ಹದಗೆಟ್ಟಿರುವ ರಾಜಕೀಯ ವ್ಯವಸ್ಥೆ ಸರಿಪಡಿಸಲು ಗಂಭೀರ ಚಿಂತನೆ ಅಗತ್ಯ: ಎಚ್.ಡಿ.ದೇವೇಗೌಡ
ಬೆಂಗಳೂರು, ಸೆ.29: ಇವತ್ತಿನ ರಾಜಕೀಯ ವ್ಯವಸ್ಥೆ ಹದಗೆಟ್ಟಿದ್ದು, ಇದನ್ನು ಸರಿ ಪಡಿಸುವ ನಿಟ್ಟಿನಲ್ಲಿ ಪ್ರತಿಯೊಬ್ಬರು ಗಂಭೀರವಾಗಿ ಆಲೋಚಿಸಬೇಕಿದೆ ಎಂದು ಮಾಜಿ ಪ್ರಧಾನಿ ಎಚ್.ಡಿ.ದೇವೇಗೌಡ ತಿಳಿಸಿದರು.
ಶನಿವಾರ ಹಕ್ಕಿಪಿಕ್ಕಿ ಪ್ರಕಾಶನ ನಗರದ ಭಾರತೀಯ ವಿದ್ಯಾಭವನದಲ್ಲಿ ಆಯೋಜಿಸಿದ್ದ ಜೆಡಿಎಸ್ ರಾಜ್ಯಾಧ್ಯಕ್ಷ ಹಾಗೂ ಲೇಖಕ ಎಚ್.ವಿಶ್ವನಾಥ್ರವರ ‘ಅಥೆನ್ಸ್ನ ರಾಜ್ಯಾಡಳಿತ’ ಕೃತಿಯನ್ನು ಬಿಡುಗಡೆಗೊಳಿಸಿ ಅವರು ಮಾತನಾಡಿದರು.
ನಾನು 1973ದಲ್ಲಿ ಅಥೆನ್ಸ್ಗೆ ಭೇಟಿ ನೀಡಿದ್ದೆ. ಆ ನಗರವು ಅತ್ಯಂತ ಸುಂದರವಾಗಿದ್ದು, ಜನಪರವಾದ ಸಂಸ್ಕೃತಿಯನ್ನು ಒಳಗೊಂಡಿದೆ. ಅಲ್ಲಿನ ರಾಜಕೀಯ ವ್ಯವಸ್ಥೆಗೆ ಮಾದರಿಯಾದುದ್ದಾಗಿದೆ. ಅಲ್ಲಿ ಜನಪ್ರತಿನಿಧಿಗಳಿಗೂ ಕಾರಿನ ಚಾಲಕರಿಗೂ ವೇತನದಲ್ಲಿ ತುಂಬಾ ವ್ಯತ್ಯಾಸವಿಲ್ಲ. ಹಾಗೂ ಸಮಾನವಾದ ಗೌರವವಿದೆ. ಇಂತಹ ವ್ಯವಸ್ಥೆಯನ್ನು ಭಾರತದಲ್ಲಿ ಕಾಣುವುದು ಯಾವಾಗ ಎಂದು ಅವರು ಪ್ರಶ್ನಿಸಿದರು.
ಭಾರತದ ರಾಜಕೀಯ ವ್ಯವಸ್ಥೆ ಸ್ವಾತಂತ್ರದ ಪ್ರಾರಂಭದ ದಶಕಗಳಲ್ಲಿ ಚೆನ್ನಾಗಿಯೆ ಇತ್ತು. ಮತದಾನದ ದಿನ ಸ್ನಾನ ಮಾಡಿ, ದೇವಸ್ಥಾನದಲ್ಲಿ ಪೂಜೆ ಸಲ್ಲಿಸಿ ಮತದಾನಕ್ಕೆ ತೆರಳುತ್ತಿದ್ದರು. ಆ ದಿನಗಳಲ್ಲಿ ಜನತೆಯೆ ಹಣ ಕೊಟ್ಟು ತಮ್ಮ ಅಭ್ಯರ್ಥಿಗಳ ಪರ ಪ್ರಚಾರ ಮಾಡುತ್ತಿದ್ದರು. ತದ ನಂತರದ ದಿನಗಳಲ್ಲಿ ಪ್ರಜಾಪ್ರಭುತ್ವ ವ್ಯವಸ್ಥೆ ಕುಸಿಯುತ್ತಾ ಸಾಗಿದೆ ಎಂದು ಅವರು ಹೇಳಿದರು.
