ಕಡಬ: ದೂರವಾಣಿ ಮೂಲಕ ಎಟಿಎಂ ನಂಬರ್ ಪಡೆದು ಸಾವಿರಾರು ರೂ. ವಂಚನೆ

ಕಡಬ, ನ.2: ''ನಿಮ್ಮ ಎಟಿಎಂ ಕಾರ್ಡ್ ನಿಷ್ಕ್ರಿಯಗೊಂಡಿದೆ. ಎಟಿಎಂ ಕಾರ್ಡ್ ನಂಬರ್ ನೀಡಿದರೆ  ಹೊಸ ಕಾರ್ಡ್ ಕಳುಹಿಸಿಕೊಡುತ್ತೇವೆ'' ಎಂದು ನಂಬಿಸಿ  ಕಡಬದ ವ್ಯಕ್ತಿಯೋರ್ವರ ಬ್ಯಾಂಕ್ ಖಾತೆಯಿಂದ ಸಾವಿರಾರು ರೂ. ದೋಚಿರುವ ಘಟನೆ ತಡವಾಗಿ ಬೆಳಕಿಗೆ ಬಂದಿದೆ.

ಕಡಬದ ಸ್ಟೇಟ್ ಬ್ಯಾಂಕ್ ಆಫ್ ಇಂಡಿಯಾದಲ್ಲಿ ಖಾತೆ ಹಿಂದಿರುವ ಪಿಜಕ್ಕಳ ನಿವಾಸಿ ರವೀಂದ್ರ (ಹೆಸರು ಬದಲಾಯಿಸಲಾಗಿದೆ) ಎಂಬವರ ಮೊಬೈಲಿಗೆ ಅ.29ರಂದು ಕರೆಯೊಂದು ಬಂದಿದೆ. ಕರೆ ಮಾಡಿದ ವ್ಯಕ್ತಿ ಹಿಂದಿಯಲ್ಲಿ ಮಾತು ಆರಂಭಿಸಿದ್ದು, ನಿಮ್ಮ ಎಟಿಎಂ ಕಾರ್ಡ್ ನ ಅವಧಿ ಮುಗಿದಿದೆ. ಆ ಕಾರ್ಡ್ ನ  ಸಂಖ್ಯೆಯನ್ನು ತಿಳಿಸಿದರೆ ಪೋಸ್ಟ್ ಮುಖಾಂತರ ನಿಮ್ಮ ವಿಳಾಸಕ್ಕೆ ಹೊಸ ಕಾರ್ಡ್ ಕಳುಹಿಸಿಕೊಡುತ್ತೇವೆ ಎಂದು ತಿಳಿಸಿದ್ದಾನೆ. ಕಾರ್ಡ್ ಸಂಖ್ಯೆ ನೀಡಲು ರವೀಂದ್ರರು ಹಿಂಜರಿದಾಗ ತಕ್ಷಣವೇ ಸಂಖ್ಯೆಯನ್ನು ನೀಡದಿದ್ದಲ್ಲಿ ಕಳ್ಳರು ಬ್ಯಾಂಕ್ ಖಾತೆಗೆ ಕನ್ನ ಹಾಕುವ ಸಾಧ್ಯತೆ ಇದೆ ಎಂದು ಹೆದರಿಸಿದ್ದಾನೆ. ಈ ರೀತಿ ವಂಚನೆಗೊಳಗಾದ ರವೀಂದ್ರರು ಆ ವ್ಯಕ್ತಿಗೆ ಕಾರ್ಡ್ ಸಂಖ್ಯೆಯನ್ನು ಕೊಟ್ಟಿದ್ದಲ್ಲದೆ, ಒಟಿಪಿ ಸಂಖ್ಯೆಯನ್ನೂ ನೀಡಿದ್ದಾರೆ. ಇದಾದ ಕೆಲವೇ ನಿಮಿಷಗಳಲ್ಲಿ ರವೀಂದ್ರ ಅವರ ಬ್ಯಾಂಕ್ ಖಾತೆಯಿಂದ 19,999 ರೂ.ನಂತೆ ಎರಡು ಸಲ ಹಾಗೂ ಐದು ನಿಮಿಷ ಕಳೆದ ಬಳಿಕ 9,999 ರೂ.ನ್ನು ತೆಗೆಯಲಾಗಿದೆ.

ತಕ್ಷಣವೇ ಎಚ್ಚೆತ್ತ ರವೀಂದ್ರ ಬ್ಯಾಂಕ್ ಗೆ ತೆರಳಿ ತನ್ನ ಖಾತೆಯಲ್ಲಿನ ವ್ಯವಹಾರವನ್ನು ಸ್ಥಗಿತಗೊಳಿಸಿದ್ದರಿಂದ ಖಾತೆಯಲ್ಲಿದ್ದ ಲಕ್ಷಕ್ಕೂ ಮಿಕ್ಕಿದ ಹಣ ಬಾಕಿಯುಳಿದಿದೆ.

ಇದೀಗ ವಂಚನೆಗೊಳಗಾದ ರವೀಂದ್ರ ಅವರು  ಪೊಲೀಸ್ ದೂರು ನೀಡಲು ಸಿದ್ಧತೆ ನಡೆಸಿದ್ದಾರೆ.