ಪ್ರಸಿದ್ಧ ಗಾಯಕ ರಘು ದೀಕ್ಷಿತ್ ವಿರುದ್ಧ ಇಬ್ಬರು ಗಾಯಕಿಯರಿಂದ ಲೈಂಗಿಕ ಕಿರುಕುಳ ಆರೋಪ

ಚೆನ್ನೈ, ಅ.10: ಭಾರತದಲ್ಲೀಗ ಮೀಟೂ ಆಂದೋಲನ ಭಾರೀ ಸುದ್ದಿಯಾಗುತ್ತಿದ್ದು, ಇದೀಗ ಪ್ರಸಿದ್ಧ ಗಾಯಕ ರಘು ದೀಕ್ಷಿತ್ ವಿರುದ್ಧ ಇಬ್ಬರು ಗಾಯಕಿಯರು ಲೈಂಗಿಕ ಕಿರುಕುಳದ ಆರೋಪ ಹೊರಿಸಿದ್ದಾರೆ.

ರಘು ದೀಕ್ಷಿತ್ ತಮಗೆ ಲೈಂಗಿಕ ಕಿರುಕುಳ ನೀಡಿದ್ದಾರೆ ಎಂದು ಇಬ್ಬರು ವಿವರಿಸಿರುವುದನ್ನು ಗಾಯಕಿ ಚಿನ್ಮಯಿ ಶ್ರೀಪಾದ ಟ್ವೀಟ್ ಮಾಡಿದ್ದಾರೆ. “ಹಲವು ವರ್ಷಗಳ ಹಿಂದೆ ಅವರು ನನ್ನನ್ನು ರೆಕಾರ್ಡಿಂಗ್ ಗೆ ಸ್ಟುಡಿಯೋಗೆ ಕರೆದಿದ್ದರು. ನಂತರ ಅವರು ತಮ್ಮ ಪತ್ನಿಯ ಬಗ್ಗೆ ಕೆಟ್ಟ ಮಾತುಗಳನ್ನು ಆರಂಭಿಸಿದರು (ಮದುವೆಯಾದ ಎಲ್ಲಾ ಪುರುಷರು ಮಾಡುವ ಹಾಗೆ). ಅವರ ಪತ್ನಿ ಅತ್ಯುತ್ತಮ ವ್ಯಕ್ತಿ”

“ರೆಕಾರ್ಡಿಂಗ್ ಮಾಡುತ್ತಿದ್ದಾಗ ಅವರು ನನ್ನನ್ನು ಬರಸೆಳೆದು ಚುಂಬಿಸುವಂತೆ ಕೇಳಿದರು. ನಂತರ ನನ್ನ ಚೆಕ್ ಗೆ ಅವರು ಸಹಿ ಹಾಕುವಾಗ … ನಂತರ ಬಾಗಿಲ ಬಳಿ ನನ್ನನ್ನು ಎತ್ತಲು ನೋಡಿದರು. ನಾನು ಅಳುತ್ತಾ ಓಡಿದೆ” ಎಂದು ಗಾಯಕಿಯೊಬ್ಬರು ಆರೋಪಿಸಿದ್ದಾರೆ ಎಂದು ಚಿನ್ಮಯಿ ಟ್ವೀಟ್ ಮಾಡಿದ್ದಾರೆ.

ಈ ಬಗ್ಗೆ ಪ್ರತಿಕ್ರಿಯಿಸಿರುವ ರಘು ದೀಕ್ಷಿತ್, “ಇತರರಿಗೆ ಬೆಂಬಲಿಸುವ ಚಿನ್ಮಯಿಯವರನ್ನು ಯಾರೂ ನಿಂದಿಸಬಾರದು ಎಂದಿದ್ದಾರೆ. “ಚಿನ್ಮಯಿ ಪೋಸ್ಟ್ ಮಾಡಿರುವ ಘಟನೆ ಬಗ್ಗೆ ನನಗೆ ನೆನಪಿದೆ. ನಾನು ಈ ಬಗ್ಗೆ ಆ ವ್ಯಕ್ತಿಯೊಂದಿಗೆ ಈ ಹಿಂದೆಯೂ, ಸಾರ್ವಜನಿಕವಾಗಿಯೂ ಕ್ಷಮೆ ಕೇಳಿದ್ದೇನೆ. ಬೇಕಿದ್ದರೆ ಮತ್ತೊಮ್ಮೆ ಖಾಸಗಿಯಾಗಿಯೂ ಕ್ಷಮೆ ಕೇಳುತ್ತೇನೆ”

“ಈ ಘಟನೆ ನಡೆದಿದೆ, ಆದರೆ ವಿವರಿಸಿದಂತೆ ಅಲ್ಲ. ನನ್ನ ಭಾಗದಿಂದ ಇದು ಸಂಪೂರ್ಣ ತಪ್ಪು ನಿರ್ಣಯ. ನಾನು ಆಕೆಯನ್ನು ಅಪ್ಪಿಕೊಂಡೆ. ನಂತರ ಚುಂಬಿಸಲು ಯತ್ನಿಸಿದೆ. ನಂತರ ಅವರು ನನಗೆ ಸಂದೇಶ ಕಳುಹಿಸಿ ನನ್ನ ನಡೆಯನ್ನು ಇಷ್ಟಪಟ್ಟಿಲ್ಲ ಎಂದರು. ನಾನು ಕ್ಷಮೆ ಕೋರಿದೆ” ಎಂದು ದೀಕ್ಷಿತ್ ವಿವರಿಸಿದ್ದಾರೆ.

ರಘು ದೀಕ್ಷಿತ್ ಈ ಟ್ವೀಟ್ ಮಾಡಿದ ಕೆಲ ಕ್ಷಣಗಳಲ್ಲೇ ಚಿನ್ಮಯಿ ಮತ್ತೊಂದು ಹೇಳಿಕೆಯನ್ನು ಪೋಸ್ಟ್ ಮಾಡಿದ್ದಾರೆ. “ಹೊಸ ಚಿತ್ರಕ್ಕಾಗಿ ತನ್ನ ಟ್ಯೂನ್ ಗಳನ್ನು ಆಲಿಸುವಂತೆ ಮತ್ತು ಅಭಿಪ್ರಾಯ ತಿಳಿಸುವಂತೆ ಅವರು ನನ್ನನ್ನು ಮನೆಗೆ ಕರೆದಿದ್ದರು. ಅವರು ನಂತರ ಟ್ಯೂನ್ ಪ್ಲೇ ಮಾಡುತ್ತಾ ‘ನನ್ನ ತೊಡೆಯಲ್ಲಿ ಕುಳಿತುಕೊಳ್ಳಿ, ಆಗ ಹತ್ತಿರದಿಂದ ಕೇಳಲು ಸಾಧ್ಯವಾಗುತ್ತದೆ’ ಎಂದರು. ಕೊನೆಗೆ ಏನೂ ನಡೆಯುವುದಿಲ್ಲ ಎನ್ನುವುದು ಅವರಿಗೆ ತಿಳಿಯಿತು” ಎಂದು ಗಾಯಕಿಯೊಬ್ಬರು ಆರೋಪಿಸಿರುವುದಾಗಿ ಚಿನ್ಮಯಿ ಟ್ವೀಟ್ ಮಾಡಿದ್ದಾರೆ.