ಬಂಟ್ವಾಳ: ಅಂಗವಿಕಲ ತಾಯಿ-ಮಗಳ ಚಿಕಿತ್ಸಾ ನೆರವಿಗೆ ಮನವಿ

ಬಂಟ್ವಾಳ, ಅ. 9: ಇನ್ನು ಮುಂದೆ ತನ್ನಿಂದ ದುಡಿಯಲು ಸಾಧ್ಯವಾಗುತ್ತಿಲ್ಲ. ದಿನಂದಿಂದ ದಿನಕ್ಕೆ ತಾಯಿಯ ಆರೋಗ್ಯಯೂ ಕ್ಷೀಣಿಸುತ್ತಿದೆ. ತಮ್ಮ ಕಷ್ಟವನ್ನು ಕೇಳುವವರಾರೂ ಇಲ್ಲ. ತಮಗಿಬ್ಬರಿಗೆ ಈ ಜೀವನವೇ ಸಾಕಾಗಿದೆ...

ಬಂಟ್ವಾಳ ತಾಲೂಕಿನ ಪುರಸಭಾ ವ್ಯಾಪ್ತಿಯ ಪಾಣೆಮಂಗಳೂರಿನ ಬಾಡಿಗೆ ಮನೆಯೊಂದರಲ್ಲಿ ಕಷ್ಟದ ದಿನದೂಡುತ್ತಿರುವ ಅಂಗವಿಕಲ ಮಹಿಳೆಯೊಬ್ಬರು ತಮ್ಮ ಅಳಲನ್ನು ತೋಡಿಕೊಂಡಿದ್ದು ಹೀಗೆ.

ಸುಮಾರು 35 ವರ್ಷಗಳಿಂದ ಪಾಣೆಮಂಗಳೂರಿನ ಬಾಡಿಗೆ ಮನೆಯೊಂದರಲ್ಲಿ ಕಮಲಾಕ್ಷಿ ಹಾಗೂ 80ರ ಹರೆಯ ತಾಯಿ ಜಯಲಕ್ಷಿ ಅವರೊಂದಿಗೆ ವಾಸವಾಗಿದ್ದು, ತಿಂಗಳಿಗೆ 1,500 ಸಾವಿರ ಬಾಡಿಗೆ.

ಕಮಲಾಕ್ಷಿ ಅವರು ಹುಟ್ಟಿನಿಂದಲೇ ತನ್ನ ಕಾಲಿನ ನ್ಯೂನತೆಯಿಂದ ಅಂಗವಿಕಲರಾಗಿದ್ದರೆ, ತಾಯಿಗೆ ಒಂದು ಕಣ್ಣು ಕಾಣಿಸುವುದಿಲ್ಲ. ತಮ್ಮ ಹೊಟ್ಟೆಪಾಡಿಗಾಗಿ ಕಮಲಾಕ್ಷಿ ಅವರು ಇದುವರೆಗೂ ಹತ್ತಿರ ಹೊಟೇಲ್‍ವೊಂದರಲ್ಲಿ ಕೂಲಿ ಕೆಲಸ ಮಾಡಿಕೊಂಡು ತನ್ನ ತಾಯಿಯ ಚಿಕಿತ್ಸಾ ವೆಚ್ಚ ಹಾಗೂ ಮನೆಬಾಡಿಗೆ ವೆಚ್ಚವನ್ನು ಭರಿಸುತ್ತಿದ್ದರು. ಇದೀಗ ಕಮಲಾಕ್ಷಿ ಅವರ ಕಾಲಿನ ಬಲ ಮತ್ತಷ್ಟು ಹೀನಕೊಂಡಿದ್ದು, ನಡೆದಾಡದಂತಹ ಸ್ಥಿತಿ ಉಂಟಾಗಿದೆ.

