'ಹಿಂದ್ ಸ್ವರಾಜ್' ಎಲ್ಲ ಕಾಲಕ್ಕೂ ಸಲ್ಲುವ ಸಾಂಸ್ಕೃತಿಕ ಪಠ್ಯ: ಅಜೀಂ ಪ್ರೇಮ್ಜಿ ವಿವಿ ಪ್ರಾಧ್ಯಾಪಕ ಚಂದನ್ಗೌಡ
ಬೆಂಗಳೂರು, ಅ.2: ಮಹಾತ್ಮ ಗಾಂಧೀಜಿಯವರ ಹಿಂದ್ ಸ್ವರಾಜ್ ಕೃತಿ ಎಲ್ಲ ಕಾಲಕ್ಕೂ ನಿರಂತರವಾಗಿ ವಿವರಿಸಿಕೊಳ್ಳಬೇಕಾದ ಹಾಗೂ ಪ್ರಸ್ತುತವಾದ ಸಾಂಸ್ಕೃತಿಕ ಪಠ್ಯ ಎಂದು ಅಜೀಂ ಪ್ರೇಮ್ಜಿ ವಿಶ್ವವಿದ್ಯಾಲಯದ ಸಮಾಜಶಾಸ್ತ್ರ ಪ್ರಾಧ್ಯಾಪಕ ಡಾ. ಚಂದನ್ಗೌಡ ಅಭಿಪ್ರಾಯಿಸಿದರು.
ಮಂಗಳವಾರ ಬೆಂಗಳೂರು ವಿಶ್ವವಿದ್ಯಾಲಯದ ಗಾಂಧಿ ಭವನದಲ್ಲಿ ಆಯೋಜಿಸಿದ್ದ ಗಾಂಧಿ ಜಯಂತಿ ಕಾರ್ಯಕ್ರಮದಲ್ಲಿ ಭಾಗವಹಿಸಿ ಮಾತನಾಡಿದ ಅವರು, ಗಾಂಧೀಜಿ ಚರಿತ್ರೆಯನ್ನು ಹೊಸ ರೀತಿಯಲ್ಲಿ ನೋಡಲು ಯತ್ನಿಸಿದರು ಮತ್ತು ಶೂದ್ರರ ದೈಹಿಕ ಶ್ರಮವನ್ನು ಭಾರತದ ನಿಜವಾದ ಶ್ರಮಜೀವನದ ಪ್ರತೀಕವೆಂದು ಗಾಂಧೀಜಿ ಬಿಂಬಿಸಿದರು ಎಂದು ತಿಳಿಸಿದರು.
ಗಾಂಧೀಜಿ ಭಾರತದ ಚರಕವನ್ನು ಮರುವಿವರಿಸಿದಂತೆಯೇ ಭಾರತದ ಹಳ್ಳಿಗಳನ್ನು ಮರುರೂಪಿಸಲು ಯತ್ನಿಸಿದರು. ಹಳ್ಳಿಗಳ ಮೂಲಕವೆ ಭಾರತವನ್ನು ತಿಳಿಯಲೆತ್ನಿಸಿದರು. ನಂತರ ಬಂದ ಗಾಂಧೀ ಶಿಷ್ಯರಾದ ಜೆಪಿ ಕೂಡ ಗಾಂಧಿಯ ಹಾದಿಯಲ್ಲೇ ಸಂಪೂರ್ಣ ಕ್ರಾಂತಿಯನ್ನು ರೂಪಿಸಲು ಪ್ರಯತ್ನಿಸಿದರು ಎಂದು ಅವರು ಅಭಿಪ್ರಾಯಪಟ್ಟರು.
ಬೆಂಗಳೂರು ವಿಶ್ವವಿದ್ಯಾಲಯದ ಕುಲಸಚಿವ ಪ್ರೊ.ಬಿ.ಕೆ. ರವಿ ಮಾತನಾಡಿ, ಇಂದಿನ ಪ್ರಕ್ಷುಬ್ದ ಸ್ಥಿತಿಯಲ್ಲಿ ಅಹಿಂಸಾ ಮಾರ್ಗವೊಂದೇ ಅಂತಿಮ ಉತ್ತರವಾಗಿದ್ದು, ಅದರ ಮೂಲಕವೇ ದುರ್ಬಲರ, ಅವಕಾಶವಂಚಿತರ ಏಳಿಗೆ ಸಾಧ್ಯ ಎಂದು ಅವರು ಹೇಳಿದರು. ಬೆಂವಿವಿ ಕುಲಪತಿ ಪ್ರೊ.ಕೆ.ಆರ್. ವೇಣುಗೋಪಾಲ್ ಮಾತನಾಡಿ ‘ಮಹಾತ್ಮ ಗಾಂಧೀಜಿ ದೈವತ್ವದ ಎತ್ತರಕ್ಕೆ ಏರಿದ ಮಹಾಸಾಧಕ. ಹೊಸ ತಲೆಮಾರಿನ ವಿದ್ಯಾರ್ಥಿಗಳು ದುಶ್ಚಟಗಳಿಂದ ದೂರವಿದ್ದು ಗಾಂಧಿ ಮಾರ್ಗವನ್ನು ಅನುಸರಿಸಬೇಕು ಎಂದು ಕರೆ ನೀಡಿದರು.
ಗಾಂಧೀಜಿ 150ನೆ ಆಚರಣೆಯ ಅಂಗವಾಗಿ ವರ್ಷವಿಡೀ ಗಾಂಧೀಜಿ ಕುರಿತ ಉಪನ್ಯಾಸ, ಹೊಸ ಪ್ರಕಟಣೆಗಳನ್ನು ಹೊರತರಲಾಗುವುದು. ಮತ್ತು ಬೆಂವಿವಿ ಸೇರಿದ ಎಲ್ಲ ಕಾಲೇಜುಗಳಲ್ಲೂ ಒಂದು ವಾರ ವಿವಿಧ ಗಾಂಧಿ ಕೇಂದ್ರಿತ ಕಾರ್ಯಕ್ರಮಗಳನ್ನು ಏರ್ಪಡಿಸಲಾಗುವುದು ಎಂದು ಅವರು ಹೇಳಿದರು.
ಗಾಂಧಿ ಅಧ್ಯಯನ ಕೇಂದ್ರದ ನಿರ್ದೇಶಕ ಡಾ.ನಟರಾಜ್ ಹುಳಿಯಾರ್ ಮಾತನಾಡಿ, ಗಾಂಧಿ ಅಧ್ಯಯನ ಕೇಂದ್ರವು ಹಮ್ಮಿಕೊಳ್ಳಲಿರುವ ಗಾಂಧಿ-150 ವರ್ಷಾಚರಣೆಯ ಭಾಗವಾಗಿ ‘ಗಾಂಧಿ ಮರುಹುಡುಕಾಟ’, ‘ಕಾಲೇಜಿನೆಡೆಗೆ ಗಾಂಧಿ’, ‘ಗಾಂಧೀಜಿಗೆ ವಿದ್ಯಾರ್ಥಿಗಳ ಪತ್ರ' ಎಂಬ ನೂತನ ಕಾರ್ಯಕ್ರಮಗಳನ್ನು ಗಾಂಧಿ ಅಧ್ಯಯನ ಕೇಂದ್ರ ರೂಪಿಸಿದೆ ಹಾಗೂ ’ನಮ್ಮ ಸುತ್ತಣ ಗಾಂಧಿಗಳು’ ಯೋಜನೆಯನ್ನು ಮತ್ತೆ ಆರಂಭ ಮಾಡಲಾಗುವುದು ಎಂದು ಹೇಳಿದರು.
ಕಾರ್ಯಕ್ರಮದಲ್ಲಿ ರಂಗ ನಿರ್ದೇಶಕ ಚನ್ನಕೇಶವ ಲೋಕಚರಿತ ತಂಡದವರು ’ಕನ್ನಡ ಕವಿಗಳು ಕಂಡ ಗಾಂಧೀಜಿ’ ರೂಪಕವನ್ನು ಪ್ರದರ್ಶಿಸಿದರು. ಬೆಂವಿವಿ ದೃಶ್ಯಕಲಾ ವಿಭಾಗದ ಕಲಾವಿದ ವಿದ್ಯಾರ್ಥಿಗಳು ಕಲಾವಿದರ ಕಣ್ಣಲ್ಲಿ ಗಾಂಧೀಜಿ ಎಂಬ ಬೃಹತ್ ಚಿತ್ರವನ್ನು ಸ್ಥಳದಲ್ಲೇ ರಚಿಸಿದರು. ವಿವಿಧ ಕಾಲೇಜುಗಳ 20 ವಿದ್ಯಾರ್ಥಿಗಳು ಗಾಂಧೀ ಚಿಂತನೆಗಳನ್ನು ಕುರಿತ ಭಾಷಣ ಸ್ಪರ್ಧೆಯಲ್ಲಿ ಭಾಗವಹಿಸಿದ್ದರು. ಸಂಭ್ರಮ್ ಕಾಲೇಜಿನ ಪ್ರೊ.ಮಿಶ್ರಾ ಸಮಾರೋಪ ಭಾಷಣ ಮಾಡಿದರು.
