ, ಈಗ ಸ್ವೀಕರಿಸುತ್ತಿಲ್ಲ ಹಾಗೂ ಮುಂದೆಯೂ ಸ್ವೀಕರಿಸುವುದಿಲ್ಲ ಎನ್ನುವುದನ್ನು ಸಾಬೀತುಪಡಿಸಬೇಕು’’ ಎಂದು ನೂತನ ನಿಯಮಗಳು ಹೇಳುತ್ತವೆ.

ತಂತ್ರಜ್ಞಾನ ಕಂಪೆನಿಗಳ ವಿರೋಧ

ಫೇಸ್‌ಬುಕ್, ಮೈಕ್ರೊಸಾಫ್ಟ್, ಡ್ರಾಪ್‌ಬಾಕ್ಸ್, ಯಾಹೂ ಮತ್ತು ಗೂಗಲ್ ಮುಂತಾದ ತಂತ್ರಜ್ಞಾನ ಕಂಪೆನಿಗಳನ್ನು ಪ್ರತಿನಿಧಿಸುವ ‘ಎಫ್‌ಡಬ್ಲುಡಿ.ಯುಎಸ್’ ಎಂಬ ಸಂಸ್ಥೆಯು ಟ್ರಂಪ್ ಸರಕಾರದ ನೂತನ ನಿಯಮಗಳನ್ನು ವಿರೋಧಿಸಿದೆ.

ಇದು ಕಾನೂನುಬದ್ಧ ವಲಸೆಯನ್ನು ಗಣನೀಯವಾಗಿ ಕಡಿಮೆ ಮಾಡಲು ಸರಕಾರದ ‘ಹಿಂಬಾಗಿಲ’ ಕ್ರಮವಾಗಿದೆ ಎಂದು ಅದು ಆರೋಪಿಸಿದೆ ಹಾಗೂ ಈ ನಿಯಮಗಳನ್ನು ಜಾರಿಗೊಳಿಸಿದರೆ ಇಡೀ ದೇಶಕ್ಕೆ ಘಾಸಿಯಾಗುತ್ತದೆ ಎಂದು ಅದು ಹೇಳಿದೆ.