ಫೊರ್ಚೂನ್ ಗ್ರೂಪ್ ಆಫ್ ಹೋಟೆಲ್ಸ್ಗೆ ಅತ್ಯುತ್ತಮ ಕಂಪೆನಿ 2018 ಪ್ರಶಸ್ತಿ
ದುಬೈ,ಸೆ.25: ಇಲ್ಲಿನ ಅಟ್ಲಾಂಟಿಸ್, ದ ಪಾಮ್ನಲ್ಲಿ ಅದ್ಧೂರಿಯಾಗಿ ನಡೆದ ಭಾರತ-ಯುಎಇ ಸಮ್ಮೇಳನ ಮತ್ತು ಪ್ರಶಸ್ತಿ ಸಮಾರಂಭದಲ್ಲಿ ಫೊರ್ಚೂನ್ ಗ್ರೂಪ್ ಆಫ್ ಹೋಟೆಲ್ಸ್ ಯುಎಇ, 2018ರ ಅತ್ಯುತ್ತಮ ಕಂಪೆನಿ, ಹಾಸ್ಪಿಟಾಲಿಟಿ ಮತ್ತು ಲೀಶರ್ ಪ್ರಶಸ್ತಿಯನ್ನು ತನ್ನದಾಗಿಸಿಕೊಂಡಿದೆ.
ಸಂಸ್ಥೆಯ ಮುಖ್ಯಸ್ಥ ಪ್ರವೀಣ್ ಶೆಟ್ಟಿಯವರಿಗೆ ಈ ಪ್ರಶಸ್ತಿಯನ್ನು ಸುಹೈಲ್ ಮುಹಮ್ಮದ್ ಅಲ್ ಝರೂನಿ ನೀಡಿ ಗೌರವಿಸಿದರು. ಎಚ್.ಎಚ್.ಶೇಕ್ ತನ್ಹೂನ್ ಬಿನ್ ಸಯೀದ್ ಬಿನ್ ತನ್ಹೂನ್ ಅಲ್ ನಹ್ಯನ್, ಭಾರತ-ದುಬೈ ಕಾನ್ಸುಲೇಟ್ ಜನರಲ್ ವಿಪುಲ್, ಜೆಡಿಯು ಮುಖ್ಯ ಪ್ರಧಾನ ಕಾರ್ಯದರ್ಶಿ ಮತ್ತು ವಕ್ತಾರ, ಸಂಸದ ಕೆ.ಸಿ.ತ್ಯಾಗಿ, ತೆಲಂಗಾನ ವಿಧಾನಸಭೆ ಸ್ಪೀಕರ್ ಸರ್ಕಿಕೊಂಡ ಮಧುಸೂದನ ಚೆರಿ, ಸಂಸದ ಶರದ್ ತ್ರಿಪಾಠಿ, ಎಫ್ಟಿಐಐ ಮಾಜಿ ಮುಖ್ಯಸ್ಥ ಮತ್ತು ಬಾಲಿವುಡ್ ನಟ ಗಜೇಂದ್ರ ಚೌಹಾಣ್ ಮತ್ತು ಬಾಲಿವುಡ್ ನಟ ರಾಜ್ಪಾಲ್ ಯಾದವ್ ಹಾಗೂ ಯುಎಇ ಮತ್ತು ಭಾರತದ ಅನೇಕ ಗಣ್ಯರು ಮತ್ತು ಸೆಲೆಬ್ರಿಟಿಗಳು ಉಪಸ್ಥಿತರಿದ್ದರು.
ಒಬ್ಸರ್ವರ್ ಡಾನ್ ಮ್ಯಾಗಝೀನ್ನ ಮುಖ್ಯ ಸಂಪಾದಕ ಹರಿಓಂ ತ್ಯಾಗಿ ಈ ಸಂದರ್ಭದಲ್ಲಿ ಭಾರತೀಯ ಮತ್ತು ಯುಎಇ ಉದ್ಯಮ ಸಮುದಾಯದ ಬೆಳೆಯುತ್ತಿರುವ ಸಂಬಂಧದ ಮೇಲೆ ಬೆಳಕು ಚೆಲ್ಲುವ ವಿಶೇಷ ಆವೃತ್ತಿಯನ್ನು ಬಿಡುಗಡೆ ಮಾಡಿದರು. ಪ್ರಶಸ್ತಿ ನೀಡಿ ಗೌರವಿಸಿದ್ದಕ್ಕಾಗಿ ಭಾರತ-ಯುಎಇ ಉದ್ಯಮ ಸಮ್ಮೇಳನದ ಆಯೋಜಕರು, ಒಬ್ಸರ್ವರ್ ಡಾನ್ ಮತ್ತು ಹಾಟ್ ಎಂಟರ್ಟೈನ್ಮೆಂಟ್ ಆ್ಯಂಡ್ ಮೀಡಿಯ ಪ್ರೈ.ಲಿಗೆ ಪ್ರವೀಣ್ ಶೆಟ್ಟಿ ಧನ್ಯವಾದ ಸಮರ್ಪಿಸಿದರು. ದುಬೈಯನ್ನು ಅವಕಾಶಗಳ ಸ್ಥಳವನ್ನಾಗಿ ಮಾಡಿ ಉದ್ಯಮ ಸಮುದಾಯ ಇಲ್ಲಿ ಬೆಳೆದು ಹೊಸ ಯಶೋಗಾಥೆಗಳನ್ನು ರಚಿಸಲು ವೇದಿಕೆ ಕಲ್ಪಿಸಿರುವ ಯುಎಇಯ ಉಪಾಧ್ಯಕ್ಷ ಮತ್ತು ಪ್ರಧಾನ ಮಂತ್ರಿ ಹಾಗೂ ದುಬೈಯ ದೊರೆ ಶೇಕ್ ಮುಹಮ್ಮದ್ ಬಿನ್ ರಶೀದ್ ಅಲ್ ಮಕ್ತೂಮ್ ಅವರನ್ನು ಈ ವೇಳೆ ಶೆಟ್ಟಿ ಶ್ಲಾಘಿಸಿದರು.