ತಾಯಿಗೆ ವಯಸ್ಸಾಗಿದ್ದು, ಇತ್ತೀಚಿನ ದಿನಗಳಲ್ಲಿ ಅವರಿಗೆ ಸರಿಯಾಗಿ ಕಿವಿ ಕೇಳಿಸುದಿಲ್ಲ. ಅಲ್ಲದೆ, ಅವರು ಅನಾರೋಗ್ಯದಿಂದ ಮಾತನಾಡುವುದನ್ನು ಕೂಡಾ ಕಡಿಮೆ ಮಾಡಿ, ಕೈ ಸನ್ನೆ ಮೂಲಕ ತಿಳಿಸುತ್ತಾರೆ ಎಂದು ಕಮಲಾಕ್ಷಿ ಅವರು ಸ್ಥಿತಿಗತಿಯ ಬಗ್ಗೆ ಮಾಹಿತಿ ನೀಡಿದ್ದಾರೆ.

ಈ ಮೊದಲು ಮಂಗಳೂರಿನ ಆಸ್ಪತ್ರೆಯಲ್ಲಿ ತನ್ನ ಕಾಲಿನ ಶಸ್ತ್ರಚಿಕಿತ್ಸೆ ಮಾಡಲಾಗಿದ್ದು, ಈ ಚಿಕಿತ್ಸಾ ವೆಚ್ಚವನ್ನು ಶಾಸಕ ರಾಜೇಶ್ ನಾಯ್ಕ್ ಅವರು ಭರಿಸಿರುತ್ತಾರೆ. ಇದೀಗ ಮತ್ತೆ ಇನ್ನೊಂದು ಶಸ್ತ್ರ ಚಿಕಿತ್ಸೆಯ ಅಗತ್ಯವಿದೆ ಎಂದು ವೈದ್ಯರು ತಿಳಿಸಿದ್ದು, ಭಯವಾಗುತ್ತಿದೆ. ಇದೆಲ್ಲಾ ನೋಡುವಾಗ ಜೀವನವೇ ಬೇಡವೆನಿಸುತ್ತಿದೆ ಎಂದು ಅಳಲನ್ನು ತೋಡಿಕೊಂಡರು.

ಮನೆ-ನಿವೇಶನ ಕೇಳಿ ಸಂಬಂಧಪಟ್ಟ ಜನಪ್ರತಿನಿಧಿಗಳಲ್ಲಿ ವಿನಂತಿಸಿಕೊಂಡರೂ ಯಾವುದೇ ಪ್ರಯೋಜನವಾಗಿಲ್ಲ. ಇದರಿಂದ ನಿಮ್ಮ ಮುಂದೆ ಈ ವಿಷಯವನ್ನು ತಿಳಿಸುತ್ತಿದ್ದೇನೆ ಎಂದು ತಮ್ಮನ್ನು ಭೇಟಿಯಾದ ಮಾಧ್ಯಮದ ಮುಂದೆ ವಿನಂತಿಸಿಕೊಂಡರು.

ಈ ತಾಯಿ ಮಗಳ ಜೀವನೋಪಾಯಕ್ಕಾಗಿ ಸರಕಾರ, ಜನಪ್ರತಿನಿಧಿಗಳು, ಪುರಸಭೆ ಅಥವಾ ಸಂಘ ಸಂಸ್ಥೆಗಳು ಸ್ಪಂದಿಸುವ ಮೂಲಕ ಅಂಗವಿಕಲ ಜೀವಕ್ಕೆ ಬೆಳಕಾಗಬೇಕಿದೆ. 

ಖಾತೆಯ ವಿವರ

ಈ ಎರಡು ಬಡ ಜೀವಗಳಿಗೆ ಸಹಾಯಧನ ನೀಡಲು ಬಯಸುವವರು. ಕಮಲಾಕ್ಷಿ, ಖಾತೆ ನಂ: 01352200125402. ಸಿಂಡಿಕೇಟ್ ಬ್ಯಾಂಕ್. ಪಾಣೆಮಂಗಳೂರು ಶಾಖೆ. (ಐಎಫ್‍ಎಸ್‍ಸಿ ಕೋಡ್: ಎಸ್‍ವೈಎನ್‍ಬಿ0000135). ಮೊಬೈಲ್: 9900927312.