ಆ ದಿನಗಳಲ್ಲಿ ಶಾಸಕರು ಹೊಟೇಲ್ಗೆ ಹೋಗಿ ಕಾಫಿ ಕುಡಿಯುವುದಕ್ಕೆ ನಾಚಿಕೊಳ್ಳುತ್ತಿದ್ದರು. ಸಿನೆಮಾಗೆ ಹೋಗಲು ಭಯ ಪಡುತ್ತಿದ್ದರು. ಜನತೆ ನಮ್ಮ ಬಗ್ಗೆ ಎಲ್ಲಿ ತಪ್ಪು ಅಭಿಪ್ರಾಯ ತಾಳುತ್ತಾರೆಯೊ ಎಂದು ಅಂಜುತ್ತಿದ್ದರು. ಸದನದಲ್ಲಿ ಬೆಳಗ್ಗೆ 10ಕ್ಕೆ ಕುಳಿತರೆ ಸಂಜೆ 6ಕ್ಕೆ ಎದ್ದು ಬರುತ್ತಿದ್ದೆವು. ಇಂತಹ ಜನಪರ ವ್ಯವಸ್ಥೆ ಪುನಃ ಸ್ಥಾಪನೆಯಾಗಬೇಕಾದ ಅಗತ್ಯವಿದೆ ಎಂದು ಅವರು ಹೇಳಿದರು.
ಲೇಖಕ ಹಾಗೂ ಜೆಡಿಎಸ್ ರಾಜ್ಯಾಧ್ಯಕ್ಷ ಎಚ್.ವಿಶ್ವನಾಥ್ ಮಾತನಾಡಿ, ಅಥೆನ್ಸ್ನಲ್ಲಿ ಎರಡೂವರೆ ಸಾವಿರ ವರ್ಷಗಳ ಹಿಂದೆಯೆ ಪ್ರಜಾಪ್ರಭುತ್ವ ವ್ಯವಸ್ಥೆ ಇತ್ತು. ಅಥೆನ್ಸ್ ನಗರ ಶಿಕ್ಷಣ, ಕ್ರೀಡೆ, ರಂಗಭೂಮಿ ಸೇರಿದಂತೆ ಎಲ್ಲವನ್ನು ಜಗತ್ತಿಗೆ ಪರಿಚಯಿಸಿದೆ, ಇಂತಹ ವ್ಯವಸ್ಥೆಯ ಬಗ್ಗೆ ರಾಜ್ಯದ ಜನತೆಗೂ ತಿಳಿಯಲಿ ಎಂಬ ಉದ್ದೇಶದಿಂದ ಈ ಕೃತಿ ರಚಿಸಿದ್ದೇನೆಂದು ತಿಳಿಸಿದರು.
ಹಿರಿಯ ಪತ್ರಕರ್ತ ಬಿ.ಎಂ.ಹನೀಫ್ ಮಾತನಾಡಿ, ರಾಜಕೀಯ ಕ್ಷೇತ್ರದಲ್ಲಿ ಮಾಜಿ ಮುಖ್ಯಮಂತ್ರಿ ರಾಮಕೃಷ್ಣಹೆಗಡೆ, ಮಾಜಿ ಸಚಿವ ಎಂ.ಪಿ.ಪ್ರಕಾಶ್, ಬಿ.ಎ.ಮೊಹಿದ್ದೀನ್ ಗಂಭೀರ ಓದುಗರಾಗಿದ್ದರು. ಅವರ ಸಾಲಿನಲ್ಲಿ ಸಭಾಧ್ಯಕ್ಷ ರಮೇಶ್ಕುಮಾರ್, ಎಚ್.ಡಿ.ದೇವೇಗೌಡ ಹಾಗೂ ಎಚ್.ವಿಶ್ವನಾಥ್ ಜಗತ್ತಿನ ವಿವಿಧ ಕ್ಷೇತ್ರಗಳ ಕುರಿತು ಓದುತ್ತಿದ್ದಾರೆ, ಬರೆಯುತ್ತಿದ್ದಾರೆ. ಇದು ಇತರೆ ಜನಪ್ರತಿನಿಧಿಗಳಿಗೂ ಮಾದರಿಯಾಗಲಿ ಎಂದು ತಿಳಿಸಿದರು.
ಎರಡೂವರೆ ಸಾವಿರ ವರ್ಷಗಳ ಹಿಂದೆಯೆ ಪ್ರಜಾಪ್ರಭುತ್ವ ವ್ಯವಸ್ಥೆಯನ್ನು ಹೊಂದಿದ್ದ ಅಥೆನ್ಸ್ ನಗರದ ರಾಜಕೀಯ ವ್ಯವಸ್ಥೆ ಕುರಿತು ಭಾರತದ ಪ್ರತಿಯೊಬ್ಬ ಜನಪ್ರತಿನಿಧಿಯು ಗಂಭೀರವಾಗಿ ಓದಬೇಕು. ಈ ಕುರಿತು ಲೇಖಕ ಎಚ್.ವಿಶ್ವನಾಥ್ ಅಥೆನ್ಸ್ನ ರಾಜ್ಯಾಡಳಿತ ಕೃತಿಯನ್ನು ರಚಿಸಿದ್ದಾರೆ. ಇದನ್ನು ಜನಪ್ರತಿನಿಧಿಗಳು ಸೇರಿದಂತೆ ರಾಜ್ಯದ ಪ್ರತಿಯೊಬ್ಬರು ಓದುವಂತಾಗಲಿ ಎಂದು ಅವರು ಆಶಿಸಿದರು.
ನಮ್ಮ ಜನಪ್ರತಿನಿಧಿಗಳಲ್ಲಿ ವಿಫುಲವಾದ ಅನುಭವವಿದೆ. ಈ ಅನುಭವಗಳು ಯುವ ಪೀಳಿಗೆಗೆ ಅಗತ್ಯವಾದದ್ದು. ಹೀಗಾಗಿ ಪುಸ್ತಕ ಪ್ರಕಾಶಕರು ಹಾಗೂ ಸಾಹಿತ್ಯ ಸಂಘ, ಸಂಸ್ಥೆಗಳು ಇವರಿಂದ ಲೇಖನ ರೂಪದಲ್ಲಿ ಇಲ್ಲವೆ ಅನುಭವ ರೂಪದಲ್ಲಿ ಬರೆಯುವಂತೆ ಪ್ರೇರೇಪಿಸಬೇಕಿದೆ ಎಂದು ಅವರು ಹೇಳಿದರು. ಈ ವೇಳೆ ಲೋಕಾಯುಕ್ತ ನ್ಯಾ. ಸಂತೋಷ್ ಹೆಗ್ಡೆ ಉಪಸ್ಥಿತರಿದ್ದರು.
ಇಂದಿನ ಸಾಹಿತ್ಯ ವಲಯಕ್ಕೆ ಜನಪ್ರತಿನಿಧಿಗಳ ಬರಹಗಳ ಬಗ್ಗೆ ಆಸಕ್ತಿಯಿಲ್ಲ. ನಾನು ಸಮಾಜದಲ್ಲಿರುವ ವಸ್ತು ಸ್ಥಿತಿಗಳ ಕುರಿತು ಬರೆದಿದ್ದೇನೆ. ಜನಪ್ರತಿನಿಧಿಗಳ ಬರಹಗಳು ಜನಸಾಮಾನ್ಯರಿಗೆ ತೀರ ಹತ್ತಿರದ ಸಂಬಂಧವಿರುತ್ತದೆ. ಹೀಗಾಗಿ ಜನಪ್ರತಿನಿಧಿಗಳ ಬರವಣಿಗೆಯ ಬಗೆಗೆ ಸಾಹಿತ್ಯ ಲೋಕ ಗಮನ ವಹಿಸಬೇಕಿದೆ.
-ಎಚ್.ವಿಶ್ವನಾಥ್, ಜೆಡಿಎಸ್ ರಾಜ್ಯಾಧ್ಯಕ್ಷ